អគារទីស្នាក់ការកណ្ដាលនៃអគ្គនាយកដ្ឋានពន្ធដារ។ ហុង មិនា
ភ្នំពេញៈ អគ្គនាយកដ្ឋានពន្ធដារ (GDT) ជំរុញ និងលើកទឹកចិត្តអ្នកជាប់ពន្ធចូលរួមអនុវត្តឱ្យបានត្រឹមត្រូវ និងប្រកាសពន្ធទាន់ពេលវេលា ដើម្បីចៀសវាងភាពរអាក់រអួលនៅថ្ងៃប្រកាសពន្ធចុងក្រោយ ខណៈដែលអគ្គនាយកដ្ឋានពន្ធដារបានធ្វើការកែសម្រួល និងអភិវឌ្ឍប្រព័ន្ធបច្ចេកវិទ្យាព័ត៌មានជាបន្តបន្ទាប់ ដើម្បីបង្កភាពងាយស្រួលដល់អ្នកជាប់កាតព្វកិច្ចបង់ពន្ធ។
ក្នុងសេចក្តីប្រកាសព័ត៌មានស្តីអំពីសិក្ខាសាលាផ្សព្វផ្សាយ «សិទ្ធិ និងកាតព្វកិច្ចរបស់អ្នកជាប់ពន្ធ និងប្រព័ន្ធគ្រប់គ្រងការប្រកាសពន្ធអាជីវកម្មតាមអនឡាញ (e-Filing)» ដែលរៀបចំដោយអគ្គនាយកដ្ឋានពន្ធដារ កាលពីថ្ងៃទី ៣ ខែសីហា លោក ហេង សុខណាង អគ្គនាយករងនៃអគ្គនាយកដ្ឋានពន្ធដារ បានឱ្យដឹងថា សិក្ខាសាលាខាងលើនេះ មានគោលបំណងបញ្ជ្រាបការយល់ដឹងពីការអនុវត្តច្បាប់ និងលិខិតបទដ្ឋានគតិយុត្តិពាក់ព័ន្ធនឹងពន្ធដារសំដៅពង្រឹងអនុលោមភាពសារពើពន្ធ និងលើកកម្ពស់វប្បធម៌បង់ពន្ធនៅកម្ពុជា។
លោកបន្ថែមថា ការបង់ពន្ធគឺជាកាតព្វកិច្ច ហើយការដាក់លិខិតប្រកាសពន្ធ គឺជារឿងសំខាន់មួយរបស់សហគ្រាសដែលត្រូវអនុវត្តឱ្យបានត្រឹមត្រូវ ដោយគោរពតាមច្បាប់ និងលិខិតបទដ្ឋានគតិយុត្តស្តីពីពន្ធដារដែលបានកំណត់។ ជាមួយគ្នានេះក៏សូមស្នើដល់អ្នកជាប់ពន្ធត្រូវធ្វើការប្រកាសពន្ធឱ្យទាន់ពេល និងចៀសវាងប្រកាសពន្ធនៅថ្ងៃចុងក្រោយ ដែលអាចធ្វើឱ្យប្រព័ន្ធមានភាពរអាក់រអួល។
លោកលើកឡើងថា៖ «ខ្ញុំសូមស្នើដល់អ្នកជាប់ពន្ធទាំងអស់ចូលរួមបង់ពន្ធទាំងអស់គ្នាដើម្បីការអភិវឌ្ឍរបស់ប្រទេសជាតិ។ ប្រជាពលរដ្ឋនៅលើពិភពលោកមិនអាចគេចវេះពីការបង់ពន្ធបានទេ រួមទាំងខ្លួនខ្ញុំផ្ទាល់ដែលត្រូវចូលរួមចំណែកក្នុងការបង់ពន្ធជូនរដ្ឋ»។
បន្ថែមពីលើនេះទៀត លោក សុខណាង ក៏បានលើកទឹកចិត្តឱ្យអ្នកជាប់កាតព្វកិច្ចពន្ធទាំងអស់គួរតែមកចុះឈ្មោះសិក្សាជំនាញវិជ្ជាជីវៈពន្ធដារនៅសាលាជាតិពន្ធដាដើម្បីទទួលបានជំនាញវិជ្ជាជីវៈត្រឹមត្រូវ ពិសេសចូលរួមអនុវត្តច្បាប់ និងលិខិតបទដ្ឋានគតិយុត្តស្ដីពីពន្ធដារ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្ដិ៍នៅថ្ងៃទី ៦ ខែសីហាថា ការធ្វើបច្ចុប្បន្នភាពប្រព័ន្ធច្បាប់ពន្ធដារ ការដាក់ បញ្ចូលប្រព័ន្ធបច្ចេកវិទ្យាបង់ពន្ធតាមអនឡាញ និងការលើកទឹកចិត្តចំពោះអ្នកជាប់កាតព្វកិច្ចបង់ពន្ធ បានធ្វើឱ្យប្រជាពលរដ្ឋខ្មែរកាន់តែច្រើនចូលរួមបំពេញកាតព្វកិច្ចបង់ពន្ធ ពិសេសក្នុងរយៈពេលប្រហែល ១ ទសវត្សរ៍ចុងក្រោយនេះ។ លោកបន្តថា ចំណូលពន្ធគឺមានសារៈសំខាន់ណាស់សម្រាប់រដ្ឋាភិបាលប្រទេសនីមួយៗយកទៅអភិវឌ្ឍប្រទេសខ្លួនតាមរយៈការកសាងច្បាប់ ធនធានមនុស្ស ប្រព័ន្ធហេដ្ឋារចនាសម្ព័ន្ធ និងប្រាក់បៀវត្សរ៍មន្ត្រីរាជការ ជាដើម។
លោកបញ្ជាក់ថា៖ «ការចូលរួមអនុវត្តកាតព្វកិច្ចបង់ពន្ធរបស់ប្រជាពលរដ្ឋ គឺជាការចូលរួមអភិវឌ្ឍប្រទេសឱ្យកាន់តែរីកចម្រើន និងសម្បូរសប្បាយ»។
អនុប្រធានសភាពាណិជ្ជកម្មកម្ពុជា លោក លឹម ហេង បាននិយាយថា នីតិវិធី និងចំនួនប្រាក់ដែលបានមកពីចំណូលពន្ធនៅកម្ពុជាកំពុងបោះជំហានទៅមុខយ៉ាងល្អ ខណៈពន្ធ គឺជាប្រភពចំណូលដ៏សំខាន់។ ដោយសារសេដ្ឋកិច្ចកម្ពុជាមានដំណើរការទៅមុខកាន់តែល្អ ដូច្នេះចំណូលពន្ធក្នុងស្រុក (ពន្ធដារ) នឹងមានចំនួនកាន់តែច្រើន។
លោកប្រាប់ថា៖ «ការចូលរួមអនុវត្តកាតព្វកិច្ចបង់ពន្ធនៅកម្ពុជាកំពុងស្ថិតនៅលើផ្លូវល្អមួយ ខណៈចំណូលពន្ធដែលរដ្ឋរកបានក៏កើនឡើងដែរ»។
អគ្គនាយកដ្ឋានពន្ធដារបានឱ្យដឹងថា ក្នុងឆមាសទី១ ឆ្នាំ ២០២៣ ការប្រមូលចំណូលពន្ធអាករគ្រប់ប្រភេទ សម្រេចបាន ២ ០៧២,៣៩ លានដុល្លារ ស្មើ ៥៨,០២ ភាគរយនៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣។
អគ្គនាយកអគ្គនាយកដ្ឋានពន្ធដារ លោក គង់ វិបុល បាននិយាយថា កំណែទម្រង់ និងទំនើបកម្មពន្ធដារចាប់តាំងពីឆ្នាំ ២០១២ រហូតមកបានធ្វើឱ្យប្រព័ន្ធពន្ធដារនៅកម្ពុជាកាន់តែមានភាពរឹងមាំ ហើយថ្នាក់ដឹកនាំ និងមន្ត្រីពន្ធដារក៏បានខិតខំស្រុះដៃគ្នាដើម្បីអនុវត្តការងារប្រកបដោយស្មារតីបុរេសកម្ម កាន់តែសកម្មថែមទៀតដើម្បីបន្តធានាបាននិរន្តរភាពចំណូលពន្ធ និងបន្តចូលរួមអនុវត្តការងារកំណែទម្រង់ និងទំនើបកម្មរដ្ឋបាលសារពើពន្ធ៕
