ទិដ្ឋភាពនៅពីមុខតំបន់សេដ្ឋកិច្ចពិសេសភ្នំពេញ។ ហុង មិនា
ភ្នំពេញៈ ក្រុមហ៊ុនតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ (PPSP) ដែលជាតំបន់សេដ្ឋកិច្ចពិសេសឈានមុខគេ និងបានចុះបញ្ជីភាគហ៊ុននៅផ្សារមូលបត្រកម្ពុជា (CSX) បានរាយការណ៍ពីកំណើនដ៏ខ្ពស់នៃប្រតិបត្តិការអាជីវកម្មរបស់ខ្លួនក្នុងត្រីមាសទី២ ឆ្នាំ ២០២៣ នេះ ទោះបីជាមានភាពមិនច្បាស់លាស់នៃសេដ្ឋកិច្ចក្នុងតំបន់ និងពិភពលោកក្តី។
លោក គិត ម៉េង ប្រធានក្រុមប្រឹក្សាភិបាល PPSP បានឱ្យដឹងនៅក្នុងឯកសារដែលផ្ញើទៅ CSX នាថ្ងៃទី ២២ ខែសីហាថា នៅក្នុងត្រីមាសទី២ ឆ្នាំ២០២៣ ក្រុមហ៊ុនបានរាយការណ៍ពីចំណូលសរុបចំនួន ២៩,៦៦៧ ពាន់លានរៀល កើន ៩៥ ភាគរយបើធៀបនឹងចំនួនទឹកប្រាក់ ១៥,២២៦ ពាន់លានរៀល នៅត្រីមាសទី២ ឆ្នាំ ២០២២។ ជាលទ្ធផលក្រុមហ៊ុនចំណេញសុទ្ធចំនួនជាង ២,៤៦១ ពាន់លានរៀលធៀបទៅនឹងការខាតសុទ្ធ ៥១៥,៦៨១ ពាន់ រៀលនៅត្រីមាសដូចគ្នាឆ្នាំ ២០២២។
លោកថ្លែងថា៖ «ស្ថានភាពហិរញ្ញវត្ថុរបស់ក្រុមហ៊ុននៅតែបន្តរឹងមាំ គិតត្រឹមថ្ងៃទី ៣០ ខែមិថុនា ឆ្នាំ ២០២៣ ដោយមានទ្រព្យសកម្មជាង ៥២៧,៤៥៦ ពាន់លានរៀល ដែលរួមមានទ្រព្យសកម្មរយៈពេលវែងចំនួន ២១០,១៣៩ ពាន់លានរៀល និងទ្រព្យសកម្មរយៈពេលខ្លីជាង ៣១៧ ពាន់លានរៀល»។
លោកបន្តថា មូលធនសរុបមានចំនួន ជាង ២៨១ ពាន់លានរៀល ធ្លាក់ចុះ ១០,៥៣ ភាគរយធៀបនឹងចំនួនជិត ២៥៥ ពាន់លានរៀលឆ្នាំ ២០២២។ ជាលទ្ធផល អនុបាតបំណុលមូលធន គឺ ០,៨៧ នៅឆ្នាំ ២០២៣ ដែលធៀបនឹងចំនួនអនុបាតបំណុល មូលធន ០,៨៥ ឆ្នាំ ២០២២។
លោក Uematsu Hiroshi អភិបាលប្រតិបត្តិ PPSP បានឱ្យដឹងក្នុងឯកសារខាងលើថា គិតត្រឹមថ្ងៃទី ៣០ ខែមិថុនា ឆ្នាំ ២០២៣ PPSP គឺក្រុមហ៊ុនតំបន់សេដ្ឋកិច្ចពិសេសមួយក្នុងចំណោមក្រុមហ៊ុនតំបន់សេដ្ឋកិច្ចពិសេសទាំង ១៧ ដែលកំពុងដំណើរការ (ពីចំនួនក្រុមហ៊ុនតំបន់សេដ្ឋកិច្ចពិសេសសរុបចំនួន ៣៦ ដែលត្រូវបានអនុម័ត) នៅក្នុងប្រទេសកម្ពុជា។
លោកឱ្យដឹងថា៖ «គិតត្រឹមថ្ងៃទី ៣០ ខែមិថុនា ឆ្នាំ ២០២៣ តំបន់សេដ្ឋកិច្ចពិសេស រ៉ូយ៉ាល់គ្រុបភ្នំពេញ គឺជាក្រុមហ៊ុនឈានមុខគេ បើគិតចំនួនវិនិយោគិនតំបន់សេដ្ឋកិច្ចពិសេស ចំនួនទឹកប្រាក់វិនិយោគសរុប និងចំនួនកម្មករក្នុងចំណោមតំបន់សេដ្ឋកិច្ចពិសេសទាំងអស់ដែលត្រូវបានអនុម័តនៅក្នុងប្រទេសកម្ពុជា និងជាតំបន់សេដ្ឋកិច្ចពិសេសឈានមុខគេមួយក្នុងប្រទេសកម្ពុជា បើគិតពីទំហំដី ដែលមានប្រមាណ ៣៥៧,៣២ ហិកតា»។
លោកបន្តថា ឆ្នាំនេះក្រុមហ៊ុនបានបង្កើតក្រុមហ៊ុនបុត្រសម្ព័ន្ធថ្មីចំនួន ៣ គឺ Royal Group Phnom Penh Special Economic Zone II Co.,Ltd សម្រាប់ការអភិវឌ្ឍតំបន់សេដ្ឋកិច្ចពិសេសថ្មី ក្រុមហ៊ុន Sahas Properties Co.,Ltd ជាក្រុមហ៊ុនអភិវឌ្ឍន៍អចលនទ្រព្យឈានមុខគេ និង Gomi Recycle (Phnom Penh) Co., Ltd ដែលក្រុមហ៊ុនបានចាប់ដៃគូជាមួយក្រុមហ៊ុនជប៉ុនសម្រាប់អាជីវកម្មគ្រប់គ្រងសំណល់រឹង។
គិតត្រឹមថ្ងៃទី ៣០ ខែមិថុនា ឆ្នាំ ២០២៣ ក្រុមហ៊ុនទទួលបានវិនិយោគិន/ក្រុមហ៊ុនជួលតំបន់សេដ្ឋកិច្ចពិសេសសរុប ១០៤ នៅក្នុង PPSP ពីប្រទេសនានាដូចជា ជប៉ុន សិង្ហបុរី ម៉ាឡេស៊ី តៃវ៉ាន់ កូរ៉េ ហ្វីលីពីន វៀតណាម ចិន តួកគី កម្ពុជា និងថៃ។
លោក Uematsu Hiroshi បានបញ្ជាក់ថា៖ «យើងផ្តោតជាសំខាន់ទៅលើវិនិយោគិនតំបន់សេដ្ឋកិច្ចពិសេសដែលពាក់ព័ន្ធនឹងឧស្សាហកម្មធុនស្រាលដល់មធ្យម និងឧស្សាហកម្មដែលប្រើប្រាស់កម្លាំងពលកម្មច្រើន ហើយរហូតមកដល់ពេលនេះ បានទាក់ទាញវិនិយោគិនមកពីផលិតផលគ្រឿងម៉ាស៊ីន និងអគ្គិសនី ដែលមានបំណងទាំងការនាំចេញ និងទីផ្សារនៅក្នុងស្រុក»៕
