លោក ជា វុទ្ធី ក្នុងជំនួបជាមួយលោក Koichi Zaiki កាលពីថ្ងៃទី ១៣ ខែកញ្ញា ឆ្នាំ ២០២៣។ រូបថត CDC
ភ្នំពេញៈ ជប៉ុនបានស្នើកម្ពុជាឱ្យជួយគាំទ្រ និងសហការនៅក្នុងការរៀបចំសិក្ខាសាលាដែលគ្រោងធ្វើនៅទីក្រុងតូក្យូ ចុងឆ្នាំ ២០២៣ នេះដើម្បីផ្សព្វផ្សាយពីកាលានុវត្តភាពការបណ្តាក់ទុននៅកម្ពុជាដល់វិនិយោគិនរបស់ខ្លួន ខណៈទំហំពាណិជ្ជកម្មទ្វេភាគីនៃប្រទេសទាំង ២ ក្នុងរយៈពេល ៨ ខែដើមឆ្នាំ ២០២៣ សម្រេចបានប្រមាណជាង ១,២ ពាន់លានដុល្លារ។
សំណើនេះត្រូវបានលោក Koichi Zaiki នាយកប្រតិបត្តិប្រចាំនៅតំបន់អាស៊ីប៉ាស៊ីហ្វិកនៃធនាគារមីហ្ស៊ូហូ (Mizuho Bank) លើកឡើងក្នុងជំនួបជាមួយលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី ១៣ ខែកញ្ញា ឆ្នាំ ២០២៣។
លោក Koichi Zaiki បានលើកឡើងថា កន្លងមកធនាគាររបស់លោកធ្លាប់បានសហការជាមួយផ្នែកពាក់ព័ន្ធនៅប្រទេសជប៉ុនដើម្បីធ្វើការផ្សព្វផ្សាយពីសក្តានុពលវិនិយោគនៅក្នុងប្រទេសកម្ពុជាដល់វិនិយោគិនជប៉ុន។ ទោះបីយ៉ាងណា ការលេចឡើងវត្តមាននៃកូវីដ ១៩ បានបង្កឱ្យមានផលវិបាកជាច្រើនដល់កិច្ចការនេះ។ លោកបន្តថា ក្នុងន័យជួយផ្សព្វផ្សាយពីផលិតផលកម្ពុជា និងទាក់ទាញវិនិយោគិនជប៉ុនឱ្យមកបណ្តាក់ទុនវិនិយោគនៅប្រទេសកម្ពុជាកាន់តែច្រើនក្រុមការងាររបស់លោកនឹងរៀបចំសិក្ខាសាលាមួយនៅក្នុងទីក្រុងតូក្យូ ប្រទេសជប៉ុន នៅក្នុងខែធ្នូ ខាងមុខ។
លោកថ្លែងថា៖ «នៅពាក់កណ្តាលខែធ្នូ ឆ្នាំ ២០២៣ ខាងមុខនេះធនាគារ Mizuho និងអង្គការពាណិជ្ជកម្មក្នុងស្រុកជប៉ុនចេត្រូ (JETRO) គ្រោងនឹងរៀបចំសិក្ខាសាលាស្តីពីកាលានុវត្តភាពវិនិយោគនៃព្រះរាជាណាចក្រកម្ពុជា នៅទីក្រុងតូក្យូ ប្រទេសជប៉ុន ដោយនឹងមានការចូលរួមពីសមាគមធុរកិច្ចជប៉ុន និងក្រុមហ៊ុនល្បីៗក្នុងប្រទេសជប៉ុនជាច្រើន»។
លោកបន្ថែមថា៖ «ដើម្បីឱ្យសិក្ខាសាលានេះប្រព្រឹត្តទៅដោយជោគជ័យ និងប្រកបដោយផ្លែផ្កា យើងស្នើសុំឱ្យមានការគាំទ្រ និងកិច្ចសហការពីក្រុមប្រឹក្សាអភិវឌ្ឍន៍កម្ពុជា ជាពិសេសពីសំណាក់ឯកឧត្តមអគ្គលេខាធិការលើគម្រោងនេះ»។
ជាការឆ្លើយតបលោក ជា វុទ្ធី បានឱ្យដឹងថា កាលពីឆ្នាំ ២០១៧ ស្ថាប័នទាំង ២ (CDC និងធនាគារ Mizuho) ធ្លាប់បានចុះអនុស្សរណៈយោគយល់គ្នា (MoU) លើកិច្ចសហប្រតិបត្តិការរួចហើយ។ តាមរយៈ MoU នេះលោកសង្ឃឹមថា ស្ថាប័នទាំង ២ នឹងនៅបន្តកិច្ចសហប្រតិបត្តិការល្អក្នុងការទាក់ទាញវិនិយោគិនជប៉ុនទាំងនៅក្នុងប្រទេសជប៉ុន និងទាំងក្រុមហ៊ុនជប៉ុនដែលមានប្រតិបត្តិការនៅប្រទេសដទៃទៀតឱ្យមកវិនិយោគក្នុងព្រះរាជាណាចក្រកម្ពុជាកាន់តែច្រើន។
លោកថ្លែងថា៖ «ខ្ញុំសូមសម្តែងការគាំទ្រ និងសហការក្នុងការរៀបចំសិក្ខាសាលាវិនិយោគនេះដើម្បីឱ្យសិក្ខាសាលាដែលគ្រោងនឹងរៀបចំនេះកាន់តែទទួលជោគជ័យថែមទៀត»។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ ភ្នំពេញ ប៉ុស្តិ៍ នៅថ្ងៃទី ១៤ ខែកញ្ញាថា ទំនាក់ទំនងរវាងរដ្ឋាភិបាល និងផ្នែកឯកជននៃប្រទេសទាំង ២ គឺមានភាពល្អប្រសើរជាមួយនឹងគ្នាយូរមកហើយ។ ក្រៅពីជួយគាំទ្រកម្ពុជាផ្នែកនយោបាយ និងជំនួយផ្សេងៗ ជប៉ុនក៏ជាប្រទេសដែលមានទំនាក់ទំនងល្អផ្នែកពាណិជ្ជកម្មជាមួយនឹងកម្ពុជាដែរ ដោយមានវិនិយោគិនជប៉ុនជាច្រើនកំពុងបណ្តាក់ទុននៅកម្ពុជា។
លោកបន្ថែមថា ការវិនិយោគរបស់ជប៉ុនត្រូវបានគេដឹងថាមានភាពច្បាស់លាស់ និងយូរអង្វែង ដូច្នេះបើកម្ពុជាអាចទាក់ទាញវិនិយោគិនជប៉ុនឱ្យមកបណ្តាក់ទុនកាន់តែច្រើន វាមិនត្រឹមតែជួយលើកកម្ពស់សមត្ថភាពនាំចេញទំនិញទៅទីផ្សារអន្តរជាតិប៉ុណ្ណោះទេ ប៉ុន្តែក៏ជួយធ្វើឱ្យមូលដ្ឋានគ្រឹះកំណើនសេដ្ឋកិច្ចកាន់តែរឹងមាំផងដែរ។
លោកបញ្ជាក់ថា៖ «គ្រប់ប្រទេសគឺសុទ្ធតែចង់បានការវិនិយោគពីក្រៅប្រទេស ពិសេសការវិនិយោគរបស់ជប៉ុនដែលភាគច្រើនជាការវិនិយោគលើឧស្សាហកម្មធុនមធ្យម និងធ្ងន់ និងប្រើប្រាស់បច្ចេកវិទ្យាទំនើបៗ និងមានភាពរឹងមាំយូរអង្វែរ»។
បច្ចុប្បន្នផលិតផលសំខាន់ៗដែលកម្ពុជានាំទៅជប៉ុន មានដូចជា សម្លៀកបំពាក់ ស្បែកជើង គ្រឿងបង្គុំ និងកសិផល ចំណែកជប៉ុននាំចូលមកកម្ពុជាវិញមាន គ្រឿងម៉ាស៊ីន រថយន្ត គ្រឿងអេឡិចត្រូនិក និងគ្រឿងចក្រសម្រាប់វិស័យកសិកម្មជាដើម។
ធនាគារជាតិនៃកម្ពុជា (NBC) ឱ្យដឹងថា គិតត្រឹមត្រីមាសទី១ ឆ្នាំ ២០២៣ ជប៉ុន គឺជាប្រទេសដែលបានវិនិយោគផ្ទាល់នៅប្រទេសកម្ពុជាច្រើនជាងគេទី៤ ដោយមានទឹកប្រាក់សរុប ១១,៣ ទ្រីលានរៀល (កើន ១១,៦ ភាគរយធៀបរយៈពេលដូចគ្នាឆ្នាំ ២០២២) គឺបន្ទាប់ពីប្រទេសចិន កូរ៉េ និងសិង្ហបុរី។ វិនិយោគិនជប៉ុនភាគច្រើនវិនិយោគក្នុងវិស័យហិរញ្ញវត្ថុ សំណង់ សណ្ឋាគារ និងអចលនទ្រព្យ ជាដើម។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជា ឱ្យដឹងថា ជប៉ុន គឺជាដៃគូពាណិជ្ជកម្មធំជាងគេទី៥ របស់កម្ពុជា បន្ទាប់ពីចិន អាមេរិក វៀតណាម និងថៃ។ បើគិតពីខែមករា ដល់ខែសីហា ឆ្នាំ ២០២៣ ការផ្លាស់ប្តូរទំនិញកម្ពុជា-ជប៉ុន មានទឹកប្រាក់សរុប ១,២ ពាន់លានដុល្លារ ធ្លាក់ចុះ ៩,៨ ភាគរយ បើធៀបនឹងរយៈពេលដូចគ្នាឆ្នាំ ២០២២។ ក្នុងនោះកម្ពុជានាំទៅជប៉ុន ៧៧០,៤៧ លានដុល្លារ ថយចុះ ២,៤ ភាគរយ និងទំនិញជប៉ុននាំមកកម្ពុជា ៤២០,៧៧ លានដុល្លារ ថយ ២០,៧ ភាគរយ។ ផ្អែកតាមតួលេខខាងលើ គឺជញ្ជីងពាណិជ្ជកម្មរបស់កម្ពុជា មានឧត្តមភាព ៣៣៩,៧ លានដុល្លារ៕
