ផលិតផលមួយចំនួនក្នុងគម្រោងសាងសង់រោងចក្រផលិតដែករបស់ក្រុមហ៊ុន Huale Steel។ រូបថត CDC
ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តឱ្យគម្រោងវិនិយោគបង្កើតរោងចក្រផលិតដែកគ្រប់ប្រភេទរបស់ក្រុមហ៊ុន Huale Steel (Cambodia) Co., Ltd ដែលមានទុនវិនិយោគ ៤០ លានដុល្លារក្នុងការឆ្លើយតបនឹងតម្រូវការក្នុងវិស័យសំណង់ដែលកំពុងបន្តរីកចម្រើនខ្លាំងក្នុងរយៈពេលប៉ុន្មានឆ្នាំមុនវិបត្តិសុខភាពសកល។
កាលថ្ងៃទី ២០ ខែកញ្ញា CDC បានចេញសេចក្តីសម្រេចលើគម្រោងវិនិយោគរបស់ក្រុមហ៊ុន Huale Steel (Cambodia) Co.,Ltd ដែលមានទុនវិនិយោគ ៤០ លានដុល្លារ និងបង្កើតការងារបាន ៥២៣ កន្លែង ដោយគម្រោងនេះស្ថិតនៅក្នុងតំបន់សេដ្ឋកិច្ចពិសេស កំពង់ផែក្រុងព្រះសីហនុ ខេត្តព្រះសីហនុ។
អ្នកគ្រប់គ្រងទូទៅសមាគមអ្នកសាងសង់កម្ពុជា លោក ជីវ ស៊ីវផេង បានប្រាប់ ភ្នំពេញ ប៉ុស្តិ៍ នៅថ្ងៃទី ២១ ខែកញ្ញាថា ការបើករោងចក្រក្នុងស្រុកនឹងផ្តល់ផលវិជ្ជមានច្រើនសម្រាប់សេដ្ឋកិច្ចជាតិ ដូចជា ការបង្កើតការងារឱ្យប្រជាពលរដ្ឋ ការកាត់បន្ថយតម្លៃដឹកជញ្ជូនពីក្រៅប្រទេស និងជាពិសេសជួយធ្វើឱ្យថ្លៃដើមសម្រាប់ការសាងសង់ទាបជាងមុន។ លោកបន្ថែមថា រោងចក្រផលិតដែកក្នុងស្រុកក៏នឹងជួយធ្វើឱ្យវិស័យសំណង់នៅកម្ពុជារីកកាន់តែលឿនផងដែរ។
លោក ស៊ីផេង បានបញ្ជាក់ថា៖«ក្នុងនាមវិស័យសាងសង់ យើងពិតជារីករាយចំពោះការបើករោងចក្រខាងលើ ព្រោះតិច ឬច្រើនវានឹងជួយឱ្យវិស័យសំណង់កម្ពុជាមានភាពរឹងមាំជាងមុន និងមិនពឹងផ្អែកខ្លាំងទៅលើផលិតផលនាំចូលដូចមុន»។
ទាក់ទងនឹងស្ថានភាពវិស័យសំណង់ និងអចលនទ្រព្យក្នុងពេលនេះ លោក ស៊ីវផេង ប្រាប់ថា សញ្ញាវិជ្ជមានចាប់ផ្តើមមានវិញជាបណ្តើរៗហើយ។
អគ្គលេខាធិការនៃសមាគមអ្នកអភិវឌ្ឍន៍លំនៅឋានកម្ពុជា លោក ហ៊ុយ វណ្ណា បាននិយាយថា បន្ទាប់ពីហក់ឡើងខ្លាំងមួយរយៈ វិស័យសំណង់នៅកម្ពុជាបានធ្លាក់ចុះមកវិញយ៉ាងគំហុកនៅពេលការមកដល់របស់ជំងឺកូវីដ ១៩ ដោយមានការដ្ឋានសំណង់ជាច្រើនត្រូវបានផ្អាកដំណើរការ។ ទោះយ៉ាងណា អ្វីៗបានចាប់ផ្តើមល្អឡើងវិញខ្លះៗហើយពេលនេះ។ លោកបន្តថា ចំពោះសម្ភារសំណង់ រួមទាំងដែកដែលប្រើប្រាស់នៅក្នុងវិស័យសំណង់ពេលនេះ ភាគច្រើនត្រូវបាននាំចូលពីប្រទេសវៀតណាម ចិន និងថៃ។
លោកនិយាយថា៖ «វត្តមានរបស់ផលិតផលក្នុងស្រុក នឹងជួយធ្វើឱ្យការពឹងផ្អែកទៅលើផលិតផលនាំចូលកាត់បន្ថយ ហើយក៏ជាជួយឱ្យការចំណាយលើការសាងសង់ថយចុះបន្តិចផងដែរ»។
អគ្គនាយកដ្ឋានគយ និងរដ្ឋាករកម្ពុជា ឱ្យដឹងថា រយៈពេល ៨ ខែ នៃឆ្នាំ ២០២៣ កម្ពុជាបានបញ្ចេញប្រាក់ ២៥៤,៣៧ លានដុល្លារលើការនាំចូលដែក និងដែកថែប (ជំពូកទំនិញលេខកូដ ៧២) កើនឡើង ៣,៩ ភាគរយបើធៀបរយៈពេលដូចគ្នាឆ្នាំ ២០២២។ ដោយឡែកខែសីហា ឆ្នាំ ២០២៣ គឺការនាំចូលទំនិញលេខកូដ ៧២ មានទឹកប្រាក់ ៣៨,៤២ លានដុល្លារ កើន ៣០,៣ ភាគរយធៀបនឹងខែសីហា ឆ្នាំ ២០២២៕
