បង្កងកណ្តូបនៅកម្ពុជាដែលកំពុងមានទីផ្សារនៅចិន ។ រូបថត សហការី
ភ្នំពេញៈ ក្រុមហ៊ុន Cambodia Tienit International Trading គ្រោងនឹងបង្កើននាំចេញបង្កងកណ្តូប ឬប្រកាំងធម្មជាតិ៦លើកទៀតស្មើនឹងប្រមាណ ១ ០៥០ គីឡូក្រាម ទៅកាន់ទីផ្សារប្រទេសចិន ក្រោយពីក្រុមហ៊ុនបាននាំចេញ ២ ដងដោយជោគជ័យ និងទទួលបានគាំទ្រច្រើនពីទីផ្សារចិន។
លោក ជា គឹមឡុង ទីប្រឹក្សាក្រុមហ៊ុនCambodiaTienit International Trading បានឱ្យដឹងនៅថ្ងៃទី២៤ ខែកញ្ញា ឆ្នាំ២០២៣ ថា ក្រោយពីក្រុមហ៊ុនបាននាំចេញបង្កងកណ្តូប ឬប្រកាំងធម្មជាតិ លើកទី១ (នាំចេញសាកល្បង)៤៥គីឡូក្រាម និងបន្តលើកទី២ ១០៥គីឡូក្រាមដោយជោគជ័យបច្ចុប្បន្នក្រុមហ៊ុនបានស្នើទៅខាងអគ្គនាយកដ្ឋានគយ និងរដ្ឋាករកម្ពុជា ក្នុងការត្រៀមនាំចេញ៦លើកទៀតនាពេលដ៏ខ្លីខាងមុខ។
លោកថា ការនាំចេញបង្កងកណ្តូបដោយជោគជ័យនេះ មានន័យថា បង្កងដែលទៅដល់ទីផ្សារចិន គឺជារបស់ធម្មជាតិ ហើយនៅរស់ទាំងអស់នៅពេលទៅដល់ប្រទេសចិន ខណៈផលិតផលនេះក៏ទទួលបានការគាំទ្រច្រើនដែរពីខាងប្រជាជនចិន។
លោក គឹមឡុង បានបញ្ជាក់ថា៖«ខាងក្រុមហ៊ុនស្នើសុំគោលការណ៍ទៅគយទុកហើយ ដើម្បីនាំចេញ៦ជើងទៀត ដែលស្មើនឹងបរិមាណ១០៥០គីឡូក្រាម ដោយថ្ងៃស្អែកនេះ ទី២៥ ខែកញ្ញា យើងនឹងនាំចេញ១០៥គីឡូទៀតជាការនាំចេញលើកទី២។និយាយរួមក្នុង១សប្តាហ៍យើងនឹងនាំចេញប្រហែល២១០គីឡូក្រាម ដោយអាចនាំចេញ២ទៅ៣ដង តាមបរិមាណដែលទិញពីកសិករបាន»។
ទោះជាយ៉ាងណា ក៏នៅមានបញ្ហាប្រឈមខ្លះដែរ ដោយលោក គឹមឡុង បានអះអាងថា ដោយសារតែបង្កងប្រភេទនេះ ជាផលិតផលធម្មជាតិដូច្នេះហើយក្រុមហ៊ុនហាក់មានការលំបាកបន្តិចទាក់ទងនឹងការប្រមូលទិញពីប្រជានេសាទ ស្របពេលដែលទីផ្សារចិនមានតម្រូវការខ្ពស់។
បើតាមលោក គឹមឡុង ក្រុមហ៊ុនCambodiaTienit International Trading នឹងនាំចេញផលិតផលជលផលសមុទ្រដទៃទៀតផងដែរនាពេលខាងមុខ។
អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កញ្ញា អ៊ឹម រចនា ធ្លាប់បានឱ្យដឹងថា ការនាំចេញបង្កងកណ្តូប ដែលជាផលិតផលធម្មជាតិ និងជាប្រភេទជលផលទឹកប្រៃនេះ គឺជាសមិទ្ធផលថ្មីមួយទៀតដែលបានចូលទៅកាន់ទីផ្សារប្រទេសចិនជាផ្លូវការ។
ថ្វីដ្បិតតែការនាំចេញបង្កងកណ្តូប ទៅកាន់ទីផ្សារប្រទេសចិនគឺរឿងល្អក៏ពិតមែន ប៉ុន្តែកញ្ញា រចនា បានអះអាងថា ដោយសារតែបង្កងកណ្តូប ជាផលិតផលធម្មជាតិខាងរដ្ឋបាលជលផលក៏បានគិតគូរយ៉ាងហ្មត់ចត់ដែរចំពោះការនាំចេញនេះដើម្បីរក្សានិរន្តរភាពនៃផលិតផលធនធានធម្មជាតិ។
កញ្ញាបានបញ្ជាក់ថា៖«ការនាំចេញក៏ត្រូវគិតដល់ស្ថិរភាពនៃធនធានធម្មជាតិដែរ។ ក្រសួងនឹងខិតខំប្រឹងប្រែងធ្វើយ៉ាងណា ធ្វើឱ្យការនាំចេញផលិតផលប្រភេទនេះ ឬក៏ផលិតផលជលផលធម្មជាតិដទៃទៀត ប្រកបដោយនិរន្តភាពនិងមិនប៉ះពាល់ដល់ធនធានសមុទ្រឡើយ។បើតាមអ្នកជំនាញជលផលយើង មិនទាន់មានប្រទេសណាអាចចិញ្ចឹមបង្កងកណ្តូបនេះបាននៅឡើយទេ»។
ទាក់ទងនឹងបង្កងកណ្តូបនេះដែរ លោកនាយករដ្ឋមន្ត្រីកម្ពុជា ហ៊ុន ម៉ាណែត នាអំឡុងពេលជួបសំណេះសំណាល ជាមួយប្រជាពលរដ្ឋខ្មែរនៅអាមេរិក និងកាណាដា នៅទីក្រុងញូវយ៉ក សហរដ្ឋអាមេរិកកាលពីថ្ងៃទី២៣ ខែកញ្ញា ក៏បានរំឭកពីការនាំចេញបង្កងកណ្តូបទៅកាន់ទីផ្សារចិននេះដែរ ដោយលោកអះអាងថា ការនាំចេញលើកដំបូង៤៥គីឡូក្រាមនៃបង្កងកណ្តូបនេះគឺជាការធ្វើតេស្តសាកល្បងប៉ុណ្ណោះ។
លោកនាយករដ្ឋមន្ត្រីបានថ្លែងថា៖«ពេលដែលធ្វើតេស្តសាកល្បងហើយ គេនឹងយកច្រើនជាងនេះទៀត គេមិនមែនយកតែ៤៥គីឡូហ្នឹងទេ ព្រោះបរិមាណនេះសូម្បីតែហាងមួយនៅភ្នំពេញទិញទៅលក់មិនគ្រប់ផង។ គេយកទៅជាជំហានមួយ គេយកជាSample ទៅសិន ប៉ុន្តែមុននឹងគេយកSampleនេះ គេសិក្សាច្បាស់លាស់អស់ហើយ »។
បើតាមក្រសួងកសិកម្ម រុក្ខាប្រមាញ់ និងនេសាទរហូតមកទល់ពេលនេះ កម្ពុជាបាននាំចេញផលិតផលជលផល និងផលិតផលវារីវប្បកម្ម៤មុខហើយ ទាំងផលិផលទឹកសាបនិងទឹកប្រៃ ស្មើនឹងបរិមាណជាង២៥តោនទៅកាន់ប្រទេសចិនជាផ្លូវការ ដែលផលិតផលទាំងនោះរួមមានដូចជា ត្រីប្រាកែច្នៃរួចចំនួន១៤តោន ,កំពឹស និងអន្ទង់បង្កក១១តោន និងចុងក្រោយនេះ គឺបង្កងកណ្តូប ៤៥គីឡូក្រាម៕
