ក្រុមប្រឹក្សាអភិវឌ្ឍន៍កម្ពុជា (CDC)។ CDC អនុម័តគម្រោងវិនិយោគ ២៦ ដែលមានទុនជាង ២៥០ លានដុល្លារ។ រូបថត ហេង ជីវ័ន
ភ្នំពេញៈ គម្រោងវិនិយោគចំនួនជិត ៣០ ដែលមានទុនវិនិយោគជាង ២៥០ លានដុល្លារ និងបង្កើតការងារបានជាង ២៧ ពាន់កន្លែង ត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តឱ្យវិនិយោគក្នុងខែកញ្ញា ឆ្នាំ ២០២៣ ដែលក្នុងនោះ ៩ ស្ថិតក្នុងតំបន់សេដ្ឋកិច្ចពិសេស។ នេះបើយោងតាម CDC។
យោងតាមការគណនារបស់ភ្នំពេញប៉ុស្តិ៍ គឺក្នុងខែកញ្ញា ឆ្នាំ ២០២៣ មានគម្រោងវិនិយោគចម្រុះចំនួន ២៦ ដែលមានទុនវិនិយោគសរុប ២៥៦,៦៥លានដុល្លារ និងបង្កើតការងារបាន ២៧ ២៦២ កន្លែង ត្រូវបាន CDC អនុម័តឱ្យវិនិយោគនៅកម្ពុជា។ គម្រោងចំនួន ៩ ស្ថិតនៅក្នុងតំបន់សេដ្ឋកិច្ចនៃខេត្តព្រះសីហនុ និងស្វាយរៀង ខណៈក្រៅពីនោះ ស្ថិតនៅក្រៅតំបន់សេដ្ឋកិច្ចពិសេសដូចជា ក្នុងរាជធានីភ្នំពេញ ខេត្តកំពង់ស្ពឺ តាកែវ ព្រះសីហនុ ក្រចេះ កណ្តាល និងកំពង់ចាម។
គម្រោងវិនិយោគដែលមានទុនវិនិយោគច្រើន គឺគម្រោងអភិវឌ្ឍន៍អនុស្ថានីយ និងខ្សែបញ្ជូនថាមពលអគ្គិសនី តង់ស្យុងខ្ពស់ ២៣០ គីឡូវ៉ុល ពីខេត្តកំពង់ចាម ទៅខេត្តក្រចេះ និងគម្រោងបង្កើតរោងចក្រផលិតដែកគ្រប់ប្រភេទនៅខេត្តព្រះសីហនុ។
ផ្អែកតាម CDC គម្រោងទាំងនោះមានដូចជា បណ្តាញចែកចាយអគ្គិសនី អំពូលភ្លើង ដែកខ្សែភ្លើង កាត់ដេរ គ្រឿងសង្ហារិម ចំណីសត្វ សម្ភារវេចខ្ចប់ កេះកាតុង, និងសម្ភារប្រើប្រាស់ប្រចាំថ្ងៃ ជាដើម។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ ភ្នំពេញ ប៉ុស្តិ៍ នៅថ្ងៃទី ១ ខែតុលាថា ការទទួលបានគម្រោងវិនិយោគថ្មីៗជាបន្តបន្ទាប់នេះបញ្ជាក់ថា កម្ពុជាកំពុងក្លាយជាប្រទេសដែលមានសក្តានុពលគ្រប់គ្រាន់ក្នុងការទាក់ទាញវិនិយោគិនជាតិ និងអន្តរជាតិឱ្យមកបណ្តាក់ទុន ខណៈក្រៅពីមានច្បាប់វិនិយោគល្អប្រសើរកម្ពុជាក៏បានចុះកិច្ចព្រមព្រៀងពាណិជ្ជកម្មជាមួយប្រទេសជាច្រើនដើម្បីបើកទីផ្សារនាំចេញឱ្យកាន់តែធំ និងមានលក្ខខណ្ឌពិសេស(ពន្ធ)ផងដែរ។
លោកបន្តថា នៅពេលចង្វាក់ផលិតកម្ម និងអាជីវកម្មក្នុងស្រុកកាន់តែរីកចម្រើន គឺមិនត្រឹមតែជួយលើកកម្ពស់សមត្ថភាព និងមុខមាត់ប្រទេសកម្ពុជានៅលើឆាកអន្តរជាតិប៉ុណ្ណោះទេ ប៉ុន្តែក៏ជួយឱ្យកម្ពុជាកាត់បន្ថយការពឹងផ្អែកលើផលិតផលនាំចូលផងដែរ។
លោកថ្លែងថា៖ «នេះជាមោទនភាពសម្រាប់កម្ពុជា ព្រោះនៅពេលមានគម្រោងវិនិយោគផ្ទាល់កាន់តែច្រើនឱកាសបង្កើនការងារ និងកម្លាំងជំរុញកំណើនសេដ្ឋកិច្ចជាតិក៏នឹងកាន់តែខ្លាំងផងដែរ។ គម្រោងវិនិយោគដែលកម្ពុជាទទួលបាននាពេលនេះ គឺមានភាពចម្រុះ និងប្រើប្រាស់បច្ចេកវិទ្យាកាន់តែទំនើប»។
ខណៈក្នុងខែវិច្ឆិកានេះកម្ពុជានឹងរៀបចំវេទិការវាងរដ្ឋាភិបាល និងផ្នែកឯកជន ដែលជាវេទិកាជំនួបរវាងថ្នាក់ដឹកនាំរដ្ឋាភិបាល (លោកនាយករដ្ឋមន្ត្រី ហ៊ុន ម៉ាណែត នឹងធ្វើជាប្រធានកិច្ចប្រជុំ) និងផ្នែកឯកជន លោក លឹម ហេង បានអះអាងថា បន្ទាប់ពីវេទិកាខាងលើ គឺនឹងមានក្រុមហ៊ុនជាតិ និងអន្តរជាតិកាន់តែច្រើនបន្ថែមទៀតចូលមកវិនិយោគនៅកម្ពុជា។
អគ្គនាយិកាក្រុមហ៊ុនផលិតនំស្រួយ លីលី លោកស្រី កែវ មុំ បានប្រាប់ថា បើតម្លៃថាមពលអគ្គិសនីកម្ពុជាអាចស្មើ ឬទាបជាងប្រទេសជិតខាង គឺកម្ពុជានឹងមានឱកាសច្រើនថែមទៀតក្នុងការទាក់ទាញអ្នកវិនិយោគឱ្យមកបណ្តាក់ទុន។ ដោយសារតម្លៃអគ្គិសនីផ្សារភ្ជាប់នឹងគ្រប់ចង្វាក់ផលិតកម្ម ដូច្នេះបើតម្លៃអគ្គិសនីទាប វាក៏នឹងជួយលើកកម្ពស់សមត្ថភាពប្រកួតប្រជែងតម្លៃទំនិញលើទីផ្សារផងដែរ។
លោកស្រីនិយាយថា៖ «អគ្គិសនីកាន់តែទាប ធ្វើឱ្យថ្លៃដើមផលិតកាន់តែទាប ដែលនឹងជួយឱ្យសមត្ថភាពប្រកួតប្រជែងកាន់តែខ្ពស់ជាមួយទំនិញរបស់ប្រទេសនានាលើពិភពលោក។ អ្នកវិនិយោគបរទេស មុននឹងទៅបណ្តាក់ទុននៅក្នុងប្រទេសណាមួយ សំណួរមុនគេតើអគ្គិសនីនៅទីនោះមានគ្រប់គ្រាន់ដែរឬទេ? តើអគ្គិសនីមានតម្លៃខ្ពស់ ឬទាប?»៕
