អ្នកទៅកម្សាន្តនៅប្រាសាទកោះកេរ កាលពីថ្ងៃទី ១៨ ខែកញ្ញា។ រូបថត ហ្វេសប៊ុក
ព្រះវិហារៈ យោងតាមរបាយការណ៍របស់អាជ្ញាធរជាតិព្រះវិហារបានបង្ហាញថា ក្នុងរយៈពេល ៩ ខែ ក្នុងឆ្នាំ ២០២៣ នេះ រមណីយដ្ឋានប្រាសាទព្រះវិហារ និងប្រាសាទកោះកេរ ទទួលបានភ្ញៀវជាង ១០ ម៉ឺននាក់ ក្នុងនោះរមណីយដ្ឋានប្រាសាទព្រះវិហារមានជាង ៦ ម៉ឺននាក់ និងប្រាសាទកោះកេរមានជាង ៤ ម៉ឺននាក់។
លោក គង់ ពុទ្ធិការ អគ្គនាយកនៃអាជ្ញាធរជាតិព្រះវិហារបានឱ្យដឹងនៅថ្ងៃទី ២ ខែតុលាថា គិតចាប់ពីខែមករា ដល់ខែកញ្ញា ក្នុងឆ្នាំ ២០២៣ នេះ រមណីយដ្ឋានប្រាសាទព្រះវិហារ បានទទួលភ្ញៀវទេសចរសរុប ៦២ ៦៥៣ នាក់ ក្នុងនោះភ្ញៀវទេសចរជាតិមានចំនួន ៥៦ ៦២៦ នាក់ និងភ្ញៀវទេសចរបរទេសមានចំនួន ៦ ០២៧ នាក់។
លោកបន្តថា បើប្រៀបធៀបនឹងរយៈពេលដូចគ្នាក្នុងឆ្នាំ ២០២២ រមណីយដ្ឋានប្រាសាទព្រះវិហារទទួលបានភ្ញៀវទេសចរសរុប ៧៩ ៨១៨ នាក់ ក្នុងនោះភ្ញៀវទេសចរជាតិមានចំនួន ៧៧ ៧២៩ នាក់ និងភ្ញៀវទេសចរបរទេសមានចំនួន ២ ០៨៩ នាក់។
លោកបញ្ជាក់ថា រមណីយដ្ឋានប្រាសាទព្រះវិហារ ក្នុងរយៈពេល ៩ ខែក្នុងឆ្នាំ ២០២៣ ភ្ញៀវទេសចរជាតិមានការថយចុះចំនួន ២៨% បើប្រៀបធៀបនឹងរយៈពេលដូចគ្នាក្នុងឆ្នាំ ២០២២ ខណៈដែលភ្ញៀវទេសចរបរទេស មានការកើនឡើងចំនួន ១៨៩% បើធៀបនឹងរយៈពេលដូចគ្នាក្នុងឆ្នាំ ២០២២។
លោកពុទ្ធិការឱ្យដឹងទៀតថា ចំពោះរមណីយដ្ឋានប្រាសាទកោះកេរវិញ ក្នុងរយៈពេល ៩ ខែក្នុងឆ្នាំ ២០២៣ នេះ បានទទួលភ្ញៀវទេសចរជាតិសរុប ៤៤ ១៦២ នាក់ ខណៈរយៈពេលដូចគ្នាក្នុងឆ្នាំ ២០២២ ទទួលបានភ្ញៀវទេសចរជាតិសរុប ៤២ ៦៦២ នាក់។ លោកបន្ថែមថា៖ «ដូច្នេះរមណីយដ្ឋានប្រាសាទកោះកេរ ក្នុងរយៈពេល ៩ខែមកនេះ មានការកើនឡើងភ្ញៀវទេសចរជាតិចំនួន ៣,៦ភាគរយ បើប្រៀបធៀបនឹងរយៈពេលដូចគ្នាក្នុងឆ្នាំ ២០២២»។
ទាក់ទងនឹងរបាយការណ៍នេះ លោក ម៉ម រិទ្ធី ប្រធានសហព័ន្ធសហជីពវិស័យទេសចរណ៍ និងសេវាកម្មកម្ពុជា បានឱ្យដឹងដែរថា បើតាមការសង្កេតជាទូទៅរបស់លោក មើលឃើញថា ឆ្នាំនេះភ្ញៀវទេសចរបរទេស ដែលចូលមកទស្សនាកម្ពុជា មិនថា តំបន់ទេសចរណ៍ខេត្តព្រះវិហារ ឬខេត្តសៀមរាបនោះទេ គឺមានការថយចុះខ្លាំង ទាំងភ្ញៀវទេសចរជាតិ និងអន្តរជាតិ។
លោកបន្តថា រាជរដ្ឋាភិបាល ក៏ដូចជាក្រសួងទេសចរណ៍ និងមន្ទីរទេសចរណ៍ គួរតែកែប្រែយុទ្ធសាស្ត្ររបស់ខ្លួន កុំប្រើយុទ្ធសាស្ត្រដដែលៗ សម្រាប់អនុវត្ត សមត្ថភាព បច្ចេកទេស សេវាកម្ម ហើយនិងការផ្សព្វផ្សាយពីវិស័យទេសចរណ៍ ដូច្នេះគួរតែពង្រឹងផ្នែកទាំងនោះឡើងវិញ។
លោក ម៉ម រិទ្ធី បញ្ជាក់ថា៖ «អ្វីដែលសំខាន់ គឺរាជរដ្ឋាភិបាល ត្រូវស្ដារស្ថានភាពសន្តិសុខប្រទេសរបស់យើង ដោយសារមួយរយៈនេះមានព័ត៌មានជាច្រើននិយាយពីសន្តិសុខប្រទេសយើង ដែលធ្វើឱ្យប៉ះពាល់ដល់ភ្ញៀវ អ៊ីចឹងរដ្ឋាភិបាលត្រូវពង្រឹងផ្នែកសន្តិសុខនេះ កុំឱ្យរំខានដល់ភ្ញៀវទេសចរ»។
លោកថា ជាមួយគ្នានេះក៏ត្រូវកែប្រែបរិបថនយោបាយនៅប្រទេសកម្ពុជាដើម្បីបង្ហាញឱ្យអ្នកទេសចរបរទេស មើលឃើញថា កម្ពុជាមានសុខសន្តិភាពហើយអ្នកនយោបាយមានការរួបរួមគ្នា ដែលវាជាផ្នែកមួយក្នុងការទាក់ទាញភ្ញៀវទេសចរឡើងវិញដែរ។
សូមរំឭកផងដែរថា រមណីយដ្ឋានប្រាសាទកោះកេរត្រូវបានចុះក្នុងបញ្ជីសម្បត្តិបេតិកភណ្ឌពិភពលោកកាលពីថ្ងៃទី ១៧ ខែកញ្ញា ឆ្នាំ ២០២៣៕
