លោក អូន ព័ន្ធមុនីរ័ត្ន (ស្ដាំ) លោកស្រី Devyani Khobragade ក្នុងជំនួបពិភាក្សា កាលពីថ្ងៃទី ៥ ខែតុលា។ រូបថត ក្រសួងសេដ្ឋកិច្ច
ភ្នំពេញៈ ឯកអគ្គរដ្ឋទូតឥណ្ឌាប្រចាំកម្ពុជា លោកស្រី Devyani Khobragade បានបញ្ជាក់សាជាថ្មីថា ជើងហោះហើរត្រង់រវាងកម្ពុជា និងឥណ្ឌានឹងបើកដំណើរការឡើងវិញក្នុងពេលឆាប់ៗខាងមុខខណៈប្រទេសទាំង ២ បានប្តេជ្ញាក្នុងការជំរុញការធ្វើពាណិជ្ជកម្ម និងទេសចរណ៍។
ក្នុងជំនួបជាមួយលោក អូន ព័ន្ធមុនីរ័ត្ន រដ្ឋមន្ត្រីនៃក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី ៥ ខែតុលា នៅទីស្តីការក្រសួងសេដ្ឋកិច្ច លោកស្រី Devyani Khobragade បានឱ្យដឹងថា ប្រទេសកម្ពុជា និងឥណ្ឌាមានទំនាក់ទំនងការទូត និងសេដ្ឋកិច្ចដ៏រឹងមាំ និងយូរអង្វែង ហើយជាមួយគ្នា។ ឥណ្ឌានឹងបន្តពង្រឹងកិច្ចសហប្រតិបត្តិការក្នុងវិស័យអាទិភាពរបស់រដ្ឋាភិបាលកម្ពុជាដើម្បីជំរុញយន្តការសម្រួលពាណិជ្ជកម្ម និងការវិនិយោគតាមរយៈការអនុគ្រោះពាណិជ្ជកម្មនៃកិច្ចព្រមព្រៀងពាណិជ្ជកម្ម។ នេះបើតាមក្រសួងសេដ្ឋកិច្ច។
លោកស្រីថ្លែងថា៖ «ដើម្បីលើកកម្ពស់ទំនាក់ទំនងជិតស្និទ្ធរវាងប្រជាជន និងប្រជាជន ក៏ដូចជាការតភ្ជាប់ឌីជីថល គឺនឹងមានជើងហោះហើរត្រង់រវាងឥណ្ឌា និងកម្ពុជា ដែលរដ្ឋាភិបាលឥណ្ឌាគ្រោងនឹងដំណើរការក្នុងពេលឆាប់ៗនេះ»។
លោក អូន ព័ន្ធមុនីរ័ត្ន បានថ្លែងអំណរគុណចំពោះរដ្ឋាភិបាលឥណ្ឌា ដែលតែងផ្តល់ការគាំទ្រ ជាពិសេសក្នុងការសម្របសម្រួលពាណិជ្ជកម្មទ្វេភាគីក្នុងគោលបំណងផ្តល់ផលប្រយោជន៍ទៅវិញទៅមករវាងឥណ្ឌា និងកម្ពុជា។ លោកបញ្ជាក់ថា៖ «យើងគាំទ្រឱ្យមានជើងហោះហើរត្រង់មកកម្ពុជា ព្រោះវានឹងជំរុញទំនាក់ទំនងរវាងប្រជាជន និងប្រជាជន និងភ្ញៀវទេសចររវាងប្រទេសទាំង ២»។
ឯកអគ្គរាជទូតកម្ពុជាប្រចាំប្រទេសឥណ្ឌា លោក កុយ គួង បានប្រាប់សារព័ត៌មានឥណ្ឌា ANI កាលពីថ្ងៃទី ២៦ ខែសីហា ថា ទំនាក់ទំនងការទូតរវាងឥណ្ឌា និងកម្ពុជា បានឈានដល់កម្រិតខ្ពស់ដែលគួរឱ្យកត់សម្គាល់ ដោយប្រទេសទាំង ២ បានប្រារព្ធខួបមិត្តភាព ៧០ ឆ្នាំ។
លោក កុយ គួង ត្រូវបានដកស្រង់សម្តីដោយ ANI ដោយលើកឡើងថា កម្ពុជាទទួលបានកិច្ចសហប្រតិបត្តិការដ៏រឹងមាំក្នុងតំបន់ជាមួយឥណ្ឌាក្នុងនាមជាដៃគូសន្ទនារបស់អាស៊ាន ក៏ដូចជាអន្តរជាតិដែលប្រទេសទាំង ២ បន្តគាំទ្រគ្នាទៅវិញទៅមក។
បច្ចុប្បន្ន ឥណ្ឌាមានជើងហោះហើរត្រង់ទៅប្រទេសជាសមាជិកអាស៊ានចំនួន ៩ លើកលែងតែប្រទេសកម្ពុជា។
លោកថ្លែងថា៖ «នៅពេលអនាគតដ៏ខ្លីខាងមុខ យ៉ាងហោចណាស់ត្រឹមដើមឆ្នាំ ២០២៤ មានលទ្ធភាពនៃការហោះហើរត្រង់ពីទីក្រុងញូវដែលីមកប្រទេសកម្ពុជា ដូច្នេះវានឹងកាន់តែងាយស្រួលសម្រាប់ប្រជាជនក្នុងការធ្វើដំណើររវាងប្រទេសទាំង ២ ក្នុងនាមជាអ្នកទេសចរ ឬវិនិយោគិន»។
យោងតាមក្រសួងទេសចរណ៍កម្ពុជា ភ្ញៀវទេសចរឥណ្ឌាចំនួន ១៦ ៣៨៨ នាក់ត្រូវបានកត់ត្រានៅក្នុងត្រីមាសទី១ ឆ្នាំនេះ ដែលជាការកើនឡើងដ៏ច្រើនពីចំនួនត្រឹមតែ ១ ៤៧៨ នាក់នៅក្នុងត្រីមាសដូចគ្នាកាលពីឆ្នាំមុន។
អគ្គនាយកដ្ឋានគយ និងរដ្ឋាករបានរាយការណ៍ថា ការនាំចេញទំនិញកម្ពុជាទៅឥណ្ឌាមានទឹកប្រាក់ ៩១,៥ លានដុល្លារក្នុងរយៈពេល ៤ ខែ ដើមឆ្នាំ ២០២៣ កើន ៦៤,២ ភាគរយធៀបនឹងរយៈពេលដូចគ្នាកាលពីឆ្នាំ ២០២២។ ឥណ្ឌាគឺជាដៃគូពាណិជ្ជកម្មធំជាងគេបំផុតទី ១៨ របស់កម្ពុជាក្នុងរយៈពេលខាងលើ៕
