លោក ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការនៃអគ្គលេខាធិការដា្ឋនអាជ្ញាធរសេវាហិរញ្ញវត្ថុមិនមែនធនាគារ នាពេលកន្លងទៅ។ រូបថត FSA
ភ្នំពេញៈ អាជ្ញាធរសេវាហិរញ្ញវត្ថុ មិនមែនធនាគារ នៃក្រសួងសេដ្ឋកិច្ច និងហិរញ្ញវត្ថុកំពុងជំរុញការអភិវឌ្ឍបច្ចេកវិទ្យាហិរញ្ញវត្ថុក្នុងវិស័យហិរញ្ញវត្ថុមិនមែនធនាគារ ដើម្បីរួមចំណែកជំរុញសម្ទុះនៃការអភិវឌ្ឍសេដ្ឋកិច្ចនិងសង្គមឌីជីថលកម្ពុជាឱ្យរស់រវើកទៅថ្ងៃអនាគត។
ការជំរុញការអភិវឌ្ឍបច្ចេកវិទ្យាហិរញ្ញវត្ថុ ក្នុងវិស័យហិរញ្ញវត្ថុមិនមែនធនាគារនេះ ត្រូវបានធ្វើឡើងតាមរយៈសិក្ខាសាលា នាថ្ងៃទី ២៣ ខែតុលា ក្នុងគោលបំណងប្រមូលធាតុចូលជាយុទ្ធសាស្ត្រ ពីអ្នកចូលរួមទាំងអស់ ជាវិភាគទានដល់ការរៀបចំផែនការយុទ្ធសាស្ត្រអភិវឌ្ឍបច្ចេកវិទ្យាហិរញ្ញវត្ថុក្នុងវិស័យហិរញ្ញវត្ថុ មិនមែនធនាគារ សំដៅចូលរួមគាំទ្រការអនុវត្តរបៀបវារៈនិងកម្មវិធីគោលនយោបាយរបស់រាជរដ្ឋាភិបាលនីតិកាលទី៧ នៃរដ្ឋសភា។
លោក សូ សុភា ប្រធានមជ្ឈមណ្ឌលបច្ចេកវិទ្យាហិរញ្ញវត្ថុនៃអគ្គលេខាធិការដា្ឋនអាជ្ញាធរសេវាហិរញ្ញវត្ថុមិនមែនធនាគារថ្លែងថា ក្នុងបរិការណ៍សកលភាវូបនីយកម្មនិងតំបន់ភាវូបនីយកម្ម, បច្ចេកវិទ្យាបាននិងកំពុង ធ្វើបរិវត្តកម្មឌីជីថលក្នុងគ្រប់វិស័យនៃសេដ្ឋកិច្ចនិងសង្គម ដែលក្នុងនោះក៏មានការធ្វើបរិវត្តកម្មឌីជីថលក្នុងវិស័យហិរញ្ញវត្ថុផងដែរ។ ការណ៍នេះធ្វើឱ្យលេចឡើងនូវបច្ចេកវិទ្យាហិរញ្ញវត្ថុ ដែលជាប្រភពថ្មីនៃកំណើនសេដ្ឋកិច្ចឌីជីថលនិងសុខុមាលភាពសង្គមវៃឆ្លាត។
លោកថា៖ «គោលនយោបាយអភិវឌ្ឍបច្ចេកវិទ្យាហិរញ្ញវត្ថុកម្ពុជា ២០២៣-២០២៨ មានការគិតគូរទាំងក្នុងវិស័យធនាគារ ទាំងក្នុងវិស័យហិរញ្ញវត្ថុមិនមែនធនាគារ ដើម្បីអភិវឌ្ឍប្រព័ន្ធអេកូឡូស៊ីបច្ចេកវិទ្យាហិរញ្ញវត្ថុ សំដៅរួមចំណែកជំរុញសម្ទុះនៃការអភិវឌ្ឍសេដ្ឋកិច្ច និងសង្គមឌីជីថលដ៏រស់រវើក»។
ជាមួយគ្នានោះដែរ លោក ម៉ី វ៉ាន់ រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាអគ្គលេខាធិការនៃអគ្គលេខាធិការដា្ឋនអាជ្ញាធរសេវាហិរញ្ញវត្ថុមិនមែនធនាគារលើកឡើងថា ក្នុងរយៈពេលប៉ុន្មានឆ្នាំចុងក្រោយនេះ ដោយសារមានការគាំទ្រខ្ពស់ពីរាជរដ្ឋាភិបាល វិស័យហិរញ្ញវត្ថុមិនមែនធនាគារ មានការលូតលាស់គួរឱ្យកត់សម្គាល់ ជាពិសេសក្នុងអំឡុងនិងក្រោយ វិបត្តិជំងឺកូវីដ ១៩។
លោកថា៖ «រាជរដ្ឋាភិបាលបានឆ្លើយតបទាន់ពេលក្នុងស្មារតីបុរេសកម្ម តាមរយៈការប្រើប្រាស់យុទ្ធសាស្ត្រផ្ការីកដើម្បីធ្វើជាយុទ្ធនាការចាក់វ៉ាក់សាំងបង្កើតភាពស៊ាំសហគមន៍ ក៏ដូចជាការដាក់ចេញនូវគោលនយោបាយនិងយុទ្ធសាស្ត្រគន្លឹះៗពាក់ព័ន្ធផ្សេងទៀត ដើម្បីគាំទ្រដល់ការស្តារនិងការអភិវឌ្ឍសេដ្ឋកិច្ចនិងសង្គម»។
លោក ម៉ី វ៉ាន់ បន្តថា វិស័យហិរញ្ញវត្ថុមិនមែនធនាគារ បាននិងកំពុងផ្តល់វិភាគទានយ៉ាងសំខាន់ ដល់ការជំរុញសន្ទុះកំណើនសេដ្ឋកិច្ចជាតិ ដោយបច្ចុប្បន្ន វិស័យនេះ នៅបន្តមានវឌ្ឍនភាពជាវិជ្ជមានលើកលែងតែវិស័យអចលនវត្ថុ ទោះបីជាសេដ្ឋកិច្ចជាតិ, តំបន់ និងសកលកំពុងទទួលរងផល ប៉ះពាល់ពីវិបត្តិសង្គ្រាមរុស្ស៊ី-អ៊ុយក្រែន និងកំណើនអតិផរណាក្តី។ វឌ្ឍនភាពទាំងនេះ ក៏មានការរួមចំណែកពីបច្ចេកវិទ្យាហិរញ្ញវត្ថុដែលជាប្រភពថ្មីនៃកំណើនសេដ្ឋកិច្ចទីផ្សារនិងសុខុមាលភាពសង្គមវៃឆ្លាតផងដែរ។
លោក សាធូរុ យ៉ាម៉ាដេរ៉ា (SATORU Yamadera) ទីប្រឹក្សានាយកដ្ឋានស្រាវជ្រាវ និងអភិវឌ្ឍន៍សេដ្ឋកិច្ចនៃធនាគារអភិវឌ្ឍន៍អាស៊ី (ADB) បានលើកឡើងនាសិក្ខាសាលានោះថា វាពិតជាមានសារៈសំខាន់ណាស់ក្នុងការប្រមូលនូវព័ត៌មាន ក៏ដូចជាមានការយល់ដឹងបន្ថែមទៀតអំពីបចេ្ចកវិទ្យាហិរញ្ញវត្ថុ (Fin Tech) ក្នុងការជួយអភិវឌ្ឍន៍ប្រទេសកម្ពុជា។
លោក សាធូរុ បញ្ជាក់ថា៖ «យើងទាំងអស់គ្នាដឹងហើយថា បច្ចេកវិទ្យា ជាគន្លឹះជាកូនសោនៅក្នុងការអភិវឌ្ឍសេដ្ឋកិច្ចប៉ុន្តែខ្ញុំចង់បញ្ជាក់ថា បច្ចេកវិទ្យាមិនមែនជាដំណោះស្រាយនោះទេ តែជាឧបករណ៍ ឬជាមធ្យោបាយដើម្បីគាំទ្រ ឱ្យសម្រេចបាននូវផែនការដែលបានគ្រោងទុក»។
បើតាមលោក ម៉ី វ៉ាន់ បច្ចេកវិទ្យាហិរញ្ញវត្ថុកម្ពុជាជាពិសេសបច្ចេកវិទ្យាហិរញ្ញវត្ថុក្នុងវិស័យហិរញ្ញវត្ថុមិនមែនធនាគារ ស្ថិតនៅដំណាក់កាលលូតលាស់ដំបូងនៅឡើយ ដែលប្រៀបដូចជាកូនដើមឈើមួយដើម ដែលទាមទារនូវការថែទាំឱ្យបានល្អបន្ថែមទៀត។ លោកថា ប្រៀបធៀបនឹងប្រទេសក្នុងតំបន់ ស្ថានភាពបច្ចេកវិទ្យាហិរញ្ញវត្ថុកម្ពុជា មិនស្ថិតនៅក្រោយគេនោះទេ ប៉ុន្តែស្ថិតក្នុងចំណោមប្រទេសដែលមិនទាន់អាចទាញយកអត្ថប្រយោជន៍ជាអតិបរមានៅឡើយ។
ជាមួយនឹងការគាំទ្រពីរាជរដ្ឋាភិបាល បច្ចេកវិទ្យាហិរញ្ញវត្ថុកម្ពុជា នឹងរួមចំណែកជំរុញសម្ទុះនៃការអភិវឌ្ឍសេដ្ឋកិច្ច និងសង្គមឌីជីថលកម្ពុជាដ៏រស់រវើកទៅថ្ងៃអនាគត៕
