សកម្មភាពលើកដាក់ទូកុងតឺន័រនៅកំពង់ផែស្វយ័តក្រុងព្រះសីហនុ នាពេលកន្លងមក។ ហេង ជីវ័ន
ដោយសារតែបញ្ហាប្រឈមខាងក្រៅ និងធ្លាក់ចុះនៅក្នុងវិស័យអចលនទ្រព្យ ជាពិសេសការធ្លាក់ចុះនៃបណ្តាប្រទេសនាំចេញដូចជាសហរដ្ឋអាមេរិក អឺរ៉ុប និងប្រទេសចិន មូលនិធិរូបិយវត្ថុអន្តរជាតិ (IMF) បានទម្លាក់ការព្យាករសេដ្ឋកិច្ចរបស់កម្ពុជាមកនៅត្រឹម ៥,៣ ភាគរយក្នុងឆ្នាំនេះទាបជាងការព្យាករកាលពីខែមេសា ដែលមានអត្រា ៥,៨ ភាគរយពីការព្យាករ។
ថ្លែងក្នុងសន្និសីទសារព័ត៌មានកាលពីថ្ងៃទី ៣១ ខែតុលា ក្រុមការងារ IMF ដឹកនាំដោយលោក Davide Furceri ប្រធានបេសកកម្មប្រចាំកម្ពុជា ដែលបានមកបំពេញទស្សនកិច្ចនៅកម្ពុជា កាលពីថ្ងៃទី ១៨ ដល់ថ្ងៃទី ៣១ ខែតុលាថា សេដ្ឋកិច្ចកម្ពុជាកំពុងស្ទុះងើបឡើងវិញជាលំដាប់ ពីការរីករាលដាលជំងឺកូវីដ ប៉ុន្តែប្រឈមមុខនឹងបញ្ហាក្នុងស្រុក និងខាងក្រៅ។ កំណើនបានកើនឡើងដល់ ៥,២ ភាគរយក្នុងឆ្នាំ ២០២២ ពី ៣ ភាគរយក្នុងឆ្នាំ ២០២១ ដែលជំរុញដោយការផលិតដ៏រឹងមាំ និងការស្ទុះងើបឡើងវិញនៅក្នុងវិស័យសេវាកម្ម។ សេដ្ឋកិច្ចត្រូវបានព្យាករថានឹងកើនឡើង ៥,៣ ភាគរយនៅឆ្នាំ ២០២៣ និង ៦,០ ភាគរយនៅឆ្នាំ ២០២៤។
លោកថ្លែងថា៖ «ការស្ទុះងើបឡើងវិញជាបន្តបន្ទាប់នៃវិស័យទេសចរណ៍ និងការនាំចេញបន្ទះសូឡា និងគ្រឿងបន្លាស់អគ្គិសនី គឺជាកត្តាជំរុញកំណើនដ៏សំខាន់។ ការនាំចេញសម្លៀកបំពាក់នៅតែខ្សោយ ដោយបង្ហាញសញ្ញាការស្ទុះងើបឡើងតិចតួចប៉ុណ្ណោះ ក្នុងរយៈពេលប៉ុន្មានខែថ្មីៗនេះ ហើយ សកម្មភាពសំណង់កាន់តែយឺតយ៉ាវក៏កំពុងដាក់សម្ពាធលើកំណើនផងដែរ»។
លោកលើកឡើងថា៖ «បន្ទាប់ពីរយៈពេលនៃការធ្លាក់ចុះពីកម្រិតខ្ពស់បំផុតកាលពីក្នុងខែមិថុនា ឆ្នាំមុន អតិផរណាបានស្ទុះងើបឡើងវិញដល់ ៣,៨ ភាគរយ កាលពីក្នុងខែកញ្ញា ឆ្នាំ ២០២៣ ដោយសារតម្លៃអាហារ និងឥន្ធនៈកាន់តែខ្ពស់»។ លោកបានបន្ថែមថា សម្រាប់ពេញ ១ ឆ្នាំ ២០២៣ អតិផរណាត្រូវបានគេរំពឹងថា នឹងមានជាមធ្យម ២,៣ ភាគរយ និងឈានទៅដល់និន្នាការរយៈពេលវែងរបស់វា ប្រហែល ៣ ភាគរយ នៅឆ្នាំ ២០២៤។
កាលពីដើមខែតុលា ធនាគារពិភពលោកបានព្យាករថា សេដ្ឋកិច្ចកម្ពុជានឹងមានកំណើន ៥,៥ ភាគរយ នៅឆ្នាំនេះ ហើយនឹងកើនឡើងដល់ ៦,១ ភាគរយ នៅឆ្នាំ ២០២៤។
លោក Aaditya Mattoo ប្រធានសេដ្ឋវិទូប្រចាំតំបន់អាស៊ីប៉ាស៊ីហ្វិកបូព៌ារបស់ធនាគារពិភពលោកបានលើកឡើងពីអត្ថប្រយោជន៍ប្រកបដោយសក្តានុពលនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុង ជ្រោយក្នុងតំបន់ (RCEP) សម្រាប់ប្រទេសកម្ពុជា។
លោកបានកត់សម្គាល់ថា RCEP អាចបង្កើនលទ្ធភាពចូលទីផ្សារ និងលើកទឹកចិត្តឱ្យមានកំណែទម្រង់ផ្នែកគោលនយោបាយ។ ការណ៍នេះមានសក្តានុពលក្នុងការជំរុញលំហូរពាណិជ្ជកម្ម និងការវិនិយោគ ដែលជួយដល់ផែនការរបស់ប្រទេសកម្ពុជា ក្នុងការធ្វើពិពិធកម្មសេដ្ឋកិច្ចរបស់ខ្លួន ដែលភាគច្រើនពឹងផ្អែក លើឧស្សាហកម្មកាត់ដេរ។
លោកបញ្ជាក់ថា៖ «ខ្ញុំមានសេចក្តីសោមនស្សរីករាយដែលមើលឃើញប្រទេសកម្ពុជា វិនិយោគលើវិស័យអេឡិចត្រូនិក»។ លោកបន្តថា៖ «ទោះជាយ៉ាងណាក៏ដោយ កម្ពុជាត្រូវតែពង្រឹងមូលដ្ឋានគ្រឹះរបស់ខ្លួន ជាពិសេសលើជំនាញ និងការតភ្ជាប់។ ទាំងនេះ គឺជាកំណែទម្រង់ដែលមិនតម្រូវឱ្យមានកិច្ចព្រមព្រៀងពាណិជ្ជកម្ម ប៉ុន្តែជាកំណែទម្រង់ក្នុងស្រុក»។
IMF បានឱ្យដឹងថា កំណើនឥណទានបានធ្លាក់ចុះមកនៅ ត្រឹម ៨,១ ភាគរយ ធៀបនឹងរយៈពេលដូចគ្នាកាលពីឆ្នាំមុន កាលពីខែសីហា ឆ្នាំ ២០២៣ ធ្លាក់ចុះពី ២៣,៥ ភាគរយ កាលពីឆ្នាំ ២០២១។ យ៉ាងណាក៏ដោយ អនុបាតឥណទានឯកជនធៀបនឹង GDP នៅតែកើនឡើងសម្រាប់កម្រិតនៃការអភិវឌ្ឍរបស់ប្រទេសកម្ពុជាក្នុងរង្វង់ ១៦០ ភាគរយ។ប្រាក់កម្ចីមិនដំណើរការបានកើនឡើងដល់ ៤,៦ ភាគរយ ក្នុងចំណោមប្រាក់កម្ចីសរុបកាលពីខែសីហា ដែលឆ្លុះបញ្ចាំងពីការកាត់បន្ថយក្នុងវិធានការប្រយ័តុ្នប្រយែង និងសម្ពាធ ដែលកើនឡើងនៅក្នុងផ្នែកខ្លះ នៃសេដ្ឋកិច្ច។
លោក Davide បន្ថែមថា៖ «ភាពមិនប្រាកដប្រជាជុំវិញចក្ខុវិស័យគឺខ្ពស់ ហើយហានិភ័យនឹងធ្លាក់ចុះ ជាពិសេសតម្រូវការដែលខ្សោយជាងការរំពឹងទុកពីប្រទេសអភិវឌ្ឍន៍ និងប្រទេសចិន គោលនយោបាយរូបិយវត្ថុរបស់អាមេរិកកាន់តែរឹតបន្តឹង ការបែងចែកភូមិសាស្ត្រសេដ្ឋកិច្ច និងបំណុលឯកជនក្នុងស្រុកមានកម្រិតខ្ពស់»៕
