ផែនទីបង្ហាញពីតំបន់ត្រួតស៊ីគ្នា ដែលមានប្រេង និងឧស្ម័នរហូតដល់ ៥០០ លានបារ៉ែលនៅក្រោមបាតសមុទ្រ។ រូបថត Bangkok Post
ភ្នំពេញៈ រដ្ឋាភិបាលកម្ពុជាស្វាគមន៍ និងរង់ចាំសហការជាមួយរដ្ឋាភិបាលថៃ សម្រាប់ការចរចាឡើងវិញលើតំបន់អភិវឌ្ឍន៍រួមគ្នា (JDA) សម្រាប់ការរុករកប្រេង និងឧស្ម័ន ក្នុងតំបន់ត្រួតស៊ីគ្នា (OCA) នៅលើផ្ទៃដី ២៦ ០០០ គីឡូម៉ែត្រការ៉េ ដែលតាមការប៉ាន់ស្មាន គឺមានស្តុកប្រេង និងឧស្ម័នរហូតដល់ ៥០០ លានបារ៉ែលនៅក្រោមបាតសមុទ្រ ជាប្រយោជន៍នៃអនាគតថាមពលខណៈវិបត្តិថាមពលនឹងឡើងខ្លាំងនៅពេលអនាគត។
យោងតាមប្រព័ន្ធផ្សព្វផ្សាយថៃ Thai BSP បានដកស្រង់សម្ដីលោក Pirapan Salirathavibhagaon ឧបនាយករដ្ឋមន្ត្រី និងជារដ្ឋមន្ត្រីក្រសួងថាមពល នៅថ្ងៃទី ៣០ ខែតុលា ដោយលើកឡើងថា រដ្ឋាភិបាលថ្មីនឹងផ្តោតលើការចរចាជាមួយកម្ពុជាលើ OCA ដោយបញ្ជាក់ពីការអភិវឌ្ឍរួមគ្នាជាជាងការកំណត់ព្រំដែនសមុទ្រ។
លោកបានលើកឡើងថា៖ «យើងត្រូវការថាមពលពី OCA មិនមែនការកំណត់ព្រំដែនសមុទ្រនោះទេ។ វាជាការលំបាក និងត្រូវការពេលវេលាដើម្បីដោះស្រាយវិវាទលើទឹកដី ដោយសារគ្មានប្រទេសណាអាចទទួលយកការផ្លាស់ប្តូរព្រំដែនរបស់ខ្លួនដោយងាយនោះទេ»។
ប្រទេសថៃ និងកម្ពុជា បានអះអាងពីតំបន់ទឹករាក់សមុទ្រ និងព្រំដែនសមុទ្ររៀងៗខ្លួន ហើយការអះអាងគឺផ្អែកលើច្បាប់ផ្សេងៗគ្នា។ លោក Pirapan អ្នកជំនាញផ្នែកច្បាប់ផងដែរនោះបានឱ្យដឹងថា៖«ប្រទេសទាំង ២ បានអះអាងភាពស្របច្បាប់ ដូច្នេះវាពិតជាពិបាកក្នុងការវិនិច្ឆ័យថាអ្នកណាត្រូវ ឬខុស»។
លោកបន្តថា៖ «បើយើងមិនអាចដោះស្រាយវិវាទបានដោយងាយ តើអ្វីជាចំណុចដែលធ្វើឱ្យវាកាន់តែស្មុគស្មាញដោយការភ្ជាប់បញ្ហាទាំង ២ជាមួយគ្នានោះ»។
លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានប្រាប់ភ្នំពេញប៉ុស្តិ៍នៅថ្ងៃទី ២ ខែវិច្ឆិកាថា កម្ពុជាស្វាគមន៍ក្នុងការធ្វើការជាមួយភាគីថៃសម្រាប់ JDA ដើម្បីផលប្រយោជន៍ទៅវិញទៅមកនៃប្រទេសទាំង ២។ លោកបន្តថា៖ «យើងកំពុងរង់ចាំធ្វើការជាមួយភាគីថៃ»។
យោងតាម BSP របស់ថៃបានដកស្រង់សម្ដី លោក Parnpree Bahiddha Nukara ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសដោយលើកឡើងថា បន្ទាប់ពីដំណើរទស្សនកិច្ចទៅកាន់ទីក្រុងភ្នំពេញកាលពីចុងខែកញ្ញា រដ្ឋាភិបាលរបស់លោកចាំបាច់ត្រូវតែបង្កើតគណៈកម្មាធិការបច្ចេកទេសថ្មីមួយ មុនពេលចាប់ផ្តើមការចរចា OCA ឡើងវិញជាមួយកម្ពុជា។
គេមិនទាន់ដឹងថា តើនរណានឹងត្រូវបញ្ចូលក្នុងគណៈកម្មាធិការនេះ ហើយថា តើវានឹងត្រូវបានដឹកនាំដោយក្រសួងការបរទេស ឬក្រសួងថាមពល ឬយ៉ាងណានោះទេ។ លោក Pirapan ដែលជាប្រធានគណបក្សថៃរួបរួមជាតិ ទំនងជាចង់ទទួលការងារនេះ។ លោកបានស្នើបំបែកបញ្ហាថាមពលចេញពីការចរចាព្រំដែនសមុទ្រ។ លោកបន្តថា វិស័យឯកជនដែលចាប់អារម្មណ៍លើថាមពល គួរតែចូលរួមក្នុងការចរចានេះ។
សិទ្ធិអភិវឌ្ឍន៍លើ OCA ដែលមានផ្ទៃទឹកទំហំ ២៦ ០០០ គីឡូម៉ែត្រការ៉េ ត្រួតលើព្រំដែនកម្ពុជា-ថៃ ក្នុងឈូងសមុទ្រថៃ គឺជាចំណុចអះអាងរវាងប្រទេសជិតខាងទាំង ២ នេះ ដែលភាគីទាំង ២ បានអះអាងតំបន់នេះតាំងពីដើមទសវត្សរ៍ឆ្នាំ ១៩៧០ មក។
ប្រទេសទាំង ២ បានចុះអនុស្សរណៈនៃការយោគយល់គ្នា (MoU) ដើម្បីរួមគ្នារុករកតំបន់នេះត្រូវបានចុះហត្ថលេខាតាំងពីឆ្នាំ ២០០១ ប៉ុន្តែក្រោយមកត្រូវបានពន្យារពេលដោយរដ្ឋាភិបាលថៃក្នុងឆ្នាំ ២០០៩។
បន្ទាប់ពីការផ្តួលរំលំរដ្ឋាភិបាលរបស់លោកស្រីយីងឡាក់ កាលពីខែឧសភា ឆ្នាំ ២០១៤ មេដឹកនាំនៃប្រទេសទាំង ២ ក៏បានស្វែងរកការចរចាឡើងវិញដែរ។
តំបន់ OCA ត្រូវបានគេប៉ាន់ប្រមាណថា នឹងមានផ្ទុកប្រេង និងឧស្ម័នរហូតដល់ ៥០០ លានបារ៉ែលនៅក្រោមបាតសមុទ្រ៕
