អូស្ត្រាលីបង្ហាញការគាំទ្រវេទិការវាងរាជរដ្ឋាភិបាល និងវិស័យឯកជននៅកម្ពុជា (G-PSF) ដោយទទួលស្គាល់ថាកិច្ចសន្ទនារវាងវិស័យសាធារណៈ និងវិស័យឯកជនពិតជាមានសារៈសំខាន់ណាស់ក្នុងការធានាឱ្យមានបរិយាកាសអំណោយផល និងភាពរឹងមាំនៃវិស័យផ្នែកធុរកិច្ចនៅកម្ពុជា។
គួរជម្រាបថា កិច្ចប្រជុំពេញអង្គនៃវេទិការវាងរាជរដ្ឋាភិបាលកម្ពុជា ជាមួយវិស័យឯកជនលើកទី១៩ នឹងប្រព្រឹត្តទៅនៅថ្ងៃទី ១៣ ខែវិច្ឆិកា ឆ្នាំ ២០២៣ នៅវិមានសន្តិភាព ក្រោមអធិបតីភាពលោក ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ការបញ្ជាក់នូវការគាំទ្ររបស់អូស្ត្រាលី បានធ្វើឡើងនៅក្នុងកិច្ចប្រជុំរវាងតំណាងស្ថានទូតអូស្ត្រាលីជាមួយតំណាងមកពីក្រុមប្រឹក្សាអភិវឌ្ឍន៍កម្ពុជា (CDC) និងសភាពាណិជ្ជកម្មកម្ពុជា (CCC) ដែលស្ថាប័នទាំងពីរមានតួនាទីជា លេខាធិការដ្ឋាននៃវេទិកាមួយនេះ។ នេះបើតាមការចុះផ្សាយរបស់ស្ថានទូតអូស្ត្រាលីប្រចាំកម្ពុជា។
ប្រភពដដែលបញ្ជាក់ថា៖ «តាមរយៈកម្មវិធីអភិវឌ្ឍសេដ្ឋកិច្ចដ៏ធំរបស់យើងគឺ កម្មវិធីភាពជាដៃគូ កម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) អូស្ត្រាលីកំពុងផ្តល់ការគាំទ្រផ្នែកបច្ចេកទេសក្នុងន័យជួយដល់វេទិកានេះ ក្នុងការបង្កើតវិធីសាស្ត្រអនុវត្តន៍ល្អប្រសើរមួយ និងធានាបាននូវការចូលរួមប្រកបដោយបរិយាបន្ន និងបម្រើប្រយោជន៍រួមសម្រាប់ប្រជាជនកម្ពុជាទាំងអស់»។
សេចក្តីប្រកាសព័ត៌មានស្តីពីជំនួបនោះ បានឱ្យដឹងថា នៅក្នុងកិច្ចប្រជុំនេះ អូស្ត្រាលីបានទទួលស្គាល់ពីសារៈសំខាន់នៃការសន្ទនាបើកចំហរវាងវិស័យសាធារណៈ និងឯកជន ហើយបានរំឭកឡើងវិញនូវការប្តេជ្ញាចិត្តរបស់ខ្លួនក្នុងការគាំទ្រ G-PSF ជាវេទិកាចម្បងសម្រាប់ការសម្របសម្រួលកិច្ចសន្ទនានេះ។
សេចក្តីប្រកាសដដែលបន្តថា G-PSF ត្រូវបានបង្កើតឡើងក្នុងឆ្នាំ ១៩៩៩ ហើយបានទទួលការគាំទ្រពីរដ្ឋាភិបាលអូស្ត្រាលីពីឆ្នាំ ២០០២ ដល់ឆ្នាំ ២០០៩ ក្នុងអំឡុងពេលនោះវាត្រូវបានទទួលស្គាល់ថាជាអ្នកដឹកនាំសកលលោកក្នុងការអនុវត្តន៍ល្អបំផុតនៃការសន្ទនាសាធារណៈ និងឯកជន។ ចាប់តាំងពីពេលនោះមក G-PSF បានពង្រីកពី ៦ ទៅ ១៤ ក្រុមការងារ ដោយបង្ហាញពីសារៈសំខាន់នៃការសន្ទនារបស់វិស័យឯកជន ដើម្បីកែលម្អបរិយាកាសបើកដំណើរការអាជីវកម្ម។
លោក Justin Whyatt ឯកអគ្គរដ្ឋទូតអូស្ត្រាលីប្រចាំនៅកម្ពុជា បានមានប្រសាសន៍ថា «វិស័យឯកជនរបស់កម្ពុជាមានសក្តានុពលខ្លាំងក្នុងការជួយដល់ការអភិវឌ្ឍសេដ្ឋកិច្ចរបស់កម្ពុជា ហើយG-PSF គឺជាឧបករណ៍ដ៏មានតម្លៃសម្រាប់ដោះសោសមត្ថភាព និងសក្តានុពលនេះ ដោយជំរុញកិច្ចសហប្រតិបត្តិការជិតស្និទ្ធរវាងរាជរដ្ឋាភិបាលកម្ពុជានិងក្រុមការងារដើម្បីដោះស្រាយបញ្ហាប្រឈមរបស់វិស័យឯកជន»៕
