កិច្ចប្រជុំក្រុមប្រឹក្សាអភិវឌ្ឍន៍កម្ពុជា (CDC) ស្តីពីកិច្ចប្រជុំពិគ្រោះយោបល់កម្រិតគោលនយោបាយស្តីពីហិរញ្ញប្បទានអភិវឌ្ឍន៍ផ្លូវការ រវាងរាជរដ្ឋាភិបាលកម្ពុជា និងរដ្ឋាភិបាលជប៉ុន ដែលបានចេញផ្សាយកាលពីថ្ងៃទី៦ ខែវិច្ឆិកា។ រូបថត CDC
ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) បានលើកឡើងថា ទំហំហិរញ្ញប្បទានរបស់ជប៉ុនត្រូវបានរំពឹងថានឹងកើនឡើងជាបន្តបន្ទាប់ តាមរយៈការចុះហត្ថលេខាលើលិខិតប្ដូរសារក្នុងក្របខ័ណ្ឌដៃគូយុទ្ធសាស្ត្រគ្រប់ជ្រុងជ្រោយ រវាងប្រទេសទាំង២ ខណៈ៣០ឆ្នាំមកនេះ ជប៉ុនបានបើកផ្តល់ហិរញ្ញប្បទានដល់កម្ពុជាជាង ៤ ពាន់លានដុល្លារ។
បើតាមសេចក្តីប្រកាសព័ត៌មាន របស់ក្រុមប្រឹក្សាអភិវឌ្ឍន៍កម្ពុជា (CDC) ស្តីពីកិច្ចប្រជុំពិគ្រោះយោបល់កម្រិតគោលនយោបាយស្តីពីហិរញ្ញប្បទានអភិវឌ្ឍន៍ផ្លូវការ រវាងរាជរដ្ឋាភិបាលកម្ពុជា និងរដ្ឋាភិបាលជប៉ុន ដែលបានចេញផ្សាយកាលពីថ្ងៃទី៦ ខែវិច្ឆិកា បានឱ្យដឹងថា ភាគីជប៉ុនគឺជាដៃគូអភិវឌ្ឍន៍ដ៍សំខាន់របស់កម្ពុជា ពោលគឺចាប់ពីឆ្នាំ១៩៩២ ដល់ឆ្នាំ២០២២ ភាគីជប៉ុនបានបើកផ្តល់ហិរញ្ញប្បទានដល់កម្ពុជាប្រមាណ ៤ ៣១៩ លានដុល្លារ ស្មើនឹង ១៤ភាគរយ នៃហិរញ្ញប្បទានផ្តល់ដោយដៃគូអភិវឌ្ឍន៍ទាំងអស់។
តាមរយៈជំនួបនេះដែរ លោក ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានទី ២ ក្រុមប្រឹក្សាអភិវឌ្ឍន៍កម្ពុជា បានលើកឡើងតាមរយៈសេចក្តីប្រកាសព័ត៌មានថា កម្ពុជា ពិតជាអរគុណយ៉ាងជ្រាលជ្រៅដល់រដ្ឋាភិបាលជប៉ុននិងប្រជាជនជប៉ុន ចំពោះការបន្តប្តេជ្ញាគាំទ្រដល់ការអភិវឌ្ឍសង្គម-សេដ្ឋកិច្ចនៅកម្ពុជា។
លោកបានបន្ថែមថា កិច្ចប្រជុំពិគ្រោះយោបល់កម្រិតគោលនយោបាយនេះ ត្រូវបានរៀបចំឡើងជាលើកដំបូងក្នុងអាណត្តិរាជរដ្ឋាភិបាល នីតិកាលទី៧ នៃរដ្ឋសភា និងស្របពេលជាមួយការរៀបចំប្រារព្ធខួបលើកទី៧០ នៃទំនាក់ទំនងការទូតរវាងប្រទេសទាំង២ ដែលគ្រោងនឹងរៀបចំនាចុងឆ្នាំ២០២៣នេះ។
លោកបានបញ្ជាក់ថា៖«ក្របខ័ណ្ឌគោលនយោបាយរបស់រាជរដ្ឋាភិបាលកម្ពុជា គឺផ្តោតការយកចិត្តទុកដាក់លើកិច្ចសហប្រតិបត្តិការអភិវឌ្ឍន៍ ដើម្បីសម្រេចបានទស្សនវិស័យរបស់កម្ពុជាក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងប្រទេសមានចំណូលខ្ពស់នៅឆ្នាំ២០៥០»។
នាឱកាសនោះដែរ លោក UENO Atsushi ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំនៅកម្ពុជាក៏បានលើកឡើងដែរថា ធម្មនុញ្ញនៃកិច្ចសហប្រតិបត្តិការអភិវឌ្ឍន៍ ដែលរដ្ឋាភិបាលជប៉ុនបានកែសម្រួលកាលពីខែមិថុនា ឆ្នាំ២០២៣ កន្លងទៅ ភាគីទាំង២បានធ្វើនិងបានពិនិត្យឡើងវិញនូវគោលនយោបាយសហប្រតិបត្តិការអភិវឌ្ឍន៍សម្រាប់កម្ពុជារួចហើយ។
លោកបានបញ្ជាក់ថា៖«ភាគីទាំង២ បានធ្វើ និងពិនិត្យឡើងវិញនូវគោលនយោបាយសហប្រតិបត្តិការអភិវឌ្ឍន៍សម្រាប់កម្ពុជាការពិភាក្សា និងផ្លាស់ប្ដូរយោបល់គ្នា លើបញ្ហាប្រឈមក្នុងការអនុវត្តគម្រោងសហប្រតិបត្តិការនាពេលកន្លងមក ក្នុងន័យបន្តពង្រឹងសមត្ថភាពនៃការអនុវត្តគម្រោងនាពេលអនាគត»។
អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា រាល់ការស្នើហិរញ្ញប្បទាននានា កម្ពុជា តែងតែរៀបចំគម្រោងអាទិភាព ឬក៏គម្រោងសំខាន់ៗ ដើម្បីស្នើទៅកាន់ប្រទេសដៃគូរបស់ខ្លួន ដូចជាប្រទេសជប៉ុនជាដើម ដើម្បីទទួលបានថវិកាក្នុងអនុវត្តគម្រោង ដែលអាចជាហិរញ្ញប្បទានឥតសំណង ឬមានសំណងក្នុងអត្រាការប្រាក់ទាប។
លោកបានប្រាប់ឱ្យដឹងទៀតថា៖«យើងឃើញថា ហិរញ្ញប្បទានរបស់ជប៉ុន បានចូលរួមដល់ការអភិវឌ្ឍក្នុងវិស័យសំខាន់ៗយ៉ាងច្រើន ដូចជា វិស័យទឹកស្អាត, វិស័យអប់រំ,វិស័យសុខុមាលភាពជាដើម ហើយអ្វីដែលជប៉ុនបានផ្តល់មកនេះ វាជាតម្រូវការចាំបាច់របស់យើង ក្នុងការធានាបង្កើននូវផលិតភាពសេដ្ឋកិច្ច ធ្វើឱ្យគុណភាពសង្គមកាន់តែប្រសើរឡើង»។
បើតាមក្រុមប្រឹក្សាអភិវឌ្ឍន៍កម្ពុជា (CDC) ជាលទ្ធផល ភាគីទាំង២បានឯកភាពគ្នាបន្តកិច្ចសហប្រតិបត្តិការអភិវឌ្ឍន៍ទ្វេភាគី ដោយផ្តោតលើវិស័យ អាទិភាព ចំនួន ៣ គឺ៖ ១) បរិវត្តកម្មសង្គមឌីជីថល, ២) ការអភិវឌ្ឍសេដ្ឋកិច្ចប្រកបដោយចីរភាព និង៣) ការអភិវឌ្ឍហេដ្ឋារចនាសម្ព័ន្ធទន់ និងរឹង ដោយវិស័យទាំងនេះមានសង្គតិភាពជាមួយទិសដៅអភិវឌ្ឍន៍ ដូចមានចែងក្នុងយុទ្ធសាស្ត្របញ្ចកោណដំណាក់កាលទី១ និងធម្មនុញ្ញកិច្ចសហប្រតិបត្តិការអភិវឌ្ឍន៍របស់ជប៉ុន។
ជាមួយគ្នានេះ ភាគីជប៉ុនក៏បានឯកភាពយកសំណើ និងធាតុចូលរបស់ភាគីកម្ពុជា ដើម្បីដាក់បញ្ចូលទៅក្នុងសេចក្តីព្រាងនៃគោលនយោបាយស្តីពីសហប្រតិបត្តិការអភិវឌ្ឍន៍សម្រាប់កម្ពុជា ដែលភាគីជប៉ុនគ្រោងនឹងរៀបចំនៅឆ្នាំ២០២៤ខាងមុខ។
ដោយឡែក កិច្ចប្រជុំកម្រិតគោលនយោបាយស្តីពីហិរញ្ញប្បទានសហប្រតិបត្តិការអភិវឌ្ឍន៍ ផ្លូវការរវាងរាជរដ្ឋាភិបាលកម្ពុជា និងរដ្ឋាភិបាលជប៉ុន ត្រូវបានរៀបចំឡើងចំនួន ១៣ លើក រួចមកហើយ ដោយកិច្ចប្រជុំលើកទី១៤ នេះ គ្រោងនឹងធ្វើឡើងក្នុងឆ្នាំ២០២០ ប៉ុន្តែត្រូវបានពន្យារដោយសារការរាតត្បាតនៃជំងឺកូវីដ១៩៕
