លោក សុខ សូកេន ពេលដឹកនាំគណៈប្រតិភូទៅទស្សនកិច្ចអាកាសយានដ្ឋានអន្ដរជាតិ-អង្គរ កាលពីថ្មីៗនេះ ។ រូបថត មន្ទីរទេសចរណ៍ខេត្ដសៀមរាប
ភ្នំពេញៈ អ្នកនាំពាក្យអាកាសចរណ៍ស៊ីវិល បានឱ្យដឹងថា ក្រោយពីបើកដំណើរការមកទល់បច្ចុប្បន្ន អាកាសយានដ្ឋានអន្តរជាតិសៀមរាប-អង្គរ ទទួលបានអ្នកដំណើរចន្លោះពី ២៦០០ នាក់ ទៅ ៣២០០នាក់ ក្នុង ១ ថ្ងៃ ដែលអ្នកដំណើរភាគច្រើនហោះហើរពីតំបន់អាស៊ាន និងចិន។
លោក ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិល បានឱ្យដឹងនៅថ្ងៃទី៧ ខែវិច្ឆិកា ឆ្នាំ២០២៣ ថា អ្នកដំណើរភាគច្រើនហោះហើរពីតំបន់អាស៊ាន និងចិន ហើយក្នុងនោះភ្ញៀវចម្រុះជាតិសាសន៍អាស៊ានមានចំនួន៧៥ភាគរយនិងភ្ញៀវអឺរ៉ុបមានចំនួន ២៥ ភាគរយ។
លោកបានបញ្ជាក់ថា៖«ចំនួនជើងហោះហើរនៅអាកាសយានដ្ឋានអន្តរជាតិសៀមរាប-អង្គរនឹងកើនដល់៤២ជើងក្នុង១ថ្ងៃ(ទ្វេទិស)នៅរដូវកាល Winter 2023នេះ។ បច្ចុប្បន្នមានក្រុមហ៊ុនហោះហើរចំនួន៧ ហើយនឹងមានការកើនឡើងដល់៩ឬ១០ក្រុមហ៊ុន នៅសប្តាហ៍បន្តបន្ទាប់ៗខាងមុខ»។
លោក ស៊ីន ចាន់សិរីវុត្ថា បានបន្ថែមថា អាកាសយានដ្ឋានអន្តរជាតិសៀមរាប-អង្គរ មានលំដាប់ថ្នាក់នៃការហោះហើរប្រភេទ 4E ដែលអាចផ្តល់លទ្ធភាពឱ្យយន្តហោះធុនធំ Boeing747 និង Airbus A340 ចុះចតបាន ហើយនឹងអាចមានលទ្ធភាពទទួលអ្នកដំណើរចំនួន៧លាននាក់ក្នុង១ឆ្នាំផងដែរ សម្រាប់ផែនការរយៈពេលខ្លី និង២០លាននាក់ក្នុង ១ ឆ្នាំ សម្រាប់ផែនការរយៈពេលវែង។
នៅក្នុងពេលដឹកនាំគណៈប្រតិភូក្រសួងទេសចរណ៍ អង្គភាពពាក់ព័ន្ធ និងវិស័យឯកជនធ្វើដំណើរទស្សនកិច្ចនិងត្រួតពិនិត្យអាកាសយានដ្ឋានអន្តរជាតិសៀមរាប-អង្គរថ្មី កាលពីពេលកន្លងទៅ លោក សុខ សូកេន រដ្ឋមន្ត្រីក្រសួងទេសចរណ៍បានលើកឡើងថា អាកាសយានដ្ឋានថ្មីនេះតំណាងឱ្យសេវាបដិសណ្ឋារកិច្ចដ៏សំខាន់មួយនៅក្នុងការប្តេជ្ញាចិត្តរបស់កម្ពុជាក្នុងការផ្តល់សេវាកម្មប្រកបដោយគុណភាពដល់អ្នកដំណើរ និងការបើកទ្វារទទួលភ្ញៀវទេសចរអន្តរជាតិបន្ថែមទៀត។
លោកបានបញ្ជាក់ថា៖ «វិស័យទេសចរណ៍កម្ពុជាត្រូវតែពិចារណាដល់ការលើកកម្ពស់សេវាកម្មនានា ជាពិសេសសេវាកម្មទេសចរណ៍ឱ្យមានកម្រិតអន្តរជាតិ មានន័យថា ទាំងហេដ្ឋារចនាសម្ព័ន្ធរឹង និងទន់ ត្រូវតែដើរទៅទន្ទឹមគ្នាដោយមិនអាចខ្វះបាន»។
ក្នុងពេលចុះពិនិត្យការងារបញ្ចប់នៃគម្រោងសាងសង់ អាកាសយានដ្ឋានអន្តរជាតិ សៀមរាប-អង្គរ កាលពីសប្តាហ៍មុន លោក តឹករ៉េត សំរេច រដ្ឋលេខាធិការប្រចាំការក្រសួងរៀបចំដែនដីនគរូបនីយកម្ម និងសំណង់ និងជាប្រធានគណៈកម្មការតម្រង់ទិសសម្រាប់ការសាងសង់អាកាសយានដ្ឋានអន្តរជាតិ សៀមរាប-អង្គរ បានថ្លែងថា ការងាររបស់គណៈកម្មការនៅពេលនេះ គឺបានចប់សព្វគ្រប់ ដោយរង់ចាំតែនាយករដ្ឋមន្ត្រីសម្ពោធជាផ្លូវការប៉ុណ្ណោះ។
លោកបានរំឭកដែរថា គម្រោងធំៗចំនួន២បានចាប់ផ្តើមចរចាក្នុងពេលដំណាលគ្នាគឺគម្រោងសាងសង់អាកាសយានដ្ឋានអន្តរជាតិសៀមរាប-អង្គរនិងគម្រោងសាងសង់ផ្លូវល្បឿនលឿនភ្នំពេញ-ខេត្តព្រះសីហនុ ប៉ុន្តែដោយសារវិបត្តិហិរញ្ញវត្ថុសកលឆ្នាំ២០០៨ គម្រោងទាំង២នេះ មិនអាចធ្វើដំណាលគ្នាបាន។
លោកបានបញ្ជាក់ថា៖«ទោះបីជាជួបវិបត្តិសេដ្ឋកិច្ចដោយសារជំងឺកូវីដ១៩ និងផលវិបាកជាច្រើនក្នុងដំណើរការសាងសង់ក៏ដោយ ក្រុមការងារទាំងអស់បានពុះពារ ដោះស្រាយជាមួយគ្នារហូតទទួលបានជោគជ័យក្នុងស្មារតីទទួលខុសត្រូវខ្ពស់និងមានលទ្ធផលដូចថ្ងៃនេះ»។
លោក តឹករ៉េត សំរេច បានបន្តថា៖«សម្រាប់ទៅថ្ងៃអនាគតយើងមិនត្រឹមតែមានអាកាសយានដ្ឋានខ្នាតអន្តរជាតិនោះទេ យើងនឹងមានទីក្រុងរណបទំនើបនៅតំបន់ជុំវិញអាកាសយានដ្ឋានដែលនឹងក្លាយទៅជាតំបន់ទ្រទ្រង់សេដ្ឋកិច្ចដ៏សំខាន់ទាំងក្នុងតំបន់ និងសេដ្ឋកិច្ចកម្ពុជាទាំងមូល ដែលនេះគឺជាមោទនភាពដែលបានកើតចេញពីការខិតខំប្រឹងប្រែងរបស់យើងទាំងអស់គ្នា»។
សូមរំឭកថា អាកាសយានដ្ឋានអន្តរជាតិសៀមរាប-អង្គរ ត្រូវបានបើកឱ្យដំណើរការ កាលថ្ងៃទី១៦ ខែតុលា ឆ្នាំ២០២៣ ដែលមានទីតាំងស្ថិតនៅក្នុងឃុំតាយែក ស្រុកសូទ្រនិគម ខេត្តសៀមរាប ដោយគ្របដណ្តប់លើផ្ទៃដីប្រមាណ ៧០០ ហិកតា មានចម្ងាយប្រមាណ៤០គីឡូម៉ែត្រពីប្រាសាទអង្គរវត្ត និង ៥១ គីឡូម៉ែត្រ ពីទីរួមខេត្តសៀមរាប។អាកាសយានដ្ឋានអន្តរជាតិនេះ នឹងសម្ពោធដាក់ឱ្យប្រើប្រាស់ជាផ្លូវការនៅថ្ងៃទី១៦ ខែវិច្ឆិកា ឆ្នាំ២០២៣ ខាងមុខ ក្រោមអធិបតីភាពលោក ហ៊ុន ម៉ាណែត នាយករដ្ឋមន្ត្រីកម្ពុជា៕
