ក្រុមប្រឹក្សាអភិវឌ្ឍន៍កម្ពុជា។ ហេង ជីវ័ន
ភ្នំពេញៈ ក្រុមហ៊ុន Cambodia Investment Management (CIM) និងក្រុមហ៊ុន Tanncam Investment Pte បានក្លាយជាភាគទុនិកយុទ្ធសាស្ត្រ ដែលរួមបញ្ចូលគ្នា ៤០ ភាគរយនៃក្រុមហ៊ុន OBORManagement Management ដើម្បីពង្រីកបន្ថែមនូវអាជីវកម្មរបស់ខ្លួននៅកម្ពុជា។
កិច្ចសហការគ្នារវាងក្រុមហ៊ុន OBOR Management ក្រុមហ៊ុន CIM និងក្រុមហ៊ុន Tanncam គឺបង្ហាញអំពីចក្ខុវិស័យរួមសម្រាប់អនាគតហិរញ្ញវត្ថុរបស់កម្ពុជា ហើយវាក៏បង្ហាញពីការយកចិត្តទុកដាក់របស់ពួកគេក្នុងការជំរុញកំណើនសេដ្ឋកិច្ចតាមរយៈការផ្តល់នូវដំណោះស្រាយហិរញ្ញវត្ថុជាយុទ្ធសាស្ត្រដល់អាជីវកម្មនៅកម្ពុជា និងឱកាសវិនិយោគដល់វិនិយោគិនអន្តរជាតិ។ នេះបើយោងតាមសេចក្តីប្រកាសរួមរបស់ក្រុមហ៊ុន។
លោក Christophe Forsinettiប្រធានក្រុមហ៊ុន OBOR បានឱ្យដឹងថា ភាពជាដៃគូជាមួយក្រុមហ៊ុនCIM និងក្រុមហ៊ុនTanncamជាពេលវេលាដ៏សំខាន់មួយនៅក្នុងយុទ្ធសាស្ត្រកំណើនរបស់ក្រុមហ៊ុន។
លោកថ្លែងថា៖ «យើងមានសេចក្តីរំភើបចំពោះការរួមបញ្ចូលគ្នានេះ និងឱកាសដែលកិច្ចសហការនេះនឹងនាំមកនូវភាពឈានមុខគេ។ វាស្របតាមការប្តេជ្ញាចិត្តរបស់យើងក្នុងការផ្តល់នូវសេវាហិរញ្ញវត្ថុសាជីវកម្ម និងប្រឹក្សាយោបល់ ដ៏សំខាន់ដល់អតិថិជនរបស់យើង»។
លោក Anthony Galliano អគ្គនាយកក្រុមហ៊ុន Cambodian Investment Management Holding បានឱ្យដឹងថា ក្រុមហ៊ុន CIM មានវត្តមានរយៈពេល ១៤ ឆ្នាំនៅកម្ពុជា ដែលផ្តល់នូវសេវាកម្មអាជីវកម្មជាច្រើនប្រភេទ។
លោកលើកឡើងថា៖ «រួមគ្នាជាមួយក្រុមហ៊ុន Tanncam យើងគឺជាវិនិយោគិនប្រកបដោយទំនុកចិត្ត និងជាអ្នកគាំទ្រដ៏ខ្ជាប់ខ្ជួនរបស់កម្ពុជា។ ខ្ញុំជឿជាក់យ៉ាងមុតមាំថា ទីផ្សារមូលធននឹងក្លាយជាកាតាលីករដ៏សំខាន់សម្រាប់ដំណាក់កាលបន្ទាប់នៃកំណើន និងការពង្រីកសេដ្ឋកិច្ចរបស់កម្ពុជា»។
លោកបញ្ជាក់ថា ខណៈពេលដែលការវិនិយោគផ្ទាល់ពីបរទេសជាទិដ្ឋភាពដ៏សំខាន់នៃសេដ្ឋកិច្ច ទីផ្សារហិរញ្ញវត្ថុដើរតួយ៉ាងសំខាន់ ជាអ្នកផ្តល់មូលធន និងសន្ទនីយភាពដល់រដ្ឋាភិបាល អាជីវកម្ម និងសហគ្រិន។
លោកថា៖«ខ្ញុំរំពឹងថា ក្រុមហ៊ុន OBOR Management នឹងបំពេញតួយ៉ាងសំខាន់ក្នុងការបង្កើតភាពមើលឃើញ ទំនុកចិត្ត និងលំហូរវិនិយោគចូលទៅទីផ្សារមូលធននៅពេលពួកគេអភិវឌ្ឍ»។
ក្នុងរយៈពេល ៦ ឆ្នាំ កន្លងមកនេះ ក្រុមហ៊ុន OBOR Management បានតាំងខ្លួនជាក្រុមហ៊ុនគ្រប់គ្រងទ្រព្យសកម្មឈានមុខគេមួយក្នុងប្រទេសកម្ពុជា ដោយវិនិយោគលើផលបត្រចម្រុះរបស់ក្រុមហ៊ុន។ ក្រុមហ៊ុននេះ បានគ្រប់គ្រង និងចាកចេញពីគម្រោងយ៉ាងសកម្ម ដោយសម្រេចបានចន្លោះពី ១៥ ភាគរយ ទៅ ១០០ ភាគរយ នៃផលចំណេញផ្ទៃក្នុង (IRR) ប្រចាំឆ្នាំលើការវិនិយោគមួយចំនួនរបស់ខ្លួន។
បច្ចុប្បន្នក្រុមហ៊ុន OBOR Management កំពុងធ្វើការលើការបង្កើតមូលនិធិគ្រប់គ្រងដោយផ្តោតលើសហគ្រាសធុនតូច និងមធ្យមដំបូងគេនៅកម្ពុជា ដើម្បីដោះស្រាយគម្លាតហិរញ្ញវត្ថុ សម្រាប់សហគ្រាសធុនតូច និងមធ្យមនៅកម្ពុជា ខណៈពេលដែលផ្តល់ផលិតផលវិនិយោគដល់វិនិយោគិនក្នុងស្រុក៕
