ក្រុមហ៊ុនសំណង់ DBD បានបង្ហាញពីការកើនឡើងនៃអាជីវកម្មរបស់ខ្លួនក្នុងត្រីមាសទី៣។ ហុង មិនា
ភ្នំពេញៈ DBD Engineering Plc ជាក្រុមហ៊ុនដំបូង ដែលបានចុះបញ្ជីនៅទីផ្សារកំណើនរបស់ផ្សារមូលបត្រកម្ពុជា (CSX) បានរាយការណ៍ពីកំណើនអាជីវកម្មយ៉ាងល្អនៅក្នុងត្រីមាសទី៣ ឆ្នាំនេះ គិតត្រឹមខែកញ្ញា ចំពេលមានការធ្លាក់ចុះទីផ្សារសំណង់ក្នុងស្រុក។
នៅក្នុងឯកសារផ្ញើជូន CSX កាលពីថ្ងៃទី៨ ខែវិច្ឆិកា ក្រុមហ៊ុនវិស្វកម្ម និងសំណង់ពហុបំណងមួយនេះ បានប្រកាសប្រាក់ចំណេញប្រតិបត្តិការសរុបចំនួន ១,៥០៥ ពាន់លានរៀល (ឬ ៣៧០,២៧២ ដុល្លារ) កើនឡើងពី ១,២៧៦ ពាន់លានរៀល ឬ ៣១១,៤១១ ដុល្លារ កាលពីត្រីមាសមុន កើនឡើង ១៧,៩ ភាគរយ។
ការកើនឡើងប្រាក់ចំណេញប្រតិបត្តិការត្រូវបានជំរុញដោយការកើនឡើងនៃប្រាក់ចំណេញដុលចំនួន ២៣៨២,៥២ ភាគរយ និងប្រាក់ចំណូលផ្សេងទៀតចំនួន ៥៦៦,៩៥ ភាគរយ។ ការកើនឡើងប្រាក់ចំណេញសុទ្ធត្រូវបានជំរុញដោយការកើនឡើងប្រាក់ចំណេញដុលចំនួន ២៣៨២,៥២ ភាគរយ និងប្រាក់ចំណេញមុនបង់ពន្ធចំនួន ១៥៨,៥៩ ភាគរយ។
លោក នាង វីធី ប្រធាន និងជានាយកប្រតិបត្តិ បានឱ្យដឹងនៅក្នុងឯកសារនេះថា ការកើនឡើងប្រាក់ចំណូលត្រូវបានជំរុញដោយការកើនឡើងប្រាក់ចំណូលផ្នែកសំណង់ចំនួន ៣៤,១៨ ភាគរយ និងការលក់ទំនិញមានចំនួន ៤៤៧,៦៦ ភាគរយ។
លោក នាង វីធី ប្រធាន និងជានាយកប្រតិបត្តិបានឱ្យដឹងនៅក្នុងឯកសារនោះថា៖ «ខ្ញុំសូមថ្លែងអំណរគុណចំពោះក្រុមប្រឹក្សាភិបាល ថ្នាក់គ្រប់គ្រង និងបុគ្គលិកទាំងអស់ សម្រាប់ដំបូន្មានល្អៗ និងការខិតខំប្រឹងប្រែងរបស់អ្នកទាំងអស់ ដើម្បីរក្សាភាពរីកចម្រើនរបស់ក្រុមហ៊ុននេះ»។
ក្រុមហ៊ុន DBD ត្រូវបានបង្កើតឡើងកាលពីឆ្នាំ១៩៩៥ ផ្តល់សេវាការរចនា ការសាងសង់ ការដំឡើង និងការកម្មថែទាំ។ នេះបើយោងតាមឯកសារ។
ឯកសារនេះបន្តថា៖ «ប្រាក់ចំណូលសំខាន់របស់ក្រុមហ៊ុន DBD បានមកពីសេវាកម្មសាងសង់ និងថែទាំដែលរួមមាន មេកានិក អគ្គិសនី បរិក្ខារទឹក (MEP) និងការងារវិស្វកម្មសំណង់ស៊ីវិល ដោយប្រាក់ចំណូលសរុបដែលបានកត់ត្រាក្នុងរបាយការណ៍ហិរញ្ញវត្ថុបានបែងចែកជា ៣ប្រភេទគឺសំណង់ និងការថែទាំ ការលក់ទំនិញប្រាក់ចំណូលផ្សេងទៀត»។
ឯកសារនេះបានកត់សម្គាល់ថា ក្រុមហ៊ុន DBD កាលពីដើមឆ្នាំ ២០២២ ត្រូវបានជួលឱ្យធ្វើការលើគម្រោងសាងសង់ និងដំឡើងប្រព័ន្ធ MEP សម្រាប់អគារ Wing Tower នៅកែងមហាវិថីព្រះមុនីវង្ស និងផ្លូវកម្ពុជាក្រោមក្នុងរាជធានីភ្នំពេញ ដែលរំពឹងថានឹងបញ្ចប់នៅឆ្នាំនេះ។
ក្រុមហ៊ុននេះ ក៏បានលើកឡើងពីគម្រោង «រោងចក្រចំហាយទឹក ជីវម៉ាស» ពីក្រុមហ៊ុន Berkeley Energy Commercial and Industrial Solutions (BECIS) ដែលមានមូលដ្ឋាននៅប្រទេសសិង្ហបុរី ដែលនឹងផ្គត់ផ្គង់ថាមពលជីវឧស្ម័នដល់ក្រុមហ៊ុនផលិតស្រាបៀរ Heineken។
លើសពីនេះ ក្រុមហ៊ុនបានធ្វើការងារលើការអភិវឌ្ឍធំៗមួយចំនួន រួមមាន ផ្សារទំនើប AEON 1, AEON 2, North Park Condominium, Chip MongSenSok, Chip Mong598 និង Chip Mong271៕
