គ្រាប់កាហ្វេដែលលីងរួច។ សហការី
មណ្ឌលគិរីៈ មន្ទីរកសិកម្ម រុក្ខាប្រមាញ់ និងនេសាទ ខេត្តមណ្ឌលគិរី ឱ្យដឹងថា ទិន្នផលគ្រាប់កាហ្វេស្រស់ខេត្តមណ្ឌលគិរីក្នុងឆ្នាំ ២០២៣ នេះមានតម្លៃខ្ពស់ជាងឆ្នាំមុន ក្រោយពីមានកិច្ចសន្យាផលិតកម្មកសិកម្ម ខណៈការដាំដុះ និងផ្ទៃដីដាំដុះមានការកើនឡើងដូចគ្នា។
ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តមណ្ឌលគិរី លោក សុង ឃាង បានឱ្យដឹងកាលពីថ្ងៃទី ១៩ ខែវិច្ឆិកា ថា តម្លៃផលិតផលគ្រាប់កាហ្វេស្រស់ ឬគ្រាប់កាហ្វេឆៅចម្រុះនៅខេត្តមណ្ឌលគិរី បានកើនឡើងចន្លោះ ២០០-៣០០ រៀល ក្នុង ១ គីឡូក្រាមនាឆ្នាំ ២០២៣ នេះ ក្រោយពីមានកិច្ចសន្យាផលិតកម្មកសិកម្ម ស្ដីពីការផ្គត់ផ្គង់ផលិតផលកាហ្វេស្រស់រវាងអ្នកក្រុមផលិតជាមួយក្រុមហ៊ុនប្រមូលទិញ។
លោកប្រាប់ថា៖ «តម្លៃគ្រាប់កាហ្វេស្រស់ ឬគ្រាប់កាហ្វេឆៅចម្រុះមានតម្លៃចន្លោះ ១ ៣៥០ ទៅ ១ ៥០០ រៀលក្នុងឆ្នាំនេះ ដោយកើនឡើង ២០០-៣០០ រៀល ហើយរំពឹងថា តម្លៃគ្រាប់កាហ្វេស្រស់ ឬគ្រាប់កាហ្វេឆៅចម្រុះនៅតែអាចបន្តកើនដល់ចន្លោះពី ១ ៤០០-១ ៦០០ រៀល ក្នុង ១ គីឡូក្រាមសម្រាប់ឆ្នាំបន្តបន្ទាប់ទៀត»។
លោក សុង ឃាង បានបន្តថា កត្តាដែលធ្វើឱ្យតម្លៃគ្រាប់កាហ្វេស្រស់ ឬកាហ្វេឆៅ កើនឡើង គឺដោយសារតែមានការសហការគ្នារវាងមន្ទីរកសិកម្មខេត្តមណ្ឌលគិរីជាមួយក្រុមហ៊ុន ខូហ្វី ក្នុងរយៈពេល ២ ឆ្នាំ ដើម្បីប្រមូលទិញគ្រាប់កាហ្វេស្រស់ក្នុងតម្លៃខ្ពស់នៅលើទីផ្សារ។
លោកបញ្ជាក់ថា៖ «ការរក្សាតម្លៃទីផ្សារនៃផលិតផលកាហ្វេស្រស់ ឬគ្រាប់កាហ្វេឆៅបានរួមចំណែកលើកកម្ពស់ជីវភាពរស់នៅកសិករកាន់តែប្រសើរ និងមានភាពធន់ជាងមុន។ ជាមួយនេះអាចពង្រឹងទៅលើការដាំដុះដើម្បីធានាខ្សែច្រវាក់ផ្គត់ផ្គង់ត្រឹមត្រូវតាមស្តង់ដា និងនិរន្តរភាពផងដែរ»។
ពលរដ្ឋរស់នៅភូមិ ឃុំភូលូក ស្រុកពេជ្រាតា ខេត្តមណ្ឌលគិរី អ្នកស្រី មាស មករា បានប្រាប់ថា អ្នកស្រីបានចាប់យកការដាំដុះកាហ្វេរយៈពេល ៩ ឆ្នាំហើយ ដើម្បីផ្គត់ផ្គង់ទីផ្សារ និងជួយលើកស្ទួយវិស័យកសិកម្មក្នុងប្រទេសបាន ១ ផ្នែក។
អ្នកស្រីបន្តថា បច្ចុប្បន្នកាហ្វេ គឺជាប្រភេទដំណាំ ដែលកំពុងមានតម្រូវការខ្ពស់នៅលើទីផ្សារទាំងក្នុងប្រទេសក្រៅប្រទេស។
អ្នកស្រីអះអាងថា៖ «គ្រាប់កាហ្វេស្រស់នាពេលបច្ចុប្បន្នមានតម្លៃគួរសម ជាពិសេសក្រោយពីការសម្របសម្រួលបង្កើតឱ្យមានកិច្ចសន្យាកសិកម្ម មានក្រុមហ៊ុនចាំប្រមូលទិញ ដោយយើងមិនបារម្ភរឿងទីផ្សារឡើយ។ ប៉ុន្តែយើងត្រូវគោរពតាមលក្ខខណ្ឌរបស់គេដោយត្រូវប្រើជីធម្មជាតិ និងថែទាំដោយយកចិត្តទុកដាក់ទើបគ្រាប់កាហ្វេស្រស់មានគុណភាពល្អ»។
បើតាមការប្រាប់ឱ្យដឹងពីប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តមណ្ឌលគិរី គិតត្រឹមឆ្នាំ ២០២៣ មានកសិករប្រមាណ ៣៦៥ គ្រួសារ និងក្រុមហ៊ុន ១ កំពុងដាំកាហ្វេ លើផ្ទៃដីសរុប ៥២៥ ហិកតា។
លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជារឿយៗតែងតែជំរុញឱ្យអ្នកពាក់ព័ន្ធធ្វើកិច្ចសន្យាផលិតកម្មកសិកម្ម រវាងក្រុមហ៊ុនឯកជន ជាមួយនឹងកសិករ ដោយលោកលើកឡើងថា កិច្ចសន្យាផលិតកម្មកសិកម្មបានដើរតួនាទីយ៉ាងសំខាន់ក្នុងការជំរុញខ្សែច្រវាក់តម្លៃផលិតកម្មកសិកម្ម ជាពិសេសពង្រឹងការទទួលខុសត្រូវ និងភាពជឿទុកចិត្តគ្នារវាងភាគីអ្នកផលិត និងភាគីអ្នកទិញ។
យោងតាមក្រសួងកសិកម្ម កំណើននៃការទទួលទានកាហ្វេនៅកម្ពុជាមានការកើនឡើងគួរឱ្យកត់សម្គាល់ ដោយក្រសួងបាននិងកំពុងរៀបចំឱ្យមានការពង្រីកដាំកាហ្វេ រ៉ូប៊ូស្តា និងការប្រើប្រាស់កាហ្វេនេះនៅកម្ពុជា ខណៈបច្ចុប្បន្នការដាំដុះកាហ្វេប្រភេទ រ៉ូប៊ូស្តា នៅមានតិចតួចនៅឡើយ។
ក្រសួងបញ្ជាក់ថា កាហ្វេប្រភេទ រ៉ូប៊ូស្តា មានភាពអំណោយផលសម្រាប់ការដាំដុះនៅកម្ពុជា ដោយអាចដាំបាននៅតំបន់ខ្ពស់រាបដូចជា ខេត្តមណ្ឌលគិរី ដែលមានអាកាសធាតុត្រជាក់ល្មម និងមានភ្លៀងច្រើន៕
