លោកស្រី ជា សេរី ថ្លែងក្នុងវេទិកាបច្ចេកវិទ្យាហិរញ្ញវត្ថុកម្ពុជា ឆ្នាំ២០២៣។ រូបថត NBC
ភ្នំពេញ: ធនាគារកណ្តាលរបស់ព្រះរាជាណាចក្រកម្ពុជាបានបញ្ជាក់ថា ស្របពេលដែលការអភិវឌ្ឍយ៉ាងឆាប់រហ័សនៃបច្ចេកវិទ្យាឌីជីថល និងនវានុវត្តន៍ ជាពិសេសប្រព័ន្ធបច្ចេកវិទ្យាហិរញ្ញវត្ថុ វាក៏មានហានិភ័យជាច្រើនមួយចំនួនដល់សង្គម ដែលទាមទារឱ្យភាគីពាក់ព័ន្ធទាំងអស់ចូលរួមសហការគ្នាក្នុងការធ្វើឱ្យកម្ពុជា ជាប្រទេសដែលមានសុវត្ថិភាពសម្រាប់ការអភិវឌ្ឍឌីជីថល និងនវានុវត្តន៍។
ថ្លែងនៅក្នុងកិច្ចប្រជុំកំពូល CamTech Summit 2023 កាលពីថ្ងៃទី ៣០ ខែវិច្ឆិកា លោកស្រី ជា សិរី ទេសាភិបាលធនាគារជាតិនៃកម្ពុជា (NBC) បានលើកឡើងថា បើទោះបីជាការទទួលយកបច្ចេកវិទ្យាក្នុងវិស័យផ្សេងៗកំពុងបង្កើនល្បឿនក៏ដោយ ក៏មានបញ្ហាប្រឈមដែលយើងត្រូវដោះស្រាយផងដែរ ដើម្បីឱ្យប្រទេសកម្ពុជាទទួលបានអត្ថប្រយោជន៍ពេញលេញនៃការរីកចម្រើនផ្នែកបច្ចេកវិទ្យានេះ។
លោកស្រីថា ទាំងរូបវន្តបុគ្គល និងអាជីវកម្មជាច្រើនមានការយល់ដឹងផ្នែកអក្ខរកម្មឌីជីថលនៅមានកម្រិតនៅឡើយ អាចជាឧបសគ្គចម្បងក្នុងការលើកកម្ពស់ការប្រើប្រាស់ និងធ្វើឱ្យពួកគេទទួលរងហានិភ័យទាក់ទងនឹងបច្ចេកវិទ្យា។
លោកស្រីបន្តថា៖ «ការណ៍នេះយើងត្រូវផ្តោតលើសារៈសំខាន់នៃអក្ខរកម្មឌីជីថល ដែលជាវិស័យថ្មីមួយទៀតដែលភាគីពាក់ព័ន្ធទាំងអស់ ចាំបាច់ត្រូវពិចារណា។ ដោយសារ Fintech បន្តវិវឌ្ឍយ៉ាងលឿន ហានិភ័យថ្មីៗ ជាពិសេសហានិភ័យសុវត្ថិភាពតាមអ៊ីនធឺណិតបានកើតឡើង និងក្លាយជាភាពស្មុគស្មាញ។ ដូច្នេះ បទប្បញ្ញត្តិត្រូវតែមានការឆ្លើយតបបន្ថែមទៀតដើម្បីតាមឱ្យទាន់ការអភិវឌ្ឍនេះ។ ការពង្រឹងក្របខ័ណ្ឌច្បាប់ដើម្បីដោះស្រាយបញ្ហាទាក់ទងនឹងសន្តិសុខអ៊ីនធឺណិត និងការការពារសិទ្ធិឯកជនភាព និងទិន្នន័យគឺជាកត្តាជំរុញដ៏សំខាន់បំផុតក្នុងការបង្កើនទំនុកចិត្តនៅពេលឆ្ពោះទៅការធ្វើឌីជីថលូបនីយកម្ម»។
លោកស្រីបានបន្ថែមថា៖ «ជាមួយនឹងបញ្ហាប្រឈមទាំងនេះ ខ្ញុំជឿជាក់ថា កិច្ចប្រជុំកំពូល CamTech នឹងផ្តល់នូវវេទិការួមបញ្ចូលគ្នាមួយសម្រាប់អ្នក បង្កើតគោលនយោបាយ និយតករ អាជីវកម្ម និងតួអង្គបច្ចេកវិទ្យាមកពីវិស័យផ្សេងៗ ដើម្បីពិភាក្សាអំពីការអភិវឌ្ឍថ្មីៗនៃបច្ចេកវិទ្យានៅកម្ពុជា និងពិភពលោក និងសារៈសំខាន់ ឱកាស និងបញ្ហាប្រឈមកាន់តែខ្លាំងឡើងរបស់ពួកគេ ក្នុងការបង្កើតសេដ្ឋកិច្ចកម្ពុជាក្នុងយុគសម័យឌីជីថល ជាពិសេសផ្លូវឆ្ពោះទៅរកការស្ទុះងើបឡើងវិញ បន្ទាប់ពីរងផលប៉ះពាល់ដោយសារការរីករាលដាលជំងឺកូវីដ ១៩ នៅពេលបច្ចុប្បន្ន»។
លោក Remi Pell ប្រធានសមាគមហិរញ្ញវត្ថុ និងបច្ចេកវិទ្យាកម្ពុជា (CAFT) បានឱ្យដឹងថា CamTech Summit 2023 មានសារៈសំខាន់ខ្លាំងណាស់ក្នុងការលើកទឹកចិត្តសមាជិកទាំងអស់ឱ្យខិតខំប្រឹងប្រែងដើម្បីជំរុញរបៀបវារៈរួមគ្នា។ លោកបន្តថា បន្ទាប់ពីការជំរុញការធ្វើឌីជីថលូបនីយកម្ម ដែលកើតឡើងដោយសារតែការរីករាលដាលជំងឺកូវីដ ១៩ វាកាន់តែច្បាស់ថាអនាគត នឹងក្លាយជាអនាគតបច្ចេកវិទ្យាជាមិនខាន។
លោកបានថ្លែងថា៖ «នៅពេលនេះ ទោះបីជាវាមានប្រយោជន៍ខ្លាំងក៏ដោយ ក៏វាពិតជាបង្ហាញពីបញ្ហាប្រឈមធំៗរបស់យើងផងដែរ។ របៀបដែលយើងនឹងបញ្ចូលចំណេះដឹងចាំបាច់ឱ្យបានលឿនតាមដែលពិភពលោកទាមទារ និងធ្វើបច្ចុប្បន្នភាពនៃអាជីវកម្ម/ការចេញផ្សាយបច្ចេកវិទ្យាថ្មីៗ។ តើយើងអាចតម្រង់ទិសតាមរយៈភាពស្មុគស្មាញនៃបច្ចេកវិទ្យាថ្មីៗ ដោយមិនត្រូវបានគេទុកចោលដោយរបៀបណា? តើយើងអាចទទួលបានជំនាញចាំបាច់ដើម្បីឱ្យស្ទាត់ជំនាញលើបច្ចេកវិទ្យាទាំងនេះដោយរបៀបណាដើម្បីប្រើប្រាស់វាឱ្យបានប្រយោជន៍? ហើយចុងក្រោយ តើយើងធ្វើឱ្យមានតុល្យភាពនវានុវត្តន៍ឌីជីថល និងការទទួលខុសត្រូវដោយរបៀបណា?
យោងតាមលោកស្រី ជា សិរី ចាប់តាំងពីការដាក់ឱ្យប្រើប្រាស់បាគង កាលពីខែតុលា ឆ្នាំ ២០២០ មក បច្ចុប្បន្ននេះមានសមាជិក បាគងចំនួន ៧១ បានចូលរួមនៅក្នុងប្រព័ន្ធនេះ ដែលក្នុងនោះមានសមាជិកចំនួន ៥២ កំពុងដំណើរការផ្ទាល់ទៅដល់អតិថិជនជាង ១០ លាននាក់ ហើយប្រតិបត្តិការសរុបមានចំនួន ៦៣ លានដង៕
