បង្គុំម៉ាស៊ីនថតរូប។ ហុង មិនា
ភ្នំពេញៈ កម្ពុជារកប្រាក់បានជិត ៣ ពាន់លានដុល្លារក្នុងរយៈពេល ១១ ខែ ឆ្នាំ ២០២៣ ពីការនាំចេញម៉ាស៊ីន ឧបករណ៍អគ្គិសនី និងបំណែករបស់វា ដោយចំនួននេះកើនជាង ៧០ ភាគរយ បើធៀបនឹងរយៈពេលដូចគ្នាឆ្នាំ ២០២២ ខណៈការនាំចេញក្នុងខែវិច្ឆិកា ឆ្នាំ ២០២៣ មានចំនួនប្រហាក់ប្រហែលនឹងខែវិច្ឆិកា ឆ្នាំ ២០២២។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា (GDCE)។
ទិន្នន័យពី GDCE ឱ្យដឹងថា ចន្លោះពីខែមករា-ខែវិច្ឆិកា ឆ្នាំ ២០២៣ កម្ពុជាបាននាំចេញទំនិញនៅក្នុងជំពូក (HS២ខ្ពង់) លេខកូដ ៨៥ ដែលរួមមានម៉ាស៊ីន ឧបករណ៍អគ្គិសនី និងបំណែករបស់វា ក្នុងទឹកប្រាក់សរុប ២,៩៤ ពាន់លានដុល្លារ កើនឡើង ៧៣,២ ភាគរយបើធៀបរយៈពេលដូចគ្នាក្នុងឆ្នាំ ២០២២ ដែលមាន ១,៧ ពាន់លានដុល្លារ។
ចំនួនប្រាក់នេះស្មើនឹង ១៤,៤ ភាគរយនៃការនាំចេញសរុបរបស់កម្ពុជាក្នុងរយៈពេល ១១ ខែ ឆ្នាំ ២០២៣ ដែលមាន ២០,៤៩ ពាន់លានដុល្លារ។ កាលពីរយៈពេល ១១ ខែ ឆ្នាំ ២០២២ ចំនួនប្រាក់នាំចេញទំនិញក្នុងជំពូកលេខកូដ ៨៥ ស្មើនឹង ៨,៤ ភាគរយនៃការនាំចេញសរុបចំនួន ២០,២៤ ពាន់លានដុល្លារ។
GDCE បានឱ្យដឹងទៀតថា សម្រាប់ខែវិច្ឆិកា ឆ្នាំ ២០២៣ ការនាំចេញឆ្នាំ ២០២៣ ការនាំចេញម៉ាស៊ីន ឧបករណ៍អគ្គិសនី និងបំណែករបស់វា មានទឹកប្រាក់ ២២៣លានដុល្លារ ថយចុះ ០,១ ភាគរយធៀបនឹងខែវិច្ឆិកា ឆ្នាំ ២០២២ ដែលមាន ២២៣,៣៤ លានដុល្លារ។
ប្រធានសមាគមបច្ចេកវិទ្យាឌីជីថលនៃកម្ពុជា លោក ឈិន កេន បានប្រាប់ភ្នំពេញប៉ុស្តិ៍នៅថ្ងៃទី ១៩ ខែធ្នូថា ការវិវឌ្ឍនៃសម័យកាល (បដិវត្តន៍ឧស្សាហកម្ម) និងការផ្លាស់ប្តូរផ្នត់គំនិតរបស់មនុស្ស បានធ្វើឱ្យតម្រូវការប្រើប្រាស់គ្រឿងម៉ាស៊ីន និងឧបករណ៍អគ្គិសនីអេឡិចត្រូនិក កើនឡើងជាលំដាប់។
គ្រឿងម៉ាស៊ីន និងឧបករណ៍ទាំងអស់នោះមិនត្រឹមតែជួយឱ្យការងារកាន់តែងាយស្រួលជាងមុនប៉ុណ្ណោះទេ ប៉ុន្តែវាក៏ជួយសន្សំពេលវេលា និងថវិកាបានមួយចំណែកដែរ។
លោកបន្ថែមថា តាមរយៈអ្វីដែលកម្ពុជាកំពុងមាន គឺការនាំចេញផលិតផលទាំងអស់ខាងលើនឹងបន្តសញ្ញាវិជ្ជមានថែមទៀតនៅពេលខាងមុខ ខណៈបច្ចុប្បន្នមានវិនិយោគិនជាតិ និងអន្តរជាតិកាន់តែច្រើនបានសម្លឹងឃើញពីឱកាសក្នុងការចូលមកបើករោងចក្រនៅកម្ពុជា ដើម្បីផលិតនាំចេញទៅទីផ្សារអន្តរជាតិ។
លោកថ្លែងថា៖ «បច្ចុប្បន្នកម្ពុជាកំពុងទាក់ទាញបានគម្រោងវិនិយោគរោងចក្រផលិតគ្រឿងម៉ាស៊ីន និងឧបករណ៍អគ្គិសនី និងអេឡិចត្រូនិក កាន់តែច្រើន ខណៈជាមួយគ្នានេះរដ្ឋាភិបាល តាមរយៈក្រសួងការងារ និងបណ្តុះបណ្តាលវិជ្ជាជីវៈ ក៏កំពុងខិតខំបង្កើតថ្នាលបណ្តុះបណ្តាលធនធានមនុស្សរបស់ខ្លួន ដើម្បីឱ្យមានសមត្ថភាពអាចចាប់យកឱកាសការងារថ្មីៗនៅតាមរោងចក្រ/សហគ្រាសទាំងអស់នោះផងដែរ»។
លោកបន្តទៀតថា សម្រាប់មូលហេតុដែលវិនិយោគិនជាច្រើនមើលឃើញពីឱកាសចូលមកវិនិយោគនៅកម្ពុជា គឺដោយសារកត្តាមួយចំនួនដូចជា ចំនួនកម្លាំងពលកម្មសម្បូរបែប និងមានតម្លៃសមរម្យ, មានទីផ្សារនាំចេញច្រើន និងមានប្រព័ន្ធអនុគ្រោះពន្ធនាំទៅទីផ្សារប្រទេសមួយចំនួន។ល។
ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា លោក ជា ចាន់ដារ៉ា បានលើកឡើងថា ការរៀបចំបានល្អលើប្រព័ន្ធច្បាប់វិនិយោគ ធនធានមនុស្ស និងហេដ្ឋារចនាសម្ព័ន្ធដឹកជញ្ជូន ព្រមទាំងការពង្រឹង និងពង្រីកទីផ្សារនាំចេញបានជួយឱ្យកម្ពុជាទាក់ទាញអ្នកវិនិយោគបានកាន់តែច្រើនឱ្យចូលមកបណ្តាក់ទុន។
លោកបន្តថា រោងចក្រ/សហគ្រាសផលិត និងកែច្នៃនៅកម្ពុជាពេលនេះគឺមិនមែនមានតែក្នុងវិស័យវាយនភណ្ឌទេ ប៉ុន្តែក៏មានរោងចក្រផលិតម៉ាស៊ីន និងឧបករណ៍អគ្គិសនី អេឡិចត្រូនិក ដែលប្រើប្រាស់បច្ចេកវិទ្យាទំនើបៗកាន់តែច្រើនផងដែរ។
លោកប្រាប់ថា៖ «ការនាំចេញផលិតផលម៉ាស៊ីន ឧបករណ៍អគ្គិសនី និងបំណែករបស់វា នឹងមានសម្ទុះខ្លាំងនៅពេលកំណើនសេដ្ឋកិច្ចពិភពលោករឹងមាំឡើងវិញ ខណៈសមត្ថភាពផលិតនៅកម្ពុជាក៏កំពុងកើនឡើងជាប្រចាំ»។
លោកប្រាប់ទៀតថា នៅពេលការនាំចេញ-នាំចូលមានកាន់តែច្រើន ចរន្តសេដ្ឋកិច្ចជាតិនឹងកើនឡើង ហើយនៅពេលនោះសកម្មភាពនៅក្នុងវិស័យដឹកជញ្ជូនក៏ល្អប្រសើរឡើងដែរ។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា បានបង្ហាញថា នៅក្នុងឆ្នាំ ២០២២ កម្ពុជាប្រមូលបានប្រាក់ ១ ៩៩៨,១៩ លានដុល្លារ ពីការនាំចេញផលិតផលលេខកូដ ៨៥ កើន ៨៤,៨ ភាគរយបើធៀបនឹងឆ្នាំ ២០២១ ដែលមានទឹកប្រាក់ ១ ០៨១,១ លានដុល្លារ។ ទឹកប្រាក់នាំចេញម៉ាស៊ីន និងឧបករណ៍អគ្គិសនី និងបំណែករបស់វា ស្មើនឹង ៨,៩ ភាគរយនៃចំនួនទឹកប្រាក់នាំចេញសរុបក្នុងឆ្នាំ ២០២២ ដែលមានចំនួន ២២ ៤៨២,៩៣៧ លានដុល្លារ៕
