ក្រុមហ៊ុនដែលផ្ញើទៅផ្សារមូលបត្រកម្ពុជា (CSX) ។ ហុង មិនា
ភ្នំពេញ៖ ធនាគារ DEUTSCHE BANK AG របស់អាល្លឺម៉ង់សាខាក្នុងប្រទេសសិង្ហបុរី បានសម្រេចផ្តល់កម្ចីក្នុងអត្រាការប្រាក់ថោក ចំនួន ៥០ លានដុល្លារដល់ក្រុមហ៊ុន CAMGSM ជាក្រុមហ៊ុន ចុះបញ្ជីភាគហ៊ុនក្នុងស្រុក ដើម្បីយកទៅពង្រីកប្រព័ន្ធបណ្តាញបច្ចេកវិទ្យារបស់ខ្លួន។
យោងតាមឯកសារបានពីក្រុមហ៊ុនដែលផ្ញើទៅផ្សារមូលបត្រកម្ពុជា (CSX) កាលពីថ្ងៃទី២៦ ខែធ្នូ ក្រុមហ៊ុន CAMGSM Plcសម្រេចបានកិច្ចព្រមព្រៀងមួយជាមួយធនាគារ DEUTSCHE BANK AG សាខាប្រទេសសិង្ហបុរី កាលពីថ្ងៃទី២២ ខែធ្នូ ឆ្នាំ២០២៣ ក្នុងតម្លៃកម្ចីចំនួន ៥០ លានដុល្លារ សម្រាប់រយៈពេល ១០ ឆ្នាំ ចាប់ពីថ្ងៃទី ២២ ខែធ្នូ ឆ្នាំ២០២៣ ដល់ថ្ងៃទី១ ខែកុម្ភៈ ឆ្នាំ២០៣៤ ហើយអត្រាការប្រាក់ចំនួន ៣ ភាគរយ+ SOFR រយៈពេល ៦ ខែ។
ក្រុមហ៊ុននេះ បានឱ្យដឹងនៅក្នុងឯកសារនេះថា៖ «ប្រាក់កម្ចីរយៈពេលវែងនេះមានគោលបំណងផ្តល់ហិរញ្ញប្បទានដល់ការចំណាយដើមទុនសម្រាប់ការពង្រីកប្រព័ន្ធបណ្តាញបច្ចេកវិទ្យា»។
លោក ហុង សុហួរ អគ្គនាយក CSX បានប្រាប់ភ្នំពេញប៉ុស្តិ៍កាលពីថ្ងៃទី ២៦ ខែធ្នូថា ទោះបីជាក្រុមហ៊ុនត្រូវបានចុះបញ្ជីលើផ្សារហ៊ុននេះក៏ដោយ ក៏ពួកគេនៅតែអាចទទួលយកហិរញ្ញប្បទាន ឬកម្ចីពីប្រភពណាមួយដើម្បីគាំទ្រដល់កំណើនអាជីវកម្មរបស់ពួកគេដែរ។លោកថ្លែងថា៖ «ជាធម្មតា ក្រុមហ៊ុនណាមួយដែលបានចុះបញ្ជីនៅតែមានលទ្ធភាពទទួលយកប្រាក់កម្ចី ឬហិរញ្ញប្បទានពីស្ថាប័នហិរញ្ញវត្ថុផ្សេងទៀត ដើម្បីគាំទ្រដល់ការពង្រីកអាជីវកម្មរបស់ពួកគេ ពីព្រោះពួកគេមិនអាចប្រើប្រាស់មូលនិធិដែលពួកគេប្រមូលបានពីទីផ្សារមូលធនតែមួយមុខ ដើម្បីគាំទ្រអាជីវកម្មរបស់ពួកគេបានទេ»។
លោកលើកឡើងថា៖ «ខ្ញុំមើលឃើញថាកម្រិតបំណុលរបស់ក្រុមហ៊ុននេះគឺមិនបង្កឱ្យមានការព្រួយបារម្ភណាមួយសម្រាប់ក្រុមហ៊ុនយក្សដូចជាក្រុមហ៊ុន CMGSM ទេ ព្រោះថាពួកគេមានសមត្ថភាពខ្លាំង ក្នុងការគ្រប់គ្រងបំណុល។ ជាការពិតណាស់ ខ្ញុំមិនបដិសេធថាការកើនឡើងបំណុលរបស់ក្រុមហ៊ុនណាមួយដែលបានចុះបញ្ជីនឹងបង្កហានិភ័យខ្លះៗសម្រាប់ភាគហ៊ុនិក និងវិនិយោគិន ប៉ុន្តែយើងចាំបាច់ត្រូវមើលថាតើបំណុលកម្រិតណា និងរបៀបដែលក្រុមហ៊ុនប្រើប្រាស់បំណុលដើម្បីបង្កើតប្រាក់ចំណូលបន្ថែមទៀត ដូច្នេះវាមិនមានន័យថា នៅពេលដែលយើងមើលឃើញបំណុលកើនឡើង យើងមានការព្រួយបារម្ភនោះទេ។ ប៉ុន្តែ បំណុលដែលកើនឡើងត្រូវបានប្រើសម្រាប់ការពង្រីកអាជីវកម្មរបស់ពួកគេ ដូច្នេះប្រាក់ចំណូលរបស់ពួកគេនឹងកើនឡើងដែរ»។
យោងតាម CSX ជាមួយនឹងប្រាក់កម្ចីនេះ អនុបាតបំណុលធៀបនឹងមូលធនសរុបរបស់ក្រុមហ៊ុន CamGSM មានចំនួន ១៨២,០៧ ភាគរយ។
កាលពីខែសីហា ក្រុមហ៊ុន CamGSMក៏សម្រេចបានលក្ខខណ្ឌកម្ចីរយៈពេល ៥ឆ្នាំចំនួន៤ ដែលមានចំនួនសរុប ១១២,៥លានដុល្លារដើម្បីផ្ដល់ហិរញ្ញប្បទានជាថ្មី លើបំណុលដែលមានស្រាប់របស់ពួកគេពីធនាគារចំនួន ៣ ទៅធនាគារ។ យោងតាមឯកសាររបស់ពួកគេផ្ញើទៅ CSX ការផ្តល់ប្រាក់កម្ចីនេះ ក្រុមហ៊ុនទទួលបាន ៤០ លានដុល្លារពីធនាគារ Malayan Banking Berhadនៅក្នុងប្រទេសសិង្ហបុរី និង ២០ លានដុល្លារ ពីធនាគារកាណាឌីយ៉ា ភីអិលស៊ី ដែលគ្រប់គ្រងដោយវិនិយោគិនក្នុងស្រុក ខណៈដែលប្រាក់កម្ចីចំនួន ២០ លានដុល្លារ ជាមួយនឹងអត្រាការប្រាក់៨,៧៥ភាគរយត្រូវបានបញ្ចេញកាលពីថ្ងៃទី២៧ ខែកក្កដា និងប្រាក់កម្ចី ៤០ លានដុល្លារ ជាមួយនឹង SOFR + ៤,៨៥ភាគរយត្រូវបានបញ្ចេញកាលពីថ្ងៃទី២៨ ខែកក្កដា។ ប្រាក់កម្ចីទាំង២ នេះ មានឥណប្រតិទានដល់ឆ្នាំ២០២៨។
ប្រាក់កម្ចីចំនួន២ទៀតមានចំនួន ៤២,៥លានដុល្លារ និង ៤១,៥ ពាន់លានរៀល (ប្រហែល ១០លានដុល្លារ) ត្រូវបានផ្តល់ដោយធនាគារ Maybank (Cambodia) Plcក្នុងអត្រាការប្រាក់ពី ៧ ទៅ ៨ ភាគរយ។ រយៈពេលសម្រាប់ប្រាក់កម្ចីទាំងនេះ ចាប់ពីថ្ងៃទី ២១ ខែកក្កដា ឆ្នាំ២០២៣ ដល់ថ្ងៃទី៣ ខែកញ្ញា ឆ្នាំ២០២៨។
កាលពីដើមខែតុលាក្រុមហ៊ុន CAMGSM PLC បានទទួលការយល់ព្រមពីក្រុមប្រឹក្សាភិបាលរបស់ខ្លួនសម្រាប់ការចេញមូលបត្របំណុល (សញ្ញាបណ្ណនិរន្តរភាព) ដើម្បីប្រមូលមូលនិធិចំនួន ២០លានដុល្លារអាមេរិកក្នុងរយៈពេល ១០ឆ្នាំ។ មូលនិធិមូលបត្របំណុលនេះ នឹងត្រូវបានប្រើសម្រាប់ការពង្រីកបណ្តាញ និងការផ្តល់ហិរញ្ញប្បទានជាថ្មីសម្រាប់បំណុល។ នេះបើយោងតាម CSX៕
