ភ្ញៀវទេសចរចិនមកដល់ព្រលានយន្តហោះអន្តរជាតិភ្នំពេញ នាពេលកន្លងទៅ។ ហេង ជីវ័ន
ភ្នំពេញៈ ផ្នែកឯកជននៅក្នុងវិស័យទេសចរណ៍កម្ពុជា រំពឹងថាព្រឹត្តិការណ៍ «ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ២០២៤» ដែលនឹងរៀបចំនៅខេត្តសៀមរាបនាចុងសប្តាហ៍នេះនឹងក្លាយទៅជាការផ្សព្វផ្សាយដ៏ធំទូលាយបន្ថែមទៀតសម្រាប់ការលើកកម្ពស់ និងភាពទាក់ទាញភ្ញៀវទេសចរជនជាតិចិន រួមទាំងជនបរទេសផ្សេងទៀតឱ្យធ្វើដំណើរមកកម្សាន្តប្រទេសកម្ពុជាកាន់តែច្រើន។
លិខិតក្រសួងទេសចរណ៍ ចុះថ្ងៃទី ៥ ខែមករា ឆ្នាំ ២០២៤ បានឱ្យដឹងថា ក្រោមកិច្ចសហការរវាងក្រសួងទេសចរណ៍ ក្រសួងវប្បធម៌ និងវិចិត្រសិល្បៈ ស្ថានទូតសាធារណរដ្ឋចិនប្រចាំកម្ពុជា និងស្ថាប័នពាក់ព័ន្ធ នឹងរៀបចំពិធីបើក «ឆ្នាំនៃការផ្លាស់ប្តូរប្រជាជននិងប្រជាជនកម្ពុជា-ចិន ២០២៤» ក្នុងន័យដើម្បីចូលរួមលើកកម្ពស់ទំនាក់ទំនងមិត្តភាពកម្ពុជា-ចិន និងត្រៀមស្វាគមន៍ភ្ញៀវទេសចរចិនមកកម្សាន្តក្នុងព្រះរាជាណាចក្រកម្ពុជា ដែលជាគោលដៅទេសចរណ៍ប្រកបដោយភាពសម្បូរបែប និងភាពកក់ក្តៅ។ កម្មវិធីនេះនឹងប្រព្រឹត្តនៅថ្ងៃទី ១៣ មករា ឆ្នាំ ២០២៤ វេលាម៉ោង ១៨:០០ នៅទីលានជល់ដំរី ខេត្តសៀមរាប។
ចំនួនភ្ញៀវទេសចរចិនមកកម្សាន្តនៅខេត្តសៀមរាបនឹងបន្តកើនឡើង ប៉ុន្តែនៅមានកម្រិតទាបបើធៀបនឹងមុនមានវិបត្តិកូវីដ ១៩
ប្រធានសមាគមមគ្គុទ្ទេសក៍ទេសចរណ៍ភាសាចិនកម្ពុជា លោក អនហេងសុភ័ក្រ បានប្រាប់ ភ្នំពេញ ប៉ុស្តិ៍ នៅថ្ងៃទី ១១ ខែមករា ថា ព្រឹត្តិការណ៍«ឆ្នាំនៃការផ្លាស់ប្តូរប្រជាជននិងប្រជាជនកម្ពុជា-ចិន ២០២៤» ដែលនឹងរៀបចំឡើងក្នុងខេត្តសៀមរាបនាចុងសប្តាហ៍នេះគឺប្រាកដជាផ្តល់ផលវិជ្ជមានច្រើនសម្រាប់អ្នកនៅក្នុងវិស័យទេសចរណ៍ ពិសេសនឹងជួយទាក់ទាញភ្ញៀវទេសចរ និងអ្នកវិនិយោគចិនឱ្យចូលមកកម្ពុជាកើនឡើងបន្ថែមទៀត។
លោកបានថ្លែងថា៖ «ព្រឹត្តិការណ៍ «ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ២០២៤» ប្រាកដជាជួយឱ្យភ្ញៀវចិនស្គាល់តំបន់ទេសចរណ៍នៅកម្ពុជាកាន់តែច្រើន ពិសេសតំបន់ប្រាសាទបុរាណក្នុងខេត្តសៀមរាប ដែលមានអាយុកាលរាប់រយឆ្នាំមកហើយ។ រូបខ្ញុំក៏នឹងទៅចូលរួមផ្ទាល់ក្នុងព្រឹត្តិការណ៍នេះដែរ»។
លោកបន្តថា បន្ទាប់ពីព្រឹត្តិការណ៍ខាងលើរំពឹងថានឹងមានជើងហោះហើរត្រង់រវាងទីក្រុងសំខាន់ៗប្រទេសចិន និងក្រុងសៀមរាបកាន់តែច្រើនឡើងវិញ ខណៈបច្ចុប្បន្នភាគច្រើននៃភ្ញៀវទេសចរ និងអ្នកវិនិយោគចិនមកកម្ពុជា គឺធ្វើឡើងតាមរយៈអាកាសយានដ្ឋានអន្តរជាតិភ្នំពេញ។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី បាននិយាយថា ក្នុងនាមជាប្រទេសមិត្តដែកថែបរដ្ឋាភិបាលនៃប្រទេសកម្ពុជា និងចិនតែងតែជំរុញ និងលើកទឹកចិត្តឱ្យភ្ញៀវទេសចរ និងអ្នកវិនិយោគនៃប្រទេសរៀងខ្លួនធ្វើដំណើរទៅវិញទៅមកជាមួយគ្នាឱ្យបានច្រើន ប៉ុន្តែសម្រាប់រូបភាពជាក់ស្តែង គឺការចូលមកទស្សនាប្រទេសកម្ពុជា ពីសំណាក់ភ្ញៀវជនជាតិចិន គឺនៅមានចំនួនតិតតួចនៅឡើយបើធៀបនឹងមុនពេលមានវត្តមានកូវីដ ១៩។
លោកបន្តថា មានមូលហេតុជាច្រើនដែលធ្វើឱ្យចំនួនភ្ញៀវទេសចរចិនចូលមកកម្ពុជានៅមានចំនួនតិចតួច ប៉ុន្តែបែរជាទៅប្រទេសជិតខាង ពិសេសប្រទេសថៃច្រើននោះ គឺដោយសារនៅប្រទេសគេមានសេវាកម្មផ្សេងៗច្រើនដែលអាចឆ្លើយតបនឹងការចង់បានរបស់ភ្ញៀវទេសចរចិន ក្រៅពីការដើរទស្សនាតំបន់ប្រវត្តិសាស្ត្រសំខាន់ៗ។
លោកអះអាងថា៖ «ការរៀបចំគ្រប់ព្រឹត្តិការណ៍ «ឆ្នាំនៃការផ្លាស់ប្តូរប្រជាជននិងប្រជាជនកម្ពុជា-ចិន ២០២៤» នៅក្នុងខេត្តសៀមរាបដោយផ្ទាល់បែបនេះ គឺនឹងជួយឱ្យភ្ញៀវទេសចរបរទេស ពិសេសជនជាតិចិនស្គាល់ពីប្រទេសកម្ពុជាថាជាកន្លែងមានតំបន់ទេសចរណ៍ច្រើនទាំងលក្ខណៈប្រវត្តិសាស្ត្រ វប្បធម៌ ធម្មជាតិ និងរមណីយដ្ឋានកែច្នៃ ជាដើម។ ក្នុងនាមអ្នកនៅក្នុងវិស័យទេសចរណ៍យើងពិតជាស្វាគមន៍ និងរីករាយចំពោះការរៀបចំព្រឹត្តិការណ៍បែបនេះឱ្យបានកាន់តែច្រើន»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បាននិយាយថា ព្រឹត្តិការណ៍«ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤ បង្ហាញឱកាសដ៏សំខាន់មួយដើម្បីពង្រឹងទំនាក់ទំនងវប្បធម៌ និងការអប់រំរវាងប្រជាជាតិទាំង ២។ ប្រសិនបើសកម្មភាពផ្លាស់ប្តូរត្រូវបានផ្សព្វផ្សាយបានល្អ វានឹងជួយជំរុញឱ្យមានការយល់ដឹងឆ្លងវប្បធម៌ពិតប្រាកដ ហើយវាអាចទាក់ទាញទេសចរចិនឱ្យមកកម្ពុជាកាន់តែច្រើន។ ទោះជាយ៉ាងណាផលប៉ះពាល់ជាក់ស្តែងលើវិស័យទេសចរណ៍នឹងអាស្រ័យទៅលើកត្តាផ្សេងៗ រួមទាំងកិច្ចព្រមព្រៀងទ្វេភាគី និងទីផ្សារនៃប្រទេសទាំង ២។
លោកនិយាយថា៖ «ប្រទេសកម្ពុជាផ្តល់ជូននូវប្រវត្តិសាស្ត្រដ៏សម្បូរបែប ទេសភាពដ៏គួរឱ្យភ្ញាក់ផ្អើល និងបទពិសោធន៍វប្បធម៌ប្លែកៗ។ ដូចគោលដៅធ្វើដំណើរផ្សេងទៀតដែរ វាមានសារៈសំខាន់សម្រាប់ភ្ញៀវទេសចរ ក្នុងការទទួលបានព័ត៌មានអំពីលក្ខខណ្ឌនៅក្នុងតំបន់ និងការណែនាំអំពីការធ្វើដំណើរ។ ជារួមកម្ពុជាអាចជាគោលដៅដែលមានសុវត្ថិភាព និងផ្តល់រង្វាន់សម្រាប់អ្នកដំណើរចិន ជាពិសេសនៅពេលដែលពួកគេចាត់វិធានការប្រុងប្រយ័ត្នចាំបាច់ និងរក្សាការជូនដំណឹងអំពីស្ថានភាពក្នុងតំបន់»។
ចំនួនភ្ញៀវទេសចរចិនមកកម្ពុជា ស្ថិតនៅលេខរៀងទី៣ ខណៈកាលពីឆ្នាំ ២០១៩ ស្ថិតនៅលេខ ១
ទិន្នន័យក្រសួងទេសចរណ៍ បានឱ្យដឹងថា ចន្លោះពីខែមករា ដល់ខែវិច្ឆិកា ឆ្នាំ ២០២៣ កម្ពុជាទទួលបានភ្ញៀវបរទេសសរុបជិត ៤,៩២ លាននាក់ កើនឡើង ១៥៦,៩ ភាគរយ បើធៀបរយៈពេលដូចគ្នាក្នុងឆ្នាំ ២០២២ ដែលមាន ១,៩១ លាននាក់។ ក្នុងចំណោមភ្ញៀវបរទេសទាំងអស់ គឺភ្ញៀវមកពីប្រទេសចិន ស្ថិតនៅលេខរៀងទី ៣ដោយមានចំនួន ៤៩៨ ២៥០ នាក់ (ស្មើ ១០,១ ភាគរយ នៃចំនួនភ្ញៀវបរទេសសរុប) កើនឡើង ៤៤៩,៧ ភាគរយធៀបនឹងរយៈពេលដូចគ្នាឆ្នាំ ២០២២ ដែលមាន ៩០ ៦៤៨ នាក់។
យ៉ាងណាក៏ដោយ ចំនួននេះគឺស្ថិតនៅទាបបើធៀបឆ្នាំ ២០១៩ (កំណត់ត្រាភ្ញៀវបរទេសច្រើនបំផុតរបស់កម្ពុជា) ដែលមានចំនួន ៦,៦១ លាននាក់ ក្នុងនោះភ្ញៀវជនជាតិចិននៅលេខរៀងទី ១ គឺចំនួន ២,៣៦ លាននាក់។
តំបន់ទេសចរណ៍នៅប្រទេសកម្ពុជាជាប់ចំណាត់ថ្នាក់ជាកន្លែងទេសចរណ៍ល្អជាបន្តបន្ទាប់
កាសែត New York Times ដែលបានចុះផ្សាយកាលពីថ្ងៃទី ៨ ខែមករា ឆ្នាំ ២០២៤ ឱ្យដឹងថា តំបន់ឧទ្យានប្រាសាទកោះកេរ របស់ប្រទេសកម្ពុជាដែលចុះបញ្ជីបេតិកភណ្ឌពិភពលោករបស់អង្គការយូណេស្កូ បានជាប់ចំណាត់ថ្នាក់ទី៣៤ ក្នុងចំណោមឧទ្យាន ៥២ កន្លែង ជាទិសដៅទេសចរណ៍ក្នុងឆ្នាំ ២០២៤ សម្រាប់ភ្ញៀវទេសចរទៅទស្សនានាឆ្នាំនេះ។
បន្ថែមលើនេះគេហទំព័រ https://www.worldtravelawards.com/winners/2023/asia កាលពីចុងឆ្នាំ ២០២៣ ក៏បានឱ្យដឹងថា ប្រទេសកម្ពុជាបានទទួលបានជយលាភីចំនួន ២ ក្នុងក្របខ័ណ្ឌនៃ «ពានរង្វាន់នៃការធ្វើដំណើរពិភពលោក» សម្រាប់ឆ្នាំ ២០២៣ (World Travel Awards 2023) ដែលរួមមាន ទី១. កម្ពុជា ជាគោលដៅទេសចរណ៍វប្បធម៌ឈានមុខគេនៅតំបន់អាស៊ី (Asia's Leading Cultural Destination) និងទី២ គោលដៅទេសចរណ៍យុវជនឈានមុខគេនៅ អាស៊ី (Asia's Leading Youth Travel Destination)៕
