អាជីវករប្ដូរប្រាក់ ១ កន្លែងក្នុងរាជធានីភ្នំពេញ។ ភ្នំំពេញ ប៉ុស្តិ៍
ភ្នំពេញៈ ប្រទេសកម្ពុជា បានក្លាយជាប្រទេសមួយក្នុងតំបន់ដែលបានគ្រប់គ្រងស្ថិរភាពអត្រាប្តូរប្រាក់ក្នុងស្រុកមានកម្រិតខ្ពស់ក្នុងរយៈពេលប៉ុន្មានឆ្នាំមកនេះ ដែលជាកត្តាសំខាន់ក្នុងការរក្សាស្ថិរភាពម៉ាក្រូសេដ្ឋកិច្ច បើទោះបីជាវិបត្តិសេដ្ឋកិច្ចសកលបានធ្វើឱ្យតម្លៃរូបិយប័ណ្ណនៅប្រទេសមួយចំនួនមានការធ្លាក់ចុះខ្លាំង។ នេះបើយោងតាមការលើកឡើងរបស់ទេសាភិបាលនៃធនាគារជាតិនៃកម្ពុជា (NBC)។
លោកស្រី ជា សិរី ទេសាភិបាលនៃ NBC បានថ្លែងក្នុងកម្មវិធីសន្និបាតបូកសរុបការងារប្រចាំឆ្នាំ ២០២៣ និងទិសដៅការងារឆ្នាំ ២០២៤ ថា កម្ពុជារក្សាបានតម្លៃប្រាក់រៀលធៀបនឹងដុល្លារអាមេរិកឱ្យមានស្ថិរភាពល្អប្រសើរ ដោយមានអត្រាប្រែប្រួលទាបជាង ២ ភាគរយប៉ុណ្ណោះ បើធៀបនឹងការប្រែប្រួលតម្លៃរូបិយប័ណ្ណនៅប្រទេសមួយចំនួន ដូចជាប្រាក់យ៉េនជប៉ុនធ្លាក់ថ្លៃ ៩ ភាគរយ យន់ចិនធ្លាក់ថ្លៃ ៦,៧ ភាគរយ និងគីបឡាវធ្លាក់ថ្លៃ ២៩,៨ ភាគរយ ក្នុងស្ថានភាពដែលប្រាក់ដុល្លារអាមេរិកបានកើនឡើងថ្លៃក្រោមឥទ្ធិពលនៃការដំឡើង និងរក្សាអត្រាការប្រាក់គោលក្នុងកម្រិតខ្ពស់។
លោកស្រីបានថ្លែងថា៖ «ស្ថិរភាពអត្រាប្តូរប្រាក់បានរួមចំណែកយ៉ាងសំខាន់ក្នុងការពង្រឹងជំនឿទុកចិត្តវិនិយោគិនគ្រប់គ្រងសម្ពាធអតិផរណាបានមួយផ្នែក ក៏ដូចជារក្សាស្ថិរភាពម៉ាក្រូសេដ្ឋកិច្ច។ អត្រាប្តូរប្រាក់ត្រូវបានសេដ្ឋវិទូ ចាត់ទុកជាសូចនាករមួយបង្ហាញពីសុខភាពសេដ្ឋកិច្ច ដូចដែលអតីតនាយកគ្រប់គ្រងរបស់មូលនិធិរូបិយវត្ថុអន្តរជាតិ លោក Per Jacobson ធ្លាប់បានលើកឡើងថា ការលើកកម្ពស់តម្លៃរូបិយវត្ថុជាតិឱ្យបានល្អ ជាការងារអាទិភាពនៃការកសាងមូលដ្ឋានអភិវឌ្ឍន៍សេដ្ឋកិច្ច ជាតិ»។
លោកតូច ចៅចេក អគ្គនាយកធនាគារប្រៃសណីយ៍កម្ពុជាបាន លើកឡើងថា ស្ថិរភាពអត្រាប្តូរប្រាក់បានធ្វើឱ្យស្ថានភាពម៉ាក្រូសេដ្ឋកិច្ចក្នុងស្រុកមានលំនឹង និងផ្តល់ភាពទុកចិត្តដល់វិនិយោគិនបរទេសមកលើកម្ពុជា។
លោកបានថ្លែងថា៖ «ធនាគារជាតិបានជំរុញការប្រើប្រាស់ប្រាក់រៀលឱ្យបានទូលំទូលាយ ជាពិសេសការតម្រូវឱ្យគ្រឹះស្ថានធនាគារនិងហិរញ្ញវត្ថុត្រូវបញ្ចេញឥណទានយ៉ាងហោចណាស់ ១០ ភាគរយជាប្រាក់រៀលនៃឥណទានសរុប ដែលជាយន្តការមួយក្នុងការរួមចំណែកការប្រើប្រាស់រូបិយបណ្ណជាតិក្នុងសេដ្ឋកិច្ច។ ធនាគាររបស់ខ្ញុំក៏បានបញ្ចេញឥណទានជាប្រាក់រៀលជាង ១០ ភាគរយផងដែរនាពេលបច្ចុប្បន្ន»។
បើតាម លោកស្រី ជា សិរី ការរក្សា បានស្ថិរភាពអត្រាប្តូរប្រាក់រៀលធៀបនឹងដុល្លារអាមេរិក ជាចម្បងអាស្រ័យដោយការអនុវត្តនយោបាយរូបិយវត្ថុប្រកបដោយភាពប្រុងប្រយ័ត្ន តាមរយៈការគ្រប់គ្រងចរាចរណ៍ប្រាក់រៀលសមស្រប និងការធ្វើអន្តរាគមន៍លក់ប្រាក់ដុល្លារអាមេរិកនៅលើទីផ្សារប្តូរប្រាក់តាមការចាំបាច់។
លោកស្រីថ្លែងបន្តថា ការងារនេះអាចសម្រេចទៅបាន ដោយសារការរក្សាបានកម្រិតខ្ពស់គ្រប់គ្រាន់នៃទុនបម្រុងអន្តរជាតិ ដែលបានកើនឡើងដល់ប្រមាណ ២០ ពាន់លានដុល្លារអាមេរិក គឺបានកើនឡើង ១២,៣ ភាគរយ ធៀបនឹងឆ្នាំ ២០២២ និងស្មើនឹងជាង ៧ ខែនៃការនាំចូលទំនិញ និងសេវានាគ្រាបន្ទាន់។
លោកស្រីបានគូសបញ្ជាក់ទៀតថា៖ «ត្រង់នេះខ្ញុំសូមបញ្ជាក់ផងដែរថា ភាពមិនច្បាស់លាស់នៃទីផ្សារហិរញ្ញវត្ថុអន្តរជាតិ និងការរក្សាកម្រិតខ្ពស់នៃអត្រាការប្រាក់គោលនៅក្នុងប្រទេសអភិវឌ្ឍន៍បានបណ្តាលឱ្យទុនបម្រុងអន្តរជាតិរបស់ធនាគារកណ្តាលមួយចំនួនថយចុះគួរឱ្យកត់សម្គាល់។ យើងក៏មានមោទនភាពផងដែរ ដែលប្រព័ន្ធធនាគារកម្ពុជាបន្តមានស្ថិរភាពយ៉ាងរឹងមាំក្នុងស្ថានភាពដែលនៅបណ្តាប្រទេសមួយចំនួន មានការដួលរលំគ្រឹះស្ថានធនាគារ ដូចជានៅសហរដ្ឋអាមេរិក និងស្វ៊ីស ដែលបានបង្កជាការព្រួយបារម្ភយ៉ាងខ្លាំងចំពោះស្ថិរភាពហិរញ្ញវត្ថុសកល»។
លោក ស្រ៊ុន សុភ័ក្ត្រ សាស្ត្រាចារ្យនៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានថ្លែងនៅក្នុងកម្មវិធីមួយកន្លងមកថា ប្រទេសកម្ពុជា មានបញ្ហាពិសេសមួយគឺការប្រើរូបិយប័ណ្ណ ២ គឺប្រាក់រៀល និងដុល្លារអាមេរិក ដំណើរការស្របគ្នាក្នុងចរន្តសេដ្ឋកិច្ច និងពាណិជ្ជកម្ម អស់រយៈពេលជិត ៣ ទសវត្សរ៍មកហើយ។
លោកថា សេដ្ឋកិច្ចដែលគ្រប់គ្រងដោយប្រាក់ដុល្លារជាបន្ត អាចប៉ះពាល់ដល់អធិបតេយ្យភាពរបស់ប្រទេសកម្ពុជា ដើម្បីដាក់ចេញគោលនយោបាយរូបិយវត្ថុដែលមានមូលដ្ឋានទូលំទូលាយ ខណៈដែលជោគវាសនារបស់ប្រាក់ដុល្លារពឹងផ្អែកលើធនាគារកណ្តាលអាមេរិក។
លោកបានថ្លែងថា៖ «ឥឡូវនេះអាចជាពេលវេលាអំណោយផលក្នុងការជំរុញការប្រើប្រាស់ប្រាក់រៀលក្នុងរបៀបវារៈរបស់រដ្ឋាភិបាល ខណៈដែលប៉ារ៉ាម៉ែត្រម៉ាក្រូសេដ្ឋកិច្ចរបស់កម្ពុជាបង្ហាញថាទីផ្សារបច្ចុប្បន្ន គឺត្រៀមខ្លួនជាស្រេចសម្រាប់រូបិយប័ណ្ណជាតិដើម្បីធ្វើជាមធ្យោបាយចម្បងក្នុងការទូទាត់»។
លោកបញ្ជាក់ថា៖ «ប្រសិនបើកម្ពុជាប្រើប្រាស់តែប្រាក់រៀល ធនាគារកណ្តាលមានអំណាចក្នុងការប្រើប្រាស់ឧបករណ៍គោលនយោបាយរូបិយវត្ថុដើម្បីអភិវឌ្ឍសេដ្ឋកិច្ចជាតិ ដូចជាបន្ថយតម្លៃរូបិយវត្ថុដើម្បីជំរុញការនាំចេញ, ការកែតម្រូវអត្រាការប្រាក់គោល ដើម្បីជំរុញការវិនិយោគ, លទ្ធភាពដោះស្រាយវិបត្តិ និងជាអ្នកផ្តល់ការទ្រទ្រង់សន្ទនីយភាពបន្ទាន់ដល់ប្រព័ន្ធហិរញ្ញវត្ថុ»។
បើតាមលោកស្រី ជា សិរី តម្រូវការប្រាក់រៀលបានកើនឡើងជាលំដាប់ ដែលឆ្លុះបញ្ចាំងតាមរយៈកំណើនប្រាក់រៀលក្នុងចរាចរណ៍ជាមួយអត្រាកំណើនមធ្យមប្រចាំឆ្នាំ ១៦,៦ ភាគរយ ពីប្រមាណ ៣៥៦ ប៊ីលានរៀលនៅឆ្នាំ ១៩៩៨ រហូតដល់ ១៤,១ ទ្រីលានរៀលនៅឆ្នាំ ២០២២៕
