យោងតាមធនាគារពិភពលោក ឧស្សាហកម្មកាត់ដេរបានបន្តតស៊ូពេញមួយឆ្នាំ២០២៣ ជាមួយនឹងតម្រូវការនាំចេញធ្លាក់ចុះ។ រូបថត ភ្នំពេញប៉ុស្ដិ៍
ភ្នំពេញ៖ ជំងឺរាតត្បាតកូវីដ-១៩ បានបំផ្លាញសេដ្ឋកិច្ចទូទាំងពិភពលោក ហើយកម្ពុជាក៏មិនអាចគេចផុតដែរ។
ដោយសាររោងចក្រកាត់ដេរដ៏មមាញឹក និងឧស្សាហកម្មទេសចរណ៍ដ៏រស់រវើកដែលជាសរសរស្ដម្ភសេដ្ឋកិច្ចដ៏សំខាន់ ប្រទេសកម្ពុជាបានប្រឈមមុខនឹងបញ្ហាធំៗក្នុងអំឡុងពេលជំងឺរាតត្បាតនោះ។
យោងតាមរបាយការណ៍របស់ធនាគារអភិវឌ្ឍន៍អាស៊ី (ADB) ចេញផ្សាយក្នុងខែមិថុនា ឆ្នាំ២០២០ បានឱ្យដឹងថា៖ «វិស័យកាត់ដេរ ទេសចរណ៍ និងសំណង់ ត្រូវបានរងផលប៉ះពាល់ខ្លាំងបំផុត ដែលនាំឱ្យមានការបាត់បង់ការងារដែលមិនធ្លាប់មានពីមុនមក និងអស្ថិរភាពសេដ្ឋកិច្ច»។
ទោះជាយ៉ាងណាក៏ដោយ នៅពេលដែលពិភពលោកបានធូរស្បើយពីជំងឺរាតត្បាត ឧស្សាហកម្មសំខាន់ៗរបស់កម្ពុជាបាននិងកំពុងវិលត្រឡប់មកវិញជាបណ្តើរៗ ដោយការផលិតសម្លៀកបំពាក់និងទេសចរណ៍បង្ហាញសញ្ញានៃការងើបឡើងវិញ ទោះបីជាមានបញ្ហាប្រឈមជាបន្តបន្ទាប់ក៏ដោយ។
គួរបញ្ជាក់ថា ធនាគារអភិវឌ្ឍន៍អាស៊ី (ADB) និងកម្មវិធីអភិវឌ្ឍន៍អង្គការសហប្រជាជាតិ (UNDP) បានរាយការណ៍ថា ប្រជាជនចន្លោះពី ៣៩ម៉ឺន ទៅ ៥៧ម៉ឺននាក់បានបាត់បង់ការងារក្នុងវិស័យជាច្រើន។
របាយការណ៍របស់ ADB បានបង្ហាញថា៖ «នេះរួមបញ្ចូលទាំងការព្យួរការងារ ជាពិសេសនៅក្នុងឧស្សាហកម្មកាត់ដេរ ដែលកម្មករជាង ៣២៣ ០០០នាក់ត្រូវបានជួបបញ្ឈប់ការងារដោយផ្នែក ឬទាំងស្រុង»។
ជំងឺរាតត្បាតបានប៉ះពាល់យ៉ាងធ្ងន់ធ្ងរដល់សេដ្ឋកិច្ចកម្ពុជា ដែលពឹងផ្អែកខ្លាំងលើការនាំចេញសម្លៀកបំពាក់ និងទេសចរណ៍សម្រាប់ការងារ និងរូបិប័ណ្ណបរទេស។
នៅឆ្នាំ ២០២០ កម្ពុជាមានអត្រាអ្នកអត់ការងារធ្វើកើនឡើងពី ០,៧ភាគរយក្នុងឆ្នាំ ២០១៩ ទៅចន្លោះពី ៣,២ភាគរយ ទៅ ៤,៤ភាគរយ ក្នុងវិស័យផលិតកម្ម សំណង់ សណ្ឋាគារ ភោជនីយដ្ឋាន និងការដឹកជញ្ជូន។
របាយការណ៍បានបន្ដថា៖ «ការកើនឡើងនៃអត្រាអត់ការងារធ្វើនេះមានផលប៉ះពាល់យ៉ាងខ្លាំង។ មួយផ្នែកធំនៃចំនួនប្រជាជនបានធ្លាក់ចូលទៅក្នុងភាពក្រីក្រ ដោយមានការប៉ាន់ប្រមាណថា កម្មកររហូតដល់ ១,១លាននាក់បានធ្លាក់ចូលទៅក្នុងភាពក្រីក្រកម្រិតមធ្យម ហើយកម្មករ ២០៥០០០នាក់បានធ្លាក់ចូលទៅក្នុងភាពក្រីក្រខ្លាំង»។
ស្ថានភាពនេះគឺធ្ងន់ធ្ងរ ជាពិសេសសម្រាប់អ្នកដែលពឹងផ្អែកលើឧស្សាហកម្ម ដូចជា ការផលិតសម្លៀកបំពាក់ ដែលមើលឃើញការថយចុះនៃតម្រូវការពីទីផ្សារសំខាន់ៗ ដូចជា សហរដ្ឋអាមេរិក និងអឺរ៉ុប។
គិតត្រឹមឆ្នាំ២០២៤ ការនាំចេញសម្លៀកបំពាក់របស់កម្ពុជាមានការកើនឡើងបន្តិចបន្តួច ដែលស្មើនឹង ១៦,៩ភាគរយនៃការនាំចេញសរុបក្នុងរយៈពេលប្រាំបួនខែដំបូងនៃឆ្នាំនេះ។ រូបថត ភ្នំពេញប៉ុស្ដិ៍
ការងើបឡើងវិញនៅក្នុងឧស្សាហកម្មកាត់ដេរ
វិស័យកាត់ដេរ ជាមូលដ្ឋានគ្រឹះនៃសេដ្ឋកិច្ចរបស់កម្ពុជា ដែលប្រើប្រាស់កម្លាំងពលកម្មមួយផ្នែកធំ បានទទួលរងនូវផលប៉ះពាល់យ៉ាងធ្ងន់ធ្ងរក្នុងអំឡុងពេលជំងឺរាតត្បាត។
រោងចក្រជាច្រើនត្រូវផ្អាកប្រតិបត្តិការដោយសារតែការធ្លាក់ចុះនៃតម្រូវការអន្តរជាតិ ដោយសារការបិទទ្វារ និងការធ្លាក់ចុះសេដ្ឋកិច្ចនៅក្នុងទីផ្សារសំខាន់ៗបានធ្វើឱ្យការបញ្ជាទិញធ្លាក់ចុះ។
ទោះយ៉ាងណាក៏ដោយ នៅឆ្នាំ២០២១ កម្ពុជាកំពុងតែកិច្ចខិតខំប្រឹងប្រែងស្តារឡើងវិញ។ កម្មវិធីគាំពារសង្គមរបស់រដ្ឋាភិបាលបានជួយសម្រាលទុក្ខលំបាកដល់កម្មករដែលត្រូវបានគេបញ្ឈប់ការងារ។
កម្មវិធីទាំងនេះបានផ្តល់ជំនួយហិរញ្ញវត្ថុដល់កម្មករកាត់ដេរ ដោយរដ្ឋាភិបាល និងនិយោជកផ្តល់ប្រាក់ ៧០ដុល្លារក្នុងមួយខែក្នុងអំឡុងពេលមានវិបត្តិ។
ការគាំពារនេះគឺមានសារៈសំខាន់ក្នុងការបន្ថយអត្រាគ្មានការងារធ្វើមកត្រឹម ២,៩ភាគរយនៅចុងឆ្នាំ២០២១ ជាការប្រសើរឡើងគួរឱ្យកត់សម្គាល់ពីកម្រិតខ្ពស់បំផុតនៅឆ្នាំ២០២០។
អង្គការសហប្រជាជាតិបានធ្វើការជាមួយក្រសួងអប់រំ យុវជន និងកីឡា (MoEYS) វិស័យឯកជន រោងចក្រកាត់ដេរ និង សមាគមរោងចក្រកាត់ដេរនៅកម្ពុជា (GMAC) ដើម្បីផ្តល់វគ្គបណ្តុះបណ្តាលជំនាញសម្រាប់កម្មករកាត់ដេរស្ត្រី ដោយប្រើការអប់រំជាឧបករណ៍ដើម្បីបង្កើនភាពធន់នឹងវិបត្តិសេដ្ឋកិច្ច។
វគ្គបណ្តុះបណ្តាលនេះមានគោលបំណងមិនត្រឹមតែបង្កើនអក្ខរកម្មមូលដ្ឋាន និងជំនាញលេខរបស់កម្មករកាត់ដេរប៉ុណ្ណោះទេ ថែមទាំងលើកកម្ពស់ចំណេះដឹងផ្នែកហិរញ្ញវត្ថុ និងការសិក្សាអំពីសុខភាពបន្តពូជ អាហារូបត្ថម្ភ សិទ្ធិកម្មករនិងច្បាប់ការងារ។
បើយោងតាមសេចក្តីប្រកាសព័ត៌មានរបស់អង្គការសហប្រជាជាតិប្រចាំកម្ពុជានៅខែមិថុនា ឆ្នាំ២០២១ បានឱ្យដឹងថា៖ «កម្មវិធីអក្ខរកម្មរោងចក្រ (FLP) បានបន្តអនុវត្ដទោះឆ្លងដុតវិបត្ដិរាតត្បាតកូវីដ១៩ ហើយបានបម្រើកម្មករជាង ២ពាន់នាក់នៅទូទាំងខេត្តចំនួន១២ តាមរយៈរោងចក្រដៃគូចំនួន ២៥។ កម្មវិធីនេះបានពង្រីក និងបន្តរយៈពេល ៣ ឆ្នាំទៀត»។
លោក កត្ដា អ៊ន អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា បន្ទាប់ពីជំងឺរាតត្បាតនេះ លក្ខខណ្ឌការងារមានភាពប្រសើរឡើង ហើយចំនួនរោងចក្រក៏មានការកើនឡើងផងដែរ។
លោកបានប្រាប់ភ្នំពេញប៉ុស្ដិ៍ថា៖ «ការព្យួរការងារដោយវិបត្តិកូវីដ-១៩ ត្រូវបិតបញ្ចប់នៅឆ្នាំ២០២២ និង វិបត្តិសង្គ្រាមរុស្សី អ៊ុយក្រែន ត្រូវបិតបញ្ចប់ចុងឆ្នាំ២០២៣។ ការព្យូរការងារនេះកម្មករទទួលបាន៧០ដុល្លារក្នុង១ខែ ដែលនិយោជកផ្តល់ ៣០ដុល្លារ និងរដ្ឋាភិបាលផ្តល់ ៤០ដុល្លារ»។
ខណៈពេលដែលឧស្សាហកម្មកាត់ដេរបានដំណើរការផលិតកម្មឡើងវិញ ហើយរោងចក្រជាច្រើនបានបើកដំណើរការឡើងវិញ ការងើបឡើងវិញគឺមិនស្មើគ្នា។
តម្រូវការអន្តរជាតិ ជាពិសេសពីសហរដ្ឋអាមេរិក និងអឺរ៉ុប នៅតែមិនស៊ីសង្វាក់គ្នា ដែលធ្វើឱ្យដំណើរការជួលឡើងវិញមានភាពយឺតយ៉ាវ។
យោងតាមធនាគារពិភពលោក ឧស្សាហកម្មកាត់ដេរបានបន្តតស៊ូពេញមួយឆ្នាំ២០២៣ ជាមួយនឹងតម្រូវការនាំចេញធ្លាក់ចុះ។
ទោះជាយ៉ាងណាក៏ដោយ គិតត្រឹមឆ្នាំ២០២៤ ការនាំចេញសម្លៀកបំពាក់របស់កម្ពុជាបានកើនឡើងបន្តិចបន្តួច ដែលស្មើនឹង ១៦,៩ភាគរយនៃការនាំចេញសរុបក្នុងរយៈពេលប្រាំបួនខែដំបូងនៃឆ្នាំនេះ។
លោក កត្ដា អ៊ន បានបន្ដថា ស្ថានភាពការងារមានភាពល្អប្រសើរចំនួនរោងចក្រមានការកើនឡើងដល់ ៤៤៤៤១ រោងចក្រ ក្នុងនោះរោងចក្រកាត់ដេរមាន ១៥៣៩ រោងចក្រ (១៣២៦ មុនកូវីដ-១៩) ដែលមានកម្មករ ៩១៧០៦៩នាក់ (កម្មករ ៨៤ម៉ឺននាក់ឆ្នាំ២០២០ មុនកូវីដ-១៩)។
លោកបានបន្ថែមថា៖ «សព្វថ្ងៃនេះ រោងចក្រទាំងនេះដំណើរការជាធម្មតានិងគោរពទៅតាមច្បាប់ការងារត្រឹមត្រូវ»។
នៅឆ្នាំ២០២៣ កម្ពុជាបានស្វាគមន៍ភ្ញៀវទេសចរអន្តរជាតិជាង ៥,៤លាននាក់ កើនឡើង ១៣៩,៥ភាគរយពីឆ្នាំ២០២២។ រូបថត Yousos Apdoulrashim
ការរស់ឡើងវិញនៃវិស័យទេសចរណ៍
ប្រសិនបើការងើបឡើងវិញរបស់ឧស្សាហកម្មកាត់ដេរមានភាពយឺតយ៉ាវ វិស័យទេសចរណ៍របស់កម្ពុជានឹងបង្ហាញពីភាពវិជ្ជមានជាងនេះ។
ឧស្សាហកម្មទេសចរណ៍ដែលរួមចំណែកពី ១៥-២០ភាគរយ ដល់ផលិតផលក្នុងស្រុកសរុប (ផ.ស.ស) របស់កម្ពុជាត្រូវបានបំផ្លិចបំផ្លាញក្នុងអំឡុងពេលរាតត្បាត ជាមួយនឹងការមកដល់របស់ភ្ញៀវអន្តរជាតិបានធ្លាក់ចុះដោយសារប្រទេសនានាបានដាក់បម្រាមការធ្វើដំណើរនិងការរឹតបន្តឹង។
សណ្ឋាគារ ភោជនីយដ្ឋាន និងអាជីវកម្មដែលទាក់ទងនឹងទេសចរណ៍ផ្សេងទៀតត្រូវបានបង្ខំឱ្យបិទ ឬកាត់បន្ថយបុគ្គលិកដែលនាំឱ្យមានការខាតបង់ការងារជាច្រើន។
ការរស់ឡើងវិញនៃវិស័យទេសចរណ៍បានចាប់ផ្តើមយ៉ាងពិតប្រាកដនៅឆ្នាំ២០២៣ នៅពេលដែលការរឹតបន្តឹងការធ្វើដំណើរត្រូវបានដកចេញ ហើយតម្រូវការអន្តរជាតិបានចាប់ផ្តើមត្រឡប់មកវិញ។
យោងតាមក្រសួងទេសចរណ៍ ការមកដល់របស់ភ្ញៀវទេសចរអន្តរជាតិបានកើនឡើង ៣២ភាគរយ នៅក្នុងឆមាសទីមួយនៃឆ្នាំ២០២៤ បើប្រៀបធៀបទៅនឹងឆ្នាំមុន ជាសញ្ញានៃការងើបឡើងវិញយ៉ាងខ្លាំង។
យោងតាមរបាយការណ៍របស់ក្រសួងចេញថ្ងៃទី ២៧ ខែកញ្ញា បានឱ្យដឹងថា៖ «កម្ពុជាទទួលបានភ្ញៀវអន្តរជាតិចំនួន ៥៤៨ ៨២៨ នាក់ក្នុងអំឡុងខែនេះ កើនឡើង ១៨,១ ភាគរយ បើធៀបនឹងខែសីហា ឆ្នាំ ២០២៣»។
របាយការណ៍ចុងក្រោយបានកត់សម្គាល់ថា ចាប់ពីខែមករាដល់ខែសីហា ចំនួនសរុបនៃការមកដល់របស់អន្តរជាតិបានកើនឡើងដល់ ៤,២៩លាននាក់ កើនឡើង ២២,៥ភាគរយធៀបនឹងរយៈពេលដូចគ្នាក្នុងឆ្នាំ ២០២។
ខេត្តសៀមរាប ជាទីតាំងនៃប្រាសាទអង្គរវត្ត ជានិមិត្តរូបនៃប្រាសាទអង្គរវត្ត មានកំណើនភ្ញៀវទេសចរ ជាពិសេសបន្ទាប់ពីការបើកដំណើរការអាកាសយានដ្ឋានអន្តរជាតិសៀមរាប-អង្គរនៅចុងឆ្នាំ២០២៣។
យោងតាមរដ្ឋលេខាធិការដ្ឋានអាកាសចរស៊ីវិល (SSCA) បានឱ្យដឹងថា នៅខួបមួយឆ្នាំរបស់ព្រលានយន្តហោះ វាបានគ្រប់គ្រងអ្នកដំណើរជាង ១,៣លាននាក់រួចហើយ និងបានសម្រួលដល់ការហោះហើរជិត ១៥០០០ជើង។
ហេដ្ឋារចនាសម្ព័ន្ធថ្មីនេះ រួមជាមួយនឹងភាពប្រសើរឡើងនៃជម្រើសមធ្យោបាយធ្វើដំណើរ និងកន្លែងស្នាក់នៅ បានធ្វើឱ្យវាកាន់តែងាយស្រួលសម្រាប់អ្នកទេសចរក្នុងការកម្សាន្ដលើសពីការទាក់ទាញបែបប្រពៃណី។
ប្រទេសសមាជិកអាស៊ាននៅតែជាប្រភពដ៏ធំបំផុត ដោយមានភ្ញៀវទេសចរចំនួន ២,៧២លាននាក់មកទស្សនាប្រទេសកម្ពុជាចន្លោះខែមករាដល់ខែសីហា។
របាយការណ៍បានបន្ថែមថា៖ «ភ្ញៀវទេសចរមកពីប្រទេសថៃ និងវៀតណាមបាននាំមុខជាមួយចំនួន ១,៣៤លាននាក់ និង ៨៦៨៤៤៥នាក់រៀងៗខ្លួន។ ប្រទេសទាំងពីរបានកត់ត្រាកំណើនពីរខ្ទង់ធៀបនឹងឆ្នាំ ២០២៣»។
ភ្ញៀវទេសចរពីអាស៊ី រួមទាំងចិន កូរ៉េខាងត្បូង និងជប៉ុន ក៏មានការកើនឡើងគួរឱ្យកត់សម្គាល់នៃចំនួនភ្ញៀវទេសចរមកកម្ពុជាផងដែរ។
កម្ពុជានឹងទទួលបានកំណើនភ្ញៀវទេសចរដល់ ៧ លាននាក់នៅឆ្នាំ២០២៦។ រូបថត ហុង រស្មី
ប្រទេសចិនបានបញ្ជូនអ្នកធ្វើដំណើរមកកម្ពុជាចំនួន ៥៣៨ ៨៣៤ នាក់ ដែលតំណាងឱ្យការកើនឡើង ៤៧,៧ភាគរយ បើធៀបនឹងឆ្នាំ ២០២៣។
យុទ្ធនាការទីផ្សារ «ព្រះរាជាណាចក្រអច្ឆរិយៈ» រួមជាមួយនឹងការកែសម្រួលគោលនយោបាយទិដ្ឋាការ បានជួយផ្សព្វផ្សាយប្រទេសកម្ពុជាជាគោលដៅដែលមានសុវត្ថិភាពនិងទាក់ទាញ។
ការពុះពារក្រោយជំងឺរាតត្បាត
កំណើនសេដ្ឋកិច្ចរបស់កម្ពុជានៅឆ្នាំ២០២៤ និងឆ្នាំ ២០២៥ ត្រូវបានរំពឹងថានឹងងើបឡើងវិញចំពោះវិស័យកាត់ដេរដោយការកើនឡើងនៃតម្រូវការពីទីផ្សារសំខាន់ៗ។
វិស័យផលិតកម្មមិនមែនកាត់ដេរត្រូវបានរំពឹងថាក៏នៅតែកើនឡើង ដែលត្រូវបានជំរុញដោយលំហូរចូលនៃការវិនិយោគផ្ទាល់ពីបរទេស (FDI)។
អតិផរណាសន្ទស្សន៍តម្លៃទំនិញប្រើប្រាស់ (CPI) ដែលឡើងដល់កំពូលក្នុងឆ្នាំ ២០២២ ជាមធ្យម ២,១ភាគរយក្នុងឆ្នាំ២០២៣ មុនពេលធ្លាក់ចុះបន្តិចបន្តួចនៅដើមឆ្នាំ២០២៤។
ភាពប្រែប្រួលនៃអតិផរណា CPI បានជះឥទ្ធិពលយ៉ាងធំដោយការផ្លាស់ប្តូរតម្លៃម្ហូបអាហារ និងប្រេង ដែលមានភាពរសើបចំពោះនិន្នាការសេដ្ឋកិច្ចពិភពលោក។
បើយោងតាមរបាយការណ៍ពិគ្រោះយោបល់ប្រចាំឆ្នាំរបស់ Amro បានបង្ហាញថា៖ «អតិផរណា CPI ត្រូវបានរំពឹងថានឹងកើនឡើងដល់ ២,២ភាគរយ ក្នុងឆ្នាំ២០២៤ និង ២,៣ភាគរយក្នុងឆ្នាំ២០២៥ ដែលខិតជិតដល់កម្រិតមុនការរាតត្បាត ដោយសារតម្រូវការក្នុងស្រុកខ្ពស់ជាង និងការស្ទុះងើបឡើងវិញនៃតម្លៃថាមពល»។
យោងតាមរបាយការណ៍ស្ថិតិទេសចរណ៍ថា៖ «នៅឆ្នាំ២០១៩ កម្ពុជាបានស្វាគមន៍ភ្ញៀវទេសចរអន្តរជាតិជាង ៦,៦លាននាក់ កើនឡើង ៦,៦ភាគរយធៀបនឹងឆ្នាំមុន»។
វិស័យទេសចរណ៍បានចូលរួមចំណែកយ៉ាងសំខាន់ដល់សេដ្ឋកិច្ចកម្ពុជា ដែលស្មើនឹង ១២,១ភាគរយនៃផលិតផលក្នុងស្រុកសរុបក្នុងឆ្នាំនោះ។
ទោះបីជាយ៉ាងណាក៏ដោយ របាយការណ៍បានបង្ហាញថា ជំងឺរាតត្បាតបានបណ្តាលឱ្យមានការថយចុះយ៉ាងខ្លាំងនៃចំនួនភ្ញៀវទេសចរ។
នៅឆ្នាំ ២០២០ ការមកដល់របស់ភ្ញៀវទេសចរអន្តរជាតិបានធ្លាក់ចុះជាង ៨០ភាគរយ ដោយមានភ្ញៀវទេសចរត្រឹមតែ ១,៣លាននាក់និងបានធ្លាក់ចុះមកត្រឹម ១៩៦,០០០ នាក់នៅឆ្នាំ ២០២១។
ផលប៉ះពាល់យ៉ាងធ្ងន់ធ្ងរលើវិស័យទេសចរណ៍នេះបានឆ្លុះបញ្ចាំងពីការរឹតត្បិតការធ្វើដំណើរជាសកល និងកង្វល់សុខភាពសាធារណៈ។
ការងើបឡើងវិញក្រោយជំងឺរាតត្បាតមានល្បឿនលឿន។ នៅឆ្នាំ២០២៣ កម្ពុជាបានស្វាគមន៍ភ្ញៀវទេសចរអន្តរជាតិជាង ៥,៤លាននាក់រួចហើយ កើនឡើង ១៣៩,៥ភាគរយគួរឱ្យកត់សម្គាល់ពីឆ្នាំ២០២២។
រដ្ឋាភិបាលបានបង្កើតក្រុមប្រឹក្សាភិបាលសិក្សាទីផ្សារនិងផ្សព្វផ្សាយទេសចរណ៍កម្ពុជា (ក.ផ.ផ) នៅខែមិថុនា ឆ្នាំ២០២៤ ដឹកនាំដោយរដ្ឋមន្ត្រីក្រសួងទេសចរណ៍ សហការជាមួយឯកជន ក្នុងគោលបំណងជំរុញការទាក់ទាញទេសចរពិភពលោកមកកាន់កម្ពុជា។
(ក.ផ.ផ) រួមមានតំណាងមកពីស្ថាប័នសាធារណៈចំនួនប្រាំបី និងអ្នកពាក់ព័ន្ធវិស័យឯកជនចំនួនប្រាំពីរ ដែលធានានូវវិធីសាស្រ្តដ៏ទូលំទូលាយមួយក្នុងការលើកកម្ពស់ទេសចរណ៍របស់ប្រទេស។
គោលបំណងសំខាន់របស់ក្រុមប្រឹក្សា (ក.ផ.ផ) គឺដើម្បីដោះស្រាយបញ្ហាប្រឈមក្នុងវិស័យទេសចរណ៍ និងធ្វើការឆ្ពោះទៅរកគោលដៅអភិវឌ្ឍន៍ប្រកបដោយចីរភាពដោយជំរុញកិច្ចសហការរវាងវិស័យឯកជន និងរដ្ឋាភិបាល។
លោកនាយករដ្ឋមន្ត្រី ហ៊ុន ម៉ាណែត បាននិយាយក្នុងឱកាសទិវាទេសចរណ៍ពិភពលោកឆ្នាំ ២០២៤ ថា កម្ពុជានឹងទទួលបានកំណើនភ្ញៀវទេសចរដល់ ៧ លាននាក់នៅឆ្នាំ២០២៦។
កិច្ចខិតខំប្រឹងប្រែងស្តារឡើងវិញត្រូវបានគាំទ្រដោយគំនិតផ្តួចផ្តើមរបស់រដ្ឋាភិបាល ដូចជា ការអភិវឌ្ឍន៍ហេដ្ឋារចនាសម្ព័ន្ធ ការលើកទឹកចិត្តផ្នែកពន្ធសម្រាប់ប្រតិបត្តិករទេសចរណ៍និងការយកចិត្តទុកដាក់លើការលើកកម្ពស់ប្រទេសកម្ពុជាជាគោលដៅសុវត្ថិភាពនិងនិរន្តរភាព៕
