ព្រឹត្តិការណ៍យ៉ូហ្កា រៀបចំដោយស្ថានទូតឥណ្ឌានៅមុខព្រលានជល់ដំរី ក្នុងខេត្តសៀមរាប កាលពីខែមិថុនា ២០២៤។ ស្ថានទូតឥណ្ឌា
ក្រសួងទេសចរណ៍និងស្ថានទូតឥណ្ឌាប្រចាំកម្ពុជានឹងរៀបចំវេទិកាទេសចរណ៍កម្ពុជា-ឥណ្ឌា ឆ្នាំ២០២៤ នៅ ខេត្តសៀមរាប នៅថ្ងៃទី៣១ ខែតុលា នៅខេត្តសៀមរាប ដើម្បីលើកកម្ពស់វិស័យទេសចរណ៍នៃប្រទេសទាំងពីរ។
ព្រឹត្តិការណ៍ទេសចរណ៍នេះធ្វើឡើងក្រោមប្រធានបទ «សក្តានុពលនៃទីផ្សារទេសចរណ៍ឥណ្ឌាសម្រាប់វិស័យទេសចរណ៍កម្ពុជា៖ កាលានុវត្តភាព និងការត្រៀមលក្ខណៈសម្បត្តិ»។ នេះបើតាមសេចក្ដីប្រកាសព័ត៌មានរបស់ក្រសួងទេសចរណ៍ចុះថ្ងៃទី២៥ ខែតុលា។
ក្រសួងទេសចរណ៍ថ្លែងថា៖ «វេទិកានេះរៀបចំឡើងក្នុងគោលបំណងចូលរួមលើកកម្ពស់ និងផ្លាស់ប្តូរវប្បធម៌ ពិសេសពង្រឹងកិច្ចសហប្រតិបត្តិការទេសចរណ៍ទ្វេភាគីកម្ពុជា-ឥណ្ឌា ជំរុញលំហូរទេសចរ និងទាក់ទាញវិនិយោគិនឥណ្ឌាមកវិនិយោគលើវិស័យទេសចរណ៍កម្ពុជា និងដើម្បីចូលរួមជំរុញយុទ្ធនាការ ឆ្នាំទេសចរណ៍ កម្ពុជា-ឥណ្ឌា លើកទី១ ២០២៤ និង ទស្សនាសៀមរាប ឆ្នាំ២០២៤»។
ព្រឹត្តិការណ៍នេះក៏នឹងផ្តល់ឱកាសឱ្យអ្នកជំនាញទេសចរណ៍ វិស័យឯកជន ភាគីពាក់ព័ន្ធនៃប្រទេសទាំងពីរបានជួបជុំពិភាក្សា ចែករំលែកគំនិតថ្មីៗ ផ្លាស់ប្តូរបទពិសោធន៍ល្អៗ និងរិះរកយុទ្ធសាស្ត្រចូលរួមអភិវឌ្ឍទេសចរណ៍ប្រកបដោយចីរភាព និងភាពទទួលខុសត្រូវ និងផ្ដល់ឱកាសសម្រាប់វិស័យឯកជននៃប្រទេសទាំងពីរបានជួបជុំគ្នា ពង្រឹងទំនាក់ទំនងទៅវិញទៅមក។
«ឆ្នាំទេសចរណ៍កម្ពុជា-ឥណ្ឌាលើកទី១» ត្រូវបានបើកនៅទីក្រុងញូវដេលី ប្រទេសឥណ្ឌារួចហើយកាលពីខែមិថុនា កន្លងទៅ។
ទិន្នន័យក្រសួងទេសចរណ៍ បង្ហាញថា ចន្លោះពីខែមករា ដល់ខែកក្កដា ភ្ញៀវមកពីប្រទេសឥណ្ឌា មានចំនួន ៥០ ០២២នាក់ កើនឡើង ១៥,២ ភាគរយបើធៀបនឹងរយៈពេលដូចគ្នាក្នុងឆ្នាំ២០២៣៕
