ទិដ្ឋភាពពីលើអាកាសនៃទីក្រុងភ្នំពេញកាលពីពេលថ្មីៗនេះ។ Post Staff
កម្ពុជានឹងជួបបញ្ហាប្រឈមមួយចំនួនពាក់ព័ន្ធនឹងការនាំចេញ និងកំណើនសេដ្ឋកិច្ចបន្ទាប់ពីចាក ចេញពីឋានៈប្រទេសមានការអភិវឌ្ឍន៍តិចតួចនៅឆ្នាំ ២០២៩ ដែលភាគច្រើនពាក់ព័ន្ធនឹងកំណើនអត្រាពន្ធសម្រាប់ទំនិញដូចជា វាយនភ័ណ្ឌ កសិកម្ម កង់ និងកំណើនសេដ្ឋកិច្ចដែលធ្វើឲ្យកម្ពុជាខាតបង់ប្រាក់ប្រមាណជាង ៧០០ លានដុល្លារ។
យោងតាមឯកសារឯកសារ «គោលនយោបាយសង្ខេប ការចាកចេញរបស់កម្ពុជាពីចំណាត់ក្រុមប្រទេសអភិវឌ្ឍន៍តិចតួច៖ ការត្រៀមខ្លួន និងសក្តានុពលនៃផលប៉ះពាល់សេដ្ឋកិច្ច និងសង្គម» ដែលក្រសួងផែនការ និងអង្គការ UNDP បានផ្សព្វផ្សាយកាលពីថ្ងៃទី ១១ ខែវិច្ឆិកា កំណើនអត្រាពន្ធសម្រាប់ការនាំចូលចូលទៅសហភាពអឺរ៉ុបក្រោមប្រព័ន្ធអនុគ្រោះពន្ធ EBA និង GSP+ និងកើនឡើងពី ០ ទៅដលើ ៨,៨ ភាគរយ។
ចំណែកពន្ធស្ថិតក្រោមប្រព័ន្ធ អត្រាពន្ធគយនាំចូលសម្រាប់ប្រជាជាតិដែលទទួលបានការអនុគ្រោះបំផុត(MFN) នឹងកើនដល់ ១១,៥ ភាគរយ។ពន្ធគយសម្រាប់អង្ករគ្រាប់វែងនាំចូលទៅអឺរ៉ុប នឹងឡើងពី ០ ដល់ទៅ ១៧៥ អឺរ៉ូក្នុងមួយតោន និងពន្ធសម្រាប់អង្ករធម្មតាឡើងដល់ ៦៥ អឺរ៉ូក្នុងមួយតោន។
ឯកសារដដែលបញ្ជាក់ថា៖ «ការនាំចេញអង្ករត្រូវបានព្យាករថានឹងធ្លាក់ចុះ ១៣,៨ ភាគរយស្មើនឹងទឹកប្រាក់ ៥៧,៣ លានដុល្លារ, ការនាំចេញកង់ធ្លាក់ចុះ ១៨,២ភាគរយ ស្មើនឹង ២៤៣ លានដុល្លារ, សម្លៀកបំពាក់ ស្បែកជើងនិងសម្ភារៈធ្វើដំណើរនឹងធ្លាក់ចុះ ៨,៦ ភាគរយ ស្នើនឹង ១,៥ ពាន់លានដុល្លារ។ អត្រាកំណើនផលិតផលក្នុងស្រុកសរុបនឹងត្រូវដក ២ភាគរយ ដែលមានតម្លៃស្មើ ៧៥០,៤ លានដុល្លារ»។
កម្ពុជាក៏នឹងទទួលបានជំនួយហិរញ្ញវត្ថុតាមរយៈកិច្ចសហប្រតិបត្តិការអភិវឌ្ឍន៍ដែលមានកំណត់ជាងមុន ខណៈដែលជំនួយឥតសំណងនឹងត្រូវបង្វែរទៅជាហិរញ្ញប្បទានដែលមានលក្ខខណ្ឌអនុគ្រោះតិចជាងមុនផងដែរ។
ខណៈដែលរដ្ឋាភិបាលនិងដៃគូពាក់ព័ន្ធកំពុងបង្កើតយុទ្ធសាស្ត្រអន្តរកាលដោយរលូន ឯកសារដដែលបានលើកអនុសាសន៍ជាច្រើនចំណុចដើម្បីឲ្យទទួលបានការគាំទ្រពីប្រទេសដែលផ្ដល់ការអនុគ្រោះនានាក្នុងដំណើរបន្សាំទៅនឹងបរិបទពាណិជ្ជកម្មថ្មី។
ឯកសារដដែលផ្ដល់អនុសាសន៍ឲ្យកម្ពុជាធ្វើពិពិធកម្មទំនិញនិងសេវាកម្ម ស្វែងរកទីផ្សារថ្មី ដូចជា ជប៉ុន ក្រុមប្រទេស BRICS អាមេរិកឡាទីន និងមជ្ឈិមបូព៌ា។ កម្ពុជាក៏គួរបន្តធ្វើការជាមួយសហភាពអឺរ៉ុប និងកាណាដា ដើម្បីរក្សានូវការអនុគ្រោះដែលមាន និងជួយដល់អន្តរកាលដ៏រលូន។
ឯកសារនេះក៏បានបង្ហាញពីភាពខ្លាំង ភាពខ្សោយ ឱកាស និង ការគំរាមកំហែង តាមរូបមន្ត SWOT ដែលភាពខ្លាំងរបស់កម្ពុជាគឺ ស្ថិរភាពនយោបាយនិងម៉ាក្រូសេដ្ឋកិច្ច, កម្ពុជាមានគោលនយោបាយពាណិជ្ជកម្មនិងវិនិយោគសេរី, មានកិច្ចព្រមព្រៀងសេរីក្នុងតំបន់និងទ្វេភាគី និងមានកម្លាំងពលកម្មក្មេង ធនធានធម្មជាតិ ជាដើម។
យ៉ាងណាក៏ដោយ ចំណុចខ្សោយរបស់កម្ពុជាគឺនៅលើអត្រាខ្ពស់នៃប្រាក់កម្ចី តម្លៃខ្ពស់សម្រាប់ផលិតកម្ម វត្ថុធាតុដើម ថាមពល និងឡូជីស្ទិក និងខ្វះកម្លាំងពលកម្មជំនាញនិងមានផលិតភាពខ្ពស់។
លើសពីនេះទៀត កម្ពុជាក៏នៅមានស្ថាប័នខ្សោយ បូករួមនឹងការអនុវត្តច្បាប់និងបទបញ្ញត្តិមានភាពមិនទៀងទាត់ខ្ពស់។ នេះបើតាមឯកសារដដែល៕
