ការសម្ពោធដាក់ឱ្យដំណើរការ Bakong Tourists App។ ធនាគារជាតិនៃកម្ពុជា
កម្ពុជារំពឹងថានឹងអាចបង្កើនភាពទាក់ទាញដល់ភ្ញៀវទេសចរបរទេសឱ្យមកកម្សាន្តកាន់តែច្រើនបន្ថែមទៀត បន្ទាប់ពីធនាគារជាតិនៃកម្ពុជា (NBC) បានសហការជាមួយក្រុមហ៊ុនបណ្តាញប័ណ្ណទូទាត់អន្តរជាតិ Mastercard ប្រកាសដាក់ឱ្យដំណើរការកម្មវិធីទូទាត់បាគងទេសចរ (Bakong Tourists App)។
អ្នកជំនាញក្នុងវិស័យទេសចរណ៍អះអាងថា ការទូទាត់តាមប្រព័ន្ធបច្ចេកវិទ្យានៅកម្ពុជាកំពុងត្រូវបានប្រើប្រាស់យ៉ាងសកម្ម។
ធនាគារជាតិនៃកម្ពុជា(NBC)កាលពីថ្ងៃទី១១ ខែវិច្ឆិកា បានប្រកាសដាក់ឱ្យដំណើរការកម្មវិធីទូទាត់បាគងទេសចរ (Bakong Tourists App) ជាមួយក្រុមហ៊ុនបណ្តាញប័ណ្ណទូទាត់អន្តរជាតិ Mastercard។ គោលបំណងក្នុងការដាក់ឱ្យដំណើរការកម្មវិធីទូទាត់បាគងទេសចរ(Bakong Tourists App)ជាមួយក្រុមហ៊ុនបណ្តាញប័ណ្ណទូទាត់អន្តរជាតិ Mastercard គឺដើម្បីពង្រីកវិសាលភាព និងជំរុញការប្រើប្រាស់កម្មវិធីទូទាត់បាគងទេសចរ ដើម្បីសម្រួលដល់ប្រតិបត្តិការទូទាត់របស់ភ្ញៀវទេសចរអន្តរជាតិដែលធ្វើដំណើរមកប្រទេសកម្ពុជា។
សេចក្តីប្រកាសព័ត៌មានរបស់ NBC បានឱ្យដឹងថា៖«តាមរយៈកិច្ចសហប្រតិបត្តិការនេះ ភ្ញៀវទេសចរអន្តរជាតិនឹងទទួលបានបទពិសោធន៍ទូទាត់ថ្លៃទំនិញនិងសេវាតាមប្រព័ន្ធឌីជីថលកាន់តែងាយស្រួល ដោយគ្រាន់តែទាញយកកម្មវិធីទូទាត់បាគងទេសចរ រួចបញ្ចូលទឹកប្រាក់ក្នុងគណនីបាគងដោយភ្ជាប់ជាមួយប័ណ្ណទូទាត់ Mastercard ដែលមានស្រាប់ពីប្រទេសដើមរបស់ខ្លួន។ ទន្ទឹមនេះអាជីវកម្មក្នុងស្រុកអាចផ្តល់បទពិសោធន៍នៃការទូទាត់តាមប្រព័ន្ធឌីជីថលប្រកបដោយភាពងាយស្រួល រហ័ស និងសុវត្ថិភាពដល់ភ្ញៀវទេសចរដែលធ្វើដំណើរមកកម្ពុជាផងដែរ»។
យោងតាម NBC កិច្ចសហប្រតិបត្តិការនេះ គឺសំដៅរួមចំណែកជំរុញវិស័យទេសចរណ៍នៅកម្ពុជា និងលើកកម្ពស់ការធ្វើបរិវត្តកម្មឌីជីថល តាមរយៈការពង្រីកលទ្ធភាពក្នុងការទូទាត់ឌីជីថលឱ្យកាន់តែសម្បូរបែប ងាយស្រួល ប្រសិទ្ធភាព និងសុវត្ថិភាព។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានប្រាប់ភ្នំពេញប៉ុស្តិ៍ក្នុងថ្ងៃទី១២ ខែវិច្ឆិកាថា ចំណេះដឹង និងការប្រើប្រាស់ប្រព័ន្ធទូទាត់តាមអេឡិចត្រូនិកនៅកម្ពុជាកំពុងត្រូវបានប្រើប្រាស់យ៉ាងទូលំទូលាយ។ ការបន្ថែមភាពងាយស្រួលក្នុងការទូទាត់សម្រាប់ភ្ញៀវអន្តរជាតិ គឺជាចំណុចទាក់ទាញមួយបន្ថែមទៀតឱ្យពួកគេធ្វើដំណើរមកកម្ពុជាកាន់តែច្រើន។ ចំនួនភ្ញៀវទេសចរបរទេសដែលចូលមកកម្សាន្តនៅកម្ពុជា កំពុងមានសញ្ញាវិជ្ជមានគួរឱ្យកត់សម្គាល់។
លោកបានថ្លែងថា៖«ការដាក់ឱ្យប្រើប្រាស់ប្រព័ន្ធទូទាត់នេះ គឺជាចំណែករួមផ្សំបន្ថែមទៀតក្នុងការជួយជំរុញវិស័យទេសចរណ៍នៅកម្ពុជាបោះជំហានទៅមុខកាន់តែលឿន ជាពិសេសវានឹងជួយបង្កើនភាពទាក់ទាញ និងសម្រួលដល់ជនបរទេសឱ្យធ្វើដំណើរមកកម្ពុជាកាន់តែច្រើន»។
ទេសាភិបាលធនាគារជាតិនៃកម្ពុជា លោកស្រី ជា សិរី ដែលបានអញ្ជើញចូលរួមជាគណៈធិបតីក្នុងកម្មវិធីខាងលើ បាននិយាយថា កិច្ចសហប្រតិបត្តិការនេះ មិនត្រឹមតែពង្រីកមុខងាររបស់កម្មវិធីទូទាត់បាគងសម្រាប់ទេសចរប៉ុណ្ណោះទេ ប៉ុន្តែថែមទាំងសបញ្ជាក់ពីចក្ខុវិស័យរួមរបស់ធនាគារជាតិនៃកម្ពុជាក្នុងការរួមចំណែកជំរុញកំណើនសេដ្ឋកិច្ចតាមរយៈវិស័យទេសចរណ៍ផងដែរ។
លោកស្រីបានថ្លែងថា៖«ភ្ញៀវទេសចរអន្តរជាតិនឹងទទួលបានបទពិសោធន៍ក្នុងការទូទាត់យ៉ាងរលូន និងឆាប់រហ័ស ដែលបានរួមចំណែកដល់និរន្តរភាព និងភាពធន់នៃវិស័យទេសចរណ៍របស់យើង។ លើសពីនេះ គំនិតផ្តួចផ្តើមនេះក៏ស្របតាមគោលនយោបាយអភិវឌ្ឍ សេដ្ឋកិច្ច និងសង្គមឌីជីថលរបស់រាជរដ្ឋាភិបាលកម្ពុជាផងដែរ»។
អនុប្រធានជាន់ខ្ពស់ទទួលបន្ទុកផ្នែកដំណោះស្រាយសម្រាប់ការទទួលយកប័ណ្ណរបស់ក្រុមហ៊ុន Mastercard លោក Sapan Shah បានលើកឡើងថា Mastercard មានសេចក្តីរំភើបរីករាយដែលបានសហការជាមួយធនាគារជាតិនៃកម្ពុជា តាមរយៈការតភ្ជាប់ជាមួយប្រព័ន្ធបាគង ដើម្បីធ្វើឱ្យប្រតិបត្តិការទូទាត់តាមឌីជីថលកាន់តែងាយស្រួលសម្រាប់ទាំងភ្ញៀវទេសចរ និងអាជីវករក្នុងនៅកម្ពុជា។ លើសពីនេះ យើងក៏កំពុងជួយជំរុញអាជីវករក្នុងស្រុកឱ្យទទួលយកការទូទាត់ដោយគ្មានសាច់ប្រាក់ ដោយបង្កើនប្រសិទ្ធភាព និងកាត់បន្ថយបញ្ហាប្រឈមនានាទាក់ទងនឹងការគ្រប់គ្រងសាច់ប្រាក់។
លោកបាននិយាយថា៖«នេះគឺជាការបោះជំហានដ៏សំខាន់មួយរបស់កម្ពុជាក្នុងការធ្វើបរិវត្តកម្មសេដ្ឋកិច្ចឌីជីថល។ ក្រោមកិច្ចសហប្រតិបត្តិការនេះ អតិថិជនរបស់ Mastercard ទាំងអស់អាចបញ្ចូលទឹកប្រាក់ទៅក្នុងគណនីបាគងដោយផ្ទាល់ តាមរយៈកម្មវិធីទូទាត់បាគងសម្រាប់ទេសចរដែលទើបតែត្រូវបានដាក់ឱ្យដំណើរការកាលពីពេលថ្មីៗនេះ។ ភ្ញៀវទេសចរ នឹងរីករាយជាមួយបទពិសោធថ្មីនេះក្នុងអំឡុងពេលធ្វើដំណើរកម្សាន្តនៅក្នុងប្រទេសកម្ពុជា»។
ទិន្នន័យក្រសួងទេសចរណ៍ បង្ហាញថា រយៈពេល ៣ ត្រីមាសដំបូង ឆ្នាំ ២០២៤ កម្ពុជាទទួលបានទេសចរបរទេសចំនួន ៤,៨ លាននាក់ កើនឡើង ២២,២ ភាគរយបើធៀបនឹងរយៈពេលដូចគ្នាឆ្នាំ ២០២៣។ សំបុត្រដែលគ្រឹះស្ថានអង្គរលក់ឱ្យភ្ញៀវបរទេសសម្រាប់ការចូលទស្សនារមណីយដ្ឋានអង្គរ មានចំនួនសរុប ៦៩៩ ៨៥០ សន្លឹក កើនឡើង ២៩,៧ ភាគរយ និងទទួលបានចំណូលសរុប ៣២,៥លានដុល្លារ កើនឡើង ៣០,២ ភាគរយ។
ឆ្នាំ ២០១៩ ត្រូវបានចាត់ទុកជាឆ្នាំកំពូលនៃវិស័យទេសចរណ៍កម្ពុជា ដោយមានភ្ញៀវទេសចរបរទេសចំនួន ៦,៦១ លាននាក់ និងទទួលបានចំណូល ៤,៩២ លានដុល្លារ។ ទឹកប្រាក់នេះ គឺបានចូលរួមប្រមាណ ១២,១ ភាគរយនៃផលិតផលក្នុងស្រុកសរុប៕
