ការថតរូបអនុស្សាវរីយក្នុងវេទិកា Joint Trade and Investment Forum។ ក្រសួងពាណិជ្ជកម្ម
ប្រទេសកម្ពុជារំពឹងថាវេទិកាពាណិជ្ជកម្ម និងវិនិយោគ(Joint Trade and Investment Forum) នឹងជួយជំរុញឱ្យទំហំពាណិជ្ជកម្មរវាងកម្ពុជា-ចក្រភពអង់គ្លេស ពិសេសការនាំចេញទំនិញពីកម្ពុជាទៅចក្រភពអង់គ្លេសមានបរិមាណកាន់តែច្រើន ហើយក៏អាចទាក់ទាញវិនិយោគិនអង់គ្លេសឱ្យចូលមកវិនិយោគផ្ទាល់នៅកម្ពុជាផងដែរ។
ក្រសួងពាណិជ្ជកម្មកម្ពុជា រួមជាមួយស្ថានទូតចក្រភពអង់គ្លេសប្រចាំកម្ពុជា កាលពីថ្ងៃទី១២ ខែវិច្ឆិកា នៅសណ្ឋាគារ រ៉ូសវូដ ភ្នំពេញ បានរៀបចំវេទិកាពាណិជ្ជកម្ម និងវិនិយោគ លើកទី ២ ក្រោមមូលបទ «ចក្ខុវិស័យឆ្ពោះទៅកាន់ឆ្នាំ ២០៣០»ដែលមានការចូលរួមពីលោកស្រី ចម និម្មល រដ្ឋមន្រ្តីក្រសួងពាណិជ្ជកម្មកម្ពុជា និងលោក Dominic Williams ឯកអគ្គរាជទូតចក្រភពអង់គ្លេសប្រចាំកម្ពុជា។
ក្នុងវេទិកានេះភាគីទាំងពីរបានពិភាក្សាពីវឌ្ឍនភាពការងារក្រោមក្របខណ្ឌវេទិកាពាណិជ្ជកម្ម និងវិនិយោគ និងបានកំណត់ទិសដៅការងារបន្តក្នុងការលើកកម្ពស់កិច្ចសហប្រតិបត្តិការពាណិជ្ជកម្ម និងវិនិយោគ ឱ្យមានកំណើនប្រកបដោយបរិយាប័ន្ន និងចីរភាព ជាពិសេសការពង្រឹងភាពជាដៃគូរវាងប្រទេសទាំងពីឱ្យកាន់តែល្អប្រសើឡើងថែមមួយកម្រិតទៀត។
រដ្ឋមន្ត្រីក្រសួងពាណិជ្ជកម្ម លោកស្រី ចម និម្មល បានថ្លែងថា វេទិកានេះគឺពិតជាមានសារៈសំខាន់ក្នុងការបង្កើនកិច្ចសហប្រតិបត្តិការទ្វេភាគីឱ្យកាន់តែមានប្រសិទ្ធភាព ប្រកបដោយភាពរឹងមាំ ព្រមទាំងអាចជួយបង្កើតឱកាសសម្រាប់ការពិភាក្សាដោយភាពស្មោះត្រង់ដើម្បីជំរុញកិច្ចសហប្រតិបត្តិការជាមួយគ្នាឱ្យកាន់តែរឹងមាំបន្ថែមទៀត។
ឯកអគ្គរាជទូតអង់គ្លេស លោក Dominic Williams MBE បាននិយាយថា លោកបានជំនឿថាសម្ព័ន្ធភាពការជួញដូរ និងការវិនិយោគរវាងអង់គ្លេស និងកម្ពុជា នឹងនាំមកនូវអត្ថប្រយោជន៍ដ៏ធំឱ្យភាគីទាំងពីរ ហើយក៏នឹងជួយគាំទ្រទៅនឹងគោលបំណងអភិវឌ្ឍន៍របស់ប្រទេសកម្ពុជាផងដែរ។
លោកបន្តថា អង់គ្លេស គឺជាទីផ្សារនាំចេញទំនិញធំទី ១០ របស់កម្ពុជា ហើយលោកក៏មានបំណងជួយឱ្យអ្នកផលិតនៅកម្ពុជាអាចលក់ផលិតផលរបស់ពួកគេទៅឱ្យអ្នកប្រើប្រាស់នៅអង់គ្លេសផងដែរ។
លោកថ្លែងថា៖«នេះនឹងគាំទ្រចំពោះវិស័យសំខាន់ៗនៃសេដ្ឋកិច្ចកម្ពុជា ដើម្បីជំរុញការលូតលាស់ និងគាំទ្រការងារសម្រាប់ប្រជាជនកម្ពុជាដែលមានការខិតខំប្រឹងប្រែង។ ខ្ញុំមានចំណាប់អារម្មណ៍ក្នុងការជួយជំរុញអាជីវកម្មអង់គ្លេសឱ្យពង្រីកសកម្មភាពរបស់ពួកគេនៅកម្ពុជា ជាពិសេសក្នុងវិស័យអប់រំ វិស័យហេដ្ឋារចនាសម្ព័ន្ធ និងសេវាកម្មហិរញ្ញវត្ថុ។ អង់គ្លេសមានក្រុមហ៊ុនដែលមានបទពិសោធន៍ល្អក្នុងវិស័យទាំងនេះ ដែលពួកគេអាចប្រើប្រាស់ ដើម្បីបង្កើតចំណូលសម្រាប់អង់គ្លេស និងបង្កើនសមត្ថភាពប្រកួតប្រជែងពិភពលោករបស់កម្ពុជា»។
យោងតាមស្ថានទូតចក្រភពអង់គ្លេស វេទិកាពាណិជ្ជកម្ម និងវិនិយោគ លើកទី ២ នេះបានទាក់ទាញម្ចាស់អាជីវកម្ម និងវិនិយោគិនសំខាន់ៗមកពីចក្រភពអង់គ្លេស ព្រមទាំងអ្នកវិនិយោគនៅក្នុងតំបន់ដូចជា សិង្ហបុរី និងវៀតណាម ឱ្យធ្វើដំណើរមកកម្ពុជា។
វេទិកានេះ គឺដើម្បីបង្ហាញពីការប្តេជ្ញារបស់ប្រទេសទាំងពីរក្នុងការលើកកម្ពស់ការធ្វើពាណិជ្ជកម្ម និងផ្លាស់ប្តូរយោបល់គ្នាដើម្បីបង្កើតអត្ថប្រយោជន៍រួម។ ជាមួយគ្នានេះក៏នឹងជួយជំរុញការចាប់ដៃគូជាអ្នកនាំចេញទំនិញទៅទីផ្សារចក្រភពអង់គ្លេសផងដែរ។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ការនាំចេញ នាំចូលទំនិញរវាងកម្ពុជា-ចក្រភពអង់គ្លេស ចន្លោះពីខែមករា ដល់ខែតុលា ឆ្នាំ២០២៤ មានទឹកប្រាក់សរុប ៨៥០,៧៤ លានដុល្លារ កើនឡើង ១៥,៧ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣ ក្នុងនោះទំនិញកម្ពុជានាំទៅអង់គ្លេស មានប្រមាណ ៨០៧,៣៥ លានដុល្លារ កើនឡើង ២១,១ភាគរយ និងទំនិញអង់គ្លេសនាំមកកម្ពុជា មានចំនួន ៤៣,៣៨ លានដុល្លារ ធ្លាក់ចុះ ៣៦,៧ ភាគរយ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី១៣ ខែវិច្ឆិកាថា ការជំរុញកិច្ចសហប្រតិបត្តិការជាមួយចក្រភពអង់គ្លេសគឺជារឿងដ៏ល្អ ព្រោះអង់គ្លេសគឺជាទីផ្សារធំដែលទទួលទិញទំនិញពីកម្ពុជា ពិសេសផលិយផលវាយនភណ្ឌក្នុងបរិមាណច្រើនជារៀងរាល់ឆ្នាំ។
ដោយសារអង់គ្លេសស្ថិតក្នុងទ្វីបអ៊ឺរ៉ុប ដូច្នេះតាមរយៈទីផ្សារអង់គ្លេសទំនិញកម្ពុជាក៏អាចមានលំហូរទៅកាន់ប្រទេសក្នុងតំបន់នោះដែរ។ លោកបន្ថែមថា ទោះបច្ចុប្បន្នអង់គ្លេសបានចាកចេញពីសហគមន៍អ៊ឺរ៉ុប ប៉ុន្តែអង់គ្លេសនៅតែបន្តផ្តល់ប្រព័ន្ធអនុគ្រោះពន្ធនាំចូលទំនិញមួយចំនួនដល់កម្ពុជា។
លោកអះអាងថា៖«គ្រប់ការបង្កើនកិច្ចសហប្រតិបត្តិការល្អ គឺវានឹងជួយជំរុញឱ្យលំហូរទំនិញ និងភ្ញៀវទេសចររវាងប្រទេសទាំង ២»។
បើតាមលោក វណ្ណៈ បច្ចុប្បន្នទំនិញដែលកម្ពុជានាំទៅចក្រភពអង់គ្លេស មានដូចជា សម្លៀកបំពាក់ ស្បែកជើង កាបូប កង់ ផលិតផលកសិកម្ម ចំណែកអង់គ្លេសនាំមកកម្ពុជា មានដូចជា រថយន្ត គ្រឿងម៉ាស៊ីន គ្រឿងអគ្គិសនី និងគ្រឿងអេឡិចត្រូនិកជាដើម៕
