ជំនួបផ្គូផ្គងធុរកិច្ចរវាងសមាគមឧកញ៉ាកម្ពុជា ជាមួយសមាគមជប៉ុន-កម្ពុជា. សភាពាណិជ្ជកម្មកម្ពុជា។ CCC
ប្រទេសកម្ពុជាមានសុទិដ្ឋិនិយមថានឹងអាចទាក់ទាញវិនិយោគិនជប៉ុនឱ្យចូលមកបណ្តាក់ទុនផ្ទាល់កាន់តែច្រើនថែមទៀតបន្ទាប់ពីក្រុមអ្នកជំនួញធំៗនៅកម្ពុជាបានជួបពិភាក្សាជាមួយវិនិយោគិនជប៉ុន ដើម្បីស្វែងយល់កាន់តែច្បាស់អំពីកាលានុវត្តភាពវិនិយោគនៅកម្ពុជា និងឱកាសក្នុងការជ្រើសរើសដៃគូវិនិយោគទៅតាមប្រភេទអាជីវកម្មរៀងៗខ្លួន។
សមាគមឧកញ៉ាកម្ពុជា សហការជាមួយសមាគមជប៉ុន-កម្ពុជា កាលពីថ្ងៃទី១៩ ខែវិច្ឆិកា បានរៀបចំ«ជំនួបផ្គូផ្គងធុរកិច្ចរវាងសមាគមឧកញ៉ាកម្ពុជា និងសមាគមជប៉ុន-កម្ពុជា ២០២៤» ដោយមានចូលរួមពីលោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) និងលោក TAKAHASHI Fumiaki ប្រធានសមាគមជប៉ុន-កម្ពុជា(អតីតអគ្គរាជទូតជប៉ុនប្រចាំនៅកម្ពុជា) ព្រមទាំងថ្នាក់ដឹកនាំ និងសមាជិកនៃសមាគមឧកញ៉ាកម្ពុជា និងធុរជនជប៉ុន-កម្ពុជា សរុបប្រមាណ ១២០ រូប។
យោងតាម CDC ជំនួបផ្គូផ្គងធុរកិច្ចនេះរៀបចំឡើងក្នុងគោលបំណងដើម្បីផ្សារភ្ជាប់ទំនាក់ទំនងរវាងសមាគម និងវិនិយោគិននៃប្រទេសទាំងពីរ ស្របតាមចក្ខុវិស័យរបស់លោក ស៊ុន ចាន់ថុល ក្នុងបេសកកម្មគោះទ្វារវិនិយោគនៅប្រទេសជប៉ុន កាលពីខែឧសភា ឆ្នាំ ២០២៤។
ជាកិច្ចចាប់ផ្តើម លោក ចាន់ថុល បានសម្តែងការកោតសរសើរដល់សមាគមឧកញ៉ាកម្ពុជា និងសមាគមជប៉ុន-កម្ពុជា ដែលបានចូលរួមជាមួយរាជរដ្ឋាភិបាលក្នុងការផ្សព្វផ្សាយ និងកៀរគរវិនិយោគិនជប៉ុនឱ្យមកបណ្តាក់ទុននៅកម្ពុជាកាន់តែច្រើន ក្នុងន័យចូលរួមចំណែកជំរុញកំណើនសេដ្ឋកិច្ចកម្ពុជាឱ្យបោះជំហានទៅមុខកាន់តែលឿន បន្ថែមពីលើនេះ លោកក៏បានរំលេចឡើងអំពីកិច្ចខិតខំរបស់រាជរដ្ឋាភិបាលកម្ពុជា ក្នុងការដើរតួនាទីជាអ្នកសម្របសម្រួលធុរកិច្ច និងវិនិយោគ ដោយបានចាត់ទុកផ្នែកឯកជន គឺជាដៃគូ និងជាកាតាលីករសម្រាប់កំណើនសេដ្ឋកិច្ច។
លោកបានថ្លែងថា៖«នេះជាបេសកកម្មរបស់ក្រុមប្រឹក្សាអភិវឌ្ឍន៍កម្ពុជា យើងបានត្រៀមខ្លួនជាស្រេចដើម្បីផ្តល់កិច្ចសហការពេញទំហឹងជូនដល់ផ្នែកឯកជនដែលមានបំណងបណ្ដាក់ទុនវិនិយោគនៅកម្ពុជា»។
លោកបន្ថែមទៀតថា៖«ខ្ញុំសូមអំពាវនាវឱ្យវិនិយោគិនជប៉ុន និងវិនិយោគិនកម្ពុជាទាំងអស់ ដែលមានវត្តមានក្នុងកម្មវិធីនេះ សូមចាប់ដៃគ្នាសិក្សាពិនិត្យលទ្ធភាពជំរុញកិច្ចសហការធុរកិច្ច ក៏ដូចជាស្វែងយល់ឱ្យកាន់តែច្បាស់នូវកាលានុវត្តភាពវិនិយោគរបស់កម្ពុជា។ សមាគមឧកញ៉ាកម្ពុជា សូមបន្តចូលរួមផ្សព្វផ្សាយពីបរិយាកាសវិនិយោគនៅកម្ពុជាទៅកាន់វិនិយោគិនផ្សេងៗទៀតដើម្បីទាក់ទាញពួកគេឱ្យមកបណ្តាក់ទុននៅកម្ពុជា បង្កើតការងារបន្ថែមជូនបងប្អូនប្រជាពលរដ្ឋខ្មែរ ក៏ដូចជាជំរុញកំណើនសេដ្ឋកិច្ចជាតិឆ្ពោះទៅសម្រេចបានចក្ខុវិស័យជាប្រទេសចំណូលខ្ពស់នៅឆ្នាំ ២០៥០»។
លោក TAKAHASHI Fumiaki បាននិយាយថា ជំនួបផ្គូផ្គងធុរកិច្ចនេះធ្វើឡើងក្រោយកិច្ចពិភាក្សាការងាររវាងសមាគមឧកញ៉ាកម្ពុជា និងសមាគមជប៉ុន-កម្ពុជា បន្ទាប់ពីវត្តមានរបស់ លោក ស៊ុន ចាន់ថុល នៅទីក្រុងតូក្យូ កាលពីខែឧសភា ឆ្នាំ ២០២៤។ តាមរយៈជំនួបនេះ វិនិយោគិនជប៉ុនបានយល់កាន់តែច្បាស់អំពីបច្ចុប្បន្នភាពនៃស្ថានភាពវិនិយោគនៅកម្ពុជា។
លោកបានលើកឡើងថា៖«តាមរយៈជំនួបនាថ្ងៃនេះ ភាគីទាំងពីរនឹងបានភ្ជាប់ទំនាក់ទំនងជាមួយគ្នាទៅវិញទៅមកប្រកបដោយទំនុកចិត្ត»។
លោកស្រី គួន ធីតា សមាជិកក្រុមប្រឹក្សាភិបាលនៃសមាគមឧកញ៉ាកម្ពុជា និងជាអនុប្រធានគណៈកម្មការទំនាក់ទំនងសាធារណៈ និងអន្តរជាតិ បានថ្លែងថា ចក្ខុវិស័យ និងបេសកកម្មរបស់សមាគមឧកញ៉ាកម្ពុជា គឺការចូលរួមចំណែកយ៉ាងសកម្មជាមួយរាជរដ្ឋាភិបាលកម្ពុជា សំដៅចូលរួមកសាង និងអភិវឌ្ឍសង្គម សេដ្ឋកិច្ចជាតិ។
លោកស្រីបានបញ្ជាក់ថា៖«ខ្ញុំមានទំនុកចិត្តថា ជំនួបផ្គូផ្គងធុរកិច្ចថ្ងៃនេះ ពិតជាផ្ដល់អត្ថប្រយោជន៍ បង្កើនភាពស្និទ្ធស្នាល និងពង្រឹងទំនុកចិត្តរវាងធុរជននៃប្រទេសទាំងពីរសម្រាប់កិច្ចសហប្រតិបត្តិការធុរកិច្ច និងវិនិយោគឱ្យលេចចេញជារូបរាងឡើងនាពេលខាងមុខ»។
បើតាមលោកស្រី គួន ធីតា សមាគមឧកញ៉ាកម្ពុជា គឺជាបណ្ដុំធុរជនមកពីចម្រុះវិស័យក្នុងប្រព័ន្ធសេដ្ឋកិច្ចកម្ពុជា ហើយរហូតមកដល់ពេលនេះមានសមាជិកសរុប ៤២០ រូប ដែលកំពុងគ្រប់គ្រងក្រុមហ៊ុន និងសហគ្រាសរហូតដល់ជាង ៨០០ ដោយបង្កើតការងារច្រើនជាង ៥០០.០០០ កន្លែងដល់ប្រជាជនកម្ពុជានៅទូទាំងប្រទេស។
យោងតាម CDC ក្នុងរយៈពេល ១០ខែ ដើមឆ្នាំ ២០២៤ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគសរុប ៣៤៦ គម្រោង ក្នុងទុនវិនិយោគសរុបប្រមាណ ៥,៥ ប៊ីលានដុល្លារ កើនឡើង ៣៨ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣។
ប្រទេសជប៉ុនឈរនៅលំដាប់ទី ៧ ដែលមានទុនវិនិយោគសរុប ៤០ លានដុល្លារនៃរំហូរទុនវិនិយោគសរុបនៅកម្ពុជា។
នាយករដ្ឋមន្ត្រីកម្ពុជា លោក ហ៊ុន ម៉ាណែត ក្នុងដំណើរទស្សនកិច្ចទៅប្រទេសជប៉ុន កាលពីខែធ្នូ ឆ្នាំ ២០២៣ ដើម្បីចូលរួមកិច្ចប្រជុំកំពូលរំឭកខួបអនុស្សាវរីយ៍អាស៊ាន-ជប៉ុន ឆ្នាំទី៥០ នៃមិត្តភាព និងកិច្ចសហប្រតិបត្តិការអាស៊ាន-ជប៉ុន ក៏បានអញ្ជើញចូលរួមនៅក្នុងសិក្ខាសាលាវិនិយោគកម្ពុជាឆ្នាំ ២០២៣ ដោយក្នុងឱកាសនោះលោកស្នើឱ្យវិនិយោគិនជប៉ុនចូលមកបណ្តាក់ទុននៅកម្ពុជាឱ្យច្រើន ជាមួយគ្នានេះលោកក៏ជំរុញឱ្យផ្នែកឯកជននៃប្រទេសទាំង ២ ធ្វើការសិក្សារួមគ្នាដើម្បីបង្កើតតំបន់សេដ្ឋកិច្ចពិសេសកម្ពុជា-ជប៉ុន នៅកម្ពុជាផងដែរ។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) បានឱ្យដឹងថា ចាប់ពីខែមករា-ខែតុលា ឆ្នាំ ២០២៤ ការធ្វើពាណិជ្ជកម្មរវាងកម្ពុជា និងជប៉ុន មានទឹកប្រាក់សរុប ១ ៧៦១,៨ លានដុល្លារ កើនឡើង ១៧,១ ភាគរយបើធៀបរយៈពេលដូចគ្នាឆ្នាំ ២០២៣ ក្នុងនោះទំនិញកម្ពុជានាំទៅជប៉ុន ១ ១៥០,៦៧ លានដុល្លារ កើនឡើង ១៨ ភាគរយ ចំណែកជប៉ុននាំមកកម្ពុជា ៦១១,១៣ លានដុល្លារ កើនឡើង ១៥,៥ ភាគរយ។
ផ្អែកតាមតួលេខខាងលើ គឺជញ្ជីងពាណិជ្ជកម្មកម្ពុជាមានឧត្តមភាព ៥៣៩,៥៥ លានដុល្លារ ខណៈរយៈពេលដូចគ្នាឆ្នាំ ២០២៣ មានចំនួន ៤៤៥,៩១ លានដុល្លារ។ ប្រទេសជប៉ុន គឺជាដៃគូពាណិជ្ជកម្មអន្តរជាតិធំទី៥ របស់កម្ពុជា បន្ទាប់ពីប្រទេសចិន អាមេរិក វៀតណាម និងថៃ៕
