សំណង់អគារខ្ពស់ៗជាច្រើននៅក្នុងខេត្តព្រះសីហនុ។ សហការី
ការស្ទុះងើបឡើងដ៏លឿននៃវិស័យសំណង់នៅកម្ពុជានាអំឡុងពេលជាង ១ទសវត្សរ៍មុនការបង្ហាញវត្តមានរបស់ជំងឺកូវីដ១៩ បានធ្វើឱ្យចំនួនអគារដែលមានកម្ពស់ចាប់ពី ៥ជាន់ឡើងទៅ កើនដល់ចំនួនជាង ២ ៨០០។ នេះបើយោងតាមក្រសួងរៀបចំដែនដី នគរូបនីយកម្ម និងសំណង់។
របាយការណ៍បានឱ្យដឹងថា ចាប់ផ្តើមអនុវត្តក្នុងឆ្នាំ ២០០០ ដល់ខែកក្កដា ឆ្នាំ ២០២៤ រដ្ឋាភិបាលកម្ពុជាបានចេញលិខិតអនុញ្ញាតសាងសង់នៅទូទាំងប្រទេសចំនួន ៦៦ ៩៧៨ គម្រោង ដែលស្មើនឹងផ្ទៃក្រឡាកម្រាលសំណង់សរុប ១៩៤ ៣១០ ១៩៦ ម៉ែត្រការ៉េ និងមានតម្លៃប៉ាន់ស្មានទុនវិនិយោគសរុបប្រមាណ ៧៧ ៧១៩ ៧៧៩ ៨៩៩ ដុល្លារ។
សម្រាប់អគារដែលមានកម្ពស់ចាប់ពី ៥ ជាន់ឡើងទៅគឺមានចំនួនសរុប ២ ៨៥៧អគារ ដោយក្នុងរាជធានីភ្នំពេញ មានចំនួន ១ ៨១៣ អគារ, ខេត្តព្រះសីហនុ ៧៣០ អគារ, ខេត្តបន្ទាយមានជ័យ ២៤៩ អគារ និងខេត្តផ្សេងទៀតសរុប ៦៥ អគារ។
បើធ្វើការបែងចែក គឺអគារដែលមានកម្ពស់ចាប់ពី ៥-៩ ជាន់ មានចំនួន ១ ៦៥២ អគារ, ចាប់ពី ១០-១៩ ជាន់ មានចំនួន ៧៤៣ អគារ, ចាប់ពី ២០-២៩ ជាន់ ចំនួន ២៥០ អគារ, ចាប់ពី ៣០-៣៩ ជាន់ ចំនួន ១៥២ អគារ និងអគារចាប់ពី ៤០ ជាន់ឡើងមានចំនួន ៦០ អគារ។
ក្រសួងបានឱ្យដឹងថា៖«វិស័យសំណង់បានដើរតួនាទីយ៉ាងសំខាន់ក្នុងការស្តារ និងអភិវឌ្ឍសង្គមជាតិ និងជំរុញកំណើនសេដ្ឋកិច្ចគ្រួសារ និងសេដ្ឋកិច្ចជាតិ។ ពីមួយអាណត្តិទៅមួយអាណត្តិ រាជរដ្ឋាភិបាលកម្ពុជាបានដាក់ចេញនូវគោលនយោបាយបន្តពង្រឹងការគ្រប់គ្រង និងការអភិវឌ្ឍវិស័យសំណង់ ដែលជាសសរស្តម្ភមួយនៃកំណើនសេដ្ឋកិច្ច ដោយផ្តោតលើការជំរុញការវិនិយោគក្នុងវិស័យសំណង់ ការកសាងច្បាប់ ការកំណត់ស្តង់ដាសំណង់ និងការពន្លឿនរយៈពេលចេញលិខិតអនុញ្ញាតសាងសង់ជូនប្រជាជន»។
ប្រធានសមាគមអចលនទ្រព្យសកល និងជាប្រធានក្រុមប្រឹក្សាភិបាលនៃសម្ព័ន្ធក្រុមហ៊ុន SAM SN GROUP លោក សំ សុខនឿន បានប្រាប់ភ្នំពេញប៉ុស្តិ៍ក្នុងថ្ងៃទី២២ ខែវិច្ឆិកាថា កំណើនអគារខ្ពស់ក្នុងរយៈពេលជាង ១០ ឆ្នាំកន្លងមក គឺដោយសារកត្តាមួយចំនួនដូចជា កំណើនតម្រូវការកន្លែងស្នាក់នៅរបស់ជនបរទេសដែលមកវិនិយោគ និងធ្វើការនៅប្រទេសកម្ពុជា (ច្បាប់កម្ពុជាអនុញ្ញាតឱ្យជនបរទេសអាចទិញធ្វើជាកម្មសិទ្ធិបានចាប់ពីជាន់ទី ១ ឡើង), កំណើនប្រជាជនចូលមករស់នៅក្នុងទីក្រុង, ការកកស្ទះចរាចរណ៍, កំណើនប្រាក់ចំណូលបុគ្គលនិងគ្រួសារ ព្រមទាំងនិន្នាការនៃការផ្លាស់ប្តូរផ្នត់គំនិតរបស់ប្រជាជនខ្មែរចំពោះការរស់នៅលំនៅឋានខ្ពស់ៗ។
លោកបន្តថា ភាគច្រើននៃអគារខ្ពស់ៗនៅកម្ពុជា ត្រូវបានប្រើប្រាស់ជា អគារខុនដូ អាផាតមិន ការិយាល័យ ផ្សារទំនើប និងអគារពាណិជ្ជកម្ម។
លោកថ្លែងថា៖«ស្ថិរភាពនយោបាយ សន្តិសុខ និងកំណើនសេដ្ឋកិច្ចរឹងមាំ បានជួយជំរុញឱ្យវិស័យសំណង់កម្ពុជារីកមុខមាត់យ៉ាងខ្លាំងក្នុងរយៈពេលជិត ២ ទសវត្សរ៍មកនេះ។ ប្រសិនបើស្ថានភាពសេដ្ឋកិច្ចពិភពលោកល្អប្រសើរវិញ ខ្ញុំមានជំនឿថា សំណង់អគារខ្ពស់ៗនៅកម្ពុជានឹងលេចវត្តមានកាន់តែច្រើន»។
លោកលើកឡើងទៀតថា មុនឆ្នាំ ២០១៩ ចំនួនអគារខ្ពស់ៗបានលេចឡើងយ៉ាងច្រើននៅខេត្តព្រះសីហនុ បន្ទាប់ពីទីនោះទទួលបានការចូលទៅបណ្តាក់ទុនយ៉ាងច្រើនពីសំណាក់វិនិយោគិនបរទេស ពិសេសជនជាតិចិន។
ទោះយ៉ាងណាបន្ទាប់ពីរដ្ឋាភិបាលដាក់ចេញនូវវិធានការមួយចំនួនដើម្បីលុបបំបាត់អាជីវកម្មមិនល្អដល់សង្គម ព្រមទាំងវិបត្តិបណ្តាលមកពីកូវីដ១៩ បានធ្វើឱ្យការដ្ឋានសំណង់អគារធំៗ និងខ្ពស់ៗជាច្រើននៅទីនោះត្រូវជាប់គាំងមកដល់ពេលបច្ចុប្បន្ន។
លោកអះអាងថា៖«វិស័យសំណង់នៅខេត្តព្រះសីហនុ នឹងមានភាពស្រស់បំព្រងឡើងវិញនាពេលខាងមុខ ខណៈរាជរដ្ឋាភិបាលបានដាក់ចេញនូវយុទ្ធសាស្រ្តថ្មីៗជាបន្តបន្ទាប់ ដើម្បីធ្វើយ៉ាងណាប្រែក្លាយខេត្តព្រះសីហនុឱ្យទៅជាខេត្តពហុបំណងសម្រាប់ការវិនិយោគលើគ្រប់វិស័យ»។
ទាក់ទងនឹងអគារដែលមានខ្ពស់ៗនាពេលនេះ លោក សុខនឿន បញ្ជាក់ថា ក្រុងប៉ោយប៉ែត(ព្រំដែនរវាងខេត្តបន្ទាយមានជ័យ ជាមួយប្រទេសថៃ) គឺកំពុងបង្ហាញពីសញ្ញាវិជ្ជមានគួរឱ្យកត់សម្គាល់។
អគ្គលេខាធិការសមាគមអ្នកអភិវឌ្ឍន៍លំនៅឋានកម្ពុជា លោក ហ៊ុយ វណ្ណា បាននិយាយថា វិស័យសំណង់នៅពេលនេះមិនសូវមានសកម្មភាពទេ ហើយបើមានភាគច្រើនជាសំណង់តូចៗដែលមានលក្ខណៈជាលំនៅឋានផ្ទាល់ដី ឬលំនៅឋានលក្ខណៈបុរីតែប៉ុណ្ណោះ។ សម្រាប់គម្រោងធំៗ និងខ្ពស់ៗ គឺបានស្ងប់ស្ងាត់ជិត ៤ ឆ្នាំមកហើយ ពោលគឺចាប់តាំងពីការមកដល់នៃជំងឺកូវីដ១៩។
លោកបាននិយាយថា៖«វិស័យសំណង់នៅកម្ពុជា ត្រូវការពេលវេលាយូរបន្ថែមទៀតដើម្បីអាចមានសន្ទុះឡើងវិញ»។
តួលេខដែលកត់ត្រាដោយ អគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ចន្លោះពីខែមករា-ខែតុលា ឆ្នាំ ២០២៤ កម្ពុជាបាននាំចូលទំនិញស្ថិតក្នុងជំពូក(HS ២ ខ្ទង់) លេខកូដ ៧២ ដែលរួមមានដែក និងដែកថែប ក្នុងទឹកប្រាក់សរុប ៥០៥,២ លានដុល្លារ កើន ៦៥,១ ភាគរយបើធៀបរយៈពេលដូចគ្នាឆ្នាំ ២០២៣ ដែលមានចំនួន ៣០៥,៩៧ លានដុល្លារ។ ចំនួននេះស្មើនឹង ២,១២ ភាគរយនៃចំនួនទឹកប្រាក់នាំទំនិញចូលសរុបរបស់កម្ពុជារយៈពេល ១០ ខែ ឆ្នាំ ២០២៤ ដែលមានចំនួន ២៣,៤៩ ពាន់លានដុល្លារ៕
