អាជីវកម្មតាមដងផ្លូវភាគច្រើនមិនមានការចុះបញ្ជីអាជីវកម្មឡើយ។ សហការី
ដើម្បីបង្កភាពងាយស្រួលដល់ម្ចាស់អាជីវកម្មដែលមានបំណងចង់កែប្រែព័ត៌មានអំពីក្រុមហ៊ុន សហគ្រាសខ្លួនដែលបានចុះបញ្ជីតាមប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន(Single Portal) រដ្ឋាភិបាលកម្ពុជា កាលពីថ្ងៃម្សិលមិញបានប្រកាសដាក់ឱ្យដំណើរការជាផ្លូវការនូវមុខងារធ្វើបច្ចុប្បន្នកម្មព័ត៌មានដែលបានចុះបញ្ជីនាពេលកន្លងមក។
ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានដំណាក់កាលទី ១ ត្រូវបានរដ្ឋាភិបាលកម្ពុជាដាក់ឱ្យដំណើរការជាផ្លូវការកាលពីថ្ងៃទី ១៥ ខែមិថុនា ឆ្នាំ ២០២០ ដោយរួមមានក្រសួងស្ថាប័នរដ្ឋចំនួន ៦ គឺក្រសួងមហាផ្ទៃ, ក្រសួងសេដ្ឋកិច្ច និងហិរញ្ញវត្ថុ, ក្រសួងពាណិជ្ជកម្ម, ក្រសួងការងារនិងបណ្ដុះបណ្ដាលវិជ្ជាជីវៈ, អគ្គនាយកដ្ឋានពន្ធដារ, និងក្រុមប្រឹក្សាអភិវឌ្ឍន៍កម្ពុជា។
ក្រោយមករដ្ឋាភិបាលក៏បានប្រកាសដាក់ឱ្យដំណើរការដំណាក់កាល ទី ២ នៅថ្ងៃទី ១៥ ខែកញ្ញា ឆ្នាំ ២០២១ និងដំណាក់កាល ទី ៣ កាលពីថ្ងៃទី ២២ ខែមិថុនា ឆ្នាំ ២០២៣ ដោយបានបញ្ចូលក្រសួង-ស្ថាប័នមួយចំនួនបន្ថែមទៀត។ ជាបន្តបន្ទាប់មកទៀតក្នុងន័យពង្រីកបន្ថែមការគ្របដណ្តប់លើសិទ្ធិសម្រេចក្នុងការផ្តល់អាជ្ញាបណ្ណ លិខិតអនុញ្ញាត និងវិញ្ញាបនបត្រ ផ្អែកលើសកម្មភាពអាជីវកម្មតាមវិស័យនានា ក្រោមការចូលរួមរបស់ក្រសួង ស្ថាប័នចំនួន ២១ ជាមួយនឹងការបញ្ចូលសេវាសាធារណៈ សរុបចំនួន ៣៣។
សេចក្តីប្រកាសព័ត៌មានស្តីពី«ការដាក់ដំណើរការនូវមុខងារចុះបញ្ជីកែប្រែព័ត៌មានក្រុមហ៊ុន សហគ្រាស ដំណាក់កាលទី ២ លើប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន» កាលពីថ្ងៃទី២៦ ខែវិច្ឆិកា ឱ្យដឹងថា ក្រុមការងារអន្តរក្រសួងរៀបចំសេវាអេឡិចត្រូនិកសម្រាប់ធុរកិច្ច ក្រោមកិច្ចសហការយ៉ាងជិតស្និទ្ធជាមួយក្រសួង ស្ថាប័នពាក់ព័ន្ធ ដែលរួមមាន ក្រសួងពាណិជ្ជកម្ម, អគ្គនាយកដ្ឋានពន្ធដារ, ក្រសួងការងារ និងបណ្តុះបណ្តាលវិជ្ជាជីវៈ និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានដាក់ឱ្យដំណើរការជាផ្លូវការនូវមុខងារធ្វើបច្ចុប្បន្នកម្មព័ត៌មានក្រុមហ៊ុន សហគ្រាស ក្នុងប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន(Single Portal) ដំណាក់កាលទី ២ ចំនួន ៦ មុខងារ។
សេចក្តីប្រកាសព័ត៌មានបញ្ជាក់ថា៖«មុខងារថ្មីទាំង ៦ នេះគឺបំពេញបន្ថែមលើមុខងារធ្វើបច្ចុប្បន្នកម្មព័ត៌មានក្រុមហ៊ុន សហគ្រាស ចំនួន ៥ ដែលបានដាក់ដំណើរការរួចហើយកាលពីថ្ងៃទី១៥ ខែមករា ឆ្នាំ២០២៤ កន្លងទៅ។ កិច្ចការនេះបានបង្ហាញពីការចូលរួមយ៉ាងសកម្មរបស់រាជរដ្ឋាភិបាលកម្ពុជា ក្នុងការជំរុញលើកកម្ពស់ការធ្វើឌីជីថលូបនីយកម្មសេវាសាធារណៈ សំដៅបង្កបរិយាកាសអំណោយផលដល់ការធ្វើធុរកិច្ចនៅកម្ពុជា និងបង្កើនភាពប្រកួតប្រជែងរបស់កម្ពុជាលើឆាកអន្តរជាតិ ដោយផ្អែកលើគោលការណ៍សំខាន់ ៣ រួមមាន ១-ការកាត់បន្ថយចំណាយ, ២-ការកាត់បន្ថយថិរវេលា, និង ៣-ការកាត់បន្ថយនីតិវិធីស្មុគស្មាញ»។
យោងតាមសេចក្តីប្រកាស មុខងារទាំង ៦ ខាងលើ រួមមាន ១-មុខងារកែប្រែនាមករណ៍ក្រុមហ៊ុន សហគ្រាស, ២-មុខងារកែប្រែព័ត៌មានលម្អិតអភិបាល, ៣-មុខងារកែប្រែព័ត៌មានលម្អិតម្ចាស់សហគ្រាស, ៤-មុខងារកែប្រែព័ត៌មានលម្អិតម្ចាស់ភាគហ៊ុន, ៥-មុខងារកែប្រែសមាសភាពអ្នកគ្រប់គ្រងសាខា ឬ ការិយាល័យតំណាងក្រុមហ៊ុនបរទេស និង ៦-មុខងារបញ្ឈប់អាជីវកម្មជាស្ថាពរ សម្រាប់ការលុបឈ្មោះចេញពីបញ្ជីពាណិជ្ជកម្ម ។ មុខងារថ្មីទាំង ៦ នេះគឺបំពេញបន្ថែមលើមុខងារធ្វើបច្ចុប្បន្នកម្មព័ត៌មានក្រុមហ៊ុន សហគ្រាស ចំនួន ៥ ដែលបានដាក់ដំណើរការរួចហើយកាលពីថ្ងៃទី១៥ ខែមករា ឆ្នាំ ២០២៤។
គិតចាប់តាំងពីដាក់ឱ្យដំណើរការផ្លូវការកាលពីថ្ងៃទី១៥ ខែមិថុនា ឆ្នាំ ២០២០ រហូតដល់ដំណាច់ខែតុលា ឆ្នាំ ២០២៤ មានក្រុមហ៊ុន សហគ្រាសសរុបចំប្រមាណ ៤០ ពាន់ទទួលបានការអនុម័តចុះបញ្ជីអាជីវកម្មតាមប្រព័ន្ធ Single Portal ដោយមានដើមទុនវិនិយោគសរុបជាង ១៤ ប៊ីលានដុល្លារអាមេរិក។
បន្ថែមលើនេះ អាជ្ញាបណ្ណ លិខិតអនុញ្ញាត និងវិញ្ញាបនបត្រតាមវិស័យចំនួន ២៧ ពាន់ត្រូវបានអនុម័តដោយក្រសួង ស្ថាប័នជំនាញនីមួយៗនៅក្នុងប្រព័ន្ធអេកូឡូស៊ីសេវាអេឡិចត្រូនិកសម្រាប់ធុរកិច្ច ដែលកំពុងធ្វើប្រតិបត្តិការនៅលើថ្នាល CamDX។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍នៅថ្ងៃទី២៧ ខែវិច្ឆិកាថា ការអនុញ្ញាតឱ្យម្ចាស់ក្រុមហ៊ុន សហគ្រាសដែលបានចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន អាចធ្វើការកែតម្រូវ ឬធ្វើបច្ចុប្បន្នភាពទិន្នន័យ និងព័ត៌មានក្រុមហ៊ុន គឺវានឹងផ្តល់ផលវិជ្ជមានច្រើនទៅដល់ម្ចាស់អាជីវកម្ម(ផ្នែកឯកជន) និងរដ្ឋាភិបាល។
សម្រាប់ផ្នែកឯកជន គឺមានភាពងាយស្រួលដោយមិនចាំបាច់ចំណាយពេលយូរក្នុងការធ្វើបច្ចុប្បន្នភាពស្ថានភាពក្រុមហ៊ុន សហគ្រាស និងជួយកាត់បន្ថយការចំណាយក្រៅផ្លូវការផងដែរ ចំណែកអាជ្ញាធរ គឺអាចមានព័ត៌មានច្បាស់លាស់អំពីបម្រែបម្រួលនៃស្ថានភាពថ្នាក់ដឹកនាំក្រុមហ៊ុន ទីតាំង និងស្ថានភាពក្រុមហ៊ុនជាដើម។
លោកបញ្ជាក់ថា៖«នេះជាវឌ្ឍនភាពមួយទៀតរបស់រដ្ឋាភិបាលក្នុងការកាត់បន្ថយនីតិវិធីចុះបញ្ជី និងកែតម្រូវព័ត៌មានរបស់ក្រុមហ៊ុន សហគ្រាសដែលចុះបញ្ជីនៅកម្ពុជា។ ការសម្រួលការងារឱ្យកាន់តែមានភាពងាយស្រួល ក៏ជាចំណែកក្នុងការបង្កើនសក្តានុពលទាក់ទាញឱ្យក្រុមហ៊ុន ឬសហគ្រាសមិនទាន់ចុះបញ្ជី មកចុះបញ្ជីកាន់តែច្រើនផងដែរ។ បន្ថែមពីលើនេះវាក៏ជួយឱ្យអ្នកដែលមានបំណងចង់បើកអាជីវកម្មថ្មី មានឆន្ទៈក្នុងការមកចុះបញ្ជីអាជីវកម្មរបស់ខ្លួនកាន់តែច្រើនផងដែរ»។
ប្រធានសមាគមបច្ចេកវិទ្យាឌីជីថលនៃកម្ពុជា លោក ឈិន កេន ធ្លាប់និយាយថា ការពង្រឹងច្បាប់អាជីវកម្ម ការសម្រួលនីតិវិធីចុះបញ្ជីដែលមានភាពងាយស្រួល និងចំណេះដឹងផ្នែកបច្ចេកវិទ្យាព័ត៌មានរបស់ម្ចាស់អាជីវកម្ម គឺបានជួយលើកទឹកចិត្តឱ្យម្ចាស់អាជីវកម្មកាន់តែច្រើននាំគ្នាទៅចុះបញ្ជី។ នៅពេលគ្រប់អាជីវកម្មសុទ្ធតែបានការទទួលស្គាល់ពីអាជ្ញាធរ វានឹងជួយធ្វើឱ្យការប្រកួតប្រជែងមានតម្លាភាពជាងមុន។
លោកបញ្ជាក់ថា៖«នៅពេលគ្រប់អាជីវកម្មទាំងអស់ត្រូវបានចុះបញ្ជី វានឹងផ្តល់ផលចំណេញច្រើនទៅរដ្ឋាភិបាល និងផ្នែកឯកជន ហើយជាមួយគ្នានេះវាក៏នឹងជួយកាត់បន្ថយការលក់បង្ខូចថ្លៃពីសំណាក់ម្ចាស់អាជីវកម្មមិនស្របច្បាប់មួយចំនួនដែលរកស៊ីដោយមិនបង់ពន្ធផងដែរ»។
ព័ត៌មានច្បាស់លាស់អំពីប្រភេទ និងស្ថានភាពអាជីវកម្ម គឺមានភាពចាំបាច់សម្រាប់ឱ្យរដ្ឋាភិបាលដាក់ចេញនូវគោលនយោបាលគាំទ្រ ឬលើកទឹកចិត្តផ្សេងៗ៕
