គ្រឿងចក្រចាប់ផ្តើមបុកគ្រឹះសាងសង់រោងចក្រកែច្នៃគ្រាប់ស្វាយចន្ទីរបស់ក្រុមហ៊ុន Unique Noble Trading Co., Ltd នៅខេត្តកំពង់ធំ។ សហការី
ការនាំចេញគ្រាប់ស្វាយចន្ទីកែច្នៃ(ផលិតផលសម្រេច)របស់កម្ពុជាទៅទីផ្សារអន្តរជាតិនឹងមានបរិមាណកាន់តែច្រើនចាប់ពីដើមឆ្នាំ ២០២៥ តទៅ ខណៈក្រុមហ៊ុនក្នុងស្រុក Unique Noble Trading Co., Ltd បានប្រកាសចាប់ផ្តើមសាងសង់រោងចក្រកែច្នៃគ្រាប់ស្វាយចន្ទីជាផ្លូវការនៅក្នុងខេត្តកំពង់ធំ ដែលមានសមត្ថភាពកែច្នៃគ្រាប់ស្វាយចន្ទីបាន ៣០ តោនក្នុង ១ថ្ងៃ។
រោងចក្រកែច្នៃគ្រាប់ស្វាយចន្ទីដែលមានម្ចាស់ជាវិនិយោគិនក្នុងស្រុកនេះ បានបើកការដ្ឋានសាងសង់ កាលពីថ្ងៃទី១៥ ខែធ្នូ ដោយមានទីតាំងនៅក្នុងឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ លើផ្ទៃដី ២០ ហិកតា។
ក្នុងទីតាំងនេះនឹងមានសាងសង់រោងចក្រចំនួន ៤ រួមមាន ទី១. រោងចក្រកែច្នៃគ្រាប់ស្វាយចន្ទី ទី២. រោងចក្រកៀបប្រេងពីសម្បកស្វាយចន្ទី ទី៣. រោងចក្រធ្វើជីពីសំណល់ចុងក្រោយរបស់គ្រាប់ស្វាយចន្ទី និងទី៤. រោងចក្រគ្រឿងយន្តម៉ាស៊ីនកែច្នៃគ្រាប់ចន្ទី។ នៅពេលគម្រោងទាំងមូលដាក់ឱ្យដំណើរការពេញលេញវាត្រូវការកម្លាំងពលកម្មប្រហែល ៤០០ នាក់។
ប្រធានសមាគមស្វាយចន្ទីកម្ពុជា លោក អួន ស៊ីឡុត បានប្រាប់ភ្នំពេញប៉ុស្តិ៍ក្នុងថ្ងៃទី ១៧ ខែធ្នូ ថា និន្នាការការដាំដុះ ទិន្នផល និងជាពិសេសបរិមាណនាំចេញគ្រាប់ស្វាយចន្ទីកែច្នៃនៅកម្ពុជាទៅទីផ្សារអន្តរជាតិកំពុងហោះជំហានទៅមុខកាន់តែលឿននារយៈពេលជាង ១ ឆ្នាំចុងក្រោយនេះ។
ខេត្តកំពង់ធំ គឺជាទីតាំងមានសក្តានុពលជាងគេផ្នែកផលិតកម្មស្វាយចន្ទី ដោយកាលពីពេលថ្មីៗប្រមុខរាជរដ្ឋាភិបាលក៏ទើបអនុញ្ញាតឱ្យបង្កើតសួនកសិ-ឧស្សាហកម្មស្វាយចន្ទីនៅក្នុងខេត្តកំពង់ធំផងដែរ។ លោកបន្តថា បច្ចុប្បន្នការដាំដុះ និងទិន្នផលគ្រាប់ស្វាយចន្ទីនៅខេត្តកំពង់បានគ្របដណ្តប់ប្រហែល ៣០ ភាគរយនៃទិន្នផលទូទាំងប្រទេសកម្ពុជា។
លោកប្រាប់ទៀតថា៖«បរិយាកាសវិនិយោគនៅកម្ពុជាដែលមានភាពអំណោយផល ព្រមទាំងការយកចិត្តទុកដាក់របស់រាជរដ្ឋាភិបាលលើផលិតកម្មស្វាយចន្ទី ដែលមានដូចជា ការរៀបចំគោលនយោបាយ និងសួនកសិ-ឧស្សាហកម្ម កំពុងចូលរួមចំណែកយ៉ាងច្រើនក្នុងការលើកទឹកចិត្តដល់អ្នកវិនិយោគឱ្យមកបណ្តាក់ទុនលើការដាំដុះ និងកែច្នៃគ្រាប់ស្វាយចន្ទីកាន់តែច្រើន»។
លោកប្រាប់ទៀតថា ការសាងសង់រោងចក្រកែច្នៃគ្រាប់ស្វាយចន្ទី នឹងត្រូវបញ្ចប់ ហើយបើកដំណើរការនាអំឡុងខែមីនា ឆ្នាំ២០២៥។ រោងចក្រនេះមានសមត្ថភាពកែច្នៃគ្រាប់ស្វាយចន្ទី បានប្រហែល ៣០ តោនក្នុង ១ ថ្ងៃ ឬចន្លោះពីជាង ៥ ០០០-១២ ០០០ តោនក្នុង ១ឆ្នាំ។
គណៈធិបតីចូលរួមក្នុងពិធីបើកការដ្ឋានសាងសង់រោងចក្រកែច្នៃគ្រាប់ស្វាយចន្ទី របស់ក្រុមហ៊ុន Unique Noble Trading Co., Ltd។ សហការី
បើតាម លោក ស៊ីឡុត ក្រៅពីគម្រោងកែច្នៃផលិតផលគ្រាប់ស្វាយចន្ទីនៅក្នុងខេត្តកំពង់ធំ ក្រុមហ៊ុន Unique Noble Trading Co., Ltd ក៏មានរោងចក្រកែច្នៃស្វាយកែវរមៀតក្នុងខេត្តកំពង់ស្ពឺ ផងដែរ។
គិតរហូតដល់ពេលនេះកម្ពុជាមានសហគ្រាសកែច្នៃស្វាយចន្ទី ចំនួន ៥២ ក្នុងនោះ ៦ ជារោងចក្រធុនមធ្យម (សមត្ថភាពផលិត ៧ ០០០ តោន ទៅ ១៤០ ០០០ តោន ក្នុងមួយឆ្នាំ)។ ចំណែក ៤៨ សហគ្រាសផ្សេងទៀតជាសិប្បកម្មលក្ខណៈគ្រួសារតូចៗ មិនមានផលិតកម្មពេញ ១ឆ្នាំឡើយ។
នៅក្នុងពិធីបញ្ចុះបឋមសិលាសាងសង់រោងចក្ររបស់ក្រុមហ៊ុន Unique Noble Trading Co., Ltd លោក ជា វ៉ាន់ចាន់ អភិបាលរងខេត្តកំពង់ធំ បានលើកឡើងថា ការវិនិយោគលើរោងចក្រកែច្នៃគ្រាប់ស្វាយចន្ទី គឺជាការចូលរួមរបស់ផ្នែកឯកជនជាមួយរាជរដ្ឋាភិបាលក្នុងការលើកស្ទួយផលិតកម្មស្វាយចន្ទីនៅកម្ពុជាឱ្យរីកចម្រើន ខណៈខេត្តកំពង់ធំ គឺជាទីតាំងដែលមានលក្ខណៈអំណោយផលច្រើនសម្រាប់ផលិតកម្មស្វាយចន្ទី។
លោកបានបន្ថែមថា ទីតាំងរបស់រោងចក្រកែច្នៃគ្រាប់ស្វាយចន្ទី Unique Noble Trading Co., Ltd គឺមានដំណាំស្វាយចន្ទីច្រើន ដូច្នេះក្រុមហ៊ុនអាចប្រមូលទិញពីមជ្ឈដ្ឋានក្នុងតំបនប់ និងកន្លែងផ្សេងៗទៀតយកមកកែច្នៃ ដើម្បីនាំចេញទៅទីផ្សារអន្តរជាតិ។
លោកស្រី ពិន ភិរម្យ អគ្គនាយកក្រុមហ៊ុន Unique Noble Trading Co., Ltd បានប្រាប់ថា ក្នុងគម្រោងនេះ គឺក្រៅពីរោងចក្រកែច្នៃគ្រាប់ស្វាយចន្ទី ក្រុមហ៊ុនក៏នឹងសាងសង់រោងចក្រកែច្នៃសម្បកគ្រាប់ស្វាយចន្ទីយកប្រេង កែច្នៃកាកសំណល់ធ្វើជាជីសម្រាប់ឱ្យប្រជាកសិករយកទៅប្រើប្រាស់ក្នុងតម្លៃសមរម្យ និងមានរោងចក្រគ្រឿងអេឡិចត្រូនិចសម្រាប់កែច្នៃគ្រាប់ស្វាយចន្ទី ផងដែរ។
នៅដើមឆ្នាំ ២០២៥ ខាងមុខ រោងចក្រកែច្នៃគ្រាប់ស្វាយចន្ទីតម្លៃប្រមាណ ១២ លានដុល្លាររបស់ក្រុមហ៊ុន CSNC Agriculture Co.,Ltd នៅខេត្តកំពង់ធំ ក៏គ្រោងនឹងបើកដំណើរការផលិតកម្មរបស់ខ្លួនផងដែរ។ រោងចក្រនេះគឺជាការវិនិយោគរួមរវាងកម្ពុជា-សិង្ហបុរី ដោយមានសមត្ថភាពកែច្នៃគ្រាប់ស្វាយចន្ទី បាន ៤០ តោនក្នុង ១ ថ្ងៃ ឬប្រមាណ ១២ ០០០តោនក្នុង ១ ឆ្នាំ។
សមាគមស្វាយចន្ទីកម្ពុជា បានឱ្យដឹងថា ក្នុងរយៈពេល ១២ខែ កម្ពុជាផលិតគ្រាប់ស្វាយចន្ទី(ការព្យាករ)បាន ៨៥០ ០០០តោន កើនឡើង ២៦,៨ភាគរយបើធៀបនឹងឆ្នាំ ២០២៣។ ការនាំចេញទៅក្រៅប្រទេស មានបរិមាណ ៨១៥ ០០០ តោន គិតជាទឹកប្រាក់ ១ ១៥០ លានដុល្លារ កើនឡើង ៣១ ភាគរយ៕
