លោក ហ៊ុន ម៉ាណែត ពិនិត្យមើលគម្រោងប្លង់របស់ «ទីក្រុងមេគង្គ ឃី»។ STPM
នាយករដ្ឋមន្ត្រីកម្ពុជា លោក ហ៊ុន ម៉ាណែត បានអះអាងថា ក្រុងអរិយក្សត្រនឹងក្លាយជាតំបន់ឧស្សាហកម្ម សេវាកម្ម និងមានប្រជាជនរស់នៅច្រើនដូចរាជធានីភ្នំពេញនាពេលខាងមុខ ខណៈបច្ចុប្បន្នរាជរដ្ឋាភិបាលកំពុងកសាងហេដ្ឋារចនាសម្ព័ន្ធជាច្រើន ជាពិសេសគម្រោងកសាងស្ពានតភ្ជាប់ទៅទីនោះ បន្ថែមពីលើគម្រោងសាងសង់ស្ពានដែលជាជំនួយរបស់ប្រទេសកូរ៉េខាងត្បូង។
នេះជាការលើកឡើងរបស់ លោក ហ៊ុន ម៉ាណែត ក្នុងឱកាសចូលរួមក្នុងពិធីបើកការដ្ឋានសាងសង់គម្រោងអភិវឌ្ឍន៍«ទីក្រុងមេគង្គឃី»(Mekong Quay City) កាលពីព្រឹកថ្ងៃទី១៧ ខែធ្នូ ឆ្នាំ ២០២៤។
គម្រោងអភិវឌ្ឍន៍«ទីក្រុងមេគង្គឃី»ត្រូវបានអភិវឌ្ឍលើទឹកដីក្រុងអរិយក្សត្រ ជាប់ដងទន្លេមេគង្គត្រើយខាងកើត ទល់មុខគម្រោងអភិវឌ្ឍន៍កោះនរា ដោយលាតសន្ធឹងលើផ្ទៃដីទំហំ ២១០ ហិកតា។ គម្រោងនេះគឺជាការអភិវឌ្ឍរួមគ្នារវាងក្រុមហ៊ុន TP Moral Group(TPMG) និងក្រុមហ៊ុន Khun Sea Import Export Group។
លោក ហ៊ុន ម៉ាណែត បានលើកឡើងថា ការវិនិយោគលើគម្រោងកសាងទីក្រុងដ៏ធំនេះ គឺជាការវិនិយោគដ៏ត្រឹមត្រូវមួយដែលបង្ហាញយ៉ាងច្បាស់ថា វិស័យអចលទ្រព្យនៅកម្ពុជាចាប់ផ្តើមងើបឡើងវិញជាបណ្តើរៗហើយ ខណៈកម្ពុជាកំពុងធ្វើដំណើរប្រកបដោយក្តីសង្ឃឹមឆ្ពោះទៅរកគោលដៅនៃការអភិវឌ្ឍ។ លោកបន្តថា តំបន់អរិយក្សត្រនឹងមានការប្រែប្រួលមុខមាត់ខ្លាំងនាពេលខាងមុខ ហើយតំបន់នេះនឹងមានប្រជាជនរស់នៅ និងធ្វើការកាន់តែច្រើន។
អរិយក្សត្រនឹងក្លាយពីតំបន់ប្រកបការងារកសិកម្ម ទៅជាតំបន់ឧស្សាហកម្មដែលមានរោងចក្រជាច្រើន។ បច្ចុប្បន្នរដ្ឋាភិបាលកម្ពុជាកំពុងមានផែនការកសាងស្ពានជាច្រើនភ្ជាប់ទៅតំបន់អរិយក្សត្រ។
លោកថ្លែងថា៖«ខ្ញុំគិតថាការតភ្ជាប់ទៅថ្ងៃមុខ គឺនឹងឈានទៅដល់ការបង្កើតមិនមែនមានឈ្មោះថា ក្រុងអរិយក្សត្រទេ មិនមែនជាក្រុងកសិកម្មទេ ប៉ុន្តែនឹងទៅជាក្រុងឧស្សាហកម្ម ក្រុងសេវាកម្មដូចនៅម្ខាងទៀតដែរ(រាជធានីភ្នំពេញ)»។
ក្រៅពីគម្រោងសាងសង់ស្ពានឆ្លងទន្លេ លោកនាយករដ្ឋមន្ត្រីក៏បានលើកឡើងពីគំនិតក្នុងអភិវឌ្ឍន៍ផ្លូវក្រោមទន្លេចេញពីរាជធានីភ្នំពេញទៅតំបន់អរិយក្សត្រផងដែរ។ លោកនិយាយថា ការកសាងហេដ្ឋារចនាសម្ព័ន្ធគឺមិនត្រឹមតែជួយសម្រួលដល់ការធ្វើដំណើរ និងកំណើនសេដ្ឋកិច្ចប៉ុណ្ណោះទេ ប៉ុន្តែក៏ជួយជំរុញឱ្យវិស័យអចលនទ្រព្យកាន់តែល្អផងដែរ។
លោកអះអាងថា៖«ខ្ញុំសង្ឃឹមថាសក្តានុពលនៃការតភ្ជាប់នេះ នឹងនាំការរីកចម្រើននៅខាងកើតទន្លេ គឺមិនមែនតែនៅក្រុងអរិយក្សត្រ ឬតំបន់ ២០០ ហិកតានេះទេ គឺនឹងរីកនៅទិសខាងកើតជំរុញទៅដល់តំបន់តភ្ជាប់រហូតទៅដល់ផ្លូវជាតិលេខ ៨ ក្លាយទៅជាតំបន់ឧស្សាហកម្ម តំបន់ដែលទំនើបដូចជាតំបន់ទិសខាងលិចផងដែរ»។
លោកបន្ថែមថា៖«ប្រសិនបើបានអាក្រោមទឹក(ផ្លូវក្រោមទន្លេ)កាន់តែល្អ ហើយសង្ឃឹមថាយើងនឹងមាននៅពេលក្រោយ ព្រោះសោភណ្ឌភាពជាពិសេសនៅទន្លេចតុមុខរបស់យើងគឺនៅខាងក្រោម»។
លោក ឌិត ចណ្ណា អគ្គនាយកក្រុមហ៊ុនអចលនទ្រព្យ Lucky Realty បានប្រាប់ភ្នំពេញប៉ុស្តិ៍ ក្នុងថ្ងៃទី១៧ ខែធ្នូថា អរិយក្សត្រជាតំបន់ដែលមានសក្តានុពលខ្លាំងក្នុងវិស័យអចលនទ្រព្យ ប៉ុន្តែដោយសារមិនមានស្ពានតភ្ជាប់ជាមួយរាជធានីភ្នំពេញ បានធ្វើឱ្យតម្លៃអចលនទ្រព្យនៅទីនោះស្ថិតនៅទាបនៅឡើយបើធៀបនឹងក្នុងរាជធានីភ្នំពេញ។ លោកបន្តថា បច្ចុប្បន្នដីនៅទីតាំងល្អបំផុតក្នុងតំបន់អរិយក្សត្រមានតម្លៃចន្លោះពី ៥០០-៨០០ ដុល្លារក្នុង ១ ម៉ែត្រការ៉េ ចំណែកតម្លៃដីទាបបំផុតចាប់ពីជាង ១០ ដុល្លារឡើងទៅ។
លោកថ្លែងថា៖«តម្លៃអចលនទ្រព្យនៅអរិយក្សត្រនាពេលនេះនៅថោកនៅឡើយបើធៀបនឹងតម្លៃអចលនទ្រព្យក្នុងរាជធានីភ្នំពេញដែលតំបន់ទាំង ២ នេះខណ្ឌចែកគ្នាត្រឹមតែទន្លេចតុមុខប៉ុណ្ណោះ»។
លោកអះអាងថា «ទីក្រុងមេគង្គ ឃី»នឹងរួមចំណែកបំពេញក្តីប្រាថ្នារបស់ប្រជាជ និងជំរុញកំណើនសេដ្ឋកិច្ចជាតិ។ គម្រោងនេះក៏នឹងជួយបង្កើនភាពសកម្មក្នុងវិស័យអចលនទ្រព្យ វិនិយោគ និងពាណិជ្ជកម្មជាដើម។
លោកនិយាយថា៖«នៅពេលមានស្ពានតភ្ជាប់ ទីផ្សារអចលនទ្រព្យនៅទីនោះប្រាកដជាហក់ឡើងខ្លាំង។ អរិយក្សត្រ គឺជាទីតាំងដ៏ល្អសម្រាប់ការរស់នៅ និងប្រកបការងារ ព្រោះទីនោះនៅជាប់មាត់ទន្លេចតុមុខ និងមានបរិស្ថានល្អ»៕
