ពិធីស្វាគមន៍ភ្ញៀវដែលធ្វើដំណើរតាមយន្តហោះរបស់ក្រុមហ៊ុន Spring Airlines ពីទីក្រុងស៊ីអាន មកអាកាសយានដ្ឋានអន្តរជាតិភ្នំពេញ។ ក្រសួងទេសចរណ៍
ការស្ទុះងើបឡើងវិញនៃចំនួនភ្ញៀវជនជាតិចិនមកប្រទេសកម្ពុជា បានជំរុញឱ្យក្រុមហ៊ុនអាកាសចរណ៍ជាតិ និងអន្តរជាតិ បង្កើន និងបង្កើត គោលដៅហោះហើរថ្មីៗជាបន្តបន្ទាប់ដើម្បីតភ្ជាប់ពីទីក្រុងសំខាន់ៗក្នុងប្រទេសចិន មកកាន់ប្រទេសកម្ពុជា។
ជាក់ស្តែងក្រុមហ៊ុនអាកាសចរណ៍មានមូលដ្ឋាននៅទីក្រុងស៊ាងហៃ ប្រទេសចិន Spring Airlines កាលពីថ្ងៃទី២៩ ខែធ្នូ បានបើកជើងហោះហើរត្រង់ទី១ របស់ខ្លួនពីទីក្រុងស៊ីអាន ប្រទេសចិន មកចុះចតនៅអាកាសយានដ្ឋានអន្តរជាតិភ្នំពេញ។
ពិធីស្វាគមន៍ជើងហោះហើរនេះត្រូវបានធ្វើឡើងដោយមានការចូលរួមពីសំណាក់ លោក ហួត ហាក់ រដ្ឋមន្ត្រីក្រសួងទេសចរណ៍កម្ពុជា លោក Wang Wenbin ឯកអគ្គរដ្ឋទូតចិនប្រចាំកម្ពុជា លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល ព្រមទាំងការចូលរួមពីអ្នកពាក់ព័ន្ធជាច្រើនទៀត។
ថ្លែងប្រាប់អ្នកសារព័ត៌មានក្នុងពិធីស្វាគមន៍ជើងហោះហើរថ្មីរបស់ក្រុមហ៊ុន Spring Airlines លោក ម៉ៅ ហាវណ្ណាល់ បានឱ្យដឹងថា សម្រាប់ការហោះហើររបស់ក្រុមហ៊ុន Spring Airlines ពីប្រទេសចិនមកកាន់កម្ពុជា គឺមិនលើកដំបូងទេ ដោយសព្វថ្ងៃក្រុមហ៊ុន Spring Airlines កំពុងធ្វើប្រតិបត្តិការហោះហើរចំនួន ៤ ជើងក្នុង ១សប្តាហ៍រវាងទីក្រុងស៊ាងហៃ និងរាជធានីនៅភ្នំពេញ។ ដោយឡែកសម្រាប់ទិសដៅទីក្រុងស៊ីអាន មកកាន់រាជធានីភ្នំពេញនៅពេលនេះ គឺជាផ្លូវហោះហើរថ្មី។
លោកថ្លែងថា៖«ជាការពិតភ្ញៀវទេសចរចិន គឺមានកំណើន ហើយជើងហោះហើរពីប្រទេសចិន ក៏ត្រូវបានពង្រីកនៅថ្ងៃនេះ»។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីលីន បានប្រាប់ភ្នំពេញប៉ុស្តិ៍ក្នុងថ្ងៃទី៣០ ខែធ្នូ ថា ភ្ញៀវទេសចរបរទេស ពិសេសជនជាតិចិន ដែលធ្វើដំណើរមកប្រទេសកម្ពុជាក្នុងរយៈពេលជិត ១ ឆ្នាំ ២០២៤ នេះគឺពិតកើនឡើងច្រើនបើធៀបនឹងឆ្នាំ ២០២៣ ប៉ុន្តែបើធៀបនឹងមុនវិបត្តិកូវីដ១៩(មុនឆ្នាំ ២០២០) គឺនៅតិចនៅឡើយ។
លោកស្រីបន្តថា ការបង្កើតចំនួនជើងហោះហើរ គឺបញ្ជាក់ពីសុទិដ្ឋិនិយមរបស់ថ្នាក់ដឹកនាំក្រុមហ៊ុន Spring Airlines ចំពោះកំណើនភ្ញៀវពីគោលដៅមួយរបស់ចិន មកកាន់ប្រទេសកម្ពុជា។
លោកស្រីប្រាប់ទៀតថា បច្ចុប្បន្ន ក្នុង ១ ថ្ងៃៗ កម្ពុជាទទួលបានជើងហោះហើរជាច្រើនរវាងទីក្រុងនានារបស់ប្រទេសចិន មកកាន់ប្រទេសកម្ពុជា ដែលប្រតិបត្តិការដោយក្នុងក្រុមហ៊ុនក្នុងស្រុក(កម្ពុជា) ព្រមទាំងក្រុមហ៊ុនអាកាសចរណ៍បរទេស ពិសេសក្រុមហ៊ុនរបស់ចិន។
ទោះយ៉ាងណាភាគច្រើននៃជើងហោះហើរទាំងនោះ គឺហោះមកកាន់អាកាសយានដ្ឋានអន្តរជាតិភ្នំពេញ ចំណែកអាកាសយានដ្ឋានអន្តរជាតិខេត្តសៀមរាប និងខេត្តព្រះសីហនុ នៅមានចំនួនតិចតួចនៅឡើយបើធៀបនឹងមុនឆ្នាំ ២០២០។
លោកស្រីបញ្ជាក់ថា៖«ក្នុងនាមវិស័យទេសចរណ៍ យើងពិតជាចង់ឃើញមានជើងហោះហើរត្រង់កាន់តែច្រើនពីគ្រប់គោលដៅ មកចុះចតនៅអាកាសយានដ្ឋានអន្តរជាតិខេត្តសៀមរាប ព្រោះភ្ញៀវបរទេសភាគច្រើនចង់មើលឃើញប្រាសាទបុរាណដែលមានអាយុកាលរាប់រយ/ពាន់ឆ្នាំរបស់កម្ពុជា»។
យោងតាមលោកស្រី ស៊ីវលីន រយៈពេលស្នាក់នៅរបស់ភ្ញៀវជនជាតិចិននៅកម្ពុជាមានជាមធ្យមប្រមាណ ៥ថ្ងៃ និងចំណាយប្រហែល ៦០០ ដុល្លារ។
ប្រធានសមាគមមគ្គុទេសក៍ទេសចរណ៍ភាសាចិនកម្ពុជា លោក អនហេង សុភ័ក្រ បាននិយាយថា សម្រាប់ភ្ញៀវទេសចរចិនពិតជាកើនឡើងច្រើនក្នុងរយៈពេលប្រហែល ១ ឆ្នាំចុងក្រោយនេះ។ លោកបន្តថា ទីផ្សារទេសចរណ៍ចិនមានទំហំធំ ដូច្នេះនៅពេលមានជើងហោះហើរត្រង់កាន់តែច្រើន និងច្រើនគោលដៅ គឺប្រាកដជាផ្តល់ភាពវិជ្ជមានច្រើនសម្រាប់ប្រាប់ចំណូលក្នុងសេដ្ឋកិច្ចកម្ពុជា។
ជាទូទៅភ្ញៀវបរទេស រួមទាំងជនជាតិចិន ចូលចិត្តដើរកម្សាន្តនៅក្នុងខេត្តសៀមរាប រាជធានីភ្នំពេញ និងព្រះសីហនុ។
លោកបានថ្លែងថា៖«ការបង្កើនឱ្យមានជើងហោះហើរកាន់តែច្រើន គឺជាចំណុចវិជ្ជមានសម្រាប់វិស័យទេសចរណ៍កម្ពុជា ជាពិសេសភ្ញៀវទេសចរមកពីប្រទេសចិន។ យើងសង្ឃឹមថា ចាប់ពីដើមឆ្នាំ ២០២៥ នឹងមានភ្ញៀវទេសចរបរទេស ពិសេសជនជាតិចិនកាន់តែច្រើនបន្ថែមទៀតធ្វើដំណើរមកប្រទេសកម្ពុជា»។
លោកបន្តថា៖«ខ្ញុំសូមសម្តែងការគាំទ្រ និងរីករាយចំពោះការបង្កើនជើងហោះហើររវាងទីក្រុងសំខាន់របស់ប្រទេសចិន ជាមួយកម្ពុជា និងសង្ឃឹមថានឹងមានជើងហោះហើរច្រើនបន្ថែមទៀតដើម្បីផ្តល់ភាពងាយស្រួល និងទាក់ទាញទេសចរចិនមកកាន់កម្ពុជា»។
ទិន្នន័យក្រសួងទេសចរណ៍ បង្ហាញថា ចន្លោះពីខែមករា-ខែវិច្ឆិកា ឆ្នាំ ២០២៤ ភ្ញៀវបរទេសដែលចូលមកប្រទេសកម្ពុជា មានចំនួនសរុប ៦ លាននាក់ កើនឡើង ២២ ភាគរយបើធៀបនឹងរយៈពេលដូចគ្នាឆ្នាំ ២០២៣ ដែលមាន ៤,៩២ លាននាក់។ ក្នុងចំនួនខាងលើ គឺភ្ញៀវមកពីប្រទេសចិនស្ថិតនៅលេខរៀងទី ៣ ដោយមានចំនួន ៧៦៩ ៧៧៥ នាក់ កើនឡើង ៥៤,៥ភាគរយនៃចំនួនភ្ញៀវបរទេសសរុប។
ឆ្នាំ ២០១៩ ជាពេលដែលប្រទេសកម្ពុជាទទួលបានភ្ញៀវទេសចរបរទេសច្រើនបំផុត គឺជាង ៦,៦១ លាននាក់ កើនឡើង ៦,៦ ភាគរយបើធៀបឆ្នាំ ២០១៨ ក្នុងនោះភ្ញៀវមកពីប្រទេសចិនឈរលើគេ ដោយមានចំនួន ២,៣៦ លាននាក់ កើនឡើង ១៦,៧ ភាគរយ។ ភ្ញៀវជនជាតិចិនបានគ្រប់គ្រង ៣៥,៧ ភាគរយនៃចំនួនភ្ញៀវបរទេសសរុប៕
