នាវាទេសចរណ៍មួយគ្រឿងឈ្មោះ AIDABELLA ដែលបានដឹកភ្ញៀវទេសចរអន្តរជាតិចម្រុះជាតិសាសន៍ សរុបប្រមាណ ២ ពាន់នាក់ បានចូលចតកំពង់ផែក្រុងព្រះសីហនុ នឹងត្រៀមទិសដៅទៅទស្សនាគោលដៅផ្សេងៗទៀតនៅកម្ពុជា ខណៈមន្ទីរទេសចរណ៍ខេត្ត អំពាវនាវដល់អាជីវករចូលរួមផ្ដល់សេវាកម្មឱ្យបានល្អ និងតម្លៃសមរម្យ។
មន្ទីរទេសចរណ៍ខេត្តព្រះសីហនុ បានឱ្យដឹងថា នៅថ្ងៃទី ១០ ខែកុម្ភៈ ឆ្នាំ ២០២៤ មាននាវាទេសចរណ៍មួយគ្រឿងឈ្មោះ AIDABELLA សញ្ជាតិ ITALY មានបណ្ដោយប្រវែង ២៥១,៨៩ម៉ែត្រ និងទទឹងប្រវែង ៣៧,៦ម៉ែត្រ ជម្រៅទឹក ៧,៣ម៉ែត្រ មកពីប្រទេសវៀតណាម បានចូលចតនៅកំពង់ផែក្រុងព្រះសីហនុ វេលាម៉ោង ៧ ព្រឹក។ នាវាទេសចរណ៍នេះ មានភ្ញៀវទេសចរ សរុប ១៩៧៦នាក់ ស្រី ១០២៩នាក់ មាន២០សញ្ជាតិ និង នាវិកចំនួន ៦២៥នាក់ស្រី ១៣១នាក់ ចំនួន ២៨សញ្ជាតិ។
មន្ទីរទេសចរណ៍ខេត្តព្រះសីហនុ បានឱ្យដឹងថា៖ «ភ្ញៀវទេសចរភាគច្រើនជាងគេជនជាតិ អាល្លឺម៉ង់ ១៨១០នាក់ អូទ្រីស ៥១នាក់ ។ ទន្ទឹមនេះគោលដៅភ្ញៀវទេសចរទៅទស្សនាមានតំបន់ឆ្នេរ វត្តអារាមនិងផ្សារនៅក្រុងព្រះសីហនុ ភ្នំពេញ សៀមរាប កំពត កែប និងកំពង់ស្ពឺជាដើម។ នាវាទេសចរណ៍នេះនឹងចាកចេញពីប្រទេសកម្ពុជានៅម៉ោង៦ល្ងាច នាថ្ងៃខែឆ្នាំដដែល»។
ជាមួយគ្នានេះ ក្នុងនាមមន្ទីរទេសចរណ៍ខេត្តព្រះសីហនុ ស្នើឱ្យអាជីវករចូលរួមផ្ដល់សេវាកម្មឱ្យបានល្អ និងតម្លៃសមរម្យ ដើម្បីឱ្យភ្ញៀវទេសចរមកកម្សាន្ដប្រកបដោយភាពរីករាយ នឹងត្រឡប់មកលេងកម្សាន្ដនៅពេលក្រោយទៀត។ ជាពិសេស ភ្ញៀវទេសចរដែលបានដើរលេងកម្សាន្ដតាមរមណីយដ្ឋាននានា ចូលរួមទុកដាក់សំរាមឱ្យបានត្រឹមត្រូវ។
បន្ថែមពីនេះ មន្ទីរទេសចរណ៍ខេត្ត បានលើកទឹកចិត្ត ក្នុងការបន្ដថែរក្សាអនាម័យ ដើម្បីរមណីយដ្ឋានក្នុងខេត្តព្រះសីហនុឱ្យបានស្អាត ដែលនឹងរួមចំណែកដល់ការទាក់ទាញភ្ញៀវទេសចរពីគ្រប់ទិសទី។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក នៅថ្ងៃទី១០ ខែកុម្ភៈ បានស្វាគមន៍ភ្ញៀវទេសចរដែលមកតាមនាវានានាទាំងអស់ ទោះជានាវានោះដឹកភ្ញៀវទេសចរក្នុងចំនួនណាក៏ដោយ សុទ្ធតែនាំផលប្រយោជន៍ដល់កម្ពុជា។
លោកបញ្ជាក់ថា៖ «ទោះជាមានភ្ញៀវមានចំនួនប៉ុន្មានក៏ដោយ ឱ្យតែមកលេងកម្សាន្តនៅក្នុងខេត្តព្រះសីហនុ ឬ តំបន់ណាក៏ដោយរបស់កម្ពុជា គឺសុទ្ធសឹងតែនាំចូលប្រទេសកម្ពុជាដែលរួមចំណែកដល់ការលើកស្ទួយសេដ្ឋកិច្ចនៅតាមមូលដ្ឋាន»៕
