ទូកុងតឺន័រនៅកំពងផែខេត្តព្រះសីហនុ កាលពីខែមេសា ឆ្នាំ ២០២៣។ ហុង មិនា
ភ្នំពេញៈ ការនាំទំនិញផលិតនៅកម្ពុជាទៅទីផ្សារអន្តរជាតិ ក្នុងខែដំបូងនៃឆ្នាំ ២០២៤ បានហក់ឡើងខ្ពស់គួរឱ្យកត់សម្គាល់ដោយមានទឹកប្រាក់ជិត ២ ពាន់លានដុល្លារ កើនជិត ៣០ ភាគរយ បើធៀបនឹងរយៈពេលដូចគ្នាឆ្នាំ ២០២៣ ខណៈទំហំពាណិជ្ជកម្មអន្តរជាតិមានចំនួនសរុបជាង ៤ ពាន់លានដុល្លារ។ នេះបើតាមអគ្គនាយកដ្ឋានគយ និងរដ្ឋាករកម្ពុជា (GDCE)។
តារាងស្ថិតិពាណិជ្ជកម្មទំនិញដែលកត់ត្រាដោយ GDCE ឱ្យដឹងថា ក្នុងខែមករា ឆ្នាំ ២០២៤ ទំនិញដែលកម្ពុជានាំទៅទីផ្សារអន្តរជាតិមានទឹកប្រាក់ ១,៩៧ ពាន់លានដុល្លារ កើនឡើង ២៧ ភាគរយ បើធៀបនឹងខែមករា ឆ្នាំ ២០២៣ ដែលមាន ១,៥៥ ពាន់លានដុល្លារ ចំណែកទំនិញនាំចូលពីក្រៅប្រទេសមានចំនួន ២,០៩ ពាន់លានដុល្លារ កើនឡើង ៨,៧ ភាគរយពី ១,៩២ ពាន់លានដុល្លារ។ បើផ្អែកតាមតួលេខខាងលើ គឺពាណិជ្ជកម្មអន្តរជាតិកម្ពុជា ក្នុងខែមករា ឆ្នាំ ២០២៤ មានទឹកប្រាក់សរុប ៤,០៦ ពាន់លានដុល្លារ កើន ១៦,៩ ពី ៣,៤៧ ពាន់លានដុល្លារក្នុងខែមករា ឆ្នាំ ២០២៣។
សម្រាប់តុល្យភាពជញ្ជីងពាណិជ្ជកម្មខែមករា ឆ្នាំ ២០២៤ កម្ពុជាមានឱនភាព ១២៣,០៩ លានដុល្លារ ខណៈក្នុងខែមករា ឆ្នាំ ២០២៣ មានចំនួន ៣៧៣,៨៩ លានដុល្លារ។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ ភ្នំពេញ ប៉ុស្តិ៍ នៅថ្ងៃទី ១២ ខែកុម្ភៈថា ការងើបឡើងវិញជាបណ្តើរៗកំណើនសេដ្ឋកិច្ចសកល ស្របពេលសមត្ថភាពផលិតកម្មនៅកម្ពុជាកំពុងកើនឡើង បានធ្វើឱ្យទឹកប្រាក់ការផ្លាស់ប្តូរទំនិញជាមួយប្រទេសដៃគូនានា ពិសេសទឹកប្រាក់នាំចេញរបស់កម្ពុជាបានកើនឡើងគួរឱ្យកត់សម្គាល់នាខែទី១ ឆ្នាំ ២០២៤។ តាមរយៈអ្វីដែលកម្ពុជាកំពុងមាន គឺទំហំពាណិជ្ជកម្មអន្តរជាតិនឹងបន្តកើនឡើងថែមទៀតនាពេលខាងមុខ។
លោកបានបន្តថា សម្រាប់កំណើនទឹកប្រាក់នាំចេញរបស់កម្ពុជា គឺដោយសារកត្តាចម្បងចំនួន ២ គឺទី១ ការកើនឡើងនៃសមត្ថភាពផលិតកម្មក្នុងស្រុកដែលបានពីកំណើនរោងចក្រ/សហគ្រាស និងកំណើនទិន្នផលក្នុងវិស័យកសិកម្ម និងទី២ កម្ពុជាមានទីផ្សារនាំចេញធំៗដែលទទួលបានពីការផ្តល់ប្រព័ន្ធអនុគ្រោះពន្ធគយនាំទំនិញទៅប្រទេសមួយចំនួន ព្រមទាំងការចូលជាធរមាននៃកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី ដែលកម្ពុជាបានចុះហត្ថលេខា។
លោកថ្លែងថា៖ «ខ្ញុំមានជំនឿថា ទឹកប្រាក់នៃការនាំចេញទំនិញកម្ពុជានឹងបន្តកើនឡើងទៀតក្នុងឆ្នាំនេះ ព្រោះបច្ចុប្បន្ននេះកម្ពុជាមានផលិតផលជាច្រើនមុខសម្រាប់នាំចេញ ខណៈកេរ្តិ៍ឈ្មោះ គុណភាព និងតម្លៃទំនិញកម្ពុជាក៏មានលក្ខណៈប្រកួតប្រជែងខ្លាំងផងដែរ»។
បើតាមលោក លឹម ហេង ក្រៅពីផលិតផលវាយនភណ្ឌ បច្ចុប្បន្នកម្ពុជាក៏ជាប្រទេសនាំចេញផលិតផលកសិកម្ម គ្រឿងបង្គុំអេឡិចត្រូនិក អគ្គិសនី និងវត្ថុប្រើប្រាស់ប្រចាំថ្ងៃជាច្រើន។
ប្រធានសមាគមស្បែកជើងកម្ពុជា លោក លី ឃុនថៃ បានប្រាប់ថា ស្ទើរពេញ ១ ឆ្នាំ ២០២៣ ការនាំចេញផលិតផលវាយនភណ្ឌកម្ពុជាទៅទីផ្សារអន្តរជាតិបានធ្លាក់ចុះ ប៉ុន្តែស្ថានភាពនេះបានចាប់ផ្តើមបង្ហាញសញ្ញាវិជ្ជមានជាបណ្តើរៗហើយតាំងពីចុងឆ្នាំ ២០២៣ មក។ ក្នុងនាមជាប្រទេសផលិត និងនាំចេញ គឺកម្ពុជាមានសមត្ថភាពគ្រប់គ្រាន់ក្នុងការផលិតទំនិញដើម្បីឆ្លើយតបនឹងតម្រូវការទីផ្សារអន្តរជាតិ។
លោកប្រាប់ថា៖ «ភាពធូរស្រាលនៃវិបត្តិនយោបាយ និងសេដ្ឋកិច្ចសកលបានធ្វើឱ្យកម្លាំងការបញ្ជាទិញកម្រើកឡើងវិញជាបណ្តើរៗ។ ដោយសារតែកម្ពុជាមានធនធានគ្រាន់គ្រាន់សម្រាប់ផលិតទំនិញតាមការចង់បានរបស់ក្រុមហ៊ុនបញ្ជាទិញ ដូច្នេះខ្ញុំជឿថាការនាំចេញទំនិញរបស់កម្ពុជាក្នុងឆ្នាំនេះនឹងមានចំនួនលើសឆ្នាំ ២០២៣»។
បើតាមលោក ឃុនថៃ អំឡុងពេលដែលស្ថានភាពនយោបាយ និងសេដ្ឋកិច្ចពិភពលោកមិនសូវល្អប៉ុន្មានឆ្នាំនេះ គឺកម្ពុជាអាចទាក់ទាញវិនិយោគិនក្នុងស្រុក និងអន្តរជាតិជាច្រើនឱ្យមកបើកអាជីវកម្ម ឬរោងចក្រ។
ឯកសារថវិកាសង្ខេប ឆ្នាំ ២០២៤ (Budget in Brief Fiscal year 2024) នៃក្រសួងសេដ្ឋកិច្ច និងហិរញ្ញវត្ថុ ឱ្យដឹងថា សេដ្ឋកិច្ចប្រទេសកម្ពុជាក្នុងឆ្នាំ ២០២៤ ត្រូវបានព្យាករនឹងសម្រេចបានកំណើនក្នុងរង្វង់ ៦,៦ ភាគរយ ដែលនឹងធ្វើឱ្យផលិតផលក្នុងស្រុកសរុប (ផសស)ថ្លៃបច្ចុប្បន្នស្ថិតក្នុងរង្វង់ ១៤ ២៩៥៧ ពាន់លានរៀល (សមមូលនឹង ៣៥ ១៦៨ លានដុល្លារ)។
ក្នុងនោះទុនបម្រុងអន្តរជាតិរបស់កម្ពុជា ឆ្នាំ ២០២៤ ត្រូវបានព្យាករណ៍នឹងមានចំនួន ២១,២៨ ពាន់លានដុល្លារពីចំនួនប៉ាន់ស្មាន ១៩,៤៤ ពាន់លានដុល្លារនៅក្នុងឆ្នាំ ២០២៣ និងចំនួន ១៧,៨ ពាន់លានដុល្លារ ក្នុងឆ្នាំ ២០២២៕
