លោក អូស្មាន ហាស្សាន់ (ឆ្វេង) ក្នុងជំនួបរវាងលោក Mohamed bin Ahmed bin Twar Al Kuwari កាលពីថ្ងៃទី ១៧ ខែកុម្ភៈ។ ស្ថានទូតកម្ពុជាក្នុងរដ្ឋកូវ៉ែត
ភ្នំពេញៈ កម្ពុជា និងកាតា បានប្តេជ្ញានឹងជំរុញពាណិជ្ជកម្ម និងការវិនិយោគរវាងប្រទេសទាំង ២ លើវិស័យនានា ដើម្បីចាប់យកវិស័យសក្តានុពលដែលមិនទាន់បានប្រើប្រាស់ ជាពិសេសវិស័យកសិកម្មនៅក្នុងព្រះរាជាណាចក្រកម្ពុជា ខណៈការហោះហើរត្រង់រវាងប្រទេសទាំង ២ ទើបតែបានតភ្ជាប់ឡើងវិញកាលពីប៉ុន្មានខែថ្មីៗកន្លងមកនេះ។
ការប្តេជ្ញាចិត្តនេះបានធ្វើឡើងកាលពីថ្ងៃទី ១៧ ខែកុម្ភៈ ក្នុងជំនួបរវាងលោក Mohamed bin Ahmed bin Twar Al Kuwari អនុប្រធានទី១ សភាពាណិជ្ជកម្មកាតា ជាមួយលោក អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស ក្នុងដំណើរទស្សនកិច្ចដឹកនាំគណៈប្រតិភូកម្ពុជា១ ក្រុមទៅកាន់ទីក្រុងដូហា ដើម្បីពង្រឹងកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសទាំង ២ និងបានពិនិត្យឡើងវិញនូវឱកាសវិនិយោគនៅកម្ពុជាលើវិស័យផ្សេងៗ។ នេះបើយោងតាមទីភ្នាក់ងារសារព័ត៌មានកាតា (QNA)។
លោក អូស្មាន ហាស្សាន់ បានបញ្ជាក់ថា ដំណើរទស្សនកិច្ចនេះមានគោលបំណងលើកកម្ពស់សេដ្ឋកិច្ច និងឱកាសវិនិយោគរបស់កម្ពុជាដល់វិនិយោគិនកាតា ដែលបញ្ជាក់ពីចំណាប់អារម្មណ៍យ៉ាងខ្លាំងក្នុងការជំរុញទំនាក់ទំនងសហប្រតិបត្តិការជាមួយកាតា។
លោក ហាស្សាន់ ហាស្សាន់ ត្រូវបានគេដកស្រង់សម្តីដោយលើកឡើងថា៖ «កម្ពុជាបានបង្កើតច្បាប់ និងច្បាប់នានាដើម្បីកែលម្អបរិយាកាសវិនិយោគសម្រាប់វិនិយោគិនបរទេស ដោយបង្ហាញពីឱកាសជាច្រើននៅក្នុងវិស័យផ្សេងៗ»។
លោកក៏បានគូសបញ្ជាក់ផងដែរថា ផលិតកម្មស្រូវរបស់កម្ពុជាលើសពី ៧ លានតោន ក្នុង ១ ឆ្នាំ និងផលិតកម្មស្វាយចន្ទីលើសពី ១ លានតោន ដែលកត់សម្គាល់ការអភិវឌ្ឍសំខាន់ៗនៅក្នុងឧស្សាហកម្មហាឡាល។
លោកថ្លែងថា៖ «កម្ពុជាចង់ទាក់ទាញការវិនិយោគរបស់កាតា ដោយជំរុញវិនិយោគិនកាតាឱ្យមកបណ្តាក់ទុននៅក្នុងប្រទេសរបស់លោក និងទទួលបានអត្ថប្រយោជន៍ពីបរិយាកាសវិនិយោគដ៏គួរឱ្យទាក់ទាញរបស់កម្ពុជា»។
លោក Al Kuwariបានឱ្យដឹងថា រដ្ឋកាតា និងកម្ពុជាបានចងភ្ជាប់ដោយទំនាក់ទំនងល្អ ដែលបញ្ជាក់ពីសារៈសំខាន់នៃការពង្រឹងការវិនិយោគរបស់កាតាក្នុងវិស័យដែលនឹងទទួលបានភាពជោគជ័យ ដែលទាក់ទាញវិនិយោគិនកាតា។
លោក Kuwari ត្រូវបានគេដកស្រង់សម្តីដោយលើកឡើងថា៖ «សភាពាណិជ្ជកម្ម ជំរុញវិនិយោគិនមកបណ្តាក់ទុននៅកម្ពុជា។ ទីផ្សារកាតាស្វាគមន៍ផលិតផលកម្ពុជាដែលមានគុណភាពខ្ពស់ និងតម្លៃសមរម្យ។ សភាពាណិជ្ជកម្ម នឹងលើកកម្ពស់ឱកាសដែលមាននៅក្នុងប្រទេសកម្ពុជាក្នុងចំណោមសហគមន៍ធុរកិច្ចកាតា ដើម្បីជំរុញការវិនិយោគនៅទីនោះ»។
លោកបញ្ជាក់បន្ថែមអំពីសារៈសំខាន់នៃការរៀបចំដំណើរទស្សនកិច្ចអាជីវកម្មសម្រាប់ម្ចាស់ធុរកិច្ចកាតាមកកាន់ប្រទេសកម្ពុជា ដើម្បីស្វែងយល់ពីឱកាសដ៏សម្បូរបែបក្នុងវិស័យកសិកម្ម ទេសចរណ៍ ហេដ្ឋារចនាសម្ព័ន្ធ កែច្នៃម្ហូបអាហារ និងវិស័យផ្សេងៗទៀត។
ក្រុមហ៊ុនអាកាសចរណ៍ Qatar Airways កាលពីថ្ងៃទី ២៩ ខែតុលា ឆ្នាំ ២០២៣ បានចុះចតនៅព្រលានយន្តហោះអន្តរជាតិភ្នំពេញ (PNH) បន្ទាប់ពីផ្អាកប្រតិបត្តិការដោយសារការរីករាលដាលជំងឺកូវីដ ១៩។
យោងតាមក្រសួងពាណិជ្ជកម្ម ពាណិជ្ជកម្មរវាងប្រទេសទាំង ២ កាលពីឆ្នាំ ២០២៣ មានចំនួនត្រឹមតែជាង ៨៦ លានដុល្លារប៉ុណ្ណោះ ធ្លាក់ចុះ ១៧ ភាគរយ ធៀបនឹងឆ្នាំ ២០២២។
កាលពីពាក់កណ្តាលខែធ្នូ ក្រុមប្រឹក្សាអភិវឌ្ឍន៍កម្ពុជា (CDC) និងសភាពាណិជ្ជកម្មកម្ពុជា (CCC) គ្រោងរៀបចំវេទិកាផ្នែកឯកជនរវាងកម្ពុជា និងអេមីរ៉ាតអារ៉ាប់រួមនៅត្រីមាសទី១ ឆ្នាំក្រោយ។ វេទិកានេះនឹងប្រមូលផ្តុំវិនិយោគិន និងអ្នកតំណាងសម្រាប់ការពិភាក្សាអំពីកិច្ចការវិនិយោគ និងពាណិជ្ជកម្ម។
កម្ពុជា និងអារ៉ាប់រួម បានចុះហត្ថលេខាលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ (CEPA) កាលពីខែមិថុនា។
CEPA បានក្លាយជាកិច្ចព្រមព្រៀងពាណិជ្ជកម្មសេរីទី៣របស់ព្រះរាជាណាចក្រកម្ពុជា បន្ទាប់ពីកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) ដែលចូលជាធរមានកាលពីថ្ងៃទី ១ ខែមករា ឆ្នាំ ២០២២ និងកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ (CKFTA) ដែលចូលជាធរមានកាលពីថ្ងៃទី ១ ខែធ្នូ ឆ្នាំ ២០២២៕
