ភ្នំពេញៈ ឯកអគ្គរដ្ឋទូត​ប្រទេស​ឆែក​ (Czech) បាន​សន្យា​ថា​នឹង​ជំរុញ​ទំហំ​ពាណិជ្ជកម្ម​រវាង​ប្រទេស​កម្ពុជា និង​ឆែក​ឱ្យ​មាន​ការ​កើន​ឡើង ខណៈ​ទំហំ​ពាណិជ្ជកម្ម​រវាង​ប្រទេស​ទាំងពីរ​ពុំ​មាន​តុល្យភាព​នៅ​ឡើយ ដោយ​ការ​នាំចេញ​ពី​កម្ពុជា​ទៅ​ប្រទេស​ឆែក​មាន​ទំហំ​ស្ទើរតែ​លើស​១០០​ដង​នៃ​ការ​នាំចូល​ពី​ប្រទេស​ឆែក​មក​កាន់​កម្ពុជា។ 


ការ​សន្យា​នេះ​ធ្វើ​ឡើង​ក្នុង​ជំនួប​រវាង​លោក ហ៊ុន សែន ប្រធាន​ព្រឹទ្ធសភា និង​លោក Martin Vavra ឯកអគ្គរដ្ឋទូត​នៃ​ប្រទេស​ឆែក​ប្រចាំ​កម្ពុជា​ដែល​ទើប​តែងតាំង​ថ្មី នាថ្ងៃទី២០ ឧសភា នៅ​វិមាន​ព្រឹទ្ធសភា រាជធានី​ភ្នំពេញ។


ក្នុង​ជំនួប​នេះ លោក ហ៊ុន សែន បាន​លើក​ទឹក​ចិត្ត​ឱ្យ​ភាគី​កម្ពុជា និង​ឆែក​ខិតខំ​ធ្វើ​យ៉ាង​ណា​ជំរុញ​ឱ្យ​ទំហំ​ពាណិជ្ជកម្ម​រវាង​ប្រទេស​ទាំងពីរ​កើន​ឡើង ជា​ពិសេស​ឱ្យ​មាន​តុល្យភាព​ជញ្ជីង​ពាណិជ្ជកម្ម ដោយ​បង្កើន​ការ​នាំចេញ​ទំនិញ​ពី​កម្ពុជា​ទៅ​ឆែក ក៏ដូចជា​ពី​នាំចូល​ទំនិញ​ពី​ឆែក​ចូល​មក​កម្ពុជា​ឱ្យ​កាន់តែ​ច្រើន​ថែម​ទៀត។


លោក​ក៏​បាន​ស្នើ​ឱ្យ​ប្រទេស​ទាំងពីរ​ពិនិត្យ​មើល​នូវ​កិច្ច​ព្រមព្រៀង​ទាំងឡាយ​ណា ដែល​អាច​ជា​ការ​លើក​ទឹក​ចិត្ត​ឱ្យ​អ្នក​វិនិយោគ​មាន​ទំនុក​ចិត្ត​គ្នា​ក៏ដូចជា​ការ​ជំរុញ​ការ​វិនិយោគ​រវាង​ប្រទេស​ទាំងពីរ​ផង​ដែរ។ 


លោក Vavra បាន​ប្តេជ្ញា​ចិត្ត​ក្នុង​ការ​ខិតខំ​ឱ្យ​មាន​ការ​នាំចូល​ទំនិញ​ច្រើន​បន្ថែម​ទៀត​ពី​ប្រទេស​ឆែក​មក​កម្ពុជា​ដើម្បី​ឱ្យ​មាន​តុល្យភាព​តាម​រយៈ​ការ​នាំ​អ្នក​វិនិយោគ​ថ្មីៗ​មក​កម្ពុជា​បន្ថែម​ទៀត ហើយ​លោក​ក៏​នឹង​ជំរុញ​ឱ្យ​មាន​ការ​ផ្ដល់​ជំនួយ​អភិវឌ្ឍន៍​ដល់​កម្ពុជា​បន្ថែម​ទៀត។ 


ហ្វេសប៊ុក​លោក ហ៊ុន សែន បាន​បញ្ជាក់​ក្រោយ​ជំនួប​នេះ​ថា៖ «ឯកឧត្ដម Martin Vavra បាន​ប្ដេជ្ញា​នឹង​បន្ត​ខិតខំ​ជំរុញ​ឱ្យ​ទំហំ​ពាណិជ្ជកម្ម​រវាង​ប្រទេស​ទាំងពីរ​កាន់តែ​ខ្លាំង​ឡើង​ថែម​ទៀត ដោយ​បច្ចុប្បន្ន​ពុំ​ទាន់​មាន​តុល្យភាព​នៅ​ឡើយ ដោយ​ការ​នាំចេញ​ពី​កម្ពុជា​ទៅ​សាធារណរដ្ឋ​ឆែក​គឺ​មាន​ទំហំ​ស្ទើរតែ​លើស​១០០​ដង​នៃ​ការ​នាំចូល​ពី​ឆែក​មក​កម្ពុជា​វិញ»។

លោក Vavra ថ្លែង​ថា លោក​នឹង​ខិតខំ​ប្រឹងប្រែង​សម្រប​សម្រួល​ដើម្បី​ឱ្យ​គណៈប្រតិភូ​សភា​នៃ​ប្រទេស​ឆែក​មក​បំពេញ​ទស្សនកិច្ច​នៅ​កម្ពុជា​នៅ​ចុង​ឆ្នាំ​២០២៤ នេះ ពីព្រោះ​គណៈប្រតិភូ​សភា​ឆែក​មាន​បំណង​នឹង​មក​បំពេញ​ទស្សនកិច្ច​នៅ​កម្ពុជា។ 

លោក ហ៊ុន សែន បាន​ថ្លែង​អំណរ​គុណ​ដល់​ប្រទេស​ឆែក​ដែល​បាន​លុប​បំណុល និង​ប្រែក្លាយ​បំណុល​សេសសល់​ទៅ​ជា​ជំនួយ​អភិវឌ្ឍន៍ ហើយ​ឆែក​ក៏​នៅ​បន្ត​ផ្ដល់​ជំនួយ​ជា​បន្ត​ទៀត​លើ​វិស័យ​សុខាភិបាល អប់រំ និង​អភិវឌ្ឍន៍​ធនធាន​មនុស្ស ជា​ពិសេស​ក្នុង​វិស័យ​អប់រំ ប្រទេស​ឆែក​បាន​ផ្ដល់​អាហារូបករណ៍​ជា​បន្ត​បន្ទាប់​ដល់​និស្សិត​កម្ពុជា​ទៅ​សិក្សា​នៅ​ឆែក។ 

លោក ហ៊ុន សែន ថ្លែង​ថា ព្រឹទ្ធសភា​កម្ពុជា​បាន​ត្រៀមខ្លួន​ជា​ស្រេច​ដើម្បី​ធ្វើការ​ជាមួយ​លោក Vavra ​ដើម្បី​ពង្រឹង​កិច្ច​សហប្រតិបត្តិការ​ទ្វេភាគី​រវាង​ប្រទេស​ទាំងពីរ​ឱ្យ​កាន់តែ​ស៊ី​ជម្រៅ​ថែម​ទៀត។ 

កាល​ពី​ឆ្នាំ​២០១៩ លោក ហ៊ុន សែន ដែល​នា​ពេល​នោះ​ជា​នាយករដ្ឋមន្ត្រី បាន​ទៅ​បំពេញ​ទស្សនកិច្ច​នៅ​ប្រទេស​ឆែក។ ភាគី​នៃ​ប្រទេស​ទាំងពីរ​បាន​ប្ដេជ្ញា​បន្ត​កិច្ច​សហប្រតិបត្តិការ​ក្នុង​ជំនួយ​អភិវឌ្ឍន៍​លើ​វិស័យ​អប់រំ និង​សុខាភិបាល៕