លោករដ្ឋមន្ត្រីក្រសួងទេសចរណ៍ សុខ សូកេន បានជួបជាមួយសមភាគីថៃ Sermsak Pongpanich នៅទីក្រុងបាងកកប្រទេសថៃនៅថ្ងៃនេះក្នុងកិច្ចប្រជុំថ្នាក់រដ្ឋមន្ត្រីទេសចរណ៍ទ្វេភាគីកម្ពុជា-ថៃ លើកទី៣។ រូបថត ក្រសួងទេសចរណ៍
អ្នកធ្វើការក្នុងវិស័យទេសចរណ៍រំពឹងថា ក្រសួងទេសចរណ៍នឹងជំរុញឲ្យប្រតិបត្តិករទេសចរណ៍ថៃ លើកទឹកចិត្តឲ្យភ្ញៀវទេសចរអន្តរជាតិដែលមកទស្សនានៅថៃ ពង្រីកកញ្ចប់ទស្សនារបស់ពួកគេមកកម្ពុជា ខណៈដែលក្រសួងទេសចរណ៍នៃប្រទេសទាំងពីរកំពុងពិភាក្សាគ្នាអំពីកិច្ចសហប្រតិបត្តិការក្នុងវិស័យទេសចរណ៍។
លោករដ្ឋមន្ត្រីក្រសួងទេសចរណ៍ សុខ សូកេន បានជួបជាមួយសមភាគីថៃ Sermsak Pongpanich នៅទីក្រុងបាងកកប្រទេសថៃនៅថ្ងៃនេះក្នុងកិច្ចប្រជុំថ្នាក់រដ្ឋមន្ត្រីទេសចរណ៍ទ្វេភាគីកម្ពុជា-ថៃ លើកទី៣ដែលប្រព្រឹត្តទៅពីថ្ងៃទី១៧-១៨ ខែកក្កដា។
បើតាមក្រសួងទេសចរណ៍ កិច្ចប្រជុំថ្នាក់រដ្ឋមន្ត្រីទេសចរណ៍នេះ ត្រូវបានរៀបចំឡើងដោយផ្អែកលើស្មារតីនៃការអនុវត្តអនុស្សរណៈយោគយល់គ្នាស្តីពីកិច្ចសហប្រតិបត្តិការទេសចរណ៍ទ្វេភាគីរវាងកម្ពុជា និង ថៃ ដែលបានចុះហត្ថលេខាកាលពី១០ឆ្នាំមុន។ នេះបើតាមក្រសួងទេសចរណ៍។
នៅក្នុងកិច្ចប្រជុំនេះ ភាគីទាំងពីរពិភាក្សាផ្លាស់ប្តូរយោបល់ និងចែករំលែកទស្សនៈនានាស្តីពីការអភិវឌ្ឍវិស័យទេសចរណ៍នៃប្រទេសទាំងពីរ និងធ្វើបច្ចុប្បន្នភាពផែនការសកម្មភាពរួមស្តីពីកិច្ចសហប្រតិបត្តិការទេសចរណ៍ ២០២៣-២០២៥ ព្រមទាំងដាក់ចេញនូវសេចក្តីថ្លែងការណ៍រួមក្នុងគោលបំណងបន្តពង្រឹងការអនុវត្តកិច្ចសហប្រតិបត្តិការទេសចរណ៍ទ្វេភាគីរវាងប្រទេសទាំងពីរ។
ជំនួបរវាងក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា (CTB) និងអាជ្ញាធរទេសចរណ៍ថៃ (TAT) ក៏ត្រូវបានធ្វើឡើងផងដែរ ដើម្បីជំរុញកិច្ចសហការ និងការចូលរួមរបស់វិស័យឯកជននៃប្រទេសទាំងពីរដើម្បីជំរុញលំហូរភ្ញៀវទេសចររវាងប្រទេសទាំងពីរ ក៏ដូចជាទាក់ទាញភ្ញៀវទេសចរប្រទេសទីបីមកកាន់ប្រទេសទាំងពីរឱ្យកាន់តែច្រើនឡើងថែមទៀត។
លោក ជុក ជំនោរ អ្នកនាំពាក្យក្រសួងទេសចរណ៍មិនអាចសុំការបញ្ជាក់បន្ថែមអំពីលទ្ធផលនៃជំនួបទ្វេរភាគីនេះបានទេ នៅរសៀលថ្ងៃព្រហស្បតិ៍នេះ។
លោក ខៀវ ធី ប្រធានសមាគមមគ្គុទ្ទេសក៍ទេសចរអង្គរនៅខេត្តសៀមរាបមានសុទ្ធិដ្ឋិនិយមអំពីជំនួបជាន់ខ្ពស់នេះ ដោយរំពឹងថា លោករដ្ឋមន្ត្រីទេសចរណ៍នឹងស្នើទៅដល់ភាគីថៃឲ្យលើកទឹកចិត្តដល់ប្រតិបត្តិករទេសចរណ៍ថៃ រកវិធីជួយឲ្យភ្ញៀវបរទេសបន្តដំណើរមកទស្សនាកម្ពុជាបន្ទាប់ពីថៃ។
លោកនិយាយថា៖ «ខ្ញុំសូមគាំទ្រការធ្វើទំនាក់ទំនងនេះ។ គាត់អញ្ជើញទៅនេះ ខ្ញុំចង់ឲ្យគាត់លើកទឹកចិត្តឲ្យប្រតិបត្តិករទេសចរណ៍នៅថៃភ្ជាប់កញ្ចប់ទស្សនាមកអង្គរវត្តផងដែរ ពីព្រោះនៅប្រទេសថៃ ជើងហោះហើររបស់គេច្រើនណាស់ ហើយភ្ញៀវទេសចរវាល់លាននាក់ឯណោះក្នុងមួយឆ្នាំ។ ដូច្នេះ យើងស្នើឲ្យថៃជួយផ្សព្វផ្សាយថា បើភ្ញៀវមកទស្សនាប្រទេសថៃ ឬទីក្រុងបាងកក សូមឲ្យគេបន្តមកកម្ពុជាផង ដូចជាទិញកញ្ចប់ទស្សនា ឬបន្តមកទស្សនាកម្ពុជាពី៣ថ្ងៃទៅមួយសប្ដាហ៍»។
បើតាមលោក ខៀវ ធី ការពង្រីកកញ្ចប់ទស្សនាសម្រាប់ភ្ញៀវបរទេសឲ្យមកទស្សនាប្រទេសកម្ពុជា ត្រូវបានអនុវត្តហើយសម្រាប់ប្រតិបត្តិករវៀតណាមខ្លះ។
បច្ចុប្បន្ននេះ ភ្ញៀវទេសចរពីប្រទេសថៃមិនទាន់មានច្រើនទេ ប៉ុន្តែអាចមាននៅតាមព្រំដែន ដែលមកធ្វើជំនួញ ឬកម្សាន្តរយៈពេលខ្លី។ លោកថា ប្រហែលជាពលរដ្ឋខ្មែរអាចទៅប្រទេសថៃក្នុងចំនួនច្រើនជាងពលរដ្ឋថៃមកទស្សនាកម្ពុជា ជាពិសេសដើម្បីទៅទិញអីវ៉ាន់ ឬទៅទទួលសេវាព្យាបាល ដោយមិនរាប់បញ្ចូលពលករទៅធ្វើការ។ នេះតាមលោក ខៀវ ធី ដដែល។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា ថ្លែងថា កិច្ចសហប្រតិបត្តិការរវាងប្រទេសជិតខាងមានសារៈសំខាន់នៅគ្រប់កាលៈទេសៈទាំងអស់ ជាពិសេសនៅពេលដែលពិភពលោកកំពុងជួបបញ្ហាសេដ្ឋកិច្ច គឺភ្ញៀវបរទសមកពីប្រទេសជិតខាងនេះហើយដែលយកមកបានលឿនជាងគេ។
លោកថា៖ «សម្រាប់ខ្ញុំ កិច្ចប្រជុំរបស់ក្រសួងទេសចរណ៍ខ្មែរយើងជាមួយភាគីថៃ គឺជារឿងល្អណាស់ ហើយនេះជាអ្វីដែលយើងចង់បាន។ កន្លងមកខាងវិស័យឯកជនរបស់ខ្ញុំក៏បានធ្វើច្រើនហើយ តាំងពីមុនកូវីដក៏យើងបានផ្លាស់ប្ដូរ[ទស្សនៈ] គ្នាដែរ»។
លោកថា ប្រទេសនីមួយៗត្រូវបង្កើតផលិតផលទេសចរណ៍របស់ខ្លួន និងរបៀបចំវាយ៉ាងណាឲ្យមានភាពទាក់ទាញទៅតាមទីផ្សារនីមួយៗ៕
