ទិដ្ឋភាពភ្ញៀវទេសចរនៅព្រលានយន្តហោះសៀមរាប អង្គរនាថ្ងៃទី៣ ខែកក្កដា ឆ្នាំ២០២៤។ រូបថត រដ្ឋបាលខេត្តសៀមរាប
ធនាគារជាតិនៃកម្ពុជានឹងដាក់ដំណើរការប្រព័ន្ធទូទាត់ប្រាក់តាមទូរស័ព្ទ បាគង(Bakong) សម្រាប់ភ្ញៀវទេសចរអន្តរជាតិដើម្បីសម្រួលដល់ការចាយវាយនៅក្នុងស្រុក នៅពេលពួកគេមកទស្សនាប្រទេសកម្ពុជា។ នេះបើតាមការបញ្ជាក់របស់លោកស្រី ជា សិរី អគ្គទេសាភិបាលធនាគារជាតិនៃកម្ពុជានៅថ្ងៃសុក្រនេះ។
លោកស្រីបញ្ជាក់ថា កម្មវីធីបាគងនេះនឹងត្រូវដាក់បង្ហាញនៅតាមព្រលានយន្តហោះនិងច្រកចូលនានាដើម្បីឲ្យភ្ញៀវអន្តរជាតិអាចដោនឡូតនៅពេលចូលមកដល់កម្ពុជាភ្លាមតែម្ដង។
លោកស្រី ជា សិរី បានថ្លែងដូច្នេះថា៖ «បន្តិចទៀតយើងមានដាក់ប្រព័ន្ធបាគង សម្រាប់ភ្ញៀវទេសចរ បានន័យថាពេលភ្ញៀវទេសចរគាត់ចុះមក គាត់អាចដោនឡូតប្រព័ន្ធបាគងយើង បើគាត់អត់មានប្រព័ន្ធធនាគារក្នុងស្រុកដើម្បីដកលុយបំពេញប្រព័ន្ធបាគងទេ គាត់អាចប្រើកាតក្រេឌីតដែលគាត់មានពីប្រទេសរបស់គាត់ ដូចជា Visa Card, Master Card, ឬ UnionPay ជាដើម»។
លោកស្រីបន្តថា៖ «ការដាក់ចេញនេះនឹងជួយសម្រួលដល់ភ្ញៀវទេសចរក្នុងការប្រើប្រាស់ និងអាចឲ្យគាត់ទទួលបានបទពិសោធឌីជីថល និងប្រព័ន្ធចាយវាយដោយមិនបាច់ប្រើសាច់ប្រាក់ ដោយសារតែគេតែងមើលមកប្រទេសយើងថាជាប្រទេសក្រ ប្រទេសតូច ប្រហែលជាអត់មានអីទេ។ ប៉ុន្តែ ពេលគាត់ចុះមក យើងចង់ឲ្យគាត់មានបាគងប្រើ ហើយចាយវាយស្រួលដូចប្រជាជនយើងក្នុងស្រុក»។
ការដាក់ឲ្យដំណើរការប្រព័ន្ធបាគងសម្រាប់ភ្ញៀវទេសចរនេះក៏ជាការឆ្លើយតបទៅនឹងបញ្ហាមួយចំនួន ដែលភ្ញៀវទេសចរមួយចំនួនបានជួបប្រទះក្នុងការចាយក្រដាស់ប្រាក់ធំ ជាពិសេសនៅខេត្តសៀមរាបដែលជាកន្លែងទាក់ទាញភ្ញៀវទេសចរដ៏សំខាន់របស់កម្ពុជា។
គម្រោងដាក់ឲ្យប្រើប្រាស់ប្រព័ន្ធបាគងសម្រាប់ភ្ញៀវទេសចរនេះ ក៏ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន ម៉ាណែត ទទួលបានការស្នើសុំពីអាជីវករនៅខេត្តសៀមរាប ដែលត្អូញត្អែរអំពីការពិបាកចាយប្រាក់ដែលរហែកបន្តិចបន្តួច ឬប្រឡាក់។ លោកបានប្រាប់ឲ្យលោកស្រី ជា សិរី រិះរកវិធីយ៉ាងណាដោះស្រាយបញ្ហានេះ។
លោកស្រី ជា សិរី៖ «លោកបានទូរស័ព្ទដើម្បីឲ្យខ្ញុំចាត់ចែង។ ខ្ញុំសូមទទួលអនុសាសន៍នេះ ហើយនឹងធ្វើការបន្តទៀតជាមួយនឹងភាគីពាក់ព័ន្ធទាំងអស់ ដោយសារតែការវិនិច្ឆ័យក្រដាស់ប្រាក់ដែលចាស់ រហែក វាអាស្រ័យទៅលើការវិនិច្ឆ័យរបស់បេឡាកររបស់ធនាគារនីមួយៗ»។
លោក ឈត ប៊ុនថង មន្ដ្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិតសភាកម្ពុជា យល់ថា ការដាក់ដំណើរការបាគងសម្រាប់ទេសចរអន្តរជាតិអាចកាត់បន្ថយបានការលំបាកខ្លះរបស់ភ្ញៀវទេសចរណ៍។
លោកថា នេះជាដំណោះស្រាយមួយជំហាន ក្នុងចំណោមបញ្ហាមួយចំនួនទៀតក្នុងវិស័យទេសចរណ៍។
លោកថ្លែងថា៖ «សម្រាប់ខ្ញុំ វិធីនេះជារឿងល្អដែលជួយសម្រួលដល់ពួកគាត់ព្រោះឥឡូវនេះពិភពលោកគឺជាសម័យឌីជីថល សម័យ AI និងសម័យបច្ចេកវិទ្យាព័ត៌មាន ដែលយើងត្រូវដើរឲ្យទាន់។ ដូច្នេះ ទេសចរដែលមកពីអរិយប្រទេសគាត់ងាយស្រួល ធ្វើយ៉ាងណាឲ្យប្រាក់សុទ្ធជាក្រដាស់ក៏អាចចាយបាន ប្រាក់ជាតួលេខក្នុងម៉ាស៊ីនក៏ចាយបាន»៕
