![](https://pppkhmer.sgp1.digitaloceanspaces.com/image/main/20247/23_7_2024_p0109151.jpg)
កសិករច្រកអំបិលដាក់ក្នុងបាវ ក្រោយប្រមូលផលបាន នៅក្នុងខេត្តកំពត កាលពីសប្តាហ៍មុន។ រូបថត យូសុះ អាប់ឌុលរ៉ាហ៊ីម
កំពតៈ ការផលិតអំបិលក្នុងខេត្តកំពត មានរហូតដល់ជាង ៩ម៉ឺនតោនក្នុងឆ្នាំ២០២៤នេះ ដែលកើនឡើងជាង១ម៉ឺនតោន បើធៀបទៅនឹងការផលិត កាលពីឆ្នាំ ២០២៣ ដោយសារតែកត្តាអាកាសធាតុអំណោយផលល្អ។
កំពតគឺជាខេត្តឃ្លាំងអំបិលមួយ ដែលមានផ្ទៃដីផលិតអំបិលសម្រាប់ផ្គត់ផ្គង់ក្នុងស្រុកជាង ៣ ៤៨៩ហិកតា។ នៅក្នុងការផលិតអំបិលនេះ មានកម្លាំងចំនួន១ ៤៧៤នាក់ ស្មើនឹង ១៧១ក្រុម ដែលចែកចេញជា ៦មណ្ឌល។ នេះបើយោងតាមអភិបាលខេត្តកំពត លោកម៉ៅ ធនិន ដែលបានថ្លែងក្នុងកិច្ចសម្ភាសន៍មួយជាមួយនឹងក្រសួងមហាផ្ទៃកាលពីពេលថ្មីៗនេះ។
ក្នុងឆ្នាំ ២០២៤នេះ ការផលិតអំបិលបានរហូតទៅដល់ ៩៣ ៩០៦តោន ដែលអាចធានាបាននូវការផ្គត់ផ្គង់នៅក្នុងប្រទេស។ ទោះយ៉ាងណា ការផលិតនេះវាពឹងផ្អែកទៅលើកត្តាធម្មជាតិផងដែរ។
លោកបញ្ជាក់ថា៖ «ដោយសារតែស្រែអំបិលគឺពឹងកម្តៅមេឃ កំដៅពន្លឺព្រះអាទិត្យ បើសិនជាអាកាសធាតុអំណោយផល មិនមានព្យុះភ្លៀង នៅពេលដែលយើងផលិត ទិន្នផលអំបិលរបស់យើងល្អណាស់។ ដោយសារតែបច្ចេកទេសរបស់បងប្អូនទាំង ៦មណ្ឌលរបស់យើងនេះ មានបទពិសោធខ្ពស់នៅក្នុងការផលិតអំបិល»។
លោកបានបន្តថា នាពេលបច្ចុប្បន្ននេះ ស្រែអំបិលទាំងនោះមានការគាំទ្រ ហើយមានការអភិរក្ស ពីព្រោះស្រែអំបិលនេះល្អណាស់សម្រាប់ជាអត្តសញាណរបស់ជាតិ និងអត្តសញាណរបស់ខេត្ត។
លោកអភិបាលថ្លែងដូច្នេះថា៖ «ជាពិសេសទៅទៀត ជាគំនិតខ្ញុំ ប្រសិនបើស្រែអំបិលនេះ អាកាសធាតុអំណោយផល យើងនឹងជំរុញបងប្អូនឱ្យបង្កើនការផលិត ធ្វើម៉េចឱ្យយើងទទួលបាននូវផលិតផលទាំងអស់នេះសម្រាប់ប្រើប្រាស់ជាផលប្រយោជន៍នៅក្នុងប្រទេសដោយយើងមិនបាច់នាំចូល។ យើងចំណេញច្រើន។ នេះជាជំហររបស់រដ្ឋបាលខេត្ត ហើយក៏ដូចជាយើងពង្រឹងឆន្ទៈ និងមនសិការបស់បងប្អូនដែរ»។
ទិន្នផលអំបិល ដែលប្រមូលបាននៅខេត្តកំពតក្នុងឆ្នាំ២០២៣មានចំនួន៧៨ ៤៨៤តោន។ ការ ផលិតអំបិល គឺចាប់ពីចុងខែធ្នូ ទៅដល់ពាក់កណ្តាលខែឧសភានៃឆ្នាំនីមួយៗ បើអាកាសធាតុអំណោយផលល្អ ផ្ទៃដី១ហិកតា អាចផលិតអំបិលបានជាមធ្យម២០ តោនក្នុង១ឆ្នាំ។
កម្ពុជាត្រូវការអំបិលចន្លោះពី ៧-១០ ម៉ឺនតោន ដើម្បីបំពេញតម្រូវការប្រើប្រាស់ក្នុងស្រុក។ ក្រៅពីផលអំបិលក្នុងស្រុក បណ្តាខេត្តនៅជាប់ព្រំដែនថៃ និងវៀតណាម ក៏តែងនាំចូលអំបិលមកដាក់លក់ផងដែរ។ នេះបើយោងតាមក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
លោក សុខ ឡុង ដែលជាម្ចាស់ស្រែអំបិលម្នាក់បានឱ្យដឹងថា ឆ្នាំនេះ ការផលិតអំបិលពិតជាមានការកើនឡើងមែន ដោយសារតែអាកាសធាតុអំណោយផលល្អ។
លោកថា៖«ឆ្នាំនេះ យើងផលិតអំបិលបានចាប់ពីខែ១ ដល់ខែ៤។ តែកាលពីឆ្នាំទៅពេលផលិតបានតែ១ខែទេ ដោយសារតែភ្លៀងកក់ខែតាំងពីដើមឆ្នាំ។ អញ្ជឹងការប្រមូលផលអំបិលឆ្នាំនេះកើនឡើង ១គុណនឹង ២ ឬគុណនឹង៣»។
ទោះយ៉ាងណា លោកថា ការផលិតបានច្រើនមែន ប៉ុន្តែតម្លៃវិញមិនបានថ្លៃដូចកាលពីឆ្នាំទៅនោះទេ។ ឆ្នាំនេះ អំបិលលេខ៣ (អំបិលគ្រួស) ១បាវ ទម្ងន់ ៥០គីឡូក្រាម តម្លៃជាង ៦ពាន់រៀល, អំបិលលេខ២ មួយបាវ តម្លៃ៨ពាន់រៀល និងលេខ១ មួយបាវតម្លៃប្រហែល១ម៉ឺនរៀល៕