ការដាក់បង្ហាញស្រូវអង្ករកម្ពុជា ក្នុងវេទិកាស្រូវអង្ករកម្ពុជាលើកទី៧ ឆ្នាំ២០២៤ កាលពីថ្ងៃអង្គារ ទី១០ ខែកញ្ញានេះ។ CAPRED-Australia/Chakriya_Khiev
ភ្នំពេញៈ វេទិកាស្រូវអង្ករកម្ពុជាលើកទី៧ ឆ្នាំ២០២៤ ត្រូវបានរៀបចំឡើងដើម្បីពង្រឹងនិងពង្រីកខ្សែច្រវាក់ផ្គត់ផ្គង់ស្រូវអង្ករកម្ពុជាឱ្យឆ្លើយតបទៅនឹងបរិបទនៃការប្រែប្រួលបរិយាកាស ក្រោមការគាំទ្រដោយអូស្ត្រាលី កាលពីថ្ងៃអង្គារ ទី១០ ខែកញ្ញានេះ។
វេទិកានេះត្រូវបានរៀបចំធ្វើឡើងដោយសហព័ន្ធស្រូវអង្ករកម្ពុជា ក្រោមប្រធានបទ «ការប្រែក្លាយខ្សែច្រវាក់ផ្គត់ផ្គង់អង្ករកម្ពុជាឱ្យកាន់តែមានភាពធន់ បរិយាបន្ន និងនិរន្តរភាព» ដែលមានការចូលរួមពីភាគីពាក់ព័ន្ធប្រមាណជា ៤០០នាក់។ នេះបើយោងតាមសេចក្តីប្រកាសព័ត៌មានរួមនៅថ្ងៃពុធនេះ។
ប្រធានក្រុមប្រឹក្សាភិបាល សហព័ន្ធស្រូវអង្ករកម្ពុជា លោក សុង សារ៉ន មានប្រសាសន៍ក្នុងវេទិកានេះថា គោលបំណងមួយក្នុងចំណោមគោលបំណងចម្បងរបស់វេទិកាស្រូវអង្ករកម្ពុជាលើកទី៧នេះ «គឺដើម្បីពង្រឹងនិងពង្រីកខ្សែច្រវាក់ផ្គត់ផ្គង់ស្រូវអង្ករកម្ពុជាឱ្យឆ្លើយតបទៅនឹងបរិបទនៃការប្រែប្រួលបរិយាកាសនិងនិន្នាការពិភពលោកលើការធ្វើឱ្យប្រសើរឡើងនូវបរិស្ថាន ការទទួលខុសត្រូវសង្គមនិងអភិបាលកិច្ចល្អ ដែលជាការកម្រិតនិងលក្ខខណ្ឌតម្រូវរបស់ទីផ្សារអន្តរជាតិសម្រាប់ការនាំចេញអង្ករដែលចាប់ផ្តើមអនុវត្តសម្រាប់ទីផ្សារសហគមន៍អឺរ៉ុបពីដើមឆ្នាំ ២០២៦ តទៅ»។
លោក ចាន់ សុឃាំង ប្រធានសហព័ន្ធស្រូវអង្ករកម្ពុជាបានលើកឡើងថា ដោយមានការយកចិត្តទុកដាក់ពី រាជរដ្ឋាភិបាលដែលមានក្រសួងកសិកម្ម ក្រសួងឧស្សាហកម្ម និង ក្រសួងពាណិជ្ជកម្ម ជាសេនាធិការ និងមានការចូលរួមពីក្រសួងស្ថាប័ននានា រួមទាំងដៃគូអភិវឌ្ឍន៍បានជួយលើកកម្ពស់វិស័យស្រូវអង្ករកម្ពុជា។ ក្នុងនោះបានពង្រីកគោលដៅទីផ្សារនាំចេញដែលមានការកើនពីចំនួន ៣៥ គោលដៅ នៅឆ្នាំ២០១០ រហូតដល់ ១២១គោលដៅត្រឹមឆ្នាំ២០២៣។
លោកបន្តថា ក្រសួងកសិកម្មកំពុងតែធ្វើការលើការអភិវឌ្ឍពូជស្រូវ និង បច្ចេកទេសដាំដុះ ខណៈដែល ក្រសួងឧស្សាហកម្មជួយលើបទដ្ឋានស្តង់ដារ និងការកិនកែច្នៃ។ រីឯ ក្រសួងពាណិជ្ជកម្មវិញកំពុងតែជួយលើការធ្វើពិពិធកម្មទីផ្សារនិងការផ្សព្វផ្សាយលើឆាកអន្តរជាតិ។
វេទិកាស្រូវអង្ករកម្ពុជាលើកទី៧នេះ ត្រូវបានបើកក្រោមអធិបតីភាព រដ្ឋមន្ត្រីក្រសួងពាណិជ្ជកម្ម លោកស្រី ចម និម្មល រដ្ឋមន្ត្រីក្រសួងកសិកម្ម លោក ឌិត ទីណា រដ្ឋមន្រ្តីក្រសួងឧស្សាហកម្ម លោក ហែម វណ្ណឌី និង ឯកអគ្គរដ្ឋទូតអូស្ត្រាលី លោកដេរិក យីប។ CAPRED-Australia/Chakriya_Khiev
លោក សុឃាំង ថែ្លងដូច្នេះថា៖ «អង្ករកម្ពុជាក៏ទទួលបានការទទួលស្គាល់ពេញពិភពលោកតាមរយៈការទទួលបានពានរង្វាន់អង្ករល្អផ្តាច់គេនៅលើសកលលោកចំនួន ៥ដង សម្រាប់អង្ករពូជស្រូវផ្ការំដួល គឺនៅឆ្នាំ២០១២, ២០១៣, ២០១៤, ២០១៨ និងឆ្នាំ២០២២ និងពានរង្វាន់មាសអង្ករពូជស្រូវសែនក្រអូបពីប្រទេសចិន នាឆ្នាំ២០២៣ ផងដែរ»។
ឯកអគ្គរដ្ឋទូតអូស្ត្រាលីប្រចាំកម្ពុជា លោក ដេរិក យីប (Derek Yip) បានថ្លែងថា អូស្រ្តាលីមានសេចក្តីរីករាយក្នុងការបន្តការគាំទ្ររបស់ខ្លួន តាមរយៈកម្មវិធីភាពជាដៃគូ កម្ពុជា អូស្រ្តាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) ដើម្បីជួយអ្នកនាំចេញអង្ករកម្ពុជា ស្វែងរកទីផ្សារអន្តជាតិ សម្រាប់លក់ផលិតផលដ៏ល្អប្រណីតរបស់ខ្លួន ព្រមទាំងជួយជំរុញការផលិតកម្មកសិកម្ម និងការកែច្នៃប្រកបដោយនិរន្តរភាព។
លោកបញ្ជាក់ថា៖ «អូស្ត្រាលីបានសហការជាមួយប្រទេសកម្ពុជាដើម្បីគាំទ្រដល់ការរីកលូតលាស់នៃវិស័យកសិកម្មតាំងពីឆ្នាំ ១៩៦០មកម៉្លេះ។ យើងពិតជាមានសេចក្តីសោមនស្សរីករាយ ដោយមើលឃើញពីវឌ្ឍនភាពដ៏សំខាន់នៅក្នុងវិស័យស្រូវអង្កររបស់កម្ពុជា ជាមួយនឹងការនាំចេញអង្ករ និងស្រូវទៅក្រៅប្រទេសក្នុងតម្លៃប្រមាណជា ១,៨ ពាន់លានដុល្លារក្នុងឆ្នាំ ២០២៣»។
វេទិកាស្រូវអង្ករកម្ពុជាលើកទី៧នេះ ត្រូវបានបើកក្រោមអធិបតីភាព រដ្ឋមន្ត្រីក្រសួងពាណិជ្ជកម្ម លោកស្រី ចម និម្មល រដ្ឋមន្ត្រីក្រសួងកសិកម្ម លោក ឌិត ទីណា រដ្ឋមន្រ្តីក្រសួងឧស្សាហកម្ម លោក ហែម វណ្ណឌី និង ឯកអគ្គរដ្ឋទូតអូស្ត្រាលី លោកដេរិក យីប។ វេទិកានេះត្រូវបានបិទក្រោមអធិបតីភាពលោកនាយករដ្ឋមន្រ្តី ហ៊ុន ម៉ាណែត។
ក្នុងរយៈពេល៧ខែ នៃឆ្នាំ ២០២៤នេះ កម្ពុជាបាននាំចេញអង្ករចំនួន ៣៧៩ ៥៤៦ តោន ដែលគិតជាទឹកប្រាក់មានចំនួន ២៨០លានដុល្លារសហរដ្ឋអាមេរិក ។ ក្រៅពីនោះ ប្រទេសកម្ពុជាក៏បាននាំចេញស្រូវចំនួន ២ ៧១១ ១៧៩តោនទៅកាន់ប្រទេសជិតខាង ដែលគិតជាទឹកប្រាក់បានប៉ាន់ប្រមាណជាង ៧៨៤,៦០លានដុល្លារសហរដ្ឋអាមេរិក៕
