គណៈប្រតិភូសភាពាណិជ្ជកម្មកម្ពុជា ទៅបំពេញទស្សនកិច្ចធុរកិច្ចនៅទីក្រុងឡុងប៊ិច រដ្ឋកាលីហ្វ័រញ៉ា សហរដ្ឋអាមេរិក ចាប់ពីថ្ងៃទី១៧-២១ ខែកញ្ញា ទៅចូលរួមក្នុងជំនួបពាណិជ្ជកម្មកម្ពុជា-អាមេរិក ឆ្នាំ២០២៤។ រូបថត CCC
ភ្នំពេញៈ កម្ពុជារំពឹងថាដំណើរទស្សនកិច្ចរបស់តំណាងផ្នែកឯកជនកម្ពុជាទៅកាន់សហរដ្ឋអាមេរិកនឹងជួយឱ្យទីផ្សារនាំចេញទំនិញកម្ពុជា ពិសេសផលិតផលកសិកម្មទៅទីផ្សារអាមេរិក មានបរិមាណកាន់តែច្រើន ខណៈរយៈពេល ៨ខែដើមឆ្នាំ២០២៤ ការផ្លាស់ប្តូរទំនិញរវាងប្រទេសទាំង ២ មានទឹកប្រាក់សរុបជិត ៧ពាន់លានដុល្លារ។
សេចក្តីប្រកាសព័ត៌មានរបស់សភាពាណិជ្ជកម្មកម្ពុជា កាលពីថ្ងៃទី១៧ ខែកញ្ញា ឱ្យដឹងថា គណៈប្រតិភូសភាពាណិជ្ជកម្មកម្ពុជា ដែលដឹកនាំដោយ លោក តាន់ មុនីវណ្ណ អនុប្រធានសភាពាណិជ្ជកម្មកម្ពុជា បានដឹកនាំតំណាងក្រុមហ៊ុននៅកម្ពុជាជាង ៥០ ទៅបំពេញទស្សនកិច្ចធុរកិច្ចនៅទីក្រុងឡុងប៊ិច រដ្ឋកាលីហ្វ័រញ៉ា សហរដ្ឋអាមេរិក ចាប់ពីថ្ងៃទី១៧-២១ ខែកញ្ញា ទៅចូលរួមក្នុងជំនួបពាណិជ្ជកម្មកម្ពុជា-អាមេរិក ឆ្នាំ២០២៤។
យោងតាម CCC នៅក្នុងដំណើរទស្សនកិច្ចនេះ នឹងមានកម្មវិធីជំនួបពាណិជ្ជកម្មកម្ពុជា-អាមេរិក, ការធ្វើបទបង្ហាញស្តីពីនិន្នាការទីផ្សារ អនុលោមភាពបទប្បញ្ញត្តិ និងប្រព័ន្ធភស្តុភារ ដែលជាព័ត៌មានគន្លឹះសម្រាប់ធុរជនកម្ពុជា ក្នុងការនាំផលិតផលចូលក្នុងទីផ្សារអាមេរិក។ ផលិតផលសំខាន់ៗ ដែលកម្ពុជាយកទៅចូលរួមក្នុងកម្មវិធីជំនួបពាណិជ្ជកម្មនេះ មានដូចជា អង្ករ ម្រេច គ្រាប់ស្វាយចន្ទី ដំណាប់ផ្លែឈើ ខ្ញី ដំឡូងជ្វា ត្រីងៀត ទឹកត្រី អំបិល និង ផលិតផលបង្កក(ទុរេន និងមៀន) ជាដើម។
ទន្ទឹមនឹងនេះ គណៈប្រតិភូសភាពាណិជ្ជកម្មកម្ពុជា ក៏នឹងបំពេញទស្សនកិច្ចទៅកាន់ផ្សារទំនើប និងក្រុមហ៊ុនចែកចាយផលិតផលនៅទីផ្សារអាមេរិកដើម្បីស្វែងយល់ពីតម្រូវការទីផ្សារ និងខ្សែច្រវាក់ផ្គត់ផ្គង់។ នេះបើតាម CCC។
អគ្គនាយកសភាពាណិជ្ជកម្មកម្ពុជា លោក ងួន ម៉េងតិច កាលពីថ្ងៃទី១៩ ខែកញ្ញា បានប្រាប់ភ្នំពេញប៉ុស្តិ៍ពីសហរដ្ឋអាមេរិក ថា សភាពាណិជ្ជកម្មកម្ពុជាធ្លាប់បានធ្វើកម្មវិធីបែបនេះជាច្រើនដងហើយចាប់តាំងពីឆ្នាំ២០១១ ដោយក្នុងជំនួបម្តងៗតែងតែមានការពិភាក្សាគ្នាដើម្បីធ្វើយ៉ាងណាជំរុញការនាំចេញទំនិញកម្ពុជា ពិសេសផលិតផលកសិកម្មទៅទីផ្សារអាមេរិក ឱ្យបានកាន់តែច្រើន។
លោកថ្លែងថា៖«យើងរំពឹងថាជំនួបនេះ នឹងផ្តល់ផលវិជ្ជមានសម្រាប់ការនាំចេញផលិតផលកម្ពុជាទៅកាន់ទីផ្សារអាមេរិក ខណៈទំហំពាណិជ្ជកម្មរវាងប្រទេសទាំង ២ បានកើនឡើងជាបន្តបន្ទាប់»។
ទិន្នន័យដែលកត់ត្រាដោយអគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ចន្លោះពីខែមករា-សីហា ឆ្នាំ២០២៤ ការនាំចេញ-នាំចូលទំនិញរវាងកម្ពុជា-អាមេរិក មានទឹកប្រាក់សរុប ៦,៩២ពាន់លានដុល្លារ កើនឡើង ១០,៤ភាគរយបើធៀបរយៈពេលដូចគ្នាក្នុងឆ្នាំ២០២៣ ដែលមាន ៦,២៧ ពាន់លានដុល្លារ។
ក្នុងចំនួនខាងលើ គឺការនាំចេញរបស់កម្ពុជាមានចំនួន ៦,៧៥ ពាន់លានដុល្លារ កើន ១០,៤ ភាគរយ ចំណែកទំនិញអាមេរិកនាំមកកម្ពុជា ១៧៣,៧៩ លានដុល្លារ កើន ៨,៣ ភាគរយ។ អាមេរិក គឺជាដៃគូពាណិជ្ជកម្មធំទី ២ របស់កម្ពុជា បន្ទាប់ពីប្រទេសចិន។ សម្រាប់រយៈពេលខាងលើ គឺជញ្ជីងពាណិជ្ជកម្មកម្ពុជាមានឧត្តមភាព ៦,៥៧ ពាន់លានដុល្លារ។
ប្រធានក្រុមប្រឹក្សាភិបាលក្រុមហ៊ុន ពេជ្រចិន្តា ហ្វ្រ៊ូតប្រូដាក់សិន ភីអែហ្វភី លោក ភត់ សុផាន់បូរី ដែលជាក្រុមហ៊ុនកែច្នៃ និងនាំចេញផលិតផលកសិកម្មមួយចំនួនដូចជា ផ្លែមៀនទៅទីផ្សារអន្តរជាតិ បានប្រាប់ភ្នំពេញប៉ុស្តិ៍ថា ជាការល្អណាស់ប្រសិនបើកម្ពុជាអាចនាំចេញផ្លែឈើស្រស់ និងបង្កកទៅកាលក់នៅទីផ្សារអាមេរិក។ បញ្ហាចោតសម្រាប់ការនាំចេញកសិផល ពិសេសផ្លែឈើទៅអាមេរិក គឺចម្ងាយផ្លូវរវាងប្រទេសទាំង ២ ដែលធ្វើឱ្យការដឹកជញ្ជូនត្រូវប្រើពេលយូរ(ការដឹកជញ្ជូនតាមកប៉ាល់)។
លោកនិយាយថា៖«កន្លងមកយើងដឹងថាមានក្រុមហ៊ុនមួយចំនួនចង់បានផលិតផលកម្ពុជា(ផ្លែមៀន និងធុរ៉េន) ទៅប្រទេសអាមេរិក និងកាណាដា ប៉ុន្តែបើតាមដឹង គឺការនាំចេញជាផ្លូវការមកដល់ពេលនេះគឺមិនទាន់ទេ»។
ទន្ទឹមនឹងការលើកឡើងខាងលើ លោក សុផាន់បូរី ក៏បានជំរុញឱ្យម្ចាស់កសិដ្ឋានដាំដុះដំណាំហូបផ្លែទាំងអស់ ត្រូវបង្កើនការយកចិត្តទុកដាក់ទៅលើការជ្រើសរើសពូជ វិធីសាស្រ្តក្នុងការដាំដុះ ថែទាំ ប្រមូលផល និងការវេចខ្ចប់ ដើម្បីឱ្យមានគុណភាពល្អ ស្របតាមការចង់បានរបស់ក្រុមហ៊ុនបញ្ជាទិញផងដែរ៕
