ភ្ញៀវទេសចរដើរកម្សាន្តនៅខេត្តសៀមរាប។ រូបថត ហ៊ឹន ពិសី
ភ្នំពេញៈ ភ្ញៀវទេសចរជនជាតិថៃ និងវៀតណាម សរុបជិត ២ លាននាក់ បានធ្វើដំណើរមកកម្ពុជានារយៈពេល ៧ ខែ ដើមឆ្នាំ ២០២៤ កើនឡើងជាង ២០ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣ ខណៈចំនួននេះគឺស្មើនឹងជាងពាក់កណ្តាលនៃចំនួនភ្ញៀវទេសចរបរទេសសរុប។
ទិន្នន័យក្រសួងទេសចរណ៍ បង្ហាញថា ចន្លោះពីខែមករា ដល់ខែកក្កដា ឆ្នាំ ២០២៤ កម្ពុជាទទួលបានភ្ញៀវបរទេសសរុប ៣ ៧៤២ ២៣០ នាក់ កើនឡើង ២៣,២ ភាគរយធៀបនឹងរយៈពេលដូចគ្នាឆ្នាំ ២០២៣ ដែលមានចំនួន ៣ ០៣៧ ៣៤៤នាក់។
ក្នុងចំណោមភ្ញៀវខាងលើ គឺភ្ញៀវមកពីប្រទេសថៃ និងវៀតណាម បានគ្របដណ្តប់ ៥០,៩ ភាគរយនៃចំនួនភ្ញៀវសរុប ដោយជនជាតិថៃ មានចំនួន ១ ១៤៧ ៥៣៤ នាក់(កើន ១១,៦ ភាគរយ) ស្មើ ៣០,៧ ភាគរយនៃចំនួនភ្ញៀវបរទេសសរុប, និងវៀតណាម ៧៥៧ ៤៣៧ នាក់(កើន ៣៧,៤ ភាគរយ) ស្មើនឹង ២០,២ ភាគរយ។
ក្រសួងឱ្យដឹងទៀតថា បន្ទាប់ពីជនជាតិថៃ និងវៀតណាម គឺជនជាតិចិន មានចំនួន ៤៦៣ ៩៨០ នាក់ ស្មើនឹង ១២,៤ ភាគរយ, ឡាវ ២២៤ ៨៧១ នាក់ ស្មើ ៦ ភាគរយ, អាមេរិក ១២៩ ៥១៧ នាក់ ស្មើ ៣,៥ ភាគរយ។ ក្រៅពីនោះមានដូចជា កូរ៉េ ឥណ្ឌូនេស៊ី, បារាំង ចក្រភពអង់គ្លេស និងប្រទេសជប៉ុន។ល។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី បានប្រាប់ភ្នំពេញប៉ុស្តិ៍នៅថ្ងៃទី២០ ខែកញ្ញាថា បើនិយាយពីចំនួនភ្ញៀវទេសចរជនជាតិថៃ និងវៀតណាម ចូលមកដើរកម្សាន្តតាមប្រាសាទបុរាណក្នុងខេត្តសៀមរាប គឺមិនមានចំនួនច្រើនដូចភ្ញៀវមកពីតំបន់អាមេរិក និងតំបន់អ៊ឺរ៉ុប ឡើយ។
លោកបន្តថា តួលេខច្រើននៃចំនួនភ្ញៀវថៃ និងវៀតណាម គឺអាចបានមកពីការចូលមកធ្វើពាណិជ្ជកម្មបន្តិចបន្តួចនៅតាមព្រំដែន ឬចូលមកកម្សាន្តតាមព្រំដែន(កាស៊ីណូ)។
លោកប្រាប់ទៀត ថាចំនួនភ្ញៀវបរទេសដែលបានធ្វើដំណើរមកកម្ពុជាពិតជាកើនឡើងជាបន្តបន្ទាប់ក្នុងរយៈពេលប្រមាណ ២ ឆ្នាំចុងក្រោយនេះ គឺបន្ទាប់ពីធ្លាក់ចុះស្ទើរដល់សូន្យអំឡុងពេលនៃការរីករាលដាលខ្លាំងជំងឺកូវីដ១៩។
លោកថ្លែងថា៖«ភ្ញៀវទេសចរបរទេសបានកើនឡើង ប៉ុន្តែមិនទាន់មានចំនួនច្រើនប្រហាក់ប្រហែលនឹងមុនឆ្នាំ២០២០ ឡើយ។ ស្ថានភាពចំនួនភ្ញៀវទេសចរ គឺជាប់ទាក់ទងនឹងស្ថានភាពសេដ្ឋកិច្ច និងនយោបាយពិភពលោក»។
យោងតាមគ្រឹះស្ថានអង្គរ ដែលជាស្ថាប័នទទួលបន្ទុកលើការលក់សំបុត្រឱ្យភ្ញៀវបរទេស ចូលទស្សនារមណីយដ្ឋានអង្គរ គឺក្នុងរយៈពេល ៧ ខែ ដើមឆ្នាំ២០២៤ មានភ្ញៀវបរទេសចំនួន ៥៨៤ ៣៧៥ នាក់ បានទិញសំបុត្រចូលទស្សនារមណីយដ្ឋានអង្គរ ដោយប្រាក់បានពីការលក់សំបុត្រមានចំនួន ២៧,១៨លានដុល្លារ កើនឡើង ៣៣ ភាគរយ និង ៣៣,៧៦ ភាគរយ ព្រមគ្នាបើធៀបរយៈពេលដូចគ្នាឆ្នាំ២០២៣។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) លោក ធួន ស៊ីណាន ធ្លាប់អះអាងថា ការផ្លាស់ប្តូររបៀបកត់ត្រា បានធ្វើឱ្យចំនួនភ្ញៀវមកពីប្រទេសជាប់ព្រំដែនទាំង ២ (ថៃ និងវៀតណាម) កើនឡើងយ៉ាងច្រើន ខុសពីពេលមុនដែលគេកត់តែភ្ញៀវដែលមានគោលបំណងចូលមកដើរលេងកម្សាន្ត។
លោកបន្តថា បើតាមលោកដឹង ពេលនេះគេកត់ទាំងអស់ឱ្យតែភ្ញៀវបរទេសឆ្លងចូលមកក្នុងទឹកដីកម្ពុជា ទោះពួកគេមកលេងល្បែងតាមទីតាំងជាប់ព្រំដែនក៏ដោយ។
យ៉ាងណាលោក ស៊ីណាន នៅតែបង្ហាញការស្វាគមន៍ចំពោះតួលេខនៃកំណើនភ្ញៀវទេសចរបរទេសដែលចូលមកកម្ពុជា។
ក្នុងឆ្នាំ ២០២៣ កម្ពុជាទទួលបានភ្ញៀវទេសចរបរទេសចំនួន ៥,៤៥ លាននាក់ កើនឡើង ១៣៩,៥ ភាគរយ បើធៀបនឹងឆ្នាំ ២០២២ ចំណែកប្រាក់ដែលរកបានពីវិស័យទេសចរណ៍បរទេស ក្នុងឆ្នាំ ២០២៣ គឺមានប្រមាណ ៣,០៤ ពាន់លានដុល្លារ កើនឡើង ១១៥ ភាគរយពីចំនួន ១,៤១ ពាន់លានដុល្លារកាលពីឆ្នាំ ២០២២។ នេះបើតាមក្រសួងទេសចរណ៍៕
