ពិធីបើកការដ្ឋានសាងសង់រោងចក្រផលិតសំបកកង់រថយន្តរបស់ក្រុមហ៊ុន WANLI Tire ដែលស្ថិតក្នុងតំបន់សេដ្ឋកិច្ចពិសេសស៊ីនបាវិត នៃខេត្តស្វាយរៀង។ CDC
កម្ពុជានឹងមានរោងចក្រផលិតសំបកកង់រថយន្ត ទី៦ ដែលជាការវិនិយោគរបស់ក្រុមហ៊ុនមកពីប្រទេសចិន WANLI Tire ក្រោមទុនវិនិយោគប្រមាណ ៥០០ លានដុល្លារ នៅក្នុងតំបន់សេដ្ឋកិច្ច ស៊ីនបាវិត ខេត្តស្វាយរៀងនាពេលខាងមុខ ខណៈរយៈពេល ១១ ខែដើមឆ្នាំ ២០២៤ ការនាំចេញសំបកកៅស៊ូកង់រថយន្តទៅទីផ្សារអន្តរជាតិសម្រេចបានជិត ៨០០ លានដុល្លារ។
ពិធីបើកការដ្ឋានសាងសង់រោងចក្រផលិតសំបកកង់រថយន្តរបស់ក្រុមហ៊ុន WANLI Tire ត្រូវបានធ្វើឡើងកាលពីថ្ងៃទី១២ ខែមករា ឆ្នាំ២០២៥ ដោយមានការចូលរួមពីលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា(CDC), លោក Wang Wenbin ឯកអគ្គរដ្ឋទូតចិនប្រចាំនៅកម្ពុជា, លោក ប៉េង ពោធិ៍សា អភិបាលខេត្តស្វាយរៀង, លោក Jing Guangjun ប្រធានក្រុមប្រឹក្សាភិបាលក្រុមហ៊ុន Guangzhou Industrial Investment Holding Group និងលោក Cao Xiandong ប្រធានក្រុមប្រឹក្សាភិបាលក្រុមហ៊ុន WANLI Tire ព្រមទាំងអ្នកពាក់ព័ន្ធជាច្រើនទៀត។
រោងចក្រនេះស្ថិតក្នុងតំបន់សេដ្ឋកិច្ចពិសេស ស៊ីនបាវិត ក្នុងខេត្តស្វាយរៀង លើផ្ទៃដីប្រមាណ ៣២ហិកតា។ គម្រោងនេះនឹងអាចបង្កើតការងារបានប្រមាណ ១ ០០០កន្លែង។ WANLI Tire គឺជារោងចក្រផលិតសំបកកង់រថយន្ត ទី២ ដែលស្ថិតនៅក្នុងតំបន់សេដ្ឋកិច្ចពិសេស ស៊ីនបាវិត និងជារោងចក្រផលិតសំបកកង់រថយន្តទី ៦ នេះកម្ពុជា។
ក្រុមប្រឹក្សាអភិវឌ្ឍន៍កម្ពុជា(CDC) បានឱ្យដឹងថា ការសម្រេចចិត្តវិនិយោគនៅកម្ពុជាពីសំណាក់ក្រុមហ៊ុន WANLI Tire គឺកើតចេញពីជំនួបពិភាក្សារវាង លោក ស៊ុន ចាន់ថុល ជាមួយលោក Jing Guangjun ក្នុងដំណើរបេសកកម្មគោះទ្វារវិនិយោគដល់រោងចក្រ WANLI Tire នៅទីក្រុងក្វាងចូវ សាធារណរដ្ឋប្រជាមានិតចិន កាលពីថ្ងៃទី២១ ខែតុលា ឆ្នាំ២០២៣។
ឧបនាយករដ្ឋមន្ត្រី លោក ស៊ុន ចាន់ថុល បានលើកឡើងថា ទំនាក់ទំនងរវាងកម្ពុជា-ចិន នឹងកាន់តែមានភាពល្អប្រសើរបន្ថែមទៀតនាពេលខាងមុខក្នុងនាមជាដៃគូយុទ្ធសាស្ត្រគ្រប់ជ្រុងជ្រោយ និងជាមិត្តដែកថែប រួមទាំងការសម្រេចឱ្យបាននូវការកសាងសហគមន៍វាសនារួមកម្ពុជា-ចិន ក្នុងយុគសម័យថ្មី ប្រកបដោយគុណភាពខ្ពស់ និងស្តង់ដារខ្ពស់។
លោកបន្ថែមថា តួលេខនៃការកើនឡើងគម្រោងវិនិយោគរបស់វិនិយោគិនចិន គឺបង្ហាញឱ្យឃើញពីការជឿទុកចិត្តរបស់វិនិយោគិនចិនមកលើរាជរដ្ឋាភិបាលកម្ពុជា ដែលជាប្រទេសមានសុខសន្តិភាព ស្ថេរភាពនយោបាយ ម៉ាក្រូសេដ្ឋកិច្ចរឹងមាំ មានលក្ខខណ្ឌក្របខណ្ឌច្បាប់វិនិយោគល្អប្រសើរ និងសេដ្ឋកិច្ចបើកចំហរ។
លោកបានថ្លែងថា៖«ខ្ញុំសូមលើកទឹកចិត្តដល់វិនិយោគិនទាំងអស់ឱ្យបន្តចូលរួមផ្សព្វផ្សាយព័ត៌មានល្អៗអំពីបរិយាកាសវិនិយោគនៅកម្ពុជាទៅកាន់វិនិយោគិនផ្សេងៗទៀតដើម្បីទាក់ទាញវិនិយោគិនមកបណ្តាក់ទុនវិនិយោគបន្ថែមទៀតនៅកម្ពុជា តាមរយៈការបង្កើតការងារបន្ថែមជូនបងប្អូនប្រជាពលរដ្ឋកម្ពុជា ក៏ដូចជាជំរុញកំណើនសេដ្ឋកិច្ចជាតិដើម្បីឆ្ពោះទៅសម្រេចបានចក្ខុវិស័យជាប្រទេសចំណូលខ្ពស់នៅឆ្នាំ២០៥០»។
យោងតាម CDC តំបន់សេដ្ឋកិច្ចពិសេសកំពុងដើរតួនាទីយ៉ាងសំខាន់ក្នុងការទាក់ទាញការវិនិយោគនៅកម្ពុជា ដែលរហូតមកទល់ពេលបច្ចុប្បន្ន កម្ពុជាមានតំបន់សេដ្ឋកិច្ចពិសេសដែលកំពុងដំណើរការចំនួន ២៨។
សម្រាប់តំបន់សេដ្ឋកិច្ចពិសេស ស៊ីនបាវិត នេះបានស្រូបយកគម្រោងវិនិយោគចំនួន ១១គម្រោង ហើយវិស័យដែលគួរឱ្យកត់សម្គាល់នោះគឺការផលិតសំបកកង់យានយន្ត ដែលជាឧស្សាហកម្មមួយថ្មី និងប្រើប្រាស់បច្ចេកវិទ្យាខ្ពស់មិនធ្លាប់មាននៅកម្ពុជា។
អនុប្រធានសភាពាណិជ្ជកម្មកម្ពុជា លោក លឹម ហេង(Lim Heng, Vice-president of the Cambodia Chamber of Commerce(CCC)) បានប្រាប់ភ្នំពេញប៉ុស្តិ៍ក្នុងថ្ងៃទី១៣ ខែមករា និយាយថា បច្ចុប្បន្នរោងចក្រផលិតសំបកកៅស៊ូកង់រថយន្តមាននៅក្នុងតំបន់សេដ្ឋកិច្ចពិសេសខេត្តស្វាយរៀង ខេត្តព្រះសីហនុ និងខេត្តក្រចេះ។
ទោះចំនួនរោងចក្រផលិតសំបកកង់រថយន្តនៅកម្ពុជាបានកើនឡើងជាបន្តបន្ទាប់ ប៉ុន្តែការប្រើប្រាស់ជ័រកៅស៊ូក្នុងស្រុកនៅមានបរិមាណតិចតួចនៅឡើយ ព្រោះជ័រកៅស៊ូដែលផលិតនៅកម្ពុជា មានភាគច្រើនជាប្រភេទជ័រកៅស៊ូគុណភាពខ្ពស់ ដែលច្រើនសម្រាប់ធ្វើជាវត្ថុធាតុដើមផលិតផលិតផ្សេងៗទៀតក្រៅពីសំបកកង់រថយន្ត។
លោកថ្លែងថា៖«សម្រាប់កៅស៊ូប្រភេទនេះ(សម្រាប់ផលិតសំបកកង់រថយន្ត) គឺកម្ពុជាផលិតបានតិចប៉ុណ្ណោះគឺប្រហែល ១០ភាគរយនៃផលិតផលជ័រកៅស៊ូសរុបប្រចាំឆ្នាំ ដូច្នេះវានៅតែមានតម្រូវការចាំបាច់សម្រាប់នាំចូលជ័រកៅស៊ូពីក្រៅប្រទេសមកបំពេញសេចក្តីត្រូវការរបស់រោងចក្រផលិតសំបកកង់រថយន្តនៅកម្ពុជា»។
លោកបានប្រាប់ទៀតថា បច្ចុប្បន្នផលិតផលសំបកកង់រថយន្តផលិតនៅកម្កុជា ភាគច្រើននាំទៅកាត់ទីផ្សារអាមេរិក និងអឺរ៉ុប។
អនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ(Lor Vichet, vice-president of the Cambodia Chinese Commerce Association (CCCA), បាននិយាយថា ភាគច្រើននៃរោងចក្រផលិតសំបកកង់រថយន្តនៅកម្ពុជា គឺមកពីប្រទេសចិន និងភាគច្រើនស្ថិតក្នុងតំបន់សេដ្ឋកិច្ចខេត្តស្វាយរៀង។
កំណើនរោងចក្រផលិតសំបកកង់រថយន្តនឹងជួយឱ្យជ័រកៅស៊ូក្នុងស្រុកមានទីផ្សារជាងមុន ខណៈកាលពីមុខផលិតផលជ័រកៅស៊ូកម្ពុជា បានពឹងផ្អែកស្ទើរទាំងស្រុងលើទីផ្សារនាំចេញទៅក្រៅប្រទេស។ លោកបន្តថា បច្ចុប្បន្នទុនវិនិយោគរបស់រោងចក្រផលិតសំបកកង់រថយន្តនៅកម្ពុជា អាចមានចំនួនជិត ២ ពាន់លានដុល្លារ។
លោកបានប្រាប់ថា៖«ឧស្សាហកម្មរោងចក្រផលិតសំបកកង់រថយន្តនៅកម្ពុជា នឹងកើនឡើងបន្ថែមទៀតនៅពេលខាងមុខ ពីព្រោះកម្តៅនយោបាយរវាងប្រទេសមហាអំណាចសេដ្ឋកិច្ចទាំង ២ របស់ពិភពលោកនឹងជំរុញឱ្យរោងចក្រកាន់តែច្រើនប្តូរទីតាំងមកកាន់ប្រទេសកម្ពុជា»។
របាយការណ៍ក្រសួងពាណិជ្ជកម្ម ឱ្យដឹងថា ចន្លោះពីខែមករា ដល់ខែវិច្ឆិកា ឆ្នាំ ២០២៤ ការនាំចេញសំបកកង់រថយន្តទៅទីផ្សារអន្តរជាតិ មានទឹកប្រាក់សរុប ៧៧២,៥៥ លានដុល្លារ កើនឡើង ១៣៥,៣៤ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣ ដែលមាន ៣២៨,២៧ លានដុល្លារ។
ចំនួនទឹកប្រាក់នាំចេញសំបកកង់រថយន្ត គឺស្មើនឹង ៣,១៧ ភាគរយនៃទឹកប្រាក់នាំចេញទំនិញសរុបរបស់កម្ពុជាក្នុងរយៈពេល ១១ ខែ ឆ្នាំ ២០២៤ ដែលមានចំនួន ២៤ ៣៤៨,៩៤ លានដុល្លារ៕
