កម្មករកំពុងលីអង្ករពីក្នុងឃ្លាំងទៅដាក់លើរថយន្ត។ អង្ករ គឺជាទំនិញសក្តានុពលមួយរបស់កម្ពុជាសម្រាប់នាំចេញទៅឥណ្ឌូនេស៊ី។ ភ្នំពេញប៉ុស្តិ៍
មន្ត្រីការទូតជាន់ខ្ពស់កម្ពុជា និងឥណ្ឌូនេស៊ី បានបង្ហាញសុទិដ្ឋិនិយមចំពោះកិច្ចសហប្រតិបត្តិការពាណិជ្ជកម្មទ្វេភាគីរវាងប្រទេសទាំង ២ ដែលសម្រេចបាន ជាង ១ ពាន់លានដុល្លារ ព្រមទាំងកិច្ចខិតខំរបស់កម្ពុជាក្នុងការជំរុញការនាំចេញអង្ករទៅប្រទេសឥណ្ឌូនេស៊ីឱ្យបានកាន់តែច្រើន។
ព័ត៌មានទាំងនេះត្រូវបានលើកឡើងក្នុងជំនួបទ្វេភាគីរវាង លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបទេស និងសហប្រតិបត្តិការអន្តរជាតិ ជាមួយ លោក Santo Darmosumarto ឯកអគ្គរដ្ឋទូតឥណ្ឌូនេស៊ីប្រចាំកម្ពុជា នៅទីស្តីការក្រសួងការបរទេស កាលពីថ្ងៃទី៦ ខែមករា។
ជាកិច្ចចាប់ផ្តើមលោក ប្រាក់ សុខុន បានរំលឹកពីការគាំទ្ររបស់ប្រទេសឥណ្ឌូណេស៊ី ចំពោះដំណើរការស្វែងរកសន្តិភាពនៅកម្ពុជា និងបានកោតសរសើរចំពោះទំនាក់ទំនងទ្វេភាគីដ៏រឹងមាំរវាងប្រជាជាតិទាំងពីរលើវិស័យនយោបាយ សេដ្ឋកិច្ច និងកិច្ចសហប្រតិបត្តិការលើវិស័យការពារជាតិ។ លោកបន្តថា តាមរយៈកិច្ចសហប្រតិបត្តិការល្អនេះ គឺបានជួយធ្វើឱ្យទំហំពាណិជ្ជកម្មទ្វេភាគីប្រទេសទាំង ២ កើនឡើងជាបន្តបន្ទាប់ ដែលមានរហូតដល់ជាង ១ ពាន់លានដុល្លារ។
លោកថ្លែងថា៖«ប្រទេសទាំង ២ មានឱកាសច្រើនថែមទៀតក្នុងការពង្រីកពាណិជ្ជកម្មទ្វេភាគីដែលមានកំណើនទឹកប្រាក់លើសពី ១ ពាន់លានដុល្លារអាមេរិករួចមកហើយនៅក្នុងឆ្នាំ២០២៣»។
សេចក្តីប្រកាសព័ត៌មានរបស់ក្រសួងការបរទេស ឱ្យដឹងថា ភាគីកម្ពុជា-ឥណ្ឌូនេស៊ី សុទ្ធតែបង្ហាញពីកិច្ចខំប្រឹងប្រែងដើម្បីបង្កើនពាណិជ្ជកម្មអង្ករ និងជំរុញកិច្ចសហប្រតិបត្តិការក្នុងឧស្សាហកម្មអាហារហាឡាល់។ បន្ថែមលើនេះ ភាគីទាំង ២ ក៏បានលើកយកពីភាពចាំបាច់ក្នុងការពង្រឹងទំនាក់ទំនងរវាងប្រជាជន និងប្រជាជន តាមរយៈការអប់រំ ទេសចរណ៍ និងជើងហោះហើរត្រង់បន្ថែមទៀត។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ចន្លោះពីខែមករា ដល់ខែវិច្ឆិកា ឆ្នាំ ២០២៤ ការផ្លាស់ប្តូរទំនិញរវាងកម្ពុជា និងឥណ្ឌូនេស៊ី មានទឹកប្រាក់សរុប ១ ០០២,១៦ លានដុល្លារ កើនឡើង ៣,៨ ភាគរយបើធៀបនឹងរយៈពេលដូចគ្នាឆ្នាំ ២០២៣ ក្នុងនោះទំនិញកម្ពុជានាំទៅឥណ្ឌូនេស៊ី មានទឹកប្រាក់ ៨៦,៨៦ លានដុល្លារ កើន ២៣,១ ភាគរយ និងឥណ្ឌូនេស៊ីនាំមកកម្ពុជា ៩១៥,៣ លានដុល្លារ កើន ២,៣ ភាគរយ។ ឥណ្ឌូនេស៊ី គឺជាដៃគូពាណិជ្ជកម្មធំទី ៧ របស់កម្ពុជា បន្ទាប់ពីប្រទេសចិន អាមេរិក វៀតណាម ថៃ ជប៉ុន និងកាណាដា។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី៨ ខែមករាថា ពាណិជ្ជកម្មទ្វេភាគីដែលមានតម្លៃរហូតដល់ជាង ១ ពាន់លានដុល្លារ គឺកើតចេញពីកិច្ចសហប្រតិបត្តិការល្អរវាងរដ្ឋាភិបាលប្រទេសទាំង ២ ក្នុងនាមជាសមាជិកសមាគមអាស៊ាន និងជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់(RCEP)។
លោកបន្តថា ទោះយ៉ាងណាបើគេពិនិត្យទៅលើចំនួនទឹកប្រាក់ទំនិញកម្ពុជានាំទៅឥណ្ឌូនេស៊ី គឺនៅមានតិចតួចបំផុតធៀបនឹងការនាំចូលពីឥណ្ឌូនេស៊ី។
គម្លាតដ៏ធំនេះ គឺដោយសារឥណ្ឌូនេស៊ី ជាប្រទេសធំ មានប្រជាជនច្រើន និងមានខឿនឧស្សាហកម្មរីកច្រើនជាយូរមកហើយ។ បច្ចុប្បន្នប្រទេសឥណ្ឌូនេស៊ី គឺជាបណ្តុំនៃរោងចក្រឧស្សាហកម្មផលិតរថយន្ត គ្រឿងម៉ាស៊ីន និងឧបករណ៍ធំៗ សម្រាប់នាំទៅកាន់បណ្តាប្រទេសក្នុងតំបន់អាស៊ានផងដែរ។
លោកលើកឡើងថា៖«ទោះការនាំចេញទំនិញរបស់កម្ពុជាទៅទីផ្សារអន្តរជាតិនាពេលនេះកំពុងបោះជំហានទៅមុនកាន់តែល្អ ក៏កម្ពុជានៅតែមានភាពចាំបាច់ក្នុងការខិតខំធ្វើពិពិធកម្មទំនិញនាំចេញរបស់ខ្លួនបន្ថែមទៀតដើម្បីអាចឆ្លើយតបនឹងតម្រូវការពីការបញ្ជាទិញ»។
លោកប្រាប់ទៀតថា ដោយសារការប្រមូលផលកសិកម្មនៅកម្ពុជាមានកំណើនជារៀងរាល់ឆ្នាំ ដូច្នេះនេះជាវិស័យអាទិភាពមួយដែលរដ្ឋាភិបាល និងផ្នែកឯកជនត្រូវបង្កើនការយកចិត្តឱ្យកាន់តែខ្លាំងបន្ថែមទៀត ពិសេសទៅលើការកែច្នៃ និងវេចខ្ចប់សម្រាប់នាំចេញ។
កាលពីខែកញ្ញា ឆ្នាំ២០២៣ ប្រទេសឥណ្ឌូនេស៊ី បានប្រកាសទិញអង្ករពីកម្ពុជាចំនួន ២៥០ ០០០តោន ក្នុង ១ឆ្នាំ ដែលជាវិធានការដើម្បីធានាសុវត្ថិភាពស្បៀងអាហារនៅក្នុងប្រទេសរបស់ខ្លួន ខណៈឥណ្ឌូនេស៊ី ក៏បានសន្យានឹងជួយគាំទ្រហេដ្ឋារចនាសម្ព័ន្ធសន្តិសុខស្បៀងអាហារកម្ពុជា តាមរយៈការផ្គត់ផ្គង់ជី និងផ្តល់ការបណ្តុះបណ្តាលដល់ប្រជាកសិករ៕
