វិស័យដឹក​ជញ្ជូន​ទំនិញ​កម្ពុជា​​នឹង​បោះ​ជំហាន​ទៅ​មុខ​កាន់​តែ​លឿន​​បន្ថែម​ទៀត​ បន្ទាប់​ពី​អគ្គនាយកដ្ឋានគយ​និងរដ្ឋាករកម្ពុជា(GDCE)បាន​​ចុះអនុស្សរណៈនៃការយោគយល់គ្នា(MOU) ជាមួយ​ក្រុមហ៊ុន DHL Express (Cambodia) Ltd ស្ដីពីការគ្រប់គ្រងនិងការផ្លាស់ប្ដូរព័ត៌មាន និង​កញ្ចប់បញ្ញើឆាប់រហ័ស។

ពិធី​ចុះ​ហត្ថលេខា​លើ MoU ​បាន​ធ្វើឡើង​រវាង​​លោក គុណ ញឹម អគ្គនាយកនៃអគ្គនាយកដ្ឋានគយ​និងរដ្ឋាករកម្ពុជា ជាមួយ​ លោក Prayag Chitrakar ប្រធានក្រុមហ៊ុន DHL Express (Cambodia) Ltd នៅ​ទីស្នាក់​ការកណ្តាល​របស់ GDCE នាថ្ងៃទី២៧ ខែមីនា ឆ្នាំ២០២៥។

គោល​បំណង​របស់​ MoU នេះ​គឺ​ដើម្បីជំរុញសាមញ្ញាកម្មនីតិវិធីបំពេញបែបបទបញ្ចេញទំនិញពីគយចំពោះកញ្ចប់បញ្ញើរហ័ស បង្កើតតម្លាភាព ប្រសិទ្ធិភាព និងកិច្ចសហប្រតិបត្តិការខ្ពស់រវាងអគ្គនាយកដ្ឋានគយ​និងរដ្ឋាករកម្ពុជា និងក្រុមហ៊ុន DHL Express Cambodia Ltd។

ប្រធាន​ក្រុមហ៊ុន DHL Express Cambodia Ltd លោក Prayag Chitrakar បានបង្ហាញ​ក្តី​រីករាយ​ដែល​បាន​​ចុះ MoU ជាមួយ​​ស្ថាប័ន​គយ និង​រដ្ឋាករកម្ពុជា ខណៈ​​ MoU នេះនឹង​ចូល​រួម​ចំណែក​ជួយ​ជំរុញឱ្យវិស័យដឹកជញ្ជូនបញ្ញើរហ័សនៅ​កម្ពុជា ​កាន់តែមានលក្ខណៈល្អប្រសើរ ឈានទៅប្រែក្លាយកម្ពុជាជា Logistics Hub ក្នុងតំបន់ និងការលើកកម្ពស់ឧត្តមភាពប្រកួតប្រជែងរបស់កម្ពុជា​​ក្នុងវិស័យឡូជីស្ទិក។


លោក គុណ ញឹម បានលើក​ឡើង​ថា MoU នេះ​គឺជាវឌ្ឍនភាពថ្មីមួយទៀត​ក្នុងការពង្រីកកិច្ចសហប្រតិបត្តិការជាមួយក្រុមហ៊ុន DHL Express (Cambodia) Ltd ដើម្បីលើកកម្ពស់កិច្ចសម្រួលពាណិជ្ជកម្ម, ការកែលម្អបរិយាកាសធុរកិច្ច និងវិនិយោគនៅកម្ពុជា ក៏ដូចជាចូលរួមចំណែកជាមួយរាជរដ្ឋាភិបាល​ក្នុងការអភិវឌ្ឍសេដ្ឋកិច្ចជាតិ។ កិច្ចការទាំងនេះ​នឹងធ្វើឱ្យដំណើរការនៃការបំពេញបែបបទបញ្ចេញទំនិញពីគយ ​កាន់តែមានភាពងាយស្រួល ឆាប់រហ័ស និងប្រកបដោយអនុលោមភាព។

យោង​តាម DHL Express (Cambodia) Ltd ខ្លឹមសារសំខាន់ៗរបស់ MoU មាន​ដូច​ជា ការពង្រឹងកិច្ចសហការរវាង GDCE និង DHL ក្នុងការតភ្ជាប់ប្រព័ន្ធស្វ័យប្រវត្តិកម្ម និងការផ្លាស់ប្តូរទិន្នន័យអេឡិចត្រូនិក, ការកាត់បន្ថយតម្រូវការឯកសារអមភ្ជាប់ប្រតិវេទន៍គយ, ការកាត់បន្ថយបន្ទុកនៃការបញ្ចូលទិន្នន័យប្រតិវេទន៍គយ, និង​ការកែលម្អមុខងារគ្រប់គ្រងហានិភ័យ និងការរៀបចំឱ្យមានបណ្ដាញទំនាក់ទំនងរបស់ GDCE និង DHL ជាដើម។

នា​ពេល​កន្លងមក អគ្គនាយកដ្ឋានគយ និងរដ្ឋាករកម្ពុជា ធ្លាប់បានចុះអនុស្សរណៈនៃការយោគយល់គ្នាជាមួយស្ថាប័ន ឬក្រុមហ៊ុនមួយចំនួន ដូចជា សមាគមអេឡិចត្រូនិច និងបច្ចេកវិទ្យាកម្ពុជា (CETA), ក្រុមហ៊ុន Chip Mong Insee Cement Corporation និងជាពិសេសគឺ MOU ជាមួយប្រៃសណីយ៍កម្ពុជា លើកិច្ចសហការផ្លាស់ប្តូរ​ព័ត៌មានកញ្ចប់បញ្ញើ​ប្រៃសណីយ៍ សំដៅផ្ដល់កិច្ចសម្រួលបន្ថែមទៀត ក៏ដូចជាលើកកម្ពស់អនុលោមភាព នៃការបំពេញបែបបទបញ្ចេញទំនិញពីគយ។

ប្រធានសមាគមភស្តុភារកម្មកម្ពុជា លោក ស៊ិន ចន្ធី ដែលបាន​​ចូល​រួម​ក្នុង​ពិធី​ចុះ MoU ខាង​លើ​បាន​ប្រាប់​ភ្នំពេញ​ប៉ុស្តិ៍​ក្នុង​ថ្ងៃ​ទី​២៧ ខែមីនា ថា MoU នេះ​នឹង​ចូល​រួម​ចំណែក​ក្នុង​ការ​​ជួយ​ជំរុញ និង​លើក​កម្ពស់​​ប្រសិទ្ធភាព​នៃ​វិស័យ​ដឹក​ជញ្ជូននៅ​កម្ពុជា​ឱ្យ​កាន់​តែ​ប្រសើរ​បន្ថែម​ទៀត។

MoU នេះ​ក៏​ចែង​ពី​ការ​​​​ចែក​រំឡែកព័ត៌មាន​ និង​ការ​អភិវឌ្ឍប្រព័ន្ធ​ព័ត៌មាន​វិទ្យា ដើម្បី​ធ្វើ​ឱ្យ​រយៈ​ពេល​នៃ​ការ​ដឹក​ជញ្ជូន​ទំនិញ​កាន់​តែ​​ឆាប់​រហ័ស និង​មាន​ប្រសិទ្ធភាព​ខ្ពស់​ជាង​មុន។

លោក​បាន​ថ្លែង​ថា៖​«​MoU នេះ​នឹង​ចូល​រួម​ចំណែក​ក្នុង​ការ​​បង្កើនប្រសិទ្ធភាព និង​ភាព​ឆាប់​រហ័ស​នៃ​ការ​ដឹក​ជញ្ជូន​ទំនិញ​រវាង​កម្ពុជា​ជា​មួយ​ប្រទេស​នានា​កាន់​តែ​ប្រសើរ​ជាង​មុន»។

ទិន្នន័យ​របស់​រដ្ឋលេខាធិការដ្ឋាន​អាកាសចរណ៍​ស៊ីវិល​កម្ពុជា ​ឱ្យ​ដឹង​ថា កាលពី​ឆ្នាំ២០២៤ ការដឹកជញ្ជូនតាមផ្លូវអាកាសរបស់កម្ពុជាមានកំណើនជាវិជ្ជមានល្អ។ ក្នុងនោះ ការដឹកជញ្ជូនអ្នកដំណើរតាមផ្លូវអាកាសមានចំនួន ៦,២៤ លាននាក់ កើនឡើង ២២ភាគរយ។ ជាមួយគ្នានេះ ការដឹកទំនិញតាមផ្លូវអាកាសមានចំនួន ៧៧ ៨៥២ តោន កើន​ ៤០ភាគរយ បើធៀបឆ្នាំ២០២៣៕