សកម្មភាពកម្មករដេរសម្លៀកបំពាក់នៅរោងចក្រមួយកន្លែងក្នុងរាជធានីភ្នំពេញ។ សម្លៀកបំពាក់ គឺជាទំនិញសក្តានុពលរបស់កម្ពុជាសម្រាប់នាំទៅទីផ្សារអាមេរិក។ STPM
អនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ មានសុទិដ្ឋិនិយមថា កម្ពុជានឹងទទួលបានលទ្ធផលល្អនៅពេលមានជំនួបចរចាជាមួយភាគីអាមេរិកទាក់ទងនឹងការកំណត់អត្រាពន្ធគយថ្មី ដែលរដ្ឋាភិបាលប្រធានាធិបតី Donald J. Trump គ្រោងយកពីកម្ពុជាក្នុងអត្រា ៤៩ភាគរយ ដែលជាអត្រាពន្ធខ្ពស់ជាងគេក្នុងតំបន់អាស៊ាន។
កាលពីថ្ងៃទី៣ ខែមេសា ឆ្នាំ២០២៥ រដ្ឋបាលអាមេរិកដែលដឹកនាំដោយ លោក Donald J. Trump បានប្រកាសដំឡើងពន្ធលើទំនិញនាំចូលពីប្រទេសកម្ពុជា រហូតដល់ ៤៩ ភាគរយ ដើម្បីឆ្លើយតបទៅនឹងអតុល្យភាពនៃជញ្ជីងពាណិជ្ជកម្មទំនិញជាមួយកម្ពុជា។ នៅពេលនោះអាមេរិក បានប្រកាសថា នឹងចាប់ផ្តើមអនុវត្តន៍ពីថ្ងៃទី៩ ខែមេសា តទៅ។
ទោះយ៉ាងណា នៅពេលវេលាកំណត់ចូលមកដល់រដ្ឋាភិបាលអាមេរិក ក៏បានសម្រេចព្យួរការអនុវត្តពន្ធគយបដិការ(Reciprocal Tariffs)របស់ខ្លួន មកត្រឹមអត្រា ១០ភាគរយក្នុងរយៈពេល ៩០ ថ្ងៃសម្រាប់គ្រប់ប្រទេសទាំងអស់ដែលបានស្នើសុំចរចាស្វែងរកដំណោះស្រាយជាមួយអាមេរិក ក្នុងនោះក៏រួមមានកម្ពុជាផងដែរ។ ដូចនេះអត្រាពន្ធគយបដិការ ៤៩ភាគរយសម្រាប់កម្ពុជា នឹងអនុវត្តត្រឹមអត្រា ១០ភាគរយតែប៉ុណ្ណោះ។
ក្រសួងពាណិជ្ជកម្មកម្ពុជា នាព្រឹកថ្ងៃទី១០ ខែមេសា បានចេញសេចក្តីប្រកាសព័ត៌មានរបស់ខ្លួនដោយលើកឡើងថា រាជរដ្ឋាភិបាលកម្ពុជាដែលមានក្រសួងពាណិជ្ជកម្ម និងក្រសួង-ស្ថាប័នពាក់ព័ន្ធជាសេនាធិការ បាននិងកំពុងបន្តផ្តល់ការយកចិត្តទុកដាក់តាមដានការវិវត្តនៃការអនុវត្តពន្ធគយបដិការ(Reciprocal Tariffs) របស់អាមេរិក និងត្រៀមរៀបចំយន្តការស្វែងរកដំណោះស្រាយសមស្របជាមួយអាមេរិក។
ក្រសួងបានឱ្យដឹងទៀតថា សម្រាប់វឌ្ឍនភាពចុងក្រោយលើការអនុវត្តពន្ធគយបដិការ គឺលោកប្រធានាធិបតី Donald J. Trump បានប្រកាសព្យួរការអនុវត្តពន្ធគយបដិការរបស់ខ្លួនមកត្រឹមអត្រា ១០ភាគរយក្នុងរយៈពេល ៩០ថ្ងៃសម្រាប់គ្រប់ប្រទេសទាំងអស់ដែលបានស្នើសុំចរចាស្វែងរកដំណោះស្រាយជាមួយអាមេរិក ក្នុងនោះរួមមានកម្ពុជាផងដែរ។
ក្រសួងបានឱ្យដឹងទៀតថា រាជរដ្ឋាភិបាលទទួលបានចម្លើយជាវិជ្ជមានពីភាគីអាមេរិកលើសំណើសុំបើកការចរចាស្វែងរកដំណោះស្រាយរួមបន្ទាប់ពីរាជរដ្ឋាភិបាលបានដាក់ចេញនូវការឆ្លើយតបភ្លាមៗ តាមរយៈលិខិតរបស់លោកនាយករដ្ឋមន្ត្រី លោក ហ៊ុន ម៉ាណែត និងលិខិតរដ្ឋមន្ត្រីក្រសួងពាណិជ្ជកម្ម លោកស្រី ចម និម្មល ចុះថ្ងៃទី៤ ខែមេសា ឆ្នាំ២០២៥ ដោយបង្ហាញពីសុច្ឆន្ទៈស្នើសុំបើកការចរចាស្វែងរកដំណោះស្រាយរួម និងបញ្ចុះពន្ធគយពីអាត្រា ៣៥ភាគរយ មកត្រឹម ៥ភាគរយលើ ១៩ ក្រុមមុខទំនិញរបស់អាមេរិកនាំចូលមកកម្ពុជា។
បន្ថែមពីលើនេះ កម្ពុជាក៏បានបង្កើតក្រុមការងារអន្តរក្រសួង-ស្ថាប័នចំពោះកិច្ច ដឹកនាំដោយ លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា សម្រាប់បើកការចរចាជាមួយអាមេរិកផងដែរ។
បន្ថែមពីលើនេះ រាជរដ្ឋាភិបាលកម្ពុជា នាថ្ងៃទី១០ ខែមេសា ក៏បានចេញសេចក្តីសម្រេចមួយស្តីពីការបង្កើតក្រុមការងារចំពោះកិច្ចសម្របសម្រួលទំនាក់ទំនងពាណិជ្ជកម្ម និងវិនិយោគទ្វេភាគីកម្ពុជា-អាមេរិក ដែលដឹកនាំដោយលោកឧបនាយករដ្ឋមន្ត្រី ស៊ុន ចាន់ថុល។
សេចក្តីសម្រេចបានបញ្ជាក់ថា៖«ក្រុមការងារចំពោះកិច្ច មានភារកិច្ចសម្របសម្រួល ចរចា និងជំរុញទំនាក់ទំនងពាណិជ្ជកម្មទ្វេភាគីកម្ពុជា-អាមេរិក, សម្របសម្រួល និងជំរុញការវិនិយោគរបស់អាមេរិកនៅកម្ពុជា, សហការសម្របសម្រួលជាមួយក្រសួង ស្ថាប័នពាក់ព័ន្ធ ស្ថានទូតនៃព្រះរាជាណាចក្រកម្ពុជាប្រចាំសហរដ្ឋអាមេរិក និងសភាពាណិជ្ជកម្មសហរដ្ឋអាមេរិកប្រចាំនៅកម្ពុជា»។
អ្នកសេដ្ឋកិច្ច និងជាអនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ បានប្រាប់ភ្នំពេញប៉ុស្តិ៍នៅថ្ងៃទី១០ ខែមេសា ថា ការប្រកាសរបស់រដ្ឋាភិបាលអាមេរិកស្តីពីការដំឡើងពន្ធទំនិញនាំចូលអាមេរិក គឺធ្វើឡើងក្នុងគោលបំណងមួយចំនួនដូចជា កាត់បន្ថយឱនភាពជញ្ជីងពាណិជ្ជកម្មរបស់អាមេរិកជាមួយប្រទេសដៃគូ, ចង់ទាក់ទាញឱ្យរោងចក្រចូលទៅបើកដំណើរការផ្ទាល់នៅអាមេរិក, ការបង្កើតការងារសម្រាប់ប្រជាជនអាមេរិក, និងការចង់ដឹងពីនិន្នាការនយោបាយនៃបណ្តាប្រទេសនានាចំពោះសហរដ្ឋអាមេរិក។
លោកបន្តថា អស់រយៈពេលជាយូរមកហើយដែលជញ្ជីងពាណិជ្ជកម្មអន្តរជាតិរបស់អាមេរិក បង្ហាញពីឱនភាពជាមួយនឹងប្រទេសជាច្រើនលើពិភពលោក។
លោកនិយាយថា៖«ការដាក់ចេញគោលនយោបាយផ្នែកពន្ធគយរបស់អាមេរិក ក៏មានបំណងចង់ឱ្យប្រទេសនីមួយៗបង្កើនការទិញទំនិញផលិតនៅអាមេរិកឱ្យកាន់តែច្រើន។ ប្រទេសណាបញ្ចុះអត្រាពន្ធសម្រាប់ទំនិញអាមេរិក គឺអាមេរិកនឹងបញ្ចុះអត្រាពន្ធដែរ»។
លោកប្រាប់ទៀតថា ក្នុងនាមជាប្រទេសកំពុងអភិវឌ្ឍន៍ រដ្ឋាភិបាលកម្ពុជាបាននិងកំពុងខិតខំយ៉ាងខ្លាំងក្នុងការសម្របសម្រួលជាមួយរដ្ឋាភិបាលអាមេរិកលើកិច្ចការចរចាលើបញ្ហាពន្ធ។ កម្ពុជា ក៏បានបង្ហាញឆន្ទះក្នុងការបញ្ចុះអត្រាពន្ធគយយ៉ាងច្រើនផងដែរសម្រាប់ទំនិញអាមេរិក។
លោកបន្ថែមថា នៅពេលខាងមុខ កម្ពុជាក៏គួរតែគិតគូរពីការរៀបចំកិច្ចព្រមព្រៀងពាណិជ្ជកម្មសេរីទ្វេភាគីជាមួយអាមេរិកផងដែរ ដើម្បីមានភាពងាយស្រួលក្នុងការចរចាលើបញ្ហាពាណិជ្ជកម្ម ជាជាងការចរចាលក្ខណៈត្រីភាគី ឬពហុភាគី។
លោកបញ្ជាក់ថា៖«ខ្ញុំគិតថារដ្ឋាភិបាលកម្ពុជា គួរតែខិតខំជំរុញបង្កើតឱ្យមានកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-អាមេរិក ជាជាងកាប្រើប្រាស់យន្តការចរចាបែបត្រីភាគី ឬពហុភាគី»។ លោកបន្តថា៖«ខ្ញុំមានជំនឿថា ការចរចារវាងរដ្ឋាភិបាលកម្ពុជា ជាមួយអាមេរិកនាពេលខាងមុខនឹងទទួលបានលទ្ធផលល្អប្រសើរខ្លាំង»។
បើតាមលោក វិចិត្រ ការប្រកាសដំឡើងពន្ធគយចំពោះទំនិញនាំចូលទីផ្សារអាមេរិកពីប្រទេសនានា ក៏អាចជួយឱ្យរដ្ឋាភិបាលអាមេរិកមើលឃើញពីប្រតិកម្មនៃកិច្ចសហប្រតិបត្តិការជាអន្តរជាតិរបស់អាមេរិកជាមួយនឹងប្រទេសនានាផងដែរ ខណៈបច្ចុប្បន្នមានប្រទេសមួយចំនួនន រួមទាំងប្រទេសក្នុងតំបន់អាស៊ានខ្លះកំពុងនាំគ្នាគិតគូរពីការចូលរួមជាសមាជិកនៃប្លុកក្រុមប្រទេស BRICS ដែលមាន ប្រទេសប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង ជាស្ថាបនិក។
ទិន្នន័យពាណិជ្ជកម្មអន្តរជាតិរបស់កម្ពុជា ដែលកត់ត្រាដោយអគ្គនាយកដ្ឋានគយ និងរដ្ឋាករកម្ពុជា(GDCE) បង្ហាញថា ក្នុងឆ្នាំ ២០២៤ ការនាំចេញ នាំចូលទំនិញទ្វេភាគីកម្ពុជា-អាមេរិក មានទឹកប្រាក់សរុប ១០,១៨ ពាន់លានដុល្លារ កើនឡើង ១១,២ ភាគរយបើធៀបនឹងឆ្នាំ ២០២៣។ ក្នុងចំនួននេះ គឺកម្ពុជានាំទៅអាមេរិក ៩,៩២ ពាន់លានដុល្លារ កើន ១១,៤ ភាគរយ ចំណែកទំនិញអាមេរិកនាំចូលវិញ មានចំនួន ២៦៤,១៥ លានដុល្លារ កើន ២,៧ ភាគរយ។
អាមេរិក គឺជាទីផ្សារទទួលទិញទំនិញពីកម្ពុជាច្រើនជាងគេ ដោយគ្រប់គ្រងចំណែកទីផ្សាររហូតដល់ ៣៧,៩ភាគរយ តាមពីក្រោយដោយវៀតណាម ១៣,៨ ភាគរយ ប្រទេសចិន ៦,៧ ភាគរយ និងប្រទេសជប៉ុន ៥,៤ ភាគរយ។ ភាគច្រើនលើសលប់នៃទំនិញកម្ពុជានាំទៅទីផ្សារអាមេរិក គឺជាផលិតផលសម្លៀកបំពាក់ កាបូបធ្វើដំណើរ និងស្បែកជើង៕
