ជំនួបពិភាក្សារវាងថ្នាក់ដឹកនាំ CDC ជាមួយថ្នាក់ដឹកនាំក្រុមហ៊ុន Regional Fish Institute, Ltd។ CDC
ក្រុមហ៊ុនជប៉ុន Regional Fish Institute, Ltd ដែលមានជំនាញឯកទេសលើកិច្ចការវារីវប្បកម្ម(Aquaculture) បានបង្ហាញការចាប់អារម្មណ៍ចំពោះវិស័យវារីវប្បកម្មនៅកម្ពុជា និងបានស្នើសុំការណែនាំពីថ្នាក់ដឹកនាំនៃក្រុមប្រឹក្សាអភិវឌ្ឍន៍កម្ពុជា(CDC) លើកិច្ចការនេះផងដែរ។
នៅក្នុងជំនួបជាមួយលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងតំណាងក្រសួងកសិកម្ម រុក្ខាប្រមាញ់ និងនេសាទ នៅទីស្តីការ CDC កាលពីថ្ងៃទី១ ខែមេសា លោក Shun Ishimoto នាយកប្រតិបត្តិនៃក្រុមហ៊ុន(អាជីវកម្មក្រៅប្រទេស) និងជាប្រធានផ្នែកប្រតិបត្តិការ និងផ្នែកផលិតកម្មក្រុមហ៊ុន Regional Fish Institute, Ltd បានលើកឡើងថា ក្រុមហ៊ុនលោកកំពុងចាប់អារម្មណ៍យ៉ាងខ្លាំងចំពោះឱកាសវិនិយោគនៅកម្ពុជា។
លោកបន្តថា Regional Fish Institute, Ltd. គឺជាក្រុមហ៊ុនដែលមានជំនាញឯកទេសលើកិច្ចការវារីវប្បកម្ម(Aquaculture) ដោយប្រើប្រាស់បច្ចេកវិទ្យាជីវសាស្រ្តជាន់ខ្ពស់(Bio-Technology) ដើម្បីលើកកម្ពស់ផលិតភាព។
ជាមួយគ្នានេះក្រុមហ៊ុនក៏មានជំនាញក្នុងការស្រាវជ្រាវ និងច្នៃបង្កើតពូជថ្មីៗ ព្រមទាំងការបង្កើនស្តង់ដារគុណភាពជលផលដែលផលិតបានដើម្បីបំពេញតម្រូវការក្នុងស្រុក និងនាំចេញទៅទីផ្សារអន្តរជាតិទៀតផង។
លោកថ្លែងថា៖«ក្រុមហ៊ុនមានគោលដៅក្នុងការសិក្សាស្រាវជ្រាវ ការផ្ទេរបច្ចេកវិទ្យា និងការផ្សព្វផ្សាយព័ត៌មានអំពីកិច្ចការវារីវប្បកម្មតាមបែបវិទ្យាសាស្រ្តទំនើប ដោយផ្តោតលើទិដ្ឋភាពផ្សេងៗគ្នានៅក្នុងតំបន់ដើម្បីជំរុញនិរន្តរភាពលើវិស័យមួយនេះក្នុងប្រទេសកម្ពុជា»។
ជាការឆ្លើយតប លោក ស៊ុន ចាន់ថុល បានសម្តែងការស្វាគមន៍ចំពោះថ្នាក់ដឹកនាំក្រុមហ៊ុន Regional Fish និងបានណែនាំឱ្យក្រុមហ៊ុនធ្វើការសិក្សាស្រាវជ្រាវ និងស្វែងយល់បន្ថែមអំពីទិដ្ឋភាពទូទៅនៃកិច្ចការវារីវប្បកម្មតាមបច្ចេកវិទ្យាជីវសាស្រ្តជាន់ខ្ពស់នេះ ជាមួយនឹងស្ថាប័នជំនាញពាក់ព័ន្ធ ពិសេសគឺក្រសួងកសិកម្ម រុក្ខាប្រមាញ់ និងនេសាទ ដើម្បីឱ្យសមស្របតាមបទដ្ឋានពាក់ព័ន្ធនានា និងបង្ការការពារផលប៉ះពាល់ណាមួយដល់ប្រព័ន្ធជីវៈចម្រុះរបស់កម្ពុជាដែលមានស្រាប់។
របាយការណ៍ក្រសួងពាណិជ្ជកម្ម ឱ្យដឹងថា ចន្លោះពីខែមករា ដល់ខែវិច្ឆិកា ឆ្នាំ ២០២៤ មានក្រុមហ៊ុន/សហគ្រាសជប៉ុនចំនួន ៨៨ បានចុះបញ្ជីពាណិជ្ជកម្មនៅកម្ពុជា ដោយកើនឡើង ២០,៥៥ ភាគរយបើធៀបនឹងរយៈពេលដូចគ្នាឆ្នាំ ២០២៣។
ក្រសួងពាណិជ្ជកម្មបានឱ្យដឹងថា កិច្ចសហប្រតិបត្តិការពាណិជ្ជកម្មទ្វេភាគីកម្ពុជា-ជប៉ុន គឺមានភាពល្អប្រសើរ ដោយក្នុងឆ្នាំ២០២៤ នេះភាគីទាំង ២ បានជួបពិភាក្សាគ្នាជាច្រើន ជាពិសេសក្រសួងពាណិជ្ជកម្មបានចូលរួមប្រជុំពិភាក្សាលើការងារពាណិជ្ជកម្មកម្ពុជា-ជប៉ុន ក្រោមប្រធានបទ«ធុរកិច្ចឥណទានកាបូន និងបរិយាកាសវិនិយោគនៅកម្ពុជា»។
បច្ចុប្បន្នការវិនិយោគរបស់ជប៉ុននៅកម្ពុជាមាននៅក្នុងវិស័យជាច្រើនដូចជា សំណង់ អចលនទ្រព្យ សណ្ឋាគារ ទេសចរណ៍ រោងចក្រដំឡើងយានយន្ត រោងចក្រកែច្នៃផលិតផលកសិកម្ម កសិ-ឧស្សាហកម្ម ចំណីអាហារ ការដាំដុះដំណាំ គ្រឿងបង្គុំអេឡិចត្រូនិក-អគ្គិសនី និងផ្សារទំនើបជាដើម។
អនុរដ្ឋមន្ត្រីការបរទេសជប៉ុន លោកស្រី ERI Arfiya ក្នុងជំនួបជាមួយនាយករដ្ឋមន្ត្រីកម្ពុជា លោក ហ៊ុន ម៉ាណែត នៅក្នុងខេត្តសៀមរាប កាលពីថ្ងៃទី២៥ ខែវិច្ឆិកា បានសន្យាថា នឹងខិតខំជំរុញកិច្ចសហប្រតិបត្តិការផ្នែកនយោបាយ និងពាណិជ្ជកម្មជាមួយកម្ពុជាឱ្យកាន់តែរឹងមាំបន្ថែមទៀត ខណៈចំនួនវិនិយោគិនជប៉ុនដែលមកបណ្តាក់ទុននៅកម្ពុជា កំពុងបកើនឡើងជាបន្តបន្ទាប់។
លោកស្រី ERI Arfiya បានថ្លែងថា៖«ភាពជាដៃគូ និងកិច្ចសហប្រតិបត្តិការ ព្រមទាំងការកសាងទំនុកចិត្តរវាងរដ្ឋាភិបាលជប៉ុន និងកម្ពុជា មិនត្រឹមតែបន្តរក្សាប៉ុណ្ណោះទេ ប៉ុន្តែនឹងបន្តពង្រឹង និងពង្រីកបន្ថែមទៀត»។
ដើម្បីជំរុញពាណិជ្ជកម្មទ្វេភាគីឱ្យកាន់តែសកម្ម កាលពីថ្ងៃទី១៩ ខែវិច្ឆិកា សមាគមឧកញ៉ាកម្ពុជា សហការជាមួយសមាគមជប៉ុន-កម្ពុជា បានរៀបចំ«ជំនួបផ្គូផ្គងធុរកិច្ចរវាងសមាគមឧកញ៉ាកម្ពុជា និងសមាគមជប៉ុន-កម្ពុជា ២០២៤»។
ក្នុងឆ្នាំ ២០២៤ ការនាំទំនិញចេញ-ចូលរវាងកម្ពុជា និងជប៉ុន មានទឹកប្រាក់សរុប ២,១៦ ពាន់លានដុល្លារ កើនឡើង ២០,១ ភាគរយបើធៀបឆ្នាំ២០២៣ ក្នុងនោះកម្ពុជានាំទៅជប៉ុន ១,៤១ ពាន់លានដុល្លារ កើន ១៩,៨ ភាគរយ និងជប៉ុននាំមកកម្ពុជា ៧៥២,៥៦ លានដុល្លារ កើន ២០,៧ ភាគរយ។ នេះបើតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា((GDCE)៕
