បុរសម្នាក់កំពុងចូលគេហទំព័រដើម្បីចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន។ ភ្នំពេញប៉ុស្តិ៍
កម្ពុជាកំពុងខិតខំបង្កើនសក្តានុពលទាក់ទាញវិនិយោគិនជាតិ និងអន្តរជាតិឱ្យមកបណ្តាក់ទុនផ្ទាល់ និងចាប់ដៃគូធ្វើពាណិជ្ជកម្មជាមួយវិនិយោគិនក្នុងស្រុកកាន់តែច្រើន តាមរយៈការប្រកាសដាក់ឱ្យអនុវត្តជាផ្លូវការនូវយុទ្ធសាស្ត្រថ្មីៗជាបន្តបន្ទាប់។
«យុទ្ធសាស្ត្រស្ដីពីការអភិវឌ្ឍសេវាអេឡិចត្រូនិកសម្រាប់ធុរកិច្ចឆ្នាំ ២០២៥-២០២៨» ត្រូវបានប្រកាសដាក់ឱ្យអនុវត្តជាផ្លូវការកាលពីព្រឹកថ្ងៃទី២៣ ខែមេសា ឆ្នាំ ២០២៥ នៅសណ្ឋាគារ Hyatt Regency ដោយ លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការសេដ្ឋកិច្ច និងធុរកិច្ចឌីជីថល។
Permanent Vice-Chairman
លោក អូន ព័ន្ធមុនីរ័ត្ន បានលើកឡើងថា បច្ចេកវិទ្យាឌីជីថលកំពុងចូលរួមយ៉ាងសកម្មនៅគ្រប់សកម្មភាពសង្គម និងសេដ្ឋកិច្ចនៅស្ទើរគ្រប់ប្រទេសលើពិភពលោក រួមទាំងកម្ពុជា។ បច្ចេកវិទ្យាឌីជីថល បានក្លាយជាកត្តាលីករក្នុងការជំរុញកំណើន និងការពង្រឹងភាពធន់នៃសេដ្ឋកិច្ចដែលមិនអាចមើលរំលងបាន។
លោកបានថ្លែងថា៖«សម្រាប់វិស័យឯកជនការចាប់យក និងការប្រើប្រាស់បច្ចេកវិទ្យាឌីជីថល គឺជាឧត្តមភាពមួយថ្មីដែលបានចូលរួមជួយលើកកម្ពស់ប្រសិទ្ធភាពការងារ កាត់បន្ថយថ្លៃដើម តភ្ជាប់ខ្សែច្រវាក់ផលិតកម្ម និងធានានូវភាពប្រកួតប្រជែងក្នុងទីផ្សារ»។
បើតាមលោក ព័ន្ធមុនីរ័ត្ន បច្ចេកវិទ្យាឌីជីថល ក៏កំពុងដើរតួនាទីសំខាន់ក្នុងវិស័យសារធារណៈផងដែរ តាមរយៈការតភ្ជាប់ និងផ្តល់ទិន្នន័យឱ្យគ្នាទៅវិញទៅមក ដែលវាបានជួយកាត់បន្ថយភាពស្មុគស្មាញនៃការិយាធិបតេយ្យ ការបង្កើនប្រសិទ្ធភាពនៃរដ្ឋបាលសាធារណៈ ពង្រឹង អនុលោមភាព និងកែលម្អបរិយាកាសធុរកិច្ចនៅកម្ពុជាឱ្យកាន់តែប្រសើរ។
តាមរយៈពិធីប្រកាសដាក់ឱ្យអនុវត្តជាផ្លូវការនូវ «យុទ្ធសាស្ត្រស្ដីពី ការអភិវឌ្ឍសេវាអេឡិចត្រូនិកសម្រាប់ធុរកិច្ចឆ្នាំ ២០២៥-២០២៨» លោក អូន ព័ន្ធមុនីរ័ត្ន ក៏បានដាក់ចេញនូវអនុសាសន៍បន្ថែមចំនួន ៦ ដែលមានដូចជា ទី១ ក្រសួង-ស្ថាប័នត្រូវសហការជិតស្និទ្ធជាមួយគណៈកម្មាធិការសេដ្ឋកិច្ច និងធុរកិច្ចឌីជីថល ក៏ដូចជាគណៈកម្មាធិការកែទម្រង់រដ្ឋបាលសាធារណៈ ក្នុងការធ្វើអាទិភាវូបនីយកម្មសេវាសាធារណៈ ដើម្បីបញ្ចូលជាសេវាអេឡិចត្រូនិកសម្រាប់ធុរកិច្ច និងត្រូវពិនិត្យឡើងវិញនូវសេវាពាក់ព័ន្ធទាំងឡាយ ក្នុងគោលដៅកែសម្រួលនីតិវិធីស្នើសុំសេវា, កែសម្រួលកម្រៃសេវា, និងពិនិត្យលទ្ធភាពលុបចេញ ឬផ្គួបចូលគ្នានូវសេវាទាំងឡាយណាដែលមានលក្ខណៈប្រហាក់ប្រហែលគ្នា ឬមិនមានតម្លៃបន្ថែមខ្ពស់ ដើម្បីធានាប្រសិទ្ធភាពនៃការផ្តល់ និងការទទួលសេវា, ទី២ ក្រសួង-ស្ថាប័ន ត្រូវសហការជាមួយលេខាធិការដ្ឋាននៃក្រុមការងារអន្តរក្រសួងរៀបចំសេវាអេឡិចត្រូនិកសម្រាប់ធុរកិច្ច និងគណៈកម្មាធិការរដ្ឋាភិបាលឌីជីថលក្នុងការរៀបចំប្រព័ន្ធបច្ចេកវិទ្យាព័ត៌មានសម្រាប់ផ្តល់សេវាអេឡិចត្រូនិក តាមគោលការណ៍ណែនាំបច្ចេកទេស, និងទី៣ ក្រសួង-ស្ថាប័ន ដែលគ្រប់គ្រងទិន្នន័យគោល ត្រូវរៀបចំ និងធ្វើទំនើបកម្មប្រព័ន្ធគ្រប់គ្រងទិន្នន័យគោល ព្រមទាំងចែករំលែកទិន្នន័យគោលទាំងនោះទៅក្នុង«ប្រព័ន្ធអេកូឡូស៊ីឌីជីថលសម្រាប់ធុរកិច្ច»តាមរយៈថ្នាល CamDX ដើម្បីកាត់បន្ថយការបញ្ចូលទិន្នន័យដដែលៗ កាត់បន្ថយការភ្ជាប់ឯកសារតម្រូវដែលមិនចាំបាច់ និងបង្កើនគុណភាពនៃទិន្នន័យតាមរយៈការផ្ទៀងផ្ទាត់ទិន្នន័យ។
ចំណែកចំណុចទី៤ គឺក្រសួងសេដ្ឋកិច្ច និង ហិរញ្ញវត្ថុ, ក្រសួងប្រៃសណីយ៍ និងទូរគមនាគមន៍ និងធនាគារជាតិនៃកម្ពុជា ដែលកំពុងគ្រប់គ្រងហេដ្ឋារចនាសម្ព័ន្ធសាធារណៈឌីជីថល មានជាអាទិ៍ ថ្នាល CamDigiKey, CamDX, Bakong, និង Verify.gov.kh, ត្រូវបន្តពង្រឹង និងធ្វើទំនើបកម្មថ្នាលឌីជីថលទាំងនេះជាប្រចាំដើម្បីគាំទ្រដល់ការតភ្ជាប់ និងអន្តរប្រតិបត្តិការនៃប្រព័ន្ធបច្ចេកវិទ្យាព័ត៌មាន សំដៅធានាសុវត្ថិភាព និងប្រសិទ្ធភាពនៃ«ប្រព័ន្ធអេកូឡូស៊ីឌីជីថលសម្រាប់ធុរកិច្ច»,ទី៥ ក្រសួង-ស្ថាប័ន ក្រោមការដឹកនាំសម្របសម្រួលរបស់គណៈកម្មាធិការកែទម្រង់រដ្ឋបាលសាធារណៈ និងគណៈកម្មាធិការរដ្ឋាភិបាលឌីជីថល ត្រូវរៀបចំផែនការអភិវឌ្ឍសមត្ថភាពមន្ត្រីប្រតិបត្តិដែលទទួលបន្ទុកផ្ដល់សេវាអេឡិចត្រូនិកសម្រាប់ធុរកិច្ច ដើម្បីពង្រឹងសមត្ថភាព និងការសម្របខ្លួនរបស់មន្រ្តីទទួលបន្ទុកទៅនឹងនីតិវិធីការងារថ្មី លើកកម្ពស់គុណភាពសេវា និងបង្កើនភាពជឿទុកចិត្ត ពីសំណាក់វិស័យឯកជន, និងទី៦ ក្រសួង ស្ថាប័ន ត្រូវចូលរួមរៀបចំ និងពង្រឹងយន្តការផ្សព្វផ្សាយព័ត៌មានអំពីសេវាអេឡិចត្រូនិករបស់ខ្លួនឱ្យបានទូលំទូលាយជូនដល់ធុរជន។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ភ្នំពេញប៉ស្តិ៍ក្នុងថ្ងៃទី២៣ ខែមេសា ថា ការដាក់ឱ្យដំណើរការជាផ្លូវការនូវ«យុទ្ធសាស្ត្រស្ដីពីការអភិវឌ្ឍសេវាអេឡិចត្រូនិកសម្រាប់ធុរកិច្ចឆ្នាំ ២០២៥-២០២៨» គឺនឹងនាំមកនូវផលវិជ្ជមានច្រើនសម្រាប់ធុរជន ព្រោះវាអាចជួយកាត់បន្ថយការចំណាយមិនចាំបាច់ កាត់បន្ថយការិយាធិបតេយ្យ ដែលនឹងជួយសម្រួលឱ្យអ្នកវិនិយោគមានភាពងាយស្រួលជាងមុន។
លោកបានថ្លែងថា៖«ការធ្វើឱ្យកាន់តែទំនើប និងការប្រើប្រាស់កាន់តែទូលំទូលាយនៃប្រព័ន្ធអេឡិចត្រូនិក នឹងចូលរួមចំណែកយ៉ាងច្រើនក្នុងការទាក់ទាញអ្នកវិនិយោគឱ្យចូលមកបណ្តាក់ទុនកាន់តែច្រើន។ យុទ្ធសាស្រ្តនេះក៏ដើរស្របទៅនឹងការវិវឌ្ឍនៃពិភពលោកផងដែរ»។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក គង់ ម៉ារី បានឱ្យដឹងថា នារយៈពេលជាង ៤ ឆ្នាំចុងក្រោយ រាជរដ្ឋាភិបាលកម្ពុជាបានបន្តយកចិត្តទុកដាក់ខ្ពស់ក្នុងការជំរុញ និងលើកកម្ពស់ការធ្វើឌីជីថលលូបនីយកម្មសេវាសាធារណៈ សំដៅបង្កបរិយាកាសអំណោយផលដល់ការធ្វើធុរកិច្ចនៅកម្ពុជា និងបង្កើនភាពប្រកួតប្រជែងរបស់កម្ពុជាលើឆាកអន្តរជាតិ។
លោក គង់ ម៉ារី បញ្ជាក់ថា នៅឆ្នាំ ២០១៩ រាជរដ្ឋាភិបាលកម្ពុជា បានបង្កើតក្រុមការងារអន្តរក្រសួងរៀបចំការចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន និងបានដាក់ឱ្យដំណើរការប្រព័ន្ធចុះបញ្ជីតាមថ្នាលបច្ចេកវិទ្យាព័ត៌មាន (OBR) ដំណាក់កាលទី១ នៅឆ្នាំ ២០២០ ដោយផ្ដោតលើការចុះបញ្ជីអាជីវកម្មជាកញ្ចប់ និងគម្រោងវិនិយោគមានលក្ខណៈសម្បត្តិគ្រប់គ្រាន់ (QIP)។
លោកបន្ថែមថា ការអនុវត្តការចុះបញ្ជីរួមជាកញ្ចប់បានជួយសម្រួលដល់ធុរជនតាមរយៈការកាត់បន្ថយចំណាយថវិកាប្រមាណ ៤០ភាគរយ និងពេលវេលាមកត្រឹម ៨ ថ្ងៃ នៃថ្ងៃធ្វើការ។
បន្ទាប់ពីការអនុវត្តនូវដំណាក់កាលទី១ រាជរដ្ឋាភិបាលកម្ពុជា បានបន្តពង្រីកវិសាលភាពនៃ ថ្នាលនេះជាបន្តបន្ទាប់ក្នុងដំណាក់កាលទី២ និងទី៣ ដែលបានគ្របដណ្ដប់ដល់ការស្នើសុំអាជ្ញាបណ្ណ និងលិខិតអនុញ្ញាត និងវិញ្ញបនបត្រជំនាញតាមវិស័យ ផ្អែកតាមសកម្មភាពអាជីវកម្មរបស់សហគ្រាស ដែលមានការចូលរួមពីក្រសួងស្ថាប័នចំនួន ២១។
យោងតាម ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន (Single Portal) គិតចាប់ពីថ្ងៃទី១៥ ខែមិថុនា ឆ្នាំ២០២០(ចាប់ផ្តើមដំណើរការ) រហូតដល់ថ្ងៃទី ៣១ ធ្នូ ឆ្នាំ ២០២៤ ចំនួនក្រុមហ៊ុន/សហគ្រាស ដែលបានចុះបញ្ជីអាជីវកម្មតាមថ្នាល់បច្ចេកវិទ្យាព័ត៌មាន(Single Portal) មានចំនួនសរុប ៤២ ៣២៥ ជាមួយនឹងដើមទុនចុះបញ្ជីសរុបចំនួន ៦៤ ពាន់ពាន់លានរៀល ឬស្មើនឹង ១៥,៦ ពាន់លានដុល្លារ។ ក្នុងចំណោមក្រុមហ៊ុន/សហគ្រាសទាំង ៤២ ៣២៥ គឺមាន ៣៧ភាគរយ មានម្ចាស់ជាស្រ្តី៕
