នៅក្នុងគំនិតផ្តួចផ្តើមដ៏សំខាន់មួយ ក្នុងគោលបំណងគាំទ្រដល់ពលរដ្ឋខ្មែរដែលត្រៀមទៅរស់នៅ ធ្វើការ ឬសិក្សានៅប្រទេសកូរ៉េខាងត្បូង ធនាគារ PPCBank បានចាប់ដៃគូជាមួយក្រុមហ៊ុន LG U+ ដែលជាក្រុមហ៊ុនទូរគមនាគមន៍ដ៏ធំរបស់ប្រទេសកូរ៉េខាងត្បូង ដើម្បីផ្តល់កញ្ចប់អត្ថប្រយោជន៍ដ៏ទូលំទូលាយ ដែលរួមមានការផ្តល់ជូនស៊ីមកាតដោយឥតគិតថ្លៃ និងសេវាកម្មហិរញ្ញវត្ថុតាមតម្រូវការ។
ភាពជាដៃគូនេះ ឆ្លុះបញ្ចាំងពីការប្តេជ្ញាចិត្តរួមគ្នារបស់ស្ថាប័នទាំងពីរ ក្នុងការសម្រួលដល់ការផ្លាស់ទៅរស់នៅក្រៅប្រទេសរបស់ប្រជាជនកម្ពុជា តាមរយៈការផ្តល់ឥណទានត្រៀមបម្រុង និងមធ្យោបាយទំនាក់ទំនង។
អនុស្សរណៈនៃការយោគយល់គ្នានេះ (MoU) ត្រូវបានចុះហត្ថលេខានៅថ្ងៃទី២៤ ខែមេសា ដោយលោក Lee Jin Young នាយកប្រតិបត្តិធនាគារ PPCBank និងលោក Park Sung Soon នាយកគ្រប់គ្រងក្រុមហ៊ុន LG U+ នៅឯការិយាល័យកណ្តាលរបស់ធនាគារ PPCBank។
តាមរយៈភាពជាដៃគូនេះ ពលករ និងនិស្សិតកម្ពុជា ដែលធ្វើដំណើរទៅប្រទេសកូរ៉េខាងត្បូង អាចរក្សាទំនាក់ទំនងជាមួយក្រុមគ្រួសារ និងមនុស្សជាទីស្រលាញ់របស់ខ្លួនបានភ្លាមៗពេលទៅដល់ ដោយពួកគេនឹងទទួលបានស៊ីមកាត LG U+ ដោយឥតគិតថ្លៃ សម្រាប់ប្រើប្រាស់លើការហៅទូរស័ព្ទ និងការភ្ជាប់អ៊ីនធឺណិតបានយ៉ាងរលូន ដោយគ្មាននីតិវិធីចុះឈ្មោះស្មុគស្មាញ ឬការចំណាយខ្ពស់លើថ្លៃសេវារ៉ូមីង (roaming) ឡើយ។
បន្ថែមពីលើការគាំទ្រផ្នែកទូរគមនាគមន៍នេះ ធនាគារ PPCBank ក៏នឹងផ្តល់ជូននូវសេវាកម្មហិរញ្ញវត្ថុ ដែលសមស្របទៅនឹងតម្រូវការពិសេសរបស់ពលករ និងនិស្សិតកម្ពុជាទៅកាន់ប្រទេសកូរ៉េផងដែរ ក្នុងនោះរួមមាន ផលិតផលប្រាក់កម្ចី និងដំណោះស្រាយការផ្ទេរប្រាក់ឆ្លងប្រទេស ដែលត្រូវបានរចនាឡើង ដើម្បីឱ្យកាន់តែងាយស្រួលប្រើប្រាស់ និងផ្តល់ភាពបត់បែនកាន់តែច្រើន។
ជាផ្នែកមួយនៃគំនិតផ្តួចផ្តើមនេះ ធនាគារ PPCBank ក៏បានសម្រួលដល់ដំណើរការកម្មវិធីផ្តល់ប្រាក់កម្ចី តាមរយៈកម្មវិធីទូរស័ព្ទរបស់ខ្លួនសម្រាប់អតិថិជនជារូបវន្តបុគ្គល ដែលបានឆ្លងកាត់ការប្រឡងតេស្តសមត្ថភាពភាសាកូរ៉េ។ ប្រាក់កម្ចីទាំងនេះមកជាមួយអត្រាការប្រាក់ប្រកួតប្រជែង ក្នុងគោលបំណងកាត់បន្ថយឧបសគ្គនៃការទទួលបានសេវាហិរញ្ញវត្ថុ សម្រាប់អ្នកដែលកំពុងស្វែងរកឱកាសនៅក្រៅប្រទេស។
លើកឡើងពីភាពជាដៃគូនេះ លោក Lee Jin Young នាយកប្រតិបត្តិធនាគារ PPCBank បានមានប្រសាសន៍ថា ៖«ដោយឃើញថា ជារៀងរាល់ឆ្នាំមានប្រជាជនកម្ពុជារាប់ពាន់នាក់បានធ្វើដំណើរទៅកាន់ប្រទេសកូរ៉េខាងត្បូង យើងយល់ពីសារៈសំខាន់នៃការរក្សាទំនាក់ទំនង ហើយយើងក៏ទទួលស្គាល់បញ្ហាប្រឈមផ្នែកហិរញ្ញវត្ថុ ជាមួយការរស់នៅក្រៅប្រទេសផងដែរ។
ដូច្នេះ នេះហើយជាមូលហេតុដែលភាពជាដៃគូនេះ គឺមានលើសពីការផ្តល់សេវាទូរគមនាគមន៍។ វារួមបញ្ចូលគ្នានូវការតភ្ជាប់ទំនាក់ទំនងដែលមានតម្លៃសមរម្យ ជាមួយនឹងការផ្តល់សេវាកម្មហិរញ្ញវត្ថុ ដើម្បីជួយដល់ពលរដ្ឋខ្មែរ ក្នុងការកសាងអនាគតមួយប្រកបដោយសុវត្ថិភាព សម្រាប់ទាំងខ្លួនឯង និងក្រុមគ្រួសាររបស់ខ្លួន»។
លោកបានបន្ថែមថា ៖«អនុស្សរណៈនៃការយោគយល់គ្នានេះ បានបង្ហាញពីកម្រិតថ្មីមួយទៀតនៃកិច្ចសហប្រតិបត្តិការឆ្លងដែន និងការប្តេជ្ញាចិត្តរួមគ្នា ក្នុងការជួយប្រជាជនខ្មែរឱ្យរីកចម្រើន មិនថាពួកគេកំពុងបម្រើការងារ ឬកំពុងបន្តការសិក្សាថ្នាក់ឧត្តមសិក្សានៅប្រទេសកូរ៉េនោះទេ»។
លោក Park Sung Soon នាយកគ្រប់គ្រងក្រុមហ៊ុន LG U+ បានមានប្រសាសន៍ថា៖« បេសកកម្មរបស់យើង គឺជួយលើកកម្ពស់ដល់សហគមន៍ចម្រុះ តាមរយៈការផ្តល់ដំណោះស្រាយផ្នែកទំនាក់ទំនង ដែលមានភាពងាយស្រួល និងតម្លៃសមរម្យ។ ភាពជាដៃគូជាមួយធនាគារ PPCBank នេះ អនុញ្ញាតឱ្យយើងគាំទ្រដល់បុគ្គលម្នាក់ៗ តាំងពីដើមដំបូងនៃដំណើររបស់ពួកគេនៅក្នុងប្រទេសកូរ៉េខាងត្បូង»។
ការផ្តល់ស៊ីមកាតដោយឥតគិតថ្លៃនេះ នឹងត្រូវបានចែកជូនតាមរយៈសាខារបស់ធនាគារ PPCBank នៅទូទាំងប្រទេស ហើយនឹងត្រូវបានបើកឱ្យដំណើរការរួចរាល់ សម្រាប់ការប្រើប្រាស់បានភ្លាមៗ នៅពេលទៅដល់ប្រទេសកូរ៉េខាងត្បូង ដើម្បីអាចទំនាក់ទំនងជាមួយមនុស្សជាទីស្រលាញ់របស់ពួកគេនៅឯស្រុកកំណើត៕
